२ कोरिन्थी 13
13
लोदा सैंदा लबै ताँ
1तारे ङ सोंखेबै लार क्हेमैं ङाँर खसिन् मुँ। खाब् मुँलै म्हिए फिर तोइ दोष ल्हैदिस्याँ परमेश्वरए छ्वेर प्ह्रिब् धोंले, “म्हि ङ्हिं सोंइ बिबै ताँ क्ह्रिस्याँ मत्त्रे च ताँ पक्का तम्।”#व्य १७:६; १९:१५ 2ओंसोंन् ङ क्हेमैं ङाँर मुँमा पाप लब्मैं आलब्मैं ताँनलाइ ङइ लोदा सैंदा लब् धोंलेन्, तोगो ह्रेंगो मुँलेया ङइ क्हेमैंलाइ लोदा सैंदा लम्: ङ धबै क्हेमैं ङाँर खमा ओंसों पाप लब्मैं मत्त्रे आङिं, ङइ लोदा सैंदा लसेया अझै पाप के लरिब्मैं खाबै मुँस्याँ चमैंलाज्यै या ङइ सजैं पिंब्मुँ। 3छतसि ङउँइँले ख्रीष्ट पोंम् उ आपों बिब क्हेमैंइ प्रमाण म्हैम् बिस्याँ छेनाले मैंन्, ख्रीष्टजी क्हेमैंए म्हाँजोर खाबलाज्यै आफेलल्ले निसाफ लमा खी आभोंब् तरिब् आरे, खी बेल्ले भोंब् तब्मुँ। 4तलेबिस्याँ भों आरेबै म्हि धों तसि खी क्रूसर च्योसि सिइ, दिलेया परमेश्वरए शक्तिजी खीलाइ धबै सोगों लमिंइ। येशूने घ्रिन् तमा ङि भों आरेब्मैं तलेया क्हेमैं छ्याँब् तरिगे बिबै ल्हागिर परमेश्वरजीन् ङिलाइ ख्रीष्टजी थोब् धों तबै छ्ह थोबै भों पिंब्मुँ।
5क्हेमैं बिश्वासर भोंब मुँ उ आरे बिसि ह्रोंसए जाँच लद्। जाँचर फेल् आतस्याँ येशू ख्रीष्ट क्हेमैंने बालु तम् बिसि क्हेमैंइ सेल् त्हुम्। 6दिलेया ङि फेल् आतइमुँ बिबै ताँ क्हेमैंइ सेब्मुँ बिसि ङइ आशा लइमुँ। 7ङिइ छ्याँबै के लसि पास तइ बिसि क्हेमैंने उँइँबर आङिं, बरु ङि फेल् तब् धों तलेया क्हेमैंइ तोइ पाप आलल्ले छ्याँबै के लरिगे बिसि ङिइ परमेश्वरने क्हेमैंए ल्हागिर प्राथना लम्। 8तलेबिस्याँ ङि येशू ख्रीष्टउँइँले खबै क्ह्रोंसेंन्बै सैं तोंबै ताँ मत्त्रे पोंम्, क्ह्रोंसेंन्बै ताँ ङिइ थोल् आखाँ। 9ङि छले भों आरेब् धों तलेया क्हेमैं भोंब् तमा ङि सैं तोंम्। छतसि क्हेमैं तोन्दोंरि सैर बिब् धों तरिगे बिसे या ङिइ प्राथना लम्। 10क्हेमैं ङाँर ङ खमा प्रभुजी ङलाइ पिंबै अधिकारउँइँले ङइ क्हेमैलाइं हौदिल् आत्हुरिगे बिसि क्हेमैंने ह्रेंगो मुँमा ङइ चु प्ह्रिछ्या प्ह्रिइमुँ। क्हेमैंए न्होह्रों लबर च अधिकार ङलाइ पिंब आङिं, बरु क्हेमैं छ्याँब् तरिगे बिसि पिंब् ग।
आखिरि ताँ
11ओ अलि-अङाँमैं, छेन्ले टिद् ओ, जय मसीह। ताँन् केमैं छेनाले लबै भों लदु, घ्रिइ-घ्रिए सैं क्होमिंबै के लदु, क्ह्रिसि टिदु, घ्रिइ-घ्रिलाइ सैदिदु। झाइले खीए म्हाँयाउँइँले ङ्योए सैं क्होल् लमिंबै परमेश्वर क्हेमैंने तब्मुँ।
12छ्याँबै खोंउँइँले#13:12 छ्याँबै खोंउँइँले ग्रिक क्युइ रि, पबित्रले अँखलो झोंसि घ्रिइ घ्रिने जय मसीह लद्।
13छुइले या परमेश्वरए ताँन् म्हिमैंइ क्हेमैंने जय मसीह बिमिंइमुँ।
14प्रभु येशू ख्रीष्टजी पिंबै दयाम्हाँया, परमेश्वर आबाजी लबै म्हाँया नेरो पबित्र प्ल्हउँइँले तबै संगति क्हेमैं ताँनने तरिगे।
Currently Selected:
२ कोरिन्थी 13: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
