२ कोरिन्थी 6
6
1ङि परमेश्वरने बालु के लब्मैं तबइले क्हेमैंने यो छ्युँ लमुँ, क्हेमैंइ योंबै परमेश्वरए दयाम्हाँया छलेन् खेरो ह्याल् आपिंन्। 2तलेबिस्याँ
“क्हेमैंइ ग्वार ह्रिमा ङइ क्हेमैंए ताँ थेइ,
झाइले जोगेमिंबै त्हिंइर ङइ क्हेमैंलाइ ल्होमिंइ।”
बिसि परमेश्वरजी बिइमुँ। थेद्, परमेश्वरए दयाम्हाँया योंबै त्हे तोगोंन् ग, मुक्ति योंबै त्हिंइ तोगोंन् ग।#यशै ४९:८
पावलए दुःख
3ङिइ परमेश्वरए सेवा लमा आगुइ ताँ सेन् आछेरिगे बिसि ङिइ खाबलाज्यै सैं नल् लबै के आल। 4बरु ङि “परमेश्वरए के लबै चेलामैं मुँन” बिब म्हिमैंइ सेरिगे बिसि ङिइ खोंयोंन् बिलै छ्याँबै के लसि उँइँम्। खैतबै दुःखन् तलेया ङिइ सैदिम्। 5धोंलै, टिंलै, झेलर च्युलै, हुल त्हुँसि दुःख पिंलै, गारो केमैं लल् त्हुलै, न्हरु च्हुइल् आयोंलै, चल्-थुँल् आयोंलै,#चिब्मैं १६:२३ 6ङि स्योर आतेल्ले, ज्ञान-बुद्धिए ताँमैं बिदै, दुःख सैदिदै, ताँनए फिर ल्हयो खदै, पबित्र प्ल्हउँइँले भों योंसि खाबलाज्यै या आफेलल्ले ताँनने म्हाँया लम्। 7क्ह्रोंसेंन्बै ताँ बिदै, परमेश्वरउँइँले भों योंसि खीए फिर थेबै बिश्वास लदै खीए बचनर बिब् धोंलेन्#6:7 खीए फिर थेबै बिश्वास लदै खीए बचनर बिब् धोंलेन् ग्रिक क्युइर, क्योलों त्हेब्रे योर हातियार छेदै (एफिसी ६:१६-१७)। ङिइ ठिक के लइमुँ। 8ङिइ मानै योंइ, हेलै तइ। छ्याँब मिं योंइ, आछ्याँब मिं योंइ। म्हिमैंइ ङिलाइ स्योर्गु मैंम्, दिलेया ङि क्ह्रोंसेंन्बै ताँ पोंब्मैं ग। 9ङिलाइ खाबज्यै ङो आसे बिलेया ताँनइ ङो सेइमुँ। ङि सियाब् धों तलेया ङि अझै सोगोंन् मुँ। ङिलाइ सजैं पिंलेया तिंयाँ समा आसैइमुँ। 10न्हुँ खलेया ङि खोंयोंन् बिलै सैं तोंरिम्, ङ्हाँदुमैं तलेया ङिइ ल्हें म्हिमैंलाइ प्ल्होब लमिंम्, ङि तोइ आरेब् धों तलेया ख्रीष्टए फिर बिश्वास लबइले ङिइ तोन्दोंरि सै योंइमुँ।
ङिइ क्हेमैंए फिर म्हाँया लब् धोंले ङिलाज्यै म्हाँया लद्
11ओ कोरिन्थथेंमैं, ङिइ सैंर तोइ ताँ आलोल्ले छेनाले क्हेमैने बिमिंइमुँ। 12ङिइमि क्हेमैंए फिर बेल्ले म्हाँया लइमुँ, बरु क्हेमैंइ गो ङिए फिर म्हाँया आलब् धों तइमुँ। 13ङइ क्हेमैंने ह्रोंसए प्हसेमैंने धोंले चु ताँ बिमुँ: ङिइ क्हेमैंने लब् धोंबै म्हाँया ङिलाज्यै लद्।
ख्रीष्टए फिर बिश्वास आलब्मैंने घ्रि तसि आप्रद्
14येशू ख्रीष्टए फिर बिश्वास आलब्मैंने घ्रि तसि आप्रद्। धर्मि नेरो अधर्मि खैले क्ह्रिमुँ? चारबै ह्वे नेरो मिछु खैब खैले बालु तल् खाँमुँ? 15येशू ख्रीष्ट नेरो दुष्ट खैले क्ह्रिमुँ? बिश्वास लब्मैं बिश्वास आलब्मैंने खैले घ्रि तल् खाँम्? 16ङ्यो परमेश्वर टिबै क्ल्ह्यो तबइले ङ्योइ कु म्हाँदिल् खाँम्मा? आखाँ! तलेबिस्याँ ङ्योए ज्यु क्ह्रोंसेंन खोंयोंइ तरिबै परमेश्वर टिबै क्ल्ह्यो ग। परमेश्वरजी ङ्योए बारेर छ बिइमुँ:
“ङए म्हिमैंने ङ टिब्मुँ,
झाइले चमैंने प्रब्मुँ।
ङ चमैंए परमेश्वर तब्मुँ,
झाइले चमैं ङए म्हिमैं तब्मुँ।”#१ कोर ३:१६; ६:१९; लेबी २६:१२; इज ३७:२७
17छतसि याहवेहजी छ बिइमुँ:
“क्हेमैं च आछ्याँबै म्हिमैंए म्हाँजोउँइँले त्होंइ खो,
क्हेमैं चमैं ङाँइले स्यो तल् त्हुम्।
पापर च्होवाबै सैमैं आछुइद्,
झाइले ङइ क्हेमैं ङ ङाँर खल् पिंस्यो।#यशै ५२:११
18ङ क्हेमैंए आबा तब्मुँ,
झाइले क्हेमैं ङए च्ह-चमिंमैं तब्मुँ।
बिसि ताँन् भन्दा थेबै शक्ति मुँबै याहवेहजी बिइमुँ।”#२ शमू ७:१४; १ इति १७:१३; यशै ४३:६; यर ३१:९
Currently Selected:
२ कोरिन्थी 6: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
