याकूब 2

म्‍हि ङ्ह्‍योसि आफेलद्

1ओ ङए अलि-अङाँमैं, ताँनइ म्हाँदिल् त्हुबै ङ्योए प्रभु येशू ख्रीष्‍टए फिर क्हेमैंइ बिश्‍वास लइमुँ। छतसि क्हेमैंइ खाबलाज्यै आफेलद्। 2म्‍हि घ्रि माराए च्यामैं नेरो सै ल्हें फेबै छ्याँ-छ्याँबै क्‍वें खिसि क्‍हेमैंए च्हों धिंर खइ, छलेन ङ्हाँदु म्हि या थौनि क्‍वें खिसि खइ बिस्याँ, 3क्‍हेमैंइ च छ्याँबै क्वें खिबै म्हिलाइ मान लसि “चु छ्याँबै क्‍ल्‍ह्‍योर क्हुँन्” बिम्, दिलेया च ङ्हाँदु म्‍हिने बिस्याँ क्‍हेमैंइ “क्हि चर्न राद्,” अथवा “ङए प्‍हले ङाँर क्हुँन्,” बिम् बिस्याँ, 4तो क्हेमैंइ ह्रोंसए न्‍होंर्न फेलब नेरो आछ्याँबै सैं प्ह्‍याबै म्हिमैं धों तइ आङिं वा?

5ओ ङए खोबै अलि-अङाँमैं, ङए ताँ थेद्, परमेश्‍वरजी चु ह्‍युलर्बै ङ्हाँदुमैंलाइ खीए फिर्बै बिश्‍वासर भोंब् लमिंसि स्वर्ग ग्याल्सर्बै हगवालमैं तबर त्हाँब, आङिं वा? खीलाइ म्हाँया लब्‍मैंने चु ग्याल्स पिंम् बिसि खीजी बाछा फैब, आङिं वा? 6दिलेया क्‍हेमैंइ मि ङ्हाँदुमैंलाइ म्हि आच्हि। क्‍हेमैंलाइ दुःख पिंब्मैं खाब् जा? च प्लब्‍मैंन् आङिं वा? क्‍हेमैंलाइ नियाधिश ङाँर बोब्मैं चमैंन् आङिं वा? 7ङ्योए प्रभु येशू ख्रीष्‍टए बारेर आछ्याँबै ताँ पोंब्मैं चमैंन् ग। खीए मिंउँइँलेन् क्हेमैं हुइब् आङिं वा?

8बरु क्‍हेमैंइ परमेश्‍वरए छ्वेर प्ह्रिबै खीए ग्याल्सर्बै ताँमैं छेनाले म्हाँदिसि क्हेमैंइ

“ह्रोंसए ङ्‍हेब् ट्हुब्मैंने ह्रोंसलाइन धोंले म्हाँया लद्!”

बिबै ताँ ङिंस्याँ क्हेमैंइ छ्याँबै के लब्मुँ।#लेबी १९:१८ 9दिलेया क्‍हेमैंइ म्‍हि ङ्ह्‍योसि के लइ बिस्‍याँ क्हेमैंइ पाप लम्, धै छ्वेर्बै ताँउँइँलेन् क्हेमैं छ्याब् मुँबन् तम्। 10तलेबिस्याँ छ्वेर्बै ताँन् ठिममैं म्हाँदिसि ठिम घ्रि मत्‍त्रे आम्हाँदिबै म्हिइ छ्वेर्बै ताँन् ठिममैं आम्हाँदिब् धोंन् तसि परमेश्‍वरए उँइँर छ्याब् मुँबन् तम्। 11तलेबिस्याँ “फ्रें आक्ल्योंन्”#प्रस २०:१४; व्य ५:१८ बिबै परमेश्‍वरजी “सैब्-म्‍लुब् या आलद्”#प्रस २०:१३; व्य ५:१७ बिइमुँ। छतसि क्‍हिइ फ्रें आक्ल्योंन्ले सैब्-म्‍लुब् लइबिस्‍याँ क्हि छ्वेर्बै ठिम आम्हाँदिबै छ्याब् मुँबन् तइ। 12परमेश्‍वरए छ्वेर्बै ठिमइ क्हेमैंलाइ आछ्याँबै बानि-बेहोरमैंउँइँले स्योमिंम्, धै च ठिमइ बिब् धोंले क्‍हेमैंए फिर खीजी निसाफ लब्‍मुँ। छतसि च ठिमइ बिब् धोंले तो पोंमुँ तो लमुँ च छेनाले लद्। 13अरूए फिर ल्हयो आखबै म्‍हिए फिर परमेश्‍वरज्यै या ल्हयो खरिब् आरे। दिलेया अरूए फिर ल्हयो खइ बिस्‍याँ, परमेश्‍वरजी निसाफ लमा क्‍हेमैं फिरै या ल्हयो खमिंब्‍मुँ।

