हिब्रू 12

येशूलाइ ङ्ह्‍योले

1ङ्योए खागु च्‍हौ ल्‍हें म्हि साक्षि मुँबइले, ताँन् खालर्बै दुःख नेरो ङ्योलाइ क्होइ थेंबै पाप स्योवासि तौदिबै क्‍ल्‍ह्‍योर आफेन् समा ङ्यो ढुक्‍कले न्हेले। 2ङ्योए बिश्‍वास सुरु लब नेरो बिश्‍वास पूरा लमिंबै येशूलाइ मत्‍त्रे ङ्ह्‍योले। खीजी लिउँइँ तखबै सुखा मैंसि म्हिमैंइ खीए आब्रु वालेया तो धोंइ आङ्हाँन्ले क्रूसर्बै थेबै दुःख नोमिंइ। धै तोगो खी परमेश्‍वरए राजगद्दिए क्‍योलोउँइँ क्हुँइमुँ।

3पापि म्‍हिमैंइ खीए बिरोधर पोंबै च्‍हौ ल्‍हें ताँमैं सैदिल् खाँबै येशूलाइ मैंन्, धै आनरल्‍ले ओंसों बडिद्। 4तलेबिस्याँ पापए बिरोधर नेल् त्हुमा क्हमैं सिलन् त्हुबर आफेइमुँ। 5परमेश्‍वरजी लोदा सैंदा लमिंबै ताँ क्हेमैंइ म्‍लेवाइ वा? क्हेमैं खीए प्हसेमैं ग। छतसि खीजी बिइ,

“ओ ङए च्‍ह, छ्याँबै बानि तरिगे बिसि प्रभुजी क्‍हिलाइ तार झोंल् म्हैमा छेनाले मैंन्,

खीजी दण्ड पिंमा सैं च्योंब आलद्।

6तलेबिस्याँ याहवेहजी म्हाँया लब्‍मैंलाइ छ्याँबै बानि तरिगे बिसि तार झोंम्,

धै ह्रोंसजी खोबै प्हसेमैंलाइ खीजी दण्ड पिंम्।”#अयू ५:१७; हितो ३:११-१२

7आबाइ तार झोंल् म्हैब् ग बिब् मैंसि क्‍हेमैंइ सैदिद्। परमेश्‍वरजी क्‍हेमैंए फिर प्‍हसेमैंने धोंलेन् ब्यबहार लमुँ। तलेबिस्याँ आबाइ तार आझोंबै प्हसे खाब् तम् रो? 8छतसि ताँनइ योंबै दण्ड क्‍हेमैंइ आयोंस्याँ क्‍हेमैं आबाए क्ह्रोंसेंन्बै च्‍हमैं आङिं, प्रग्‍यामैं ग। 9ङ्योए आबामैंइ ङ्योलाइ तार झोंबइले ङ्योइ खेंमैं मान लम् बिस्याँ झन् ङ्योलाइ खोंयोंइ आखाँबै छ्ह पिंबै स्वर्गर्बै परमेश्‍वर आबालाइमि झन ल्हें मान लल् आत्हु वा? 10ङ्योए आबामैंइ छ्याँब् मैंब् धों तरिगे बिसि ङ्योलाइ तिस्याँदे तार झोंइ। दिलेया परमेश्‍वर आबाजीम् ङ्यो खी धोंबन् पबित्र तसि ङ्योइ आशिक योंरिगे बिसि तार झोंम्। 11तार झोंबै त्हेर दुःख तम्, दिलेया तार झोंमा सैदिल् खाँब्मैंइ लिउँइँ परमेश्‍वरए उँइँर छ्याँबै केमैं लसि ताँनने क्ह्रिसि टिल् खाँम्।

लोदा सैंदा लमिंब

12छतसि क्‍हेमैंए पडेयाबै योमैं क्वेद्, धै त्हारबै च्‍हिमैं भोंब् लद्।#यशै ३५:३ 13डुड् प्हले आथुररिगे,#12:13 डुड् प्हले आथुररिगे अर्था, क्हेमैं न्होंर्बै बिश्‍वासर भोंब् आरेब्मैं भोंब् तरिगे बरु सयारिगे बिसि क्हेमैं प्रबै घ्‍याँ सोद् लद्।#हितो ४:२६

14ताँन् म्‍हिमैंने क्ह्रिब भों लद्, धै पबित्रले छ्ह थोबै सैं लद्। छले छ्ह आथोस्‍याँ खाबज्‍यै या प्रभु म्रोंल् आखाँ। 15परमेश्‍वरए दयाम्हाँया आयोंब खाबै आतरिगे बिसि न्ह क्रों मि क्रों तद्। आक्ह्रिबै लमा क्हेमैंए न्होंरि फ्रेब् प्ह्राब् आतरिगे। आस्याँ ल्हें म्हिमैं पापर च्होयाब्मुँ।#व्य २९:१८ 16खाबज्यै या आछ्याँबै केमैं आलरिगे धै स्‍योंम्‍बै एसाव धोंबै परमेश्‍वर आम्हैब आतरिगे। चइ तिछोए ल्हागिर ह्रोंसइ योंल् त्हुबै च्ह थेबाए हग त्हेवाइ।#12:16 च्ह थेबाए हग एसाव च्ह थेब तबइले परमेश्‍वरउँइँले योंबै हग थेब मुँल।#उत २५:२९-३४ 17लिउँइँ क्रोदै चइ चए आबाने आशिक ह्रिइ दिलेया आबाउँइँले चइ आशिक आयों। तलेबिस्याँ चइ पछुत ललेया च्ह थेबाइ योंबै हग ओंसोंन् चब् तिछोने त्हेवाल। चु ताँ क्हेमैंइ सेइमुँ।#उत २७:३०-४०

