भजनमैं 119
119
क्हिए ताँ ङए प्हलेए ल्हागिर बत्ति ग
א अलेफ#119:1 चु भजनरि २२ भाग मुँ। हिब्रू क्युइर भाग ह्रोंसे ताँन् पद सिर्सकर मुँबै अक्षरउँइँलेन् सुरु लम्।
1छ्याब् आरेब्मैंइ आशिक योंम्;
चमैं याहवेहए ठिमर बिब् धोंले प्रम्।
2खीजी बिबै ताँमैं ङिंब्मैं,
नेरो सैं न्होंउँइँले खीलाइ म्हैब्मैंइ आशिक योंम्।
3चमैंइ आछ्याँबै केमैं आल,
दिलेया खीए घ्याँर प्रम्।
4ङिइ लल् त्हुबै के ताँन् छेनाले लरिगे बिसि
ङिइ लल् त्हुबै ताँमैं क्हिजी पिंथेंइमुँ।
5क्हिए निसाफमैं ङिंबै ल्हागिर
ङल आछ्याँबै घ्याँर प्रबै सैं आखस्याँ कति छ्याँब् तमल!
6झाइले क्हिए ताँन् ताँमैं च्हैंसि मैंसि लसि
ङ फापिल त्हुरिब आरे।
7क्हिए ठिक ठिममैं लोसि
ङए छ्याँबै सैंइ क्हिए मिं थेब् लब्मुँ।
8क्हिजी पिंबै ठिमर्बै ताँमैं ङिंस्यो;
ङलाइ खैंमैंइ आपिमिंन्।
ב बेथ
9फ्रेंसि म्हिइ आछ्याँबै केमैंउँइँले ह्रोंसलाइ खैले जोगेसि थेंल् खाँम्?
क्हिए ताँइ बिब् धोंले प्रसिन् ग।
10ङइ ह्रोंसए सैं न्होंउँइँलेन् क्हिलाइ म्हैमुँ;
क्हिए ताँमैं थोसि प्रबइले ङ जोगेमिंन्
11क्हिए बिरोधर ङइ पाप आलरिगे बिसि
क्हिजी बिबै ताँमैं ङए सैं न्होंर जोगेसि थेंइमुँ।
12ओ याहवेह, क्हिए मिं थेब् तरिगे!
क्हिए ठिममैं ङ लोमिंन्!
13क्हिए सुँउँइँले त्होंबै
ताँन् ठिममैंए बयन ङइ लमुँ।
14ल्हें सैन्होर योंबै म्हि सैं तोंब् धोंले
क्हिजी बिबै ताँमैं ङिंबर ङए सैं तोंम्।
15क्हिजी लद् बिबै ताँमैं ङइ सैंर मैंमुँ
धै क्हिजी लोमिंबै ताँमैं ङइ मैंरिइमुँ।
16क्हिजी पिंबै ठिममैंर ङए सैं तोंरिब्मुँ;
धै क्हिए ताँमैं ङ खोंयोंइ म्लेरिब् आरे।
ג गिमेल
17ङ ल्हें सोसि क्हिए ताँमैं ङिंरिगे बिसि
ह्रोंसए के लबै म्हिलाइ बिब् धों मैंब् धों लमिंनु।
18क्हिए ठिमर्बै आचम्बै ताँमैं ङइ म्रोंल् योंरिगे बिसि
ङए मि थोमिंनु।
19ङम् चु ह्युलर ङ्हिरोबै प्ह्रें ग;
क्हिए ताँमैं ङउँइँले आलोमिंन्!
20क्हिए ठिममैं क्होबर
ङए खों खोंयोंन् बिलै क्यु पिब् धोंन् तम्।
21थेब् प्हैंब्मैंलाइ क्हिजी हौदिमुँ। चमैं सरापए न्होंर मुँ,
क्हिजी तेंबै घ्याँर चमैं आप्र।
22क्हिजी बिबै ताँमैं ङइ ङिंइमुँ।
छतसि ङए अब्ब्रु वासि ङलाइ प्ह्रब्मैं ङ ङाँइँले स्योमिंन्।
23क्रथे मिंथेमैं खागु तसि ङए बिरोधर ताँ लम्,
दिलेया क्हिए के लबै म्हिइ क्हिए निसाफमैं छेनाले मैंब्मुँ।
24क्हिजी बिबै ताँमैंइ ङए सैं तोंन् लइमुँ;
च ताँमैंइन ङलाइ छेनाले लोदा सैंदा लम्।
ד दालेथ
25ङ त्हुलर्न सिबि छेइमुँ,
छतसि क्हिजी बिब् धोंलेन् ङए रक्षा लमिंन्!
