हितोपदेश 18
18
1आक्ह्रिबै म्हि लोबए लिलि प्रम्;
धै छाबै म्हिइ क्ह्रिल् खाँबै ताँमैं थोम्।
2आमादुमैंइ ताँ क्होदा आङ्हाँ;
चमैं ह्रोंसए ताँ फिर लल् योंस्याँ मत्त्रे सैं तोंम्।
3आछ्याँबै के लबै दुष्ट म्हि फापिल् तम्,
धै छाबै म्हिलाइ खाबज्यै म्हि आल, चलाइ खाबज्यै आक्वें।
4बुद्धि मुबै म्हिए ताँमैं माँ ङ्युइ धों ग;
धै क्होबै म्हिए ताँमैं मुल् त्होंसि बग्दिब स्यों धों तब् ग।
5दुष्ट म्हिए ख लब
धै छ्याब आरेबै म्हिए ल्हागिर ठिक निसाफ आलब ठिक आङिं।
6आमादुइ पोंबै ताँइ प्होंगि मिम्,
धै ह्रोंसए सुँइ लमन् चलाइ आगुइ प्रिंम्।
7ह्रोंसइ पोंबै ताँइन आमादुल न्होह्रों तम्;
ह्रोंसइ पोंबै ताँइ लमन् च ङोर फेम्।
8पार्दिइ पोंबै ताँ लिंबै चबै सै धोंन् तम्;
चइ पोंबै ताँ म्हिमैंइ सैं न्होंर क्वेंम्।
9लल् त्हुबै के युनन् आलबै म्हि
न्होह्रों लबै म्हिए अलि धों तब् ग।
10याहवेहए मिं बेल्ले भोंबै धरर धों ग;
छतसि ठिक के लब्मैं चर ह्यामा ग्वार योंम्।
11प्लबै म्हिए सैंर ह्रोंसने मुँबै सै न्होरन् भोंबै सहर ग;
धै चए सैंर च बेल्ले नुल्ले झोंबै गारा धों तब् ग।
12तोन् तोर्न थेब् प्हैंबै म्हि नास तयाब्मुँ,
कुरबै म्हिइ मान योंब्मुँ।
13ताँ थेब् भन्दा ओंसों ज्वाफ पिंबै म्हि आमादु ग;
छाबै म्हि फापिन् तम्।
14म्हि सोदा ङ्हाँबै सैंइ च नरिबै त्हेर आश् पिंम्,
दिलेया च सैं आरेस्याँ सोबै आशा म्हयाम्।
15ह्रब् सेब् तदा ङ्हाँबै म्हिइ ज्ञान बुद्धिए ताँमैं क्होल् म्हैम्;
धै बुद्धि मुँबै म्हिइ छाबै ताँमैं थेबै सैं लम्।
16थेबै म्हिलाइ त्होबर क्होल्सै बोसि ह्यास्याँ
चए घ्याँ खोल्दिम्।
17अर्को म्हि खसि ताँ छलफल आलन् समा
मुद्दा झोंबै म्हिन् ठिक म्रोंम्।
18प्होंगि-कैगि लबै म्हिमैं आक्ह्रिमा
गोला झोंमिस्याँ चमैंए झगडामैं च्याँ तयाम्।
19कारग्युले नुबै गारा झोंबै सहर ट्होब् भन्दा सैं नबै अलिलाइ वाँब झन् गारो तम्,
धै अलिने प्होंब जिगल्सि झोंसि म्रा तोरब् धोंन् ग।
20म्हिए सुँइ पोंमा सैं म्रेंमुँ,
छाबन ताँजगो चए छर खम्।
21सैब नेरो सोल् लबै शक्ति लेर मुँ,
खैलि पोंइमु, चमैंइ चए रो चब्मुँ।
22प्ह्रेंस्यो योंबै म्हिइ छ्याँब सै योंम्
धै चइ याहवेहउँइँले दयाम्हाँया योंम्।
23ल्हयो खमिंन् बिसि ङ्हाँदु म्हिइ बिन्ति लम्,
दिलेया प्लबै म्हिइ आछ्याँल्ले जवाफ पिंम्।
24म्हिल थुमैं ल्हें मुँलेया नोक्सन् तल् खाँम्,
दिलेया कोइ थु बिस्याँ आघें-अलि भन्दा या सब तम्।
Currently Selected:
हितोपदेश 18: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