परमेश्‍वर म्हाँदिब नेरो छ्याँबै के लब

14ओ ङए अलि-अङाँमैं, खाबज्‍यै या “ङइ परमेश्‍वर म्हाँदिम्” बिलेया, छ्याँबै के आलस्‍याँ चइ बिश्‍वास लब तो केर फेइ? तो चए बिश्‍वासइ परमेश्‍वरए ह्रिसउँइँले चलाइ जोगेल् खाँम्‍मा? 15अलि-अङाँए न्होंरि खाब् मुँलै खिबै क्वें आरेस्याँ, चब सै या आयोंस्‍याँ, 16क्‍हेमैंए न्होंरि खाबज्यै चने “छेनाले ह्‍याद्, टोंन्ले टिद्, म्रेंन्ले चद्” मत्‍त्रे बिसि चए चैदिबै सै तोइ आपिंइ बिस्‍याँ, चइ तो योंइ? तोइ आयों। 17च धोंलेन् परमेश्‍वर म्हाँदिलेया छ्याँबै केमैं आलस्‍याँ चइ परमेश्‍वर म्हाँदिब फाकर्न ग।

18दिलेया कोइ म्‍हिइ बिलै, “क्हिने प्रे बिश्‍वास मुँ, ङने प्रे केमैं। ल्हु, छबिस्याँ के आलल्‍ले क्‍हिइ लबै बिश्‍वास ङने उँइँन्दि! धै ङइ के लसि ङइ लबै बिश्‍वास क्‍हिने प्रे उँइँब्मुँ।” 19परमेश्‍वर घ्रि मत्‍त्रे मुँ बिबै ताँ क्‍हिइ क्वेंम्, चम् ङिंबन् ग! मोंमैंज्यै या छलेन् क्वेंम्, धै ङ्हिंसि त्‍हारम्। 20ओ ताँ आक्होबै म्‍हि! छ्याँबै के आलब्मैंए बिश्‍वास केर आफेब तम् बिसि ङइ क्‍हिने चिनु उँइँरिगे ङ्हाँइमुँ वा? 21ङ्योए खे अब्राहामइ ह्रोंसए च्‍ह इसहाकलाइ परमेश्‍वरए मिंर ख्रो पिंबर होंइ। छतसि परमेश्‍वरए उँइँर च ठिक के लबै म्हि तइ, आङिं वा?#उत २२:१-१४ 22अब्राहामइ बिश्‍वासउँइँलेन् छाबै के लइ। छले चइ लबै केउँइँलेन् चए बिश्‍वास क्ह्रोंसेंन्बै मुँन बिब् सेइ। 23छले पबित्र छ्वेर छ बिसि पोंबै ताँ पूरा तइ:

“अब्राहामइ परमेश्‍वरए फिर बिश्‍वास लइ,

छाबै बिश्‍वासइ लमा परमेश्‍वरए उँइँर च ठिक के लबै म्हि तइ।”

छतसि अब्राहाम “परमेश्‍वरए थु,” तइ।#उत १५:६; २ इति २०:७; यशै ४१:८ 24छतमा खीए फिर बिश्‍वास लब्मैंइ बिश्‍वास मत्‍त्रे आङिं, छ्याँबै केमैं या लल् त्हुमन। छलस्याँ परमेश्‍वरए उँइँर ठिक के लबै म्हिमैं तब् मुँन।

25छलेन राहाब बिबै फ्यालुस्योज्‍यै या ङ्योए यहूदी ह्रेंए खेमैं यरिहो सहरर छैं लबर ह्‍यामा ह्रोंस ङाँर खबै यहूदीमैंलाइ चब् थुँब् लमिंसि चर्बै म्हिमैंइ था आसेल्‍ले अर्को घ्‍याँउँइँले कुल्मिंइ। छाबै केउँइँलेन् च ठिक ठहर्दिब आङिं वा?#यहो २:१-२१

26छतसि खैले ज्युर प्‍ल्‍ह आरेस्‍याँ म्हि सियामुँ, छलेन छ्याँबै के आलबै बिश्‍वासै या सियाब् धोंन् ग।

Currently Selected:

याकूब 2: GCMB

Highlight

Copy

Compare