26ङए बानि ब्योर खै तब् मुँ बिसि ङइ क्हिने बिमा क्हिजी ङ जवाफ पिंइ;
क्हिजी पिंबै ठिममैं ङलाइ लोमिंन्!
27क्हिजी ल्हैदिबै केमैं छेनाले क्होल् खाँरिगे बिसि
क्हिजी लबै औदिबै केमैं ङइ मैंरिम्।
28शोकइ लमा ङ तोइ लल् आखाँब् तइमुँ;
छतसि क्हिए ताँइ बिब् धोंले ङ भोंब् लमिंन्!
29आछ्याँबै घ्याँमैंउँइँले ङलाइ स्यो लसि थेंन्;
धै ङए फिर दयाम्हाँया लसि क्हिए ठिमर्बै ताँमैं ङ लोमिंन्!
30ङइ क्ह्रोंसेन्बै घ्याँ त्हाँइमुँ;
क्हिए निसाफमैं ङइ ङए ओंसों थेंइमुँ।
31ओ याहवेह, क्हिजी बिबै ताँमैं ङइ ङिंइमुँ।
ङ फाफिल् लल् आपिंन्!
32क्हिजी बिबै घ्याँर ङ प्रइमुँ,
तलेबिस्याँ क्हिजी ङए खों खाँसों ङ्हाँन् लमिंइमुँ!
ה हे
33ओ याहवेह, क्हिए निसाफमैंइ बिब् धोंलेन् प्रब ङलाइ लोमिंन्;
धै चमैंइ बिब् ङिंसि ङ लिउँइँ समा प्ररिगे।
34ङलाइ क्होल् खाँबै शक्ति पिंन्, धै ङइ क्हिए ठिमर्बै ताँमैं म्हाँदिब्मुँ;
धै ङए खों न्होंउँइँलेन् ङ ङिंब्मुँ।
35क्हिजी ल्हैदिबै के छेनाले लल् खाँबै म्हि ङलाइ तल् पिंनु,
तलेबिस्याँ च केर्न ङए सैं तोंम्।
36ङए सैंर तोइ सैलैया लोब् आखरिगे बिसि
ङए सैंर क्हिए बिबै ताँमैं थेंमिंन्।
37ङए मिइ केर आफेबै सैमैं ङ्ह्योल् आपिंन्;
क्हिए ताँइ बिब् धोंलेन् ङए रक्षा लमिंन्।
38क्हिलाइ मान लबै म्हिमैंने क्हिजी बाछा फैइमुँ;
क्हिए के लबै म्हिए ल्हागिर च बाछा पूरा लमिंन्।
39क्हिए ठिममैं छ्याँब मुँ,
दिलेया च ठिममैं म्हाँदिबइले म्हिमैंइ ङलाइ प्ह्रम्।
ङ फा पिल त्हुलै बिसि ङ ङ्हिंम्। छतसि ङलाइ प्ह्रबै म्हिमैं ङउँइँले स्योमिंन्!
40क्हिजी ल्हैदिबै केमैं ताँन् ङइ लइमुँ!
छतसि ठिक निसाफ लसि ङलाइ जोगेमिंन्!
