योना 3
3
योना निनवेर ह्याब
1छले याहवेहजी धबै योनाने बिइ, 2“रेद्, थेबै निनवे सहर ह्याद्, धै ङइ क्हिने पिंबै ताँ चर ह्यासि बिप्रद्।”
3छले याहवेहजी बिब् धोंले योना रेसि निनवे सहर ह्याइ। (निनवे सहर बेल्ले थेब मुँल धै मिं कालिदिब् मुँल, च सहरए ताँन क्ल्ह्यो ङ्ह्योबर सोंरो छ्युमल।#3:3 उ चर ङ्ह्योप्रब सोंरो छ्युमल।) 4योनाइ तिगें दे दिन छ्युल्ले प्रसि च सहर न्होंर होंसि ताँ बिबर होंइ, “तारेबै प्लिच्यु त्हिं न्होंर निनवे सहर नास तब्मुँ!” 5झाइले च ताँ थेसि निनवे सहरर्बै म्हिमैंइ परमेश्वरजी बिबै ताँ क्वेंइ। धै चिब्मैइ ताँनलाइ बर्त टिबर ल्हैदिइ, धै कोलमैं-चिबमैं ताँनइ “ङिइ आछ्याँबै केमैं लइनमैं” बिसि नइए रेंगए क्वें खिइ।#मत्ती १२:४१; लूक ११:३२
6योनाइ बिबै ताँ निनवेर्बै म्रुँ ङाँर फेनइ, धै च ह्रोंसए राजगद्दिउँइँले रेइ, धै ह्रोंसए क्वें प्लिसि चइ या नइए ह्रेंगए क्वें खिइ, झाइले म्येउरो फिर टिइ। 7छले चइ निनवे सहरर छ बिइरि घोषना लइ,
“म्रुँ नेरो चर्बै जिम्म नोब्मैंइ बिब् धोंले, न म्हिमैंइ, न ख्योदोमैंइ, न क्ल्ह्यामैं-मेमैंइ, न र-क्युमैंइ, खाबजै या तो सैमैं या आचरिगे धै क्युइ या आथुँरिगे। 8छले म्हिमैं नेरो ख्योदोमैंइ नइए ह्रेंग कुरिगे धै बेल्ले ओरदै परमेश्वरने ग्वार् ह्रिरिगे। चमैंए ह्रोंसए दुष्ट केमैंउँइँले धै चमैंए आछ्याँन्ले प्रब टिबै बानि ब्योरउँइँले एरिगे। 9छले परमेश्वरजी खीए सैं एइरि ल्हयो लसि खीए थेबै ह्रिसउँइँले सैं एम् उ, धै ङ्यो नास तरिब् आरे, बिसि खाबइ सेइमुँ?”
10छले परमेश्वरजी चमैं ताँन खेंमैंए आछ्याँबै के लबै घ्याँ पिसि एखब् म्रोंइ, खीए खोंर ल्हयो खइ। छतसि खीजी सहर नास लम् बिब् धोंले सहर नास आल।
Currently Selected:
योना 3: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.