१ पत्रुस 1
1
1येशू ख्रीष्टजी कुल्मिंबै चेला चिब ङ पत्रुसउँइँले पोन्टस, गलातिया, कापाडोकिया, एशिया नेरो बिथिनिया तिगोंन् प्हुँइ टिब्मैंलाइ जय मसीह मुँ! 2येशू ख्रीष्टजी बिबै ताँ क्हेमैंइ ङिंसि खीए कोजी ख्रुमिंसि पबित्र प्ल्हउँइँले चोखो तबै ल्हागिर परमेश्वर आबाजी क्हेमैंलाइ स्योंमन् त्हाँल। क्हेमैं ताँनए फिर परमेश्वरए दयाम्हाँया नेरो शान्ति खोंयोंन् बिलै ल्हें ततै ह्यारिगे।
छारा छ्ह क्ह्रोंसेंन्ले योंबै आशा
3ङ्योए प्रभु येशू ख्रीष्टए आबालाइ ङ्योइ धन्यबाद पिंल् त्हुम्! तलेबिस्याँ खीए शक्तिजी येशू ख्रीष्टलाइ सिबउँइँले धबै सोगों लमिंबइले ङ्योइ छारा छ्ह योंइ। छतसि ङ्योइ खोंयोंन् बिलै परमेश्वरने टिल् योंबै क्ह्रोंसेंन्बै आशा योंइमुँ। 4स्वर्गर क्हेमैंए ल्हागिर साँथेंबै आशिक खोंयोंइ नास आतब, खोंयोंइ आङ्योंलोंब बेल्ले छ्याँब मुँ। 5क्हेमैंइ परमेश्वर फिर बिश्वास लइ। छतसि खीए शक्तिउँइँले क्हेमैंइ चु आशिक योंबै ल्हागिर खीजी क्हेमैंलाइ जोगेसि थेंइमुँ। च आशिक चु ह्युल नुयाबै त्हिंइर खीजी उँइँमिंब्मुँ।
6छतसि तोगो तिस्या क्हेमैंइ ल्हें खालर्बै दुःख भुँदिल् त्हुलेया क्हेमैं सैं तोंरिद्। 7च दुःखमैं तले तम् बिस्याँ क्हेमैंइ छेनाले बिश्वास लन उ आलन बिसि तब् ग। मारा मिर ख्रोंसि जाँच लब् धोंले क्हेमैंलाज्यै या जाँच लब् ग, दिलेया क्हेमैंए बिश्वास नास तयाबै मारा भन्दा सै ल्हें फेम्। छतसि येशू ख्रीष्ट एयुबै त्हिंइर क्हेमैंए बिश्वास बेल्ले छ्याँब तसि क्हेमैंइ स्याबासि, मान नेरो छ्याँबै बयन योंब्मुँ। 8क्हेमैंइ येशू ख्रीष्टलाइ खोंयोंइ आम्रोंइमुँ, दिलेया खीलाइ म्हाँया लरिइमुँ। खीलाइ तोगो आम्रोंलेया खीए फिर बिश्वास लइमुँ। धै बेल्ले सैं तोंरिइमुँ, 9तलेबिस्याँ क्हेमैंइ परमेश्वरए फिर बिश्वास लबइले क्हेमैंइ मुक्ति योंइमुँ।
10परमेश्वरजी क्हेमैंलाइ पिंबै चु मुक्तिए बारेर स्योंम्बै अगमक्तामैंज्यै या क्होल् म्हैल, धै परमेश्वरजी क्हेमैंलाइ पिंबै दयाम्हाँयाए बारेर ताँ पोंइ। 11अगमबक्तामैंइ चु खैले तम् खोंयों तम् बिसि क्होल् म्हैरिल। ख्रीष्टजी ल्हें दु:ख नोल् त्हुब्मुँ धै लिउँइँ थेबै मान योंब्मुँ बिसि ओंसोंन् ख्रीष्टए प्ल्हजी चमैंलाइ उँइँमिंल। 12चमैंने उँइँमिंबै ताँ चमैंए ल्हागिर आङिं, चमैंइ क्हेमैंए सेवा लरिल बिसि परमेश्वरजी सेल् पिंइ। धै चु ताँ स्वर्गउँइँले कुल्मिंबै पबित्र प्ल्हउँइँले क्हेमैंने सैं तोंबै ताँ बिमिंबै म्हिमैंउँइँले क्हेमैंइ थेइमुँ। स्वर्गदूतमैंज्यै या चु ताँ था सेदा ङ्हाँइमुँ।