ו वाव
41ओ याहवेह, क्हिए खोंयोंइ आनुबै म्हाँया ङइ योंरिगे,
क्हिजी बाछा फैसि पिंम् बिबै मुक्ति ङए ङाँर खरिगे;
42छतस्याँ ङलाइ प्ह्रब्मैंलाज्यै या ङइ बिल् योंब्मुँ,
तलेबिस्याँ क्हिजी बिबै ताँर ङइ भर थेंइमुँ।
43खोंयोंन् बिलै ङइ क्हिए क्ह्रोंसेंन्बै ताँमैं पोंल् खाँरिगे;
तलेबिस्याँ क्हिए निसाफमैंर ङइ आशा थेंइमुँ।
44क्हिए ठिमर्बै ताँमैं
ङइ खोंयोंन् बिलै म्हाँदिब्मुँ।
45ङ खाँसो ङ्हाँन्ले प्रब्मुँ,
तलेबिस्याँ क्हिजी ल्हैदिबै केमैं लबै भों ङइ लइमुँ।
46म्रुँमैंए उँइँर क्हिजी बिबै ताँमैंए बारेर ङ पोंब्मुँ,
धै ङ फापिल् त्हुरिब् आरे।
47क्हिजी ल्हैदिबै केमैं लमा ङए सैं तोंम्,
तलेबिस्याँ क्हिजी बिबै ताँमैं ङइ खोम्।
48क्हिजी बिबै ताँमैं ङइ खोसि म्हाँदिम,
धै क्हिए निसाफैंन् ङइ मैंरिम्।
ז जाइन
49ह्रोंसए के लबै म्हिने फैबै बाछा मैंमिंन्,
तलेबिस्याँ चउँइँले क्हिजी ङलाइ आशा पिंइमुँ।
50ङए फिर दुःख तमा क्हिजी फैबै बाछाइन ङए सैं क्होमिंइमुँ,
च बाछाइन ङ जोगेमिंइमुँ।
51तोंन् तोर्न थेब् प्हैंब्मैंइ ङलाइ प्ह्रसि निस्योइमुँ,
दिलेया क्हिए ठिमउँइँले ङ ह्रेंगो आतइमुँ।
52क्हिजी स्योंम् ओंनों लबै निसाफमैं ङइ मैंरिइमुँ।
छतसि ओ याहवेह, चमैंइन ङए सैं क्होमिंइमुँ।
53क्हिए ठिमर्बै ताँमैंइ बिब् धों आलबै दुष्टमैं म्रोंसि
ङ बेल्ले ह्रिस खइमुँ।
54ङ खनिर टिलैया
क्हिए निसाफमैंए बारेर ङइ भजन प्रिंरिम्।
55ओ याहवेह म्हुँसरैया ङ क्हिलाइन मैंरिमुँ,
धै क्हिए ठिमइ बिब् धोंलेन् ङइ लरिम्।
56ङ खोंयोंन् बिलै
क्हिजी ल्हैदिबै केमैं ङइ लरिइमुँ।
ח हेथ
57ओ याहवेह, ङए चैदिबै सै क्हिन् ग!
क्हिए ताँमैं ङिंम् बिसि ङइ बाछा फैइमुँ।
58ङए खों न्होंउँइँलेन् क्हिलाइ म्हैइमुँ;
क्हिजी फैबै बाछा मैंसि ङए फिर दयाम्हाँया लमिंन्।
59ङए बानि ब्योर ङइ च्हैंब् मैंब् लइमुँ,
धै क्हिए ताँइ बिब् धोंबै घ्याँर ङइ प्रबै भों लइमुँ।
60क्हैल् आलल्ले
युन्ले क्हिजी ल्हैदिबै के लबै सैं ङल् मुँ।
61दुष्ट म्हिमैंइ ङलाइ छोइ फैथेंलैया
क्हिए ठिमर्बै ताँमैं ङ म्लेरिब् आरे।
62क्हिजी लबै ठिक निसाफमैंए ल्हागिर
म्हुँइँस आधरैया क्हिलाइ धन्यबाद पिंबर ङ रेम्।
63क्हिने ताँन् ङ्हिंब्मैंए थु ङ ग;
ओं, क्हिजी ल्हैदिबै के ताँन् लब्मैंए थु ङ ग।
64ओ याहवेह, क्हिए खोंयोंइ आनुबै म्हाँयाजी पृथ्बी प्लिंइमुँ;
क्हिए निसाफमैं ङलाइ लोमिंन्!
