हिब्रू 8
8
येशू ङ्योए खेगि क्रथे ग
1ङिइ बिल् म्हैबै थेबै ताँ चुन् ग: ङ्योला छाबै ख्रो पिंबै खेगि क्रथे मुँ, खी स्वर्गर ताँन् भन्दा थेबै परमेश्वरए क्योलोउँइँ (कयोउँइँ) गद्दिर क्हुँइमुँ।#भज ११०:१ 2धै खेगि क्रथे तसि येशूजी स्वर्गर्बै क्ह्रोंसेंन्बै ताँन् भन्दा पबित्र क्ल्ह्योरि सेवा लम्। च पबित्र क्ल्ह्यो म्हिइ बनेब आङिं, दिलेया प्रभु परमेश्वरजी बनेब ग।
3ताँन् खेगि क्रथे भेटि नेरो ख्रो पिंबर त्हाँम्। छतसि ङ्योए खेगि क्रथे येशूने ख्रो पिंबै सै तल् त्हुम्। 4खी चु पृथ्बीर्न मुँरिस्याँम् ख्रो पिंबै खेगि आतमल, तलेबिस्याँ ठिमर बिब् धोंले भेटि पिंबै ल्हागिरि लेबीए कुलर्बै ख्रो पिंबै खेगिमैं चुर्न मुँ। 5दिलेया चुर्बै ख्रो पिंबै खेगिमैंइ स्वर्गर्बै पबित्र क्ल्ह्योए नकल लसि छरिए सेवा मत्त्रे लम्। तलेबिस्याँ मोशाइ पबित्र क्ल्ह्यो बनेल् म्हैमा परमेश्वरजी चने बिइ, “क्हिने कोंर उँइँमिंबै नमुना अनुसार ताँन् सै बनेद्।”#प्रस २५:४० 6दिलेया च ओंसों फैबै बाछा भन्दा प्रभु येशूजी म्हिमैंए ल्हागिर लमिंबै बाछा झन् थेब मुँ। छतसि परमेश्वर नेरो म्हिमैं न्होंरि येशूजी लमिंबै बाछा ओंसोंबै बाछा भन्दा छ्याँब मुँ। छलेन स्योंम्बै खेगिमैंइ भन्दा येशूजी झन् बेल्ले थेबै के लइमुँ।
7ओंसों फैबै बाछा केर फेस्याँ चए क्ल्ह्योरि अर्को बाछा आचैदिमल। 8दिलेया म्हिमैंए दोष उँइँदै परमेश्वरजी बिइमुँ,
“इस्राएलर्बै ह्रें नेरो यहूदाए ह्रेंमैंने ङइ छारा बाछा घ्रि फैबै त्हिंइ खब्मुँ।
9चु बाछा ङइ चमैंए खेमैं-माँमैंने फैबै बाछा धोंब तरिब् आरे।
च त्हेरि ङइ चमैंए यो क्हासि मिश्र ह्युलउँइँले डोरेसि पखल।
दिलेया ङइ फैबै बाछाए ताँमैंर चमैं दरले टिल् आखाँ।
छतसि ङइ चमैंए वास्ता आल,” बिसि याहवहजी बिइमुँ।
10“दिलेया चु त्हिंइ लिउँइँ, बिसि याहवहजी बिइमुँ।
ङ इस्राएलए सन्तानमैंने छाबै बाछा फैब्मुँ:
चमैंए सैंर ङए ठिम थेंमिंब्मुँ,
धै चमैंए खोंर च ठिममैं प्ह्रिमिंब्मुँ।
ङ चमैंए परमेश्वर तब्मुँ,
धै चमैं ङए म्हिमैं तब्मुँ।
11च त्हेर ‘परमेश्वरलाइ ङो सेद्’ बिसि
खाबज्यै या ह्रोंसए ङ्हेब्-ट्हुब्मैं नेरो ह्रोंसए आघें अलिलाइ लोमिंरिब् आरे,
तलेबिस्याँ थेब च्योंब
ताँनइ ङलाइ ङो सेब्मुँ।
12चमैंए पापमैं ङइ क्षमा लमिंब्मुँ,
धै चमैंए आछ्याँबै केमैं ङइ धबै मैंरिब् आरे।”#यर ३१:३१-३४
13परमेश्वरजी चु बाछाने, “छारा,” बिसि ओंसोंबै बाछा स्योगो लामिंइ, छले चु बाछा केर आफेब् तसि युनन् म्हयाम्।
Currently Selected:
हिब्रू 8: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
