२ कोरिन्थी 2
2
1ङइ लमा क्हेमैंए सैं आनरिगे बिसि ङ धबै क्हेमैं ङाँर आखबै सैं लइ, 2तलेबिस्याँ ङइ क्हेमैंए सैं नल् लवाइ बिस्याँ खाबइ ङए सैं क्होमिंम्? ङए सैं क्होमिंबम् क्हेमैंन् ग। 3छतसि ङ क्हेमैं ङाँर खमा ङए सैं तोंन् लमिंब्मैं ङाँइलेन् ङए सैं च्योंब् तल् आत्हुरिगे बिसि ओंसोंबै प्ह्रिछ्यार क्हेमैंलाइ छ छ लद् बिसि प्ह्रिब् ग। ङए सैं तोंमा#2:3 ङए सैं तोंमा चमैंइ पावल प्ह्रिबै ताँमैं ङिंबइले पावल चमैं ङाँर खमा सैं तोंब्मुँ, झाइले चमैं ताँन् सैं तोंब्मुँ बिइ। क्हेमैं या सैं तोंम् बिब ङइ सेइमुँ। 4तलेबिस्याँ क्हेमैंए सैं नल् लबर आङिं, बरु क्हेमैंए फिर ङइ कति थेबै म्हाँया लम् बिब क्हेमैंइ सेरिगे बिसि सैंर बेल्ले न्हुँ लसि क्रोदै क्हेमैंलाइ च प्ह्रिछ्या प्ह्रिल।
पाप लबै म्हिलाइ क्षमा पिंन्
5क्हेमैं न्होंर्बै खाबज्यै क्हेमैंलाइ सैं नल् लवाइमुँ बिस्याँ, चइ ङए सैं नल् लब आङिं, क्हेमैंए सैं नल् लब् ग। तोन् तलेया चए फिर सैं सारो आलद्। 6क्हेमैं न्होंर्बै ल्हें म्हिमैंइ चलाइ सजैं पिंसेरो तइ। 7तारे क्हेमैंइ च म्हिलाइ क्षमा पिंसि भों या पिंल् त्हुम्। छ आलस्याँ च म्हि झन् न्हुँ लसि सैं च्योंब तम्। 8छतसि क्हेमैंइ च म्हिलाइ अझै म्हाँया लद्। क्हमैंइ म्हाँया लइमुँ बिब चइ सेरिगे बिसि ङइ क्हेमैंने यो छ्युँ लम्। 9क्हेमैंए जाँच लबै ल्हागिर नेरो ताँन् सैर क्हेमैंइ ङइ बिबै ताँ ङिंम् उ आङिं बिबै ताँ था सेबर ङइ च ओंसोंबै प्ह्रिछ्या प्ह्रिल। 10क्हेमैंइ खाबलाइ क्षमा पिंमुँ ङज्यैया चलाइ क्षमा पिंम्। तलेबिस्याँ ङइ खाबलाज्यै क्षमा पिंइमुँ बिस्याँ क्हेमैं क्ह्रिरिगे बिसि ख्रीष्ट येशूए उँइँर क्षमा पिंइमुँ। 11ङ्योए फिर दुष्टइ तोइ लल् आखाँरिगे बिसि च पाप लबै म्हिलाइ क्षमा पिंल् त्हुम्, तलेबिस्याँ दुष्टइ खैले पापर च्होवाम् बिब ङ्योइ सेइमुँ।
त्रोआस नाँसर फेनेसि पावल बेल्ले आतिदिब
12ख्रीष्ट येशूउँइँले खबै सैं तोंबै ताँ बिबर ङ त्रोआस बिबै नाँसर ह्यामा प्रभुजी ङलाइ चर खीए के लबै मौका पिंइ। 13दिलेया चर ङए अलि तीतसलाइ त्होल् आयोंमा ङए सैं आतों। छतसि तीतसने घ्याँर त्होम् उ ङ्हाँसि चर्बै म्हिमैंने बिदा तसि ङ माकेडोनिया ह्युलउँइँ ह्याइ।#चिब्मैं २०:१
ख्रीष्टने घ्रिन् तसि ट्होब
14परमेश्वरलाइ धन्यबाद तरिगे!#2:14 परमेश्वरलाइ धन्यबाद तरिगे! च क्ल्ह्योरि तीतसने त्होसि पावलइ कोरिन्थथेंमैंए बारेर छ्याँबै ताँ थेल् योंसि परमेश्वलाइ धन्यबाद पिंइ। (२ कोर ७:६-७) तलेबिस्याँ खीजी ङ्योलाइ ख्रीष्ट येशूने घ्रिन् लमिंसि ट्होगों घ्याँर डोरेब्मुँ! धै छ्याँबै थाँ खबै धुप धों तबै खीए ज्ञानए ताँमैं ङ्योउँइँलेन् ताँन् क्ल्ह्योजरे फेनेब्मुँ। 15तलेबिस्याँ मुक्ति योंब्मैं नेरो नास तबि छेब्मैंए म्हाँजोरै या ङ्यो परमेश्वरए ल्हागिर ख्रीष्टए छ्याँबै थाँ खबै धुप धों तइमुँ। 16दिलेया नास तब्मैंए ल्हागिर ङ्यो सिनु थाँ नाँब् धों तम्। छतसि चमैं नर्गर फेनेम्। मुक्ति योंब्मैंए ल्हागिर ङ्यो लिंबै थाँ खबै धुप धोंन् तम्। छतसि चमैं स्वर्गर फेनेम्। च्हौ थेबै के खाबइ लल् खाँम्? 17ल्हें म्हिइ धोंले परमेश्वरए ताँ छों लब्मैं ङि आङिं, तलेबिस्याँ ङिलाइमि परमेश्वरजीन् कुल्मिंब् ग। छतसि ङि ख्रीष्टए सेवा लसि खीए ओंसों स्योर ताँ आकोंल्ले परमेश्वरए ताँ पोंमुँ।
Currently Selected:
२ कोरिन्थी 2: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