ט टेथ
65ओ याहवेह, क्हिजी ताँ बिब् धोंलेन्
क्हिए के लबै म्हिलाइ बिब् धों मैंब् धों लमिंन्।
66क्हिए ताँमैं ङइ क्वेंइमुँ;
छतसि ज्ञान बुद्धिए छ्याँब ताँमैं ङलाइ लोमिंन्।
67ङए फिर दुःख खब् भन्दा ओंसों ङ घ्याँ फ्लेसि प्ररिल,
दिलेया तारेम् क्हिजी बिबै ताँमैं ङिंसि ङ प्रब्मुँ।
68क्हि स्वाब मुँ, क्हिजी छ्याँबै के लम्;
क्हिए निसाफइ बिब् धोंले प्रब ङलाइ लोमिंन्।
69थेब् प्हेंब्मैंइ ङए बिरोधर स्योलिबै ताँमैं ललैया,
क्हिजी ल्हैदिबै केमैं ङइ ताँन् खोंउँइँले लम्;
70चमैंए खों सारो मुँ, चमैंइ खाबलाज्यै या दयाम्हाँया आल।#119:70 हिब्रू क्युइर, चमैंए खों छोबै छि धों तइमुँ
दिलेया ङए सैं बिस्याँ क्हिए ठिमर्बै ताँमैंर्न तोंरिम्।
71ङए फिर दुःखमैं तखब छ्याँबन् तइ,
तलेबिस्याँ क्हिए निसाफमैं ङइ क्होल् योंइ।
72मारा नेरो चाँदिए हजार टुक्र भन्दै या
क्हिए सुँउँइँले त्होंबै ठिम ङए ल्हागिर बेल्ले छ्याँब मुँ।
י योध
73क्हिए योजीन् ङ बनेइ;
क्हिए ताँमैं लोबर ङलाइ क्होबै शक्ति पिंन्।
74क्हिजी बिबै ताँर ङइ आशा थेंइमुँ;
छतसि क्हिलाइ मान लब्मैं ङलाइ म्रोंसि सैं तोंरिगे!
75ओ याहवेह, क्हिजी लबै निसाफमैं ठिक मुँ।
तले ङलाइ दुःख पिंइ बिस्याँ
क्हि भर लल् खाँब मुँ बिसि ङइ सेइमुँ।
76ङ क्हिए के लबै म्हिने क्हिजी फैबै बाछाउँइँले
क्हिए खोंयोंइ आनुबै म्हाँयार ङए सैं क्होमिंन्।
77क्हिए ठिमर्बै ताँमैंइन ङए सैं तोंन् लमिंम्;
छतसि ङ सोरिगे बिसि क्हिए ल्हयो ङए फिर थेंमिन्।
78थेब् प्हैंब्मैं फा पिन् तरिगे
तलेबिस्याँ चमैंइ तोन् तोर्न ङए न्होह्रों लम्;
दिलेया ङ बिस्याँ क्हिजी ल्हैदिबै केमैं मैंरिब्मुँ।
79क्हिलाइ मान लब्मैं ङउँइँ तोरिगे;
ओं, क्हिजी बिबै ताँमैं क्होब्मैं ङउँइँ तोरिगे।
80ङ फापिल् आत्हुबै ल्हागिर
क्हिए निसाफमैंइ बिब् धोंले ङए खों छ्याब मुँब आतरिगे।
כ काफ
81क्हिजी खोंयों जोगेमिंब् ङ्हे बिसि क्हिए घ्याँ ङ्ह्योन-ङ्ह्योन् ङ नारल् खाँइ।
दिलेया क्हिजी फैबै बाछार ङइ आशा थेंइमुँ।
82क्हिजी फैबै बाछाए ताँ मैंन-मैंन् ङए मि छेन्ले आम्रोंब् तल् खाँइमुँ;
“खोंयों क्हिजी ङए सैं क्होमिंमुँ?”
83केर आफेबै च्युँयाबै छाकल धोंन् ङ तयाइमुँ,
दिलेया क्हिए निसाफमैं ङइ आम्लेइमुँ।
84ङइ अझै खोंयों समा प्रेंल् त्हुब् जा?
ङए न्होह्रों लब्मैंलाइ क्हिजी खोंयों दण्ड पिम्?
85क्हिए ठिमर्बै ताँ आङिंसि
थेब् प्हैंब्मैंइ ङ पायारिगे बिसि होंल्दो ताइमुँ।
86क्हिए ताँन् ताँमैं भर लल् खाँब मुँ;
छतसि ङ ल्होमिंन्, तलेबिस्याँ म्हिमैंइ तोन् तोर्न ङलाइ ह्रुगुदिइमुँ!