येशूए फिर बिश्वास लब्मैंए बानि ब्योर
13छतसि च्हैंब् मैंब् लद्, न्ह क्रों मि क्रों तद्। येशू ख्रीष्ट धबै स्वर्गउँइँले युमा क्हेमैंइ योंबै दयाम्हाँयार क्ह्रोंसेंन्बै आशा थेंन्। 14क्हेमैं परमेश्वरए ताँ ङिंबै प्हसेमैं तबइले ओंसों येशूलाइ ङो आसेमा लबै आछ्याँबै केमैं तारे आलद्। 15क्हेमैंलाइ हुइबै परमेश्वर पबित्र मुँ, छतसि क्हेमैं या ह्रोंसए छ्हर तोन्दोंरि सैर पबित्र तद्। 16तलेबिस्याँ ठिमर छले प्ह्रिइमुँ,
“क्हेमैं पबित्र तद्, तलेबिस्याँ ङ पबित्र मुँ।”#लेबी ११:४४-४५; १९:२
17म्हिमैंइ लबै के ङ्ह्योसि खाबै आफेलनाले निसाफ लबै परमेश्वरलाइ आबा बिसि प्राथना लम् बिस्याँ, चु ह्युलर टिबै छ्ह तिगोंन् परमेश्वरने ङ्हिंसि टिद्। 18क्हेमैंए खेमैंउँइँले खबै स्योलिबै रोसउँइँले क्हेमैंलाइ फ्रेमिंबर तो सै फोसि क्हेमैंलाइ खामिंइमुँ बिसि क्हेमैंइ सेइमुँ। मारा चाँदि धोंबै नास तबै सैमैंउँइँले आङिं, 19दिलेया तोइ खोट नेरो तोइ छ्याब् आरेबै क्यु झज धों तसि ख्रीष्टजी को पिंसि क्हेमैंलाइ खामिंइमुँ। 20परमेश्वरजी ह्युल बनेब् भन्दा ओंसोंन् ख्रीष्टलाइ त्हाँल, दिलेया क्हेमैं जोगेबै ल्हागिर चु नुखबै त्हेर खी युइ। 21क्हेमैंइ ख्रीष्टउँइँले परमेश्वरए फिर बिश्वास लइ। परमेश्वरजी ख्रीष्टलाइ सिबउँइँले धबै सोगों लमिंसि बेल्ले थेबै मान पिंइ, छतसि क्हेमैंइ परमेश्वरए फिर बिश्वास नेरो आशा थेंल् खाँइ।
22क्हेमैंइ क्ह्रोंसेंन्बै परमेश्वर म्हाँदिसि ह्रोंसलाइ चोखो लबइले, ह्रोंसए आघें अलिलाइ आफेलनाले म्हाँया लद्, धै घ्रिइ घ्रिलाइ सैं न्होंउँइँलेन् म्हाँया लद्, 23तलेबिस्याँ क्हेमैंइ परमेश्वरए खोंयोंइ तरिबै सोगों बचनउँइँले खोंयोंइ आखाँबै छ्ह योंइमुँ। चु छ्ह क्हेमैंए आबा-आमाउँइँले योंब आङिं, खोंयोंन् बिलै तरिबै सोगों बचनउँइँले छारा तसि क्हेमैं फिइमुँ। 24तलेबिस्याँ छ्वेर छले प्ह्रिइमुँ,
“ताँन् म्हिमैं छि धों तब् ग,
म्हिए ज्यु कति छ्याँब मुँलेया ट धों तब् ग।
छि ङ्योंलोयाम् धै टै या खारयाम्।
25दिलेया परमेश्वरए बचन खोंयोंन् बिलै तरिम्।”#यशै ४०:६-८
क्हेमैंने बिमिंबै सैं तोंबै ताँ चुन् ग।
Currently Selected:
१ पत्रुस 1: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
