भजनमैं 9
9
परमेश्वरजी लबै औदिबै केमैंए बयन लब
क्वे प्रिंब्मैंए चिबए ल्हागिर दाऊदए भजन घ्रि। “च्ह सियाइ” बिबै भाकर प्रिंब।
1ओ याहवेह, खों न्होंउँइँलेन् ङ क्हिए मिं थेब् लब्मुँ;
क्हिजी लबै ताँन् औदिबै केमैंए बयन ङ लब्मुँ।
2ङ क्हिनेन् सैं तोंसि उफर्दिब्मुँ।
ओ ताँन् भन्दा थेबै परमेश्वर, ङ क्हिए मिंर्न क्वे प्रिंब्मुँ।
3क्हिलाइ म्रोंसि ङए शत्तुरमैं लिग्याँइ तोसि न्हेयामा
क्हिए उँइँर्न थुरसि नास तयाम्।
4तलेबिस्याँ राजगद्दिर क्हुँसि क्हिजी ठिक निसाफ लइमुँ
धै ङइ योंल् त्हुबै सैमैं ङलाइ पिंइमुँ।
5अरू ह्रेंमैंलाइ क्हिजी हौदिइमुँ; झाइले दुष्ट म्हिमैं नास लवाइमुँ;
क्हिजी चमैंए मिं क्ह्रन् म्हवाइमुँ।
6ङए शत्तुरमैंए फिर तोइ आचैन् लवाबै दुःख खइमुँ,
चमैं टिबै क्ल्ह्योमैं क्हिजी स्युवाइमुँ;
छतसि चमैंए मिं क्ह्रन् म्हयाइमुँ।
7दिलेया याहवेहजी खोंयोंन् बिलै ग्याल्स लमुँ;
खीजी निसाफ लबै ल्हागिर ह्रोंसए राजगद्दि बनेइमुँ।
8खीजी ह्युलर्बै म्हिमैंए फिर ठिक निसाफ लम्,
खीजी खाबलाज्यै या आफेलल्ले निसाफ लम्।
9आगुइ क्र ओलै आपिंब्मैंए ल्हागिर याहवेह किल्ला#9:9 किल्ला शत्तुरमैंइ स्याल् आखाँरिगे बिसि रक्षा योंबै ल्हागिर नुबर भोंन्ले बनेबै गारा धोंब ग। ग।
दुःख तमा ग्वार योंबै क्ल्ह्यो खीन् ग।
10क्हिलाइ ङो सेब्मैंइ क्हिए फिर्न भर लम्;
तलेबिस्याँ ओ याहवेह, क्हिलाइ म्हैब्मैंलाइ क्हिजी खोंयोंइ पिरिब् आरे।
11सियोनर#9:11 सियोन यरूशलेमर मुँबै कों टिबै याहवेहए ल्हागिर क्वे प्रिंन्!
खीजी लबै केमैं ह्रें-ह्रेंमैंए उँइँर बिमिंन्!
12तलेबिस्याँ याहवेहजी दुःख तब्मैं आम्ले,
चमैंइ ग्वार ह्रिमा खीजी थेम्,
धै चमैंलाइ दु:ख पिंब्मैंलाइ दण्डा पिंम्।
13ओ याहवेह, ङ फिर दयाम्हाँया लमिंन्!
ङ्ह्योत्ति, ङलाइ आखोब्मैंउँइँले ङइ बेल्ले दुःख योंल् त्हुइमुँ।
छतसि कालए सुँउँइँले ङलाइ जोगेमिंन्।
14यरूशलेमर्बै#9:14 यरूशलेमर्बै हिब्रू क्युइर, सियोनए च्हमिंए तगररि ङइ क्हिए मिं थेब लरिमा
क्हिजी ङलाइ जोगेमिंबइले ङ सैं तोंसि चर टिल् योंरिगे बिसि
ङ कालए सुँउँइँले फ्रेमिंन्।
15अरू ह्रेंमैं ह्रोंसइ ताबै होंल्दोंर खेंमैंन् पायाइमुँ,
चमैंइ लोसि चुबै ङोइ चमैं ह्रोंसन् स्याइमुँ।
16याहवेहजी ठिक निसाफ लम् बिब ताँनइ सेइमुँ,
दुष्टमैं बिस्याँ खेंमैंइ लबै केर खेंमैंन् फसेइमुँ। च्याँ तसि तिस्याँदे मैंन्#9:16 च्याँ तसि तिस्याँदे मैंन् हिब्रू क्युइर, हिग्गायोन सेला
17दुष्ट म्हिमैं नेरो परमेश्वर म्लेयाबै ताँन् ह्रेंमैं सिसि ह्याबै क्रोंर फेनेम्।
18दिलेया आयों आख्युब्मैं परमेश्वरजी खोंयोंइ म्लेरिब् आरे,
दुःख योंब्मैंए आशा खोंयोंइ म्हरिब् आरे।
19ओ याहवेह रेद्,
म्हिमैंइ ट्होल् आयोंरिगे,
ह्रें-ह्रेंमैंए निसाफ लमिंन्।
20ओ याहवेह, चमैं क्हिने ङ्हिंरिगे,
चमैंम् म्हि मत्त्रे ग बिसि अरू ह्रेंमैंइ सेरिगे। तिस्याँदे मैंन्
Currently Selected:
भजनमैं 9: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