87चमैंइ ङ धन्दै सैवाब,
दिलेया क्हिजी ल्हैदिबै केमैं ङइ लसिन् मुँ।
88क्हिए खोंयोंइ आनुबै म्हाँयाइ ङए फिर रक्षा लमिंन्,
तलेबिस्याँ क्हिए सुँउँइँले त्होंबै ताँमैंइ बिब् धों ङइ लब्मुँ।
ל लामेध
89ओ याहवेह, क्हिजी बिबै ताँ खोंयोंन् बिलै तरिम्;
सवर्गर च भोंले थेंइमुँ।
90क्हिजी पोंबै ताँमैं पुस्ता-पुस्ता समान् तरिम्;
पृथ्बी क्हिजीन् छेनाले बनेइ, छतसि च खोंयोंन् बिलै तरिम्।
91क्हिए निसाफमैंइ तो-तो बिइमुँ तिंयाँ समन् छान् तरिइमुँ,
तलेबिस्याँ क्हिए ताँ तोंन्दोरिइ म्हाँदिल् त्हुम्।
92क्हिए ठिमर्बै ताँमैंइ ङए सैं तोंल् आलस्याँ,
ङए दुःखइ लमा ङ सियामल।
93क्हिजी लोदा सैंदा लबै ताँमैं ङ खोंयोंइ म्लेरिब् आरे,
तलेबिस्याँ चमैंउँइँलेन् ङ सोरिल् योंइमुँ।
94क्हिजी ल्हैदिबै केमैं ङइ लसिन् मुँ;
ङ जोगेमिंनु तलेबिस्याँ ङ क्हिलन् ग।
95ङलाइ सैब् बिसि दुष्ट म्हिमैं ह्रेसि टिइमुँ,
दिलेया ङए सैंइ क्हिजी बिबै ताँमैंन् मैंरिम्।
96तो सैन् मुँलेया तिस्याँ मत्त्रे ग बिब ङइ सेइमुँ,
दिलेया क्हिए ताँमैं बिस्याँ खोंयोंन् बिलै तरिम्।
ם मेम
97क्हिए ठिम ङइ बेल्ले खोम्!
त्हिंतिमिन् ङ चन् मैंरिम्।
98क्हिए ताँमैं खोंयोंन् बिलै ङए सैंर थेंइमुँ,
च ताँमैंइन ङए शत्तुरमैं भन्दा ङ बुद्धि मुँब लमिंम्।
99ङलाइ लोमिंब्मैंइ भन्दा ङइ ल्हें क्होइमुँ,
तलेबिस्याँ क्हिजी बिबै ताँमैं ङए सैंर मैंरिमुँ।
100चिब्मैंइ भन्दा ङइ ल्हें च्हैंब् मैंब् लल् खाँम्;
तलेबिस्याँ क्हिजी ल्हैदिबै केमैं ङइ लम्।
101क्हिजी बिब् धोंबै केमैं लल् खाँरिगे बिसि
ङइ आछ्याँबै के लबै घ्याँर प्रब पिवाइमुँ।
102क्हिए निसाफमैंइ बिब् धोंलेन् ङ प्ररिइमुँ,
तलेबिस्याँ छले प्रबर क्हिजीन् ङ लोमिंइमुँ।
103क्हिजी फैबै बाछा ङए लेर बेल्ले लिंब तइमुँ,
क्वे खुदु भन्दै या ङए सुँर च बेल्ले लिंइमुँ।
104क्हिजी ल्हैदिबै केमैंउँइँलेन् ङइ च्हैब् मैंब् लल् खाँबै शक्ति योंइमुँ;
छतसि ताँन् आछ्याँबै के लबै घ्याँमैं ङइ पिवाल् खाँइमुँ।
נ नुन
105क्हिए ताँ ङए प्हलेमैंए ल्हागिर बत्ति ग,
धै ङ प्रल् त्हुबै घ्याँर ङलाइ डोरेबै ह्वे ग।
106क्हिए ठिक निसाफमैंइ बिब् धोंबै के लब्मुँ बिसि
ङइ कसम चइमुँ।
107ङइ बेल्ले दुःख योंइमुँ;
ओ याहवेह, क्हिजी बिब् धोंलेन् ङलाइ जोगेमिंन्!
