हिब्रू 3
3
मोशा भन्दा येशू थेब ग।
1छतसि ओ परमेश्वरजी त्हाँबै ङिने स्वर्गर्बै हग योंबै अलि अङाँमैं, ङ्योइ बिश्वास लबै ङ्योए खेगि क्रथे येशूलाइ मैंन्। 2ङ्योए खे मोशा परमेश्वरए उँइँर ठिक केमैं लबै म्हि मुँल। च धोंलेन् येशूज्यै या ह्रोंसलाइ त्हाँबै परमेश्वरजी ल्हैदिबै केमैं झन् छेनाले लइ।#गन्ती १२:७ 3धिं भन्दा धिं बनेबै म्हि थेब् ग। च धोंलेन मोशा भन्दा येशू थेब् ग। 4धिंमैंम् म्हिमैंइ बनेम्, दिलेया तोन्दोंरि सै बनेबम् परमेश्वरन् ग। 5लिउँइँ तखबै ताँए ग्वाइ पिंबै ल्हागिर परमेश्वरए म्हिमैंए न्होंर मोशा ताँन् भन्दा भर लल् खाँबै केब्छैं मुँल। 6दिलेया ख्रीष्ट बिस्याँ परमेश्वरए च्ह मुँल। छतसि ङ्योइ थेंबै आशार लिउँइँ समा खीए फिर भर थेंसि सैं भोंब् लरिस्याँ ङ्यो या परमेश्वरए प्हसेमैं तम्।
परमेश्वरए म्हिमैंइ भों न्हल् योंब
7छतसि पबित्र प्ल्हजी बिइमुँ,
“तिंयाँ क्हेमैंइ परमेश्वरजी बिबै ताँ थेइबिस्याँ,
8क्हेमैंए खेमैंइ क्यु आयोंबै क्ल्ह्योरि परमेश्वरए बिरोध लब् धोंले क्हेमैंए सैं सारो आलद्,
च त्हेर चमैंइ परमेश्वरए सैं फो (जाँच) किंब् धोंलेन् क्हेमैंइ खीए सैं फो किंबै के आलद्।
9च क्ल्ह्योर प्लिच्यु बर्ष समा क्हेमैंए खेमैंइ ङइ लबै केमैं म्रोंसेया ङए सैं फो किंबै के लइ।#3:9 सैं फो किंबै के लइ अर्थ, “परमेश्वरजी ङ्योलाइ जोगेमिंल् आखाँलै,” बिसि जाँच लइ।
10छतब् म्रोंसि ङ बेल्ले ह्रिस खसि बिइ,
‘चमैंए सैं खोंयोंन् बिलै ङ ङाँइले ह्रेंगोन् तरिम्,
चमैंइ ङए घ्याँ आसेइमुँ।’
11छतसि ङ ह्रिस खसि छले कसम चइ,
‘चमैं ङए भों न्हबै क्ल्ह्योर खोंयोंइ होंल् योंरिब् आरे।’”#भज ९५:७-११
12छतसि ओ अलि-अङाँमैं, सैं चिद्, क्हेमैं न्होंरि खाबलैया बिश्वास आलबै आछ्याँबै सैंइ लमा क्हेमैं सोगों परमेश्वरउँइँले ह्रेंगो आबोरिगे। 13बरु खाबै या पापर आच्होरिगे धै क्हेमैं खाबज्यै या सैं सारो आलरिगे बिसि परमेश्वरए छ्वेर बिब् धोंले “तिंयाँबै त्हिंइ” मुँब् समा घ्रिइ घ्रिलाइ अर्थि पिंब्रें लद्। 14ङ्योइ ओंसों लब् धोंबै बिश्वास लिउँइँ समन् लरिस्याँ, ङ्योइ ख्रीष्टने बालुन् परमेश्वरजी पिंबै हग योंब्मुँ।
15परमेश्वरए छ्वेर छले बिइमुँ,
“तिंयाँ क्हेमैंइ परमेश्वरजी बिबै ताँ थेइ बिस्याँ,
क्हेमैंए खेमैंइ परमेश्वरए बिरोध लब् धोंले ह्रोंसए सैं सारो आलद्।”#भज ९५:७-८
16परमेश्वरए ताँ थेसेया खीए बिरोध खाबइ लइ? मोशाइ मिश्र ह्युलउँइँले तेइ पखबै म्हिमैंइ, आङिं वा? 17परमेश्वर प्लिच्यु बर्ष समा खाबने ह्रिस खल? च पाप लब्मैंने आङिं वा? चमैं क्यु आयोंबै क्ल्ह्योर सियाल् खाँल। 18“परमेश्वरजी बिबै ताँ आङिंब्मैं खीए भों न्हबै क्ल्ह्योर खोंयोंइ होंल् योंरिब् आरे,” बिसि खीजी चमैंए बारेर कसम चब आङिं वा?#गन्ती १४:१-३५ 19परमेश्वरए फिर बिश्वास आलबइले चमैं भों न्हल् योंबै क्ल्ह्योर होंल् आयों।
Currently Selected:
हिब्रू 3: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
