उत्पत्ति 40
40
कैदिमैंइ म्रोंबै म्होंडमैंए अर्थ योसेफइ बिमिंब
1दे त्हे लिउँइँ मिश्रर्बै म्रुँए थुँबै सैमैं पिंखबै चिब नेरो चबै सैमैं ह्योमिंबै चिबइ म्रुँए बिरोधर अपराध लइ। 2छतमा फारो ह्रोंसए थुँबै सैमैं पिंखबै चिब नेरो चबै सैमैं ह्योमिंबै चिबने ह्रिस खइ। 3झाइले चइ चमैंलाइ दरबार रुँब्मैंए न्होंर्बै कप्तानने झेलर च्युबर पिंवाइ। च झेलर योसेफै या च्युथेंल। 4च कप्तानइ चमैं योसेफए जिम्मार थेंमिंइ। चर योसेफइ चमैंलाइ ङ्ह्योबै केमैं लमल। दे त्हे समा चमैं झेलर्न टिइ।
5झेलर फेबै मिश्रर्बै म्रुँए थुँबै सैमैं पिंनेबै चिब नेरो चबै सैमैं ह्योमिंबै चिब ङ्हिंइन तिंगें स्यो-स्योबै म्होंड म्रोंइ। 6योसेफ न्हाँगर चमैं ङाँर खमा चमैं न्हुँ लसि टिरिब् म्रोंइ। 7छतमा योसेफइ चमैंने “तिंयाँ क्हेमैं तले आतोंन्ले टिरिल?” बिसि ङ्योएइ।
8चमैंइ चने बिइ, “ङिइ म्होंड म्होंइ। दिलेया म्होंडए अर्थ बिमिंबै म्हि चुर खाबै आयों।”
योसेफइ चमैंने बिइ, “म्होंडए अर्थ परमेश्वरजी मत्त्रे सेल् खाँम्। क्हेमैंए म्होंडमैं ङने सेद्।”
9योसेफइ छबिमा म्रुँए थुँबै सैमैं पिंनेबै चिबज्यै या ह्रोंसए म्होंड सेइ। “ङए म्होंडर ङए उँइँर अँगुरए धुँ घ्रि मुँल। 10अँगुरए धुँर हाँग सों मुँल। चर च्योंरि हाँगमैं म्लोखसि टमैं या बेल्ले छेन्ले प्हारइ, धै अँगुरए झुप्पामैं पाँ-पाँले अँगुर रोसि मिंइ। 11फारोए प्हेल ङए योर मुँल। धै ङइ अँगुर च्ह्योरसि फारोए प्हेलर झोंसि च प्हेल फारोए योर थेंमिंइ।”
12योसेफइ चने बिइ, “चुए अर्थ चुन् ग: हाँग सों बिब सोंरो ग। 13सोंरो न्होंर फारो म्रुँइ क्हि झेलउँइँले तेमिंब्मुँ, धै क्हिलाइ धबै ओंसोंबै केन् पिंब्मुँ। ओंसों क्हिइ फारोलाइ थुँबै सैमैं पिंनेब् धोंलेन् धबै क्हिइ थुँबै सैमैं चए योर थेंब्मुँ। 14दिलेया क्हिए बिब् धों तमा ङलाज्यै या मैंन् ओ। गार आम्हाँदिल्ले फारोने ङए ताँ लसि चु झेलउँइँले ङ तेमिंन्। 15तलेबिस्याँ क्ह्रोंसेंन म्हिमैंइ ङलाइ हिब्रूमैंए ह्युलउँइँले क्हासि पखब् ग। धै चुरै या झेलर टिल् त्हुबै के ङइ तोइ आलल।”
16च म्होंडए अर्थ छ्याँब तब् म्रोंसि चबै सैमैं ह्योमिंबै चिबज्यै या योसेफने बिइ, “ङज्यै या छाबै म्होंड घ्रि म्होंइ। ङए क्रर क्हेंए ट्हलो सों मुँल। 17ताँन् भन्दा फिर्बै ट्हलोरि फारोए ल्हागिर ह्योमिंबै ल्हें खालर्बै चबै सैमैं मुँल। दिलेया ङए क्रर मुँबै ट्हलोउँइँले नमेंमैंइ चो-चोसि चरिल।”
18योसेफइ बिइ, “चु म्होंडए अर्थ चुन् ग: ट्हलो सों बिब सोंरो ग। 19सोंरो न्होंर फारो म्रुँइ क्हिलाइ या झेलउँइँले तेसि, क्हिए क्र थोवाब्मुँ, धै क्हि सिंधुँर च्योवाब्मुँ। धै नमेंमैंइ क्हिए से चो-चोसि चब्मुँ।”
20सोंरो लिउँइँ फारो फिबै त्हिंइ मुँल। छतमा फारो म्रुँइ च त्हिंर ह्रोंसए ताँन् चिबनाँब्मैं चब्-थुँब् लबर हुइल। धै चए थुँबै सैमैं पिंब नेरो चबै सैमैं ह्योबै चिब्मैं या झेलउँइँले तेपखसि चमैं ङाँर राल् पिंइ। 21चइ ह्रोंसए थुँबै सैमैं पिंखबै चिबलाइ धबै ओंसोंबै ह्रोंसए केन् लल् पिंइ, धै चइ फारोए प्हेल फारोए योर पिंब्रें लइ। 22झाइले योसेफइ चमैंए म्होंडए अर्थ बिमिंब् धोंले चबै सैमैं ह्योबै चिब बिस्याँ फारो म्रुँइ च्योवाइ। 23दिलेया फारोए थुँबै सैमैं पिंनेबै चिबइ योसेफलाइ आमैं, चइ योसेफलाइ म्लेयाइ।
Currently Selected:
उत्पत्ति 40: GCMB
Highlight
Share
Compare
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