108ओ याहवेह, ङइ क्हिए मिं क्वेमा क्हि सैं तोंमिंन्।
धै क्हिए निसाफमैं ङलाइ लोमिंन्।
109ङ कालए सुँर्न फेल् त्हुलैया
क्हिए ठिमर्बै ताँमैं ङइ म्लेरिब् आरे।
110दुष्ट म्हिमैंइ ङए ल्हागिर ङो चुइमुँ,
दिलेया क्हिजी ल्हैदिबै केमैं ङइ लइन मुँ।
111क्हिजी बिबै ताँमैं ङए ल्हागिर मारा मुइ भन्दा थेब मुँ,
च ताँमैंइ खोंयोंइ बिलै ङए सैं तोंन् लम्।
112ङ आसिन् समा क्हिए निसाफमैं म्हाँदिब्मुँ बिसि
ङइ सैं लइमुँ।
ס समेख
113सैं ङ्हिरि तबै म्हिमैं ङइ आखो,
दिलेया क्हिए ठिम ङइ खोम्।
114क्हि ङए लोबै क्ल्ह्यो नेरो ढाल ग;
क्हिए ताँर ङइ भर थेंइमुँ।
115ङए परमेश्वरए ताँमैं ङइ छेनाले ङिंरिगे बिसि,
ओ दुष्ट के लब्मैं, ङउँइँले ह्रेंगो तह्याद्।
116ङ सोरिबै ल्हागिर क्हिजी फैबै बाछा अनुसार ङलाइ भोंब लमिंन्।
ङइ थेंबै आशा फुल् आपिंन्।
117ङ सोल् योंरिगे ङलाइ जोगेमिंन्;
धै क्हिए निसाफमैं खोंयोंन् बिले ङइ छेनाले म्हाँदिब्मुँ!
118क्हिए निसाफमैं आङिंब्मैं क्हिजी भ्योंवाम्,
तलेबिस्याँ चमैंइ पोंबै स्योलिबै ताँमैं केर आफे।
119पृथ्बीर्बै ताँन् दुष्ट म्हिमैंलाइ क्हिजी कसिं भ्योंब् धोंले भ्योंवाम्,
छतसि क्हिजी बिबै ताँमैं ङइ बेल्ले खोम्।
120क्हिने ङ्हिंसि ङ त्हाररिमुँ,
धै क्हिए निसाफमैं म्रोंसि ङ ङ्हिंइमुँ।
ע ऐयिन
121ङइ क्ह्रोंसेंन्बै ठिक केमैं लसि प्रइमुँ;
छतसि दुःख पिंब्मैंए योर ङलाइ आवाथेंन्।
122ह्रोंसए के लबै म्हिलाइ छ्याँबै के लमिंबै जिम्मा किंन्;
थेब् पैंब्मैंइ ङलाइ खैच्हिजी लल् आयोंरिगे।
123क्हिजी खोंयों जोगेमिंब् ङ्हे?
धै क्हिजी फैबै क्ह्रोंसेंन्बै बाछा खोंयों पिंब् ङ्हे? बिसि ङए मि छेन्ले आम्रोंब् तल् खाँइमुँ;
124क्हिए खोंयोंइ आनुबै म्हाँयार ह्रोंसए के लबै म्हिए फिर ल्हयो लमिंन्,
धै क्हिए निसाफमैं ङलाइ लोमिंन्।
125ङ क्हिए के लबै म्हि ग! छतसि क्हिजी बिबै ताँमैं क्होल् खाँरिगे बिसि
ङलाइ च्हैंब् मैंब् लल् पिंन्!
126ओ याहवेह, म्हिमैंइ क्हिए ठिमए बिरोध लइमुँ!
