प्रस्थान 20
20
याहवेहजी ल्हैदिबै ताँमैं च्यु
(व्यवस्था ५:१-२१)
1परमेश्वरजी चु ताँन् ताँमैं बिइ: 2“ङ याहवेह क्हेमैंए परमेश्वर ग, क्हेमैं केब्छैंमैं तसि टिबै मिश्र ह्युलउँइँले ङइन तेसि पखइ।
3“छतसि ङलाइ मत्त्रे म्हाँदिद् अरू देवतामैं आम्हाँदिद्।
4“क्हेमैंइ ह्रोंसए ल्हागिर मु, पृथ्बी नेरो क्यु न्होंर मुँबै सैमैंला कु (मूर्ति) आबनेद्। 5चमैंए ओंसों आकुरद्, चमैंए पूजा आलद्, तलेबिस्याँ क्हेमैंए याहवेह परमेश्वर ङ ह्रिस लबै परमेश्वर ग। ङलाइ छेरब्मैंए पुस्ता सों, प्लि समा दण्ड पिंब्मुँ,#प्रस ३४:१७; लेबी १९:४; २६:१; व्य ४:१५-१८; २७:१५ 6दिलेया ङलाइ म्हाँया लब्मैं नेरो ङइ बिबै ताँ ङिंब्मैंए हजार-हजार पुस्ताए फिर ङ ल्हयो खब्मुँ।#प्रस ३४:६-७; गन्ती १४:१८; व्य ७:९-१०
7“ह्रोंसए याहवेह परमेश्वरए मिं फाकर्र्न आकिंन्, तलेबिस्याँ ङए मिं फाक्कर्न किंब्मैंलाइ ङइ छ्याब् ल्हैदिब्मुँ।#लेबी १९:१२
8“प्रिबै त्हिंइ पबित्र ङ्हाँल् त्हुम् बिसि सैंर मैंन्।#प्रस १६:२३-३०; ३१:१२-१४ 9ट्हुगैं समा ह्रोंसए लल् त्हुबै केमैं ताँन् लद्, 10दिलेया क्हेमैंए याहवेह परमेश्वरए ल्हागिर ङिगैं ‘प्रिबै त्हिंइ’ ग। च त्हिंइर क्हेमैंए च्ह च्हमि, केब्छैं-केब्स्योमैं, खेदोमैं नेरो आगुए ह्युलर्बै म्हिमैं खाबज्यै तो के या आलद्।#प्रस २३:१२; ३१:१५; ३४:२१; ३५:२; लेबी २३:३ 11तलेबिस्याँ टुगैंर ङ याहवेहजी मु, पृथ्बी, मा ङ्युँइ (समुन्द्र) नेरो चर मुँबै तोन्दोंरि सैमैं बनेइ, धै ङिगैंर भों न्हइ। छतसि प्रिबै त्हिंइलाइ याहवेहजी आशिक पिंसि पबित्र लइ।#उत २:१-३; प्रस ३१:१७
12“ह्रोंसए आबा-आमाए मान लद्, छलस्याँ ङइ पिंबै ह्युलर क्हेमैं ह्रिंग्यो छ्ह योंब्मुँ।#व्य २७:१६; मत्ती १५:४; १९:१९; मर्क ७:१०; १०:१९; लूक १८:२०; एफि ६:२-३
13“म्हि आसैद्।#उत ९:६; लेबी २४:१७; मत्ती ५:२१; १९:१८; मर्क १०:१९; लूक १८:२०; रोम १३:९; याक २:११
14“ब्यभिचार आलद्।#लेबी २०:१०; मत्ती ५:२७; १९:१८; मर्क १०:१९; लूक १८:२०; रोम १३:९; याक २:११
15“आह्योद्।#लेबी १९:११; मत्ती १९:१८; मर्क १०:१९; लूक १८:२०; रोम १३:९
16“ह्रोंसए ङ्हेब्टुमैंए बिरोधर स्योर तेसि छ्याब् आल्हैदिद्।#प्रस २३:१; मत्ती १९:१८; मर्क १०:१९; लूक १८:२०
17“ह्रोंसए ङ्हेब्मैंए धिं-नाँ, प्ह्रेंस्यो, केब्छैं-केब्स्योमैं, क्ल्या, गदा चए तो सै म्रोंलेया आम्रोद्।”#रोम ७:७; १३:९
इस्राएलीमैं ङ्हिंब
(व्यवस्था ५:२२-३३)
18च त्हेर काम्लि तिम्लि रासि मु ङ्हेब नेरो थुतुरिए कै थेइ धै कोंउँइँले मिखु खब म्रोंसि चमैं थरथरले त्हारसि ह्रेंगोन् रारिइ। 19चमैंइ मोशाने बिइ, “क्हि ङिने पोंइ बिस्याँ ङिइ क्हिए ताँ थेब्मुँ, दिलेया परमेश्वर ङिने आपोंरिगे। खी ङिने पोंस्याँ ङि सिब्मुँ।”#हिब्रू १२:१८-१९
20मोशाइ म्हिमैंने बिइ, “क्हेमैं आङ्हिंन्, तलेबिस्याँ क्हेमैंए जाँच लबर, क्हेमैंइ पाप आलरिगे धै खीने ङ्हिंरिगे बिसि परमेश्वर युइमु।” 21दिलेया म्हिमैं ह्रेंगोन् रारिइ। परमेश्वर मुँबै रुँदो न्हाँम्स्योर खीए ङाँर मोशा ह्याइ।
ठिममैं नेरो लल् त्हुबै केमैं
22छले ह्यामा याहवेहजी मोशाने बिइ, “ङ स्वर्गउँइँले क्हेमैंने पोंब क्हेमैंइ म्रोंइमुँ बिसि क्हिइ इस्राएलीमैंने बिद्। 23क्हेमैंइ ह्रोंसए ल्हागिर चाँदि नेरो माराए देवतामैं बनेसि आफ्योद्।
24“क्हेमैंइ ङए ल्हागिर सए ख्रो पिंबै क्ल्ह्यो बनेसि मिइ ख्रोंबै ख्रोमैं, क्ह्रिमिंबै ख्रोमैं, क्युमैं नेरो खेदोए ख्रोमैं पिंन्। ङए मिंए मान लबै क्ल्ह्योजरे ङ युसि क्हेमैंलाइ आशिक पिंब्मुँ। 25ङए ल्हागिरि क्हेमैंइ युँमाए ख्रो पिंबै क्ल्ह्यो बनेमा कुन्दिबै युँमाए ख्रो पिंबै क्ल्ह्यो आबनेद्। तलेबिस्याँ छिनइ युँमार कुन्दिमा क्हेमैंइ ख्रो पिंबै क्ल्ह्यो अशुद्ध लब्मुँ।#व्य २७:५-७; यहो ८:३१ 26छलेन क्हेमैंए म्रोंल् आतबै सै आम्रोंरिगे बिसि लिउँइँले ङए मिंर ख्रो पिंबै क्ल्ह्योर आक्रेद्।
Currently Selected:
प्रस्थान 20: GCMB
Highlight
Share
Compare
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
