हितोपदेश 16
16
1म्हिमैंइ सैंर चाँजोमैं लम्,
दिलेया जवाफ याहवेहउँइँलेन् खम्।
2म्हिमैंइ ह्रोंसइ लबै केमैं छ्याँबन् ङ्हाँलै,
दिलेया म्हिमैंए सैंर तो मुँ बिब याहवेहजी सेम्।
3क्हिइ लल् म्हैबै ताँन् केमैं याहवेहए योर थेंन्,
धै क्हिइ लल् म्हैबै केमैं छ्याँब् तम्।
4याहवेहजी तोन्दोंरि सैमैं खीए सैंर मैंब् धोंले बनेइमुँ,
खीजी दुष्ट म्हिमैं या नास तबै त्हिंइए ल्हागिर साँथेंइमुँ।
5याहवेहजी थेब् प्हैंब्मैं तिफुँइ आखो;
चमैंइ खैले बिलैया दण्ड योंब्मुँ।
6भर पर्दिल्ले छ्ह थोद्, धै परमेश्वरजी क्हिए पाप क्षमा लब्मुँ,
धै याहवेहजी बिब् ङिंस्याँ क्हिला तोइ न्होंह्रो आत।
7क्हिइ याहवेहलाइ सैं तोंन् लस्याँ
खीजी शत्तुरमैंलाज्यै या क्हिए थु लमिंब्मुँ।
8अनिया लसि कमैबै ल्हें सै न्होर भन्दा
ठिक के लसि योंबै च्युगुदे सै न्होर छ्याँब् ग।
9म्हिइ ह्रोंसए सैंर छ लमुँ, छु लमुँ बिमुँ,
दिलेया चइ लल् त्हुबै केर याहवेहजीन् डोरेम्।
10म्रुँइ छ्याँबै ताँ पोंमुँ;
धै खोंयोंइन ठिक निसाफ लमिंम्।
11छेनाले क्ह्वेब नेरो क्वेबै सै याहवेहजी खोम्;
धै म्हन पथि नेरो ढगमैं ठिक तल् त्हुम् बिसि खीजी बिइमुँ।
12ठिक के लबै म्रुँइ खोंयोंइ ग्याल्स लम्,
तलेबिस्याँ छाबै म्रुँइ आछ्याँबै के तिफुँइ आखो।
13ठिक के लबै म्हिमैंइ पोंबै ताँ थेसि म्रुँ सैं तोंम्,
धै क्ह्रोंसेंन्बै ताँ पोंब्मैंलाइ म्रुँइ खोम्।
14म्रुँलाइ ह्रिस खल् लबै म्हि सिल् त्हुब्मुँ,
छतसि बुद्धि मुँबै म्हिइ ह्रिस खरिबै म्रुँलाइ सैं तोंन् लम्।
15म्रुँलाइ सैं तोंन् लमा म्हिमैं सोल् योंम्,
च ख्वालबै त्हेर नाँ पबै न्हाँम्स्यों धों खम्।
16मारा योंब् भन्दा बुद्धि योंब छ्याँब् ग,
धै चाँदि भन्दा ज्ञान बुद्धिलाइ त्हाँन्।
17सोजो म्हिइ आछ्याँबै केमैं आल;
आछ्याँबै के आलब्मैंइ छेनाले छ्ह थोल् खाँम्।
18तोन् तोर्न थेब् प्हैंबै म्हि नास तयाब्मुँ,
अरूमैंलाइ तो धोंइ आङ्हाँबै म्हिल मि-क्ह्रन् म्हयाब्मुँ।
19थेब् प्हैंब्मैंने क्ह्रिसि लुडिबै सैमैं चुब् भन्दा
बरु च्योंने तसि ङ्हाँदुमैंने टिब छ्याँब् ग।
20लोदा सैंदा लमा छेनाले ङिंबै म्हिल बिब् धों तब्मुँ,
याहवेहए फिर भर थेंब्मैंइ आशिक योंब्मुँ।
21बुद्धि मुँबै म्हिलाइ ह्रब् सेब बिमुँ,
धै छ्याँबै ताँइ म्हिमैंलाइ ह्रब् सेब् लम्।
22च्हैंब् मैंब् लल् खाँबै म्हिलाइ बुद्धिइ छ्याँबै घ्याँर डोरेम्;
दिलेया आमादुमैंइ ह्रोंसए न्होह्रों तबै के ह्रोंसइन लम्।
23बुद्धि मुँबै म्हिइ च्हैंसि मैंसि पोंम्,
धै चइ पोंबै ताँइ म्हिमैं ह्रब् सेब् तम्।
24छ्याँबै ताँमैं क्वे खुदुए न्हाँज्यु धों तम्,
चइ म्हिमैंलाइ भों पिंम्, धै सैं तोंन् लम्।
25ह्रोंस प्रबै घ्याँ ठिक धों ङ्हाँलेया
लिउँइँ च घ्याँ कालाए सुँर फेनेम्।#हितो १४:१२
26फो ख्रेंबै म्हिइ झन् के लम्;
तलेबिस्याँ चल् त्हुसेरो के लल् त्हुम्।
27दुष्ट म्हिइ आछ्याँबै के मत्त्रे लप्रम्,
धै चइ पोंबै ताँइ म्हिमैंए सैं नल् लम्।
28स्योलिबै ताँ लबै म्हिइ प्होंगि लम्,
धै आगुए ताँ लप्रबै म्हिइ क्ह्रिरिबै थुमैंया आक्ह्रिल् लवाम्।
29न्होह्रों लल् म्हैबै म्हिइ आगुलाइ फस्ला फुस्लु लवासि
आछ्याँबै घ्याँर डोरेदिम्।
30मि च्याब्लने चिब्लि लबै म्हिइ जाल रोमुँ;
धै म्हदे म्लिब्मैंए बानि ब्योर आछ्याँब तम्।
31सारबै क्र ङ्हेबै क्रेगि ग;
ठिक के लब्मैंइ ह्रिंबै छ्ह योंम्।
32ल्हडेंर नेबर ह्याबै म्हि भन्दा युनन् ह्रिस आखबै म्हि थेब ग,
ह्रिस थाम्दिल् खाँबै म्हि सहरलाइ ट्होबै म्हि भन्दा थेब् ग।
33म्हिइ चिट्टाम् झोंमुँ,
दिलेया तोन्दोंरि ताँए जवाफ याहवेहउँइँलेन् खम्।
Currently Selected:
हितोपदेश 16: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