चमैंलाइ तो लल् त्हुब् जा क्हिजीन् लद्।
127मारा मुइ भन्दा, बेल्ले छ्याँबै मारा भनदै या,
क्हिए ताँमैंन् ङइ खोम्,
128धै क्हिजी लद् बिबै ताँन् केमैं ङइ लइमुँ;
आछ्याँबै के लबै ताँन् घ्याँ ङइ आखो।
פ पे
129क्हिजी बिबै ताँमैं औदिबै मुँ;
छतसि सैं न्होंउँइँलेन् ङइ चमैं ङिंइमुँ।
130क्हिए ताँए अर्थ खोल्दिमिंमा ज्ञान बुद्धि योंमुँ,
धै आह्र आसेब्मैं या ह्रब् सेब् तम्।
131क्हिए ताँमैं ङइ छेनाले क्होदा ङ्हाँसि
ङ क्यु पिब् धोंले सो हेंम्।
132क्हिए मिं म्हाँया लब्मैंए फिर क्हिजी ल्हयो लब् धोंले
ङए फिर दयाम्हाँया लसि ङ ङाँइ तोमिंन्।
133क्हिजी फैबै बाछाइ बिब् धोंलेन् ङलाइ ठिक घ्याँर डोरेमिंन्,
तोइ सैज्यै या ङलाइ पापर च्होवाल् आखाँरिगे।
134क्हिजी ल्हैदिबै केमैं लल् खाँबै ल्हागिर
ङलाइ दु:ख पिंब्मैंउँइँले ङ जोगेमिंन्।
135क्हिए के लबै म्हिलाइ छ्याँब लमिंन्;
धै क्हिए निसाफमैं ङलाइ लोमिंन्।
136म्हिमैंइ क्हिए ठिम आङिंब् म्रोंमा
ङए सैं नसि मिग्लि युम्।
צ साधे
137ओ याहवेह, क्हिजी ठिक के लमुँ,
धै क्हिए निसाफमैं ठिक मुँ।
138क्हिजी बिबै ताँमैं ठिक मुँ,
धै क्ह्रोंसेंन्बै भर लल् खाँबै ताँमैं मुँ।
139ङए शत्तुरमैंइ क्हिए ताँमैंलाइ तो धोंइ आङ्हाँब् म्रोंसि
ङ बेल्ले त्होंदो रासि मिइ धोंले ङलाइ ख्रोंइमुँ।
140क्हिजी फैबै बाछार्बै ताँमैं जाँच लसि पक्का मुँ,
छतसि क्हिए के लबै म्हिइ च ताँ बेल्ले खोम्।
141ङ तोंन् तोर्बै मुँ बिसि म्हिमैंइ म्हि आच्हि,
दिलेया क्हिजी ल्हैदिबै केमैं ङइ आम्ले।
142क्हिजी लबै ठिक केमैं खोंयोंन् बिलै तरिमुँ,
धै क्हिए ठिमर क्ह्रोंसेंन्बै ताँमैं मुँ।
143ङए फिर थेबै दुःख तइमुँ,
दिलेया क्हिए ताँमैंइ ङए सैं तोंल् लइमुँ।
144क्हिजी बिबै ताँमैं खोंयोंन् बिलै ठिक मुँ!
ङ सोरिगे बिसि च ताँमैं क्होबै शक्ति पिंन्।
ק कोफ
145ओ याहवेह, ङए सैं न्होंउँइँलेन् ङइ क्हिने ग्वार हिमा ङ जवाफ पिंन्,
धै क्हिए निसाफमैं ङइ म्हाँदिब्मुँ।
146ङइ क्हिने ग्वार ह्रिमा ङ जोगेमिंन्,
झाइले क्हिजी बिबै ताँमैं अनुसार ङ प्रब्मुँ।
147त्हिंइ प्योब् भन्दा ओंसों रेसि ङ क्हिने ग्वार ह्रिमुँ;
ङइ क्हिए ताँए फिर आशा थेंइमुँ।
148क्हिजी फैबै बाछाए ताँमैं मैंबै ल्हागिर
म्हुँइँस तिरो ङ न्हरु आख।
149ओ याहवेह, क्हिजी खोंयोंन् बिलै ङने म्हाँया लमुँ;
छतसि ङए ताँ थेमिंनु, क्हिए निसाफमैं अनुसार ङलाइ जोगेमिंन्।
150आछ्याँबै के लप्रबै दुष्ट म्हिमैं ङए ङाँर खसिन् मुँ,
क्हिए ठिमर्बै ताँमैं चमैंइ तिफुँइ आम्हाँदि!
151दिलेया ओ याहवेह, क्हि ङए ङाँर्न मुँ,
धै क्हिए ताँन् ताँमैं क्ह्रोंसेंन्बै मुँ।
152खोंयोंन् बिलै तरिगे बिसि क्हिजी क्हिए ताँमैं प्ह्रिथेंइ बिसि
ङइ च ताँमैंउँइँले ओंसों ओंनोंन् लोइ।
ר रेश
153क्हिए ठिम ङइ आम्लेइमुँ,
छतसि ङए दुःख ङ्ह्योमिंसि ङ फ्रेमिंन्।
154ङए ख लसि ङए ल्हागिर पोंमिंन्, धै चु दु:खउँइँले ङ फ्रेमिंन्;
क्हिजी फैबै बाछा अनुसार ङलाइ जोगेमिंन्!
