मत्ती 18
18
स्वर्गर्बै ग्याल्सर खाब् थेब बिबै ताँ
(मर्कूस ९:३३-३७; लूका ९:४६-४८)
1च त्हेर्न चेलामैं येशू ङाँर खसि “स्वर्गर्बै ग्याल्सर धाँसे थेब खाब् तमुँ?” बिसि खीने ङ्योएइ।#लूक २२:२४
2येशूजी च्युथिरि कोलो घ्रि हुइसि चमैंए म्हाँजोर राल् पिंसि 3बिइ, “क्ह्रोंसेंन्ले ङ क्हेमैंने बिमुँ, क्हेमैंए सैं एसि छाबै च्योंबै कोलोमैंल् धों तबै सैं आप्ह्यास्याँ क्हेमैं स्वर्गर्बै ग्याल्सर खोंयोंइ होंल् योंरिब् आरे।#मर्क १०:१५; लूक १८:१७ 4चु कोलो धोंलेन् च्योंब तसि थेब आप्हैंबै म्हि स्वर्गर्बै ग्याल्सर धाँसे थेब तब्मुँ। 5झाइले खाबइ ङए मिंर छाबै कोलो घ्रि मान लमुँ, चइ ङलाज्यै या मान लम्।
पाप लबर ल्हैदिबै सैमैं
(मर्कूस ९:४२-४८; लूका १७:१-२)
6“ङए फिर बिश्वास लबै छाबै कोलोमैं न्होंर्बै घ्रिलाइ खाबइ ङ ङाँइँले स्योवासि पाप लबर ल्हैदिमुँ, च म्हिइ च केए सजैं योंब् भन्दा चए खरिर थेबै ह्रेंदो च्योसि मा ङ्युँइर भ्योंवाब चए ल्हागिर छ्याँब तम्। 7धिक्कार चु ह्युललाइ! तलेबिस्याँ चु ह्युलर म्हिमैंलाइ पापर च्होवाबै सैमैं मुँ। पापर च्होवाबै परिक्षाम् खम्, दिलेया अरू म्हिलाइ पापर च्होवाबै म्हिलाइ झन धिक्कार मुँ।
8“क्हिए यो अथवा प्हलेइ क्हिलाइ पाप लबर ल्हैदिम् बिस्याँ च थोसि भ्योंवाँन्। तलेबिस्याँ यो प्हले ङ्हिंना ङ्हिंन्ने नर्गर्बै मिर ह्याब् भन्दा बरु डुँड तसि खोंयोंइ आखाँबै छ्ह योंब क्हिए ल्हागिर बेल्ले छ्याँब ग।#मत्ती ५:३० 9छलेन क्हिए मिइ क्हिलाइ पाप लबर ल्हैदिम् बिस्याँ चै या ट्हुइसि भ्योंवाँन्। मि ङ्हिंनेन् नर्गर्बै मिर ह्याब् भन्दा कन तसि खोंयोंइ आखाँबै छ्ह योंब क्हिए ल्हागिरि छ्याँब तम्।#मत्ती ५:२९
म्हयाबै क्युए अहान्
(लूका १५:३-७)
10“छतसि ङ क्हेमैंने बिमुँ, छेनाले मैंन्! क्हेमैंइ छाबै कोलोमैं धों तब्मैं खाबलाज्यै या हेल आलद्। तलेबिस्याँ चमैं जोगेमिंबर स्वर्गदूतमैं स्वर्गरि खोंयोंन् बिलै ङए आबाए उँइँर्न तम्।#लूक १९:१० 11[तलेबिस्याँ म्हिए च्ह म्हयाबै म्हिमैं म्हैसि जोगेमिंबर युब् ग।]#18:11 धाँसे ओंसोंबै योइ प्ह्रिबै कितबजगोर चु ब्राकेट न्होंर्बै ताँफुँमैं आप्ह्रिल। लूका १९:१० ङ्ह्योद्।
12“क्हेमैंइ खै ङ्हाँमुँ? क्यु प्र मुँबै प्ह्रोंछैंइ क्यु घ्रि म्हयास्याँ चइ च कुच्युसे कु क्युमैं वाथेंसि च म्हयाबै क्यु घ्रि म्हैबर खन्तोंदोंन् आह्या रो वा? 13क्ह्रोंसेंन ङ क्हेमैंने बिमुँ, चइ च म्हयाबै क्यु योंइ बिस्याँ आम्हबै कुच्युसे कु क्युमैंए ल्हागिर भन्दा च म्हयाबै क्यु योंइ बिसि प्ह्रोंछैं बेल्ले सैं तोंब्मुँ। 14छलेन स्वर्गर मुँबै क्हेमैंए परमेश्वर आबालाज्यै या छाबै ङए फिर बिश्वास लबै कोलोमैं न्होंर घ्रि या नास आतरिगे बिबै सैं मुँ।
आछ्याँबै के लबै अलि
(लूका १७:३)
