भजनमैं 25
25
क्हिए घ्याँर प्रबर लोमिंन्
दाऊदए भजन घ्रि।
1ओ याहवेह, ङए सैं क्हि ङाँइँन लमुँ।
2ओ ङए परमेश्वर, ङइ क्हिए फिर्न भर लइमुँ,
ङलाइ फा पिन् आलमिंन्,
ङए शत्तुरमैं ङए फिर ट्होगों तल् आपिंन्।
3क्हिए फिर भर थेंब्मैं खाबै या खोंयोंइ फा पिल् त्हुरिब् आरे,
दिलेया फाकर्न धोका पिंब्मैं फा पिल् त्हुब्मुँ।
4ओ याहवेह, ङलाइ क्हिए घ्याँ तेंमिंन्,
क्हिए घ्याँर प्रबर ङलाइ लोमिंन्।
5क्हिए क्ह्रोंसेंन्बै घ्याँर प्रबर ङलाइ लोमिंन्,
तलेबिस्याँ ङलाइ जोगेमिंबै परमेश्वर क्हिन् ग;
धै ङइ त्हिंतिमिंन् क्हिए फिर्न आशा लइमुँ।
6ओ याहवेह, स्योंम् ओंनोंन् ङए फिर
मुँबै क्हिए थेबै दयाम्हाँया मैंमिंन्!
7ओ याहवेह, ङए फ्रेंसिर्बै पापमैं नेरो ङइ लबै आछ्याँबै केमैं आमैंमिंन्;
क्हि खोंयोंन् बिलै म्हाँया लबै परमेश्वर ग, छतसि ङलाइ आम्लेमिंन्,
तलेबिस्याँ क्हिए सैं छ्याँब मुँ।
8याहवेहजी ठिक निसाफ लमुँ, खी स्वाब मुँ,
छतसि खीजी पापिमैंलाज्यै या ठिक घ्याँर प्रबर लोमिंम्।
9खीजी थेब् आप्हैंब्मैंलाइ ठिक घ्याँर डोरेमिंब्मुँ,
धै चमैंलाइ खीए घ्याँर प्रबर लोमिंब्मुँ।
10खीजी फैबै बाछाए ताँमैं ङिंब्मैंलाइ
याहवेहजी खोंयोंइ आनुबै म्हाँया लसि
भर पर्दिल् खाँन्ले डोरेम्।
11ओ याहवेह, ङइ आछ्याँबै केमैं ल्हें लइ।
ङलाइ क्षमा पिंन्, तलेबिस्याँ क्हि क्षमा पिंबै परमेश्वर ग।
12याहवेहलाइ मान लब्मैंइ खेंमैं खैले प्रल् त्हुम् बिबै ताँ
खीउँइँलेन् लोल् योंब्मुँ।
13चइ सुखर त्हिंइमैं थोब्मुँ,
धै चए सन्तानमैं ह्युलए फिर क्ल्हे तब्मुँ।
14याहवेहलाइ मान लब्मैंने बालु खी बेल्ले क्ह्रिबै थु तम्,
धै खीजी फैबै बाछाए ताँमैं चमैंलाइ सेल् पिंम्।
15ङए मिइ खोंयोंन् बिलै याहवेह ङाँइँन ङ्ह्योरिमुँ,
तलेबिस्याँ खीजीन् ङए प्हलेमैं ङोउँइँले जोगेमिंब्मुँ।
16ङ ङाँइ तोमिंन् धै ङए फिर दयाम्हाँया लमिंन्,
तलेबिस्याँ ङ घ्रिन् मुँ धै ङए फिर दुःख तइमुँ।
17ङए सैंर्बै दुःखमैं ल्हें ततै ह्याइमुँ;
क्हिजीन् चु दुःखउँइँले ङ फ्रेमिंन्।
18ङए दुःख नेरो पिरमैं क्हिजी बिचार लमिंन्,
धै ङए ताँन् पापमैं क्षमा लमिंन्।
19ङ्ह्योत्ति, ङए शत्तुरमैं कति ल्हें मुँ,
चमैंइ ङलाइ बेल्ले हेल् लम्।
20ङए रक्षा लमिंन् धै ङलाइ जोगेमिंन्!
ङ फा फिल् आत्हुरिगे, तलेबिस्याँ ङ क्हिए प्हलेर ग्वार योंबर खइमुँ।
21ङइ स्योर आतेइमुँ, ङइ लबै छ्याँब आछ्याँबै केमैं ताँन् ङइ क्हिनेन् बिइमुँ।
छतसि ङलाइ जोगेमिंन्, तलेबिस्याँ ङइ क्हिए फिर्न आशा थेंइमुँ।
22ओ परमेश्वर, क्हिजी त्हाँबै इस्राएललाइ दुःखउँइँले फ्रेमिंन्।
Currently Selected:
भजनमैं 25: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