155दुष्टमैंइ मुक्ति योंरिब् आरे,
तलेबिस्याँ क्हिए निसाफमैं चमैंइ आम्हाँदि।
156ओ याहवेह, क्हिजी ङए फिर बेल्ले ल्हयो खमुँ;
क्हिए निसाफमैंइ बिब् धोंलेन् ङए रक्षा लमिंन्।
157ङलाइ ह्रुगुदिबै शत्तुरमैं ल्हें मुँ,
दिलेया क्हिजी तामैं बिब् धोंलेन् प्ररिब ङ आपिइमुँ।
158धोका पिंबै म्हिमैं ङइ तिफुँइ आखो;
तलेबिस्याँ क्हिजी बिबै ताँमैं चमैंइ आङिं।
159ङ्ह्योत्ति, क्हिजी चु के लद् बिबै ताँमैं ङइ कति म्हाँया लइमुँ!
छतसि ओ याहवेह, क्हिए खोंयोंइ आनुबै म्हाँयाजी ङलाइ रक्षा लमिंन्।
160क्हिजी पोंबै ताँन् ताँमैं क्ह्रोंसेंन्बै मुँ,
क्हिए ताँन् ठिक निसाफमैं खोंयोंन् बिलै तरिम्।
ש शिन
161क्रथे मिंथेमैंइ तोन्-तोर्न ङलाइ ह्रुगुदिम्,
दिलेया ङए सैं क्हिए ताँर्न तरिम्।
162लुडिसि पखबै सै न्होर योंबै म्हि सैं तोंब् धोंले
क्हिजी फैबै बाछए ताँर ङ सैं तोंम्।
163स्योलिबै ताँमैंर ङ धोंइ आङ्हाँ, छाबै ताँमैं ङइ आखो,
दिलेया क्हिए ठिम ङइ खोम्।
164क्हिए ठिक निसाफमैंए ल्हागिर
तिंगैंर्न ङइ ङिखे समा क्हिए मिं थेब् लम्।
165क्हिए ठिमइ खोब्मैंइ तो सैरै या न्हुँ लल् आत्हु;
तो सैज्यै या चमैंलाइ ट्होल् आखाँ।
166ओ याहवेह, क्हिजी जोगेमिंब्मुँ बिसि ङइ ह्रेरिइमुँ;
धै क्हिए ताँमैं अनुसार ङ प्ररिइमुँ।
167क्हिजी बिबै ताँमैं ङइ ङिंरिइमुँ;
तलेबिस्याँ च ताँमैं ङइ बेल्ले खोम्।
168क्हिजी ल्हैदिबै केमैं ङइ लमुँ, धै क्हिजी बिबै ताँमैं ङइ ङिंम्;
तलेबिस्याँ ङए ताँन् बानि ब्योर क्हिजी सेइमुँ।
ת ताव
169ओ याहवेह, ङइ ग्वार ह्रिमा क्हिजी थेमिंनु;
क्हिए ताँइ बिब् धोंले ङलाइ क्होबै शक्ति पिंन्!
170ङइ यो छ्युँ लमा क्हिजी थेमिंनु;
क्हिजी फैबै बाछा अनुसार ङलाइ फ्रेमिंन्।
171क्हिए निसाफमैं ङलाइ क्हिजी लोमिंम्;
छतसि ङए सुँउँइँले खोंयोंन् बिलै क्हिए मिं क्वेबै ताँमैं त्होंरिगे।
172क्हिए ताँमैं ताँन् ठिक मुँ;
छतसि ङए सुँइ क्हिए बाछाए छ्याँबै बयन प्रिंरिगे।
173क्हिजी ल्हैदिबै केमैं ङइ लइमुँ;
छतसि क्हिए योजी खोंयोंन् बिलै ङलाइ ल्होमिंरिगे।
174ओ याहवेह, ङइ क्हिए मुक्तिर आशा थेंइमुँ,
धै क्हिए ठिमइ ङए सैं तोंल् लम्।
175क्हिए मिं क्वेबै ल्हागिर ङ सोल् योंरिगे,
धै क्हिए निसाफमैंइ ङलाइ ल्होरिगे।
176म्हयाबै क्यु धों ङ तप्ररिइमुँ;
ह्रोंसए केब्छैंलाइ म्हैदु,
तलेबिस्याँ क्हिए ताँमैं ङइ आम्लेइमुँ।
Currently Selected:
भजनमैं 119: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