18स्‍योंम्‍बै इस्राएलीमैं सिनै बिबै कोंउँइँ ह्‍याइ, दिलेया क्‍हेमैं छाबै छुइल् आँखाँबै कोंर आखइमुँ। क्हेमैं लुँरिबै मि, म्‍लोंग्‍या न्‍हाँम्‍स्यो, मिछु खैबर अथवा थेबै नाँ-खैंए चेंदो या आखइमुँ। 19क्हेमैं बेल्‍ले ङ्‍हेबै त्हुतुरुए चेंदो आखइमुँ, धै थेबै कै घ्रिए चेंदो या क्हेमैं आखइमुँ। च कै थेब्मैंइ “तारे छाबै कै थेल् आत्हुरिगे,” बिसि यो छ्युँ लइ,#प्रस १९:१६-२२; २०:१८-२१; व्य ४:११-१२; ५:२२-२७ 20तलेबिस्याँ “खेदोज्यै या च कों छुइस्याँ, चलाइ युँमाइ ल्हिसि सैद्,” बिबै ताँ चमैंइ सैदिल् आखाँ।#प्रस १९:१२-१३ 21चर म्रोंबै सै बेल्‍ले ङ्हिंन् ङ्हाँब मुँल, छतमा मोशाज्यै “ङ ङ्हिंसि त्‍हारइ” बिल।#व्य ९:१९

22दिलेया क्हेमैंम् सियोन कोंर खइमुँ, सोगों परमेश्‍वरए सहरर, स्‍वर्गर्बै यरूशलेमर, च्योलै आखाँबै स्‍वर्गदूतमैं सैं तोंदै परमेश्‍वरए मिं क्वेबै क्ल्ह्‍योर, 23स्वर्गर मिं दर्ता तबै च्‍ह थेब्मैंए ङाँर, ताँनए फिर छेनाले निसाफ लबै परमेश्‍वर ङाँर नेरो पबित्र लमिंबै ठिक के लब्मैंए प्ल्हए ङाँर क्हेमैं खइमुँ। 24छलेन क्हेमैं नेरो परमेश्‍वरए म्हाँजोर छारा बाछा फैमिंबै येशू ङाँर नेरो खीए पबित्र लमिंबै कोए ङाँर खइमुँ। येशूए कोजी हाबिलए कोइ भन्दा अझै छ्याँबै ताँ पोंम्।#12:24 हाबिलए कोइ भन्दा अझै छ्याँबै ताँ पोंम् आघें कयिनइ हाबिललाइ सैवामा हाबिलए कोइ परमेश्‍वरने ग्वार ह्रिइ, दिलेया म्‍हिमैंइ प्रभु येशूलाइ सैवासि खीए कोउँइँले म्‍हिमैंइ क्षमा योंइमुँ।#उत ४:१०

25छतसि न्ह क्रों मि क्रो तद्, ङ्योने पोंबै परमेश्‍वरजी बिब ङिंन्। तलेबिस्याँ चु पृथ्‍बीर्बै म्‍हि मोशाइ बिबै ताँ इस्राएलीमैंइ थेल् आङिंमा चमैं दण्‍डउँइँले स्योल् आखाँ बिस्याँ, झन् स्‍वर्गउँइँले पोंबै परमेश्‍वरजी बिबै ताँ आङिंब्मैं खैले स्योरल् खाँमुँ?#प्रस २०:२२ 26च त्हेर परमेश्‍वरए कैइ पृथ्‍बी त्हारल, दिलेया तारे खीजी बाछा फैसि बिइमुँ,

“अझै तिखे पृथ्‍बी मत्‍त्रे आङिं,

स्‍वर्ग या ङइ लाब्‍मुँ।”#हाग २:६

27“अझै तिखे” बिबै मतलब, लाल् खाँबै सैमैं, अथवा सृष्‍टि तबै सैमैं ताँन् स्‍योवाब्‍मुँ, दिलेया लाल् आखाँबै सैमैं चैरिब्मुँ बिब् ग।

28छतसि ङ्योइ लाल् आखाँबै ग्याल्स#12:28 लाल् आखाँबै ग्याल्स अर्थ, परमेश्‍वरए स्‍वर्गर्बै ग्याल्स योंबइले परमेश्‍वरलाइ धन्‍यबाद पिंले, धै खीए मान लदै खीने ङ्हिंदै खीजी खोल्‍ले खीए मिं क्वेले। 29तलेबिस्याँ ङ्योए परमेश्‍वर नास लवाबै मि ग।#व्य ४:२४

Currently Selected:

हिब्रू 12: GCMB

Highlight

Copy

Compare