भजनमैं 109
109
ओ ङए याहवेह परमेश्वर, ङलाइ ल्होमिंन्!
क्वे प्रिंब्मैंए चिबए ल्हागिर दाऊदए भजन घ्रि।
1ओ परमेश्वर, ङ क्हिए मिं क्वेब्मुँ, आपोंन्ले आटिमिंन्!
2तलेबिस्याँ आछ्याँबै के लब्मैं नेरो स्योलिबै ताँ पोंब्मैं ङए बिरोधर पोंइमुँ,
धै चमैंइ स्योर तेबै लेइ ङए बिरोधर पोंइमुँ।
3चमैंइ ङने छेरन् ङ्हाँबै ताँमैं पोंइमुँ,
धै तोन् तोर्न चमैं ङए फिर ह्वाखम्।
4ङइ चमैंए फिर म्हाँया ललेया चमैंइ ङलाइ छ्याब् ल्हैदिम्,
दिलेया ङ बिस्याँ चमैंए ल्हागिर प्राथना लरिम्।
5चमैंलाइ छ्याँन् ललेया चमैंइ ङए न्होह्रों लम्,
धै ङइ म्हाँया ललेया चमैंइ ङलाइ हेल लम्।
6छतसि ङए शत्तुरए बिरोध लबै ल्हागिर दुष्ट म्हि घ्रि त्हाँन्;
धै चए फिर छ्याब् ल्हैदिबै म्हि चए क्योलोउँइँ राल् पिंन्।
7चए निसाफ तमा च छ्याब् मुँब ठर्दिरिगे;
धै चइ प्राथान लमा चलाइन दण्ड योंरिगे!
8चए छ्ह रिंठि तरिगे;
धै चए पद आगुइ प्हेंवारिगे!#चिब्मैं १:२०
9चए प्हसेमैं आबा आरेब्मैं तरिगे
धै चए प्ह्रेंस्यो म्हरेस्यो तरिगे!
10चए प्हसेमैं आगुने ह्रिसि चल् त्हुरिगे,
चमैं टिबै फुयाबै धिंउँइँले त्होंसि चबै सैमैं म्हैल् त्हुरिगे!
11चने मुँबै ताँन् सै न्होर साउइ किंवारिगे;
धै चइ दुःख लसि रोबै रोमैं स्याँमैंइ लुडिरिगे!
12चए फिर म्हाँया लब्मैं खाबै आतरिगे,
धै चए आबा आरेबै प्हसेमैंए फिर ल्हयो खब्मैं या खाबै आतरिगे!
13चए सन्तानमैं ताँन् नास तयारिगे;
धै लिउँइँ खबै पुस्तार चए मिं क्ह्रन् म्हयारिगे!
14चए खेबाज्युइ लबै आछ्याँबै केमैं याहवेहजी मैंरिगे,
धै चए आमाइ लबै पाप खोंयोंइ आमेटिरिगे!
15चमैंइ लबै पाप खोंयोंइन याहवेहए उँइँर तरिगे,
धै खीजी चमैंए मिं पृथ्बीउँइँले मेटिवारिगे!
16तलेबिस्याँ आगुए फिर म्हाँया लम् बिसि चइ खोंयोंइ आमैं,
दिलेया दु:ख योंब्मैं नेरो आयों-आख्युब्मैंलाइ चइ ह्रुगिदिइ,
धै सैं चोयाब्मैंलाइ सैयाइ।
17चइ खैले आगुए फिर सराप झोंइ, छलेन चए फिर सराप ल्हैदिरिगे;
चइ आगुए फिर आशिक पिंब आखोमल, छतसि चइ आशिक आयोंरिगे!
18क्वें खिब् धोंले चइ सराप लब खिइमुँ;
चए फोर क्यु धोंले सरापइ प्लिंइ,
धै छ्युगु धोंले चए ह्रिबर सराप होंइ!
19चए ल्हागिर सराप क्वें धोंन् तरिगे,
धै चए क्रेर सराप खोंयोंइ खिरिबै फगि धोंन् तरिगे!
20ङए फिर छ्याब् ल्हैदिब्मैं नेरो ङए बिरोधर आछ्याँबै ताँ पोंब्मैंलाइ
याहवेहजी छाबन् इनाम पिंरिगे!
21दिलेया ओ याहवेह, ङए थेबै प्रभु,
ङइ क्हिए मिं थेब लरिगे बिसि ङए फिर ल्हयो खमिंन्;
क्हिए खोंयोंइ आनुबै म्हाँया बेल्ले थेब मुँ, छतसि ङलाइ जोगेमिंन्।
22तलेबिस्याँ ङ आयोंब आख्युब मुँ,
धै ङए सैं बेल्ले नइमुँ।
23ङेसर्बै छरि धोंले ङ म्हयामुँ;
तिनि क्वेंउँइँले भ्योंवाब् धोंले ङलाइ खारासि भ्योंवाइमुँ।
24बर्त टिब्रें लमा ङए च्हिमैं आभोंब् तइमुँ;
ङए ज्यु च्हवेसि कारयाइमुँ।
25ङलाइ छ्याब् ल्हैदिब्मैंए उँइँर ङ आखोबै म्हि तइमुँ;
ङलाइ म्रोंमा चमैंइ क्र लाम्।#मत्ती २७:३९; मर्क १५:२९
26ओ ङए याहवेह परमेश्वर, ङलाइ ल्होमिंन्!
क्हिए खोंयोंइ आनुबै म्हाँयाजी ङ जोगेमिंन्!
27क्हिए योइन छ लइ बिसि चमैंइ सेरिगे;
ओ याहवेह, चु क्हिजीन् लब् ग बिसि चमैंइ क्होरिगे!
28चमैंइ ङलाइ सराप पिंलेया क्हिजी आशिक पिंब्मुँ!
चमैंइ ङए फिर यो झोंखमा चमैं फापिल् तब्मुँ,
दिलेया क्हिए के लबै म्हि ङ सैं तोंल् योंब्मुँ!
29ङए फिर छ्याब् ल्हैदिब्मैं फापिल् त्हुबै क्वें खिरिगे;
धै फापिबै पछ्यौरइ चमैं हुवारिगे!
30ङ ह्रोंसए सुँइ याहवेहलाइ बेल्ले थेब लब्मुँ;
ल्हें म्हिए म्हाँजोर ङ खीए क्वे प्रिंब्मुँ।
31तलेबिस्याँ दण्ड पिंबै म्हिउँइँले दु:ख योंबै म्हिलाइ जोगेमिंबै ल्हागिर
चए क्योलोउँइँ खी रारिम्।
Currently Selected:
भजनमैं 109: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