15“क्हिए अलिइ क्हिए बिरोधर तोइ आछ्याँबै के लस्याँ, ओंसों च ङाँर ह्यासि क्हेमैं ङ्हिं मत्त्रे मुँमा चइ लबै आछ्याँबै केमैं उँइँमिंन्। धै चइ क्हिए ताँ ङिंस्याँ, क्हिए अलि ह्रोंसलन् तइ।#लूक १७:३ 16दिलेया चइ क्हिए ताँ थेल् आङिंस्याँ म्हि घ्रिदे ङ्हिंदे साक्षि ग्वाइ लबर क्हिने बालु बोसि चने सल्ला लद्। तलेबिस्याँ ‘उजुर लस्याँ साक्षि ग्वाइ टिब्मैं ङ्हिंदे सोंदे चैदिम्,’ बिसि ठिमर प्ह्रिथेंइमुँ।#व्य १९:१५ 17अझै या चइ क्हेमैंए ताँ थेल् आङिंस्याँ बिश्वासीमैं ङाँर ह्यासि ताँन् ताँ बिद्। धै चमैंए ताँ या च अलिइ आङिंस्याँ च परमेश्वर आम्हाँदिब्मैं अथवा रोमी म्रुँए ल्हागिर बालि रेब्मैं धोंबन् तरिगे।#18:17 च परमेश्वर आम्हाँदिब्मैं अथवा रोमी म्रुँए ल्हागिर बालि रेब्मैं धोंबन् तरिगे मतलब च म्हिउँइँले स्यो तद्।
18“क्ह्रोंसेंन ङ क्हेमैंने बिमुँ, क्हेमैंइ पृथ्बीरि तो फैमुँ, च स्वर्गरै या फैब्मुँ। धै क्हेमैंइ पृथ्बीरि तो प्ल्हमुँ, च स्वर्गरै या प्ल्हब्मुँ।#मत्ती १६:१९; यूह २०:२३ 19धबै ङ क्हेमैंने बिमुँ, पृथ्बीरि क्हेमैंए न्होंरि म्हि ङ्हिं क्ह्रिसि सैं घ्रिलेन् प्राथना लस्याँ क्हेमैंइ तो सै ह्रिलेया स्वर्गर मुँबै ङए परमेश्वर आबाजी च सै क्हेमैं पिंब्मुँ। 20तलेबिस्याँ खनिर म्हि ङ्हिदे सोंदे ङए मिंर#18:20 ङए मिंर अथवा ङए म्हिमैं तसि खागु तमुँ, चमैंए म्हाँजोरि ङ तब्मुँ।”
क्षमा आपिंबै केब्छैंए अहान्
21झाइले पत्रुस येशू ङाँर खसि “गुरु, ङए अलिइ ङए फिर आछ्याँबै के लब्रें लस्याँ कति खे समा चलाइ क्षमा पिंल् त्हुम्? ङिब्ले समा क्षमा पिंले उ?” बिसि ङ्योएइ।
22येशूजी चने बिइ, “ङ क्हिने बिमुँ, ङिखे आङिं, ङिच्यु गुणा ङिखे समा क्षमा पिंल् त्हुम्!#लूक १७:३-४#उत ४:२४ 23छतसि स्वर्गर्बै ग्याल्स म्रुँ घ्रि धोंन् तब् ग। च म्रुँइ ह्रोंसए केब्छैंमैंने खीउँइँले बोबै छे ह्रिल् त्हुइ बिबै सैं लइ। 24झाइले म्रुँइ हिसाब किंबर होंमा हजार च्यु माराए मुइ फोल् त्हुबै म्हि घ्रि म्रुँ ङाँर पखइ। 25दिलेया च म्हिइ छे फोल् आखाँमा म्रुँइ ‘च, चए प्ह्रेंस्यो, च्ह-चमि नेरो चने मुँबै तोन्दोंरि सै चुँसि ङए मुइ पिंन्,’ बिसि ल्हैदिइ।
26“च केब्छैंइ म्रुँए उँइँर च्हि तुँसि यो छ्युँ लसि ‘तिस्या पैंमिंन्, ङइ क्हिए ताँन् छे फोस्यो,’ बिइ।
27“छबिमा म्रुँइ चए फिर ल्हयो खसि ‘क्हिइ ङने किंबै छे फोल् आत्हु! मुँरिगे!’ बिसि च केब्छैं ह्याल् पिंइ।
28“दिलेया च केब्छैं बैरु त्होंह्यामा चइ ह्रोंसए चाँदिए मुइ प्र छे बोबै के लबै थु घ्रि त्होइ। धै ‘ङउँइँले बोबै छे फोद्’ बिसि चए खरिर क्हाइ।
29“छबिमा चए थुइ च्हि तुँसि चने यो छ्युँ लसि ‘तिस्या पैंमिंन्, ङइ क्हिए छे फोस्यो,’ बिइ। 30छबिमा चइ आङिंसि छे आफोन् समा चलाइ झेलर च्युवाइ।
31“छ लब् म्रोंसि अरू के लब्मैंए सैं बेल्ले नइ। चमैं म्रुँ ङाँर ह्यासि ताँन् ताँ बिवाइ। 32झाइले म्रुँइ च केब्छैं ह्रोंसए उँइँर हुइसि बिइ, ‘ओ दुष्ट केब्छैं! क्हिइ ङने यो छ्युँ लमा ल्हयो खसि ङइ क्हिइ किंबै छे फोल् आत्हु मुँरिगे बिसि पिवाइ! 33ङइ क्हिए फिर ल्हयो खब् धोंले क्हिज्यै या ह्रोंसए थुए फिर ल्हयो खल् त्हुमल आङिं वा?’ 34झाइले म्रुँ बेल्ले ह्रिस खसि ‘चइ ताँन् छे आफोन् समा दण्ड पिंब्मैंए योर पिंवाँइ।’
35“छतसि क्हेमैंज्यै ह्रोंसए अलिलाइ सैं न्होंउँइँले क्षमा आपिंस्याँ, स्वर्गर मुँबै ङए आबाज्यै या क्हेमैं क्षमा पिंरिब् आरे।”
Currently Selected:
मत्ती 18: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
