१ कोरिन्थी 4

ख्रीष्‍टजी कुल्मिंबै चेला चिब्मैं

1छतसि ङिलाइ येशू ख्रीष्‍टए के लब्मैं नेरो परमेश्‍वरउँइँले खबै बुद्धिए ताँमैं ङिए जिम्‍मार थेंइमुँ बिसि म्हिमैंइ मैंल् त्‍हुम्। 2परमेश्‍वरए छाबै के लब्मैं ताँनइ भर लल् खाँब्मैं तल् त्हुम्। 3क्हेमैंइ ङए फिर छ्याब् ल्हैदिलेया, थे-थेबै अदालतर बोसि दोष ल्हैदिलेया, ङ तोइ धोंइ आङ्हाँ। ङइ छ्याँबै केमैं लइमुँ उ आलइमुँ बिसि ङइ ह्रोंसलाज्यै या जाँच आल। 4तलेबिस्याँ ङइ आछ्याँबै के तोइ आलइमुँ बिसि ङए सैंर मैंलेया ङ छ्याब् आरेब् तइ बिल् आखाँ। ङलाइ जाँच लब खाब् जा बिस्याँ प्रभुन् ग। 5छतसि ठिक त्हे आतन् समा खाबै फिरै या क्हेमैंइ छ्याब् आल्हैदिद्, ताँनए निसाफ प्रभुजीन् च त्हेर लम्। म्हिमैंइ आसेल्‍ले लबै आछ्याँबै केमैं या ताँनइ सेल् लमिंब्मुँ, छलेन म्‍हिमैंए सैं न्‍होंर्बै ताँमैं या उँइँमिंब्‍मुँ। धै म्हिमैंइ खैबै केमैं लइमुँ च अनुसार्बै इनाम परमेश्‍वरजी चमैंलाइ पिंब्‍मुँ।

6ओ अलि-अङाँमैं, क्हेमैं बिब् धों तरिगे बिसि ङइ क्हेमैंने अपोल्‍लस नेरो ङए नमुना उँइँसि चु ताँमैं प्ह्रिइमुँ। तलेबिस्याँ ङि धोंलेन् क्हेमैं या परमेश्‍वए छ्वेर बिब् धोंले छ्ह थोल् खाँरिगे, धै क्हेमैं न्होंरि खाबज्यै या कोइलाइ थेब् लब कोइलाइ च्योंब् लबै के आतरिगे। 7खाबइ क्हिलाइ अरूमैं भन्दा थेब् लमिंइ? क्‍हिने मुँबै सैमैं ताँन् परमेश्‍वरजी पिंब आङिं वा? क्‍हिइ योंबै तोन्दोंरि सैमैं परमेश्‍वरजी पिंबै बरदान आङिं वा? छतसि क्हेमैं तले थेब् प्हैंमुँ?

8क्‍हेमैंइ चैदिबै सैमैं तोन्दोंरि योंल् खाँइमुँ वा? क्‍हेमैं प्‍ल्‍होल् खाँइमुँ वा? ङि आरेल्‍लै या क्हेमैं म्रुँ तइमुँ वा? ओं, ङि या क्‍हेमैंने बालुन् ग्याल्स लल् खाँरिगे बिसि क्‍हेमैंइ क्‍ह्रोंसेंन ग्याल्स लस्याँ तमल! 9ङए सैंरम् ङि कुल्मिंबै चेला चिब्मैंलाइमि परमेश्‍वरजी ताँन् भन्दा च्‍योंबै क्‍ल्‍ह्‍योर थेंब् धों ङ्हाँइमुँ, तलेबिस्याँ चु ह्‍युलए उँइँर, म्हिमैंए उँइँर नेरो स्वर्गदूतमैंए उँइँरै या ङि सिबै सजैं योंल् त्हुबै म्हि धोंन् तइमुँ। 10ङिम् ख्रीष्‍टए ल्हागिर बुद्धि आरेब्मैं धोंन् तइमुँ, क्‍हेमैंम् ख्रीष्‍टर बुद्धि मुँब्मैं धों तइमुँ! ङि भों आरेब्मैं धोंन् तइमुँ, क्हेमैंम् भों मुँब्मैं धों तइमुँ! म्‍हिमैंइ क्‍हेमैंलाइ मान लम्, ङिलाइ हेल लम्। 11तिंयाँ समा ङिइ धोंब-टिंब सैदिसिन् मुँ, ङि फो ख्रेंइमुँ, क्यु पिइमुँ, क्‍लुनान् मुँ, ङिल धिं नाँ या आरे, 12चब-थुँबै ल्हागिर ङिइ ह्रोंसइन बेल्‍ले दुःख लमुँ। म्हिमैंइ ङिए फिर सराप झोंलेया ङिइ चमैंए फिर आशिकन् पिंमुँ। म्हिमैंइ ङिने खैन् ललेया ङि सैदिम्।#चिब्मैं १८:३ 13म्‍हिमैंइ ङिए आब्रु वानाबिलेया ङिइ चमैंने छ्याँबै सुँलेन् पोंमु। तोगो समा ङि म्हिमैंए उँइँर ह्‍युलर्बै केर आफेसि वाबै कसिं धोंन् तइमुँ।

14क्‍हेमैंलाइ फाफिन् लबर ङइ चु ताँ प्ह्रिब् आङिं, ह्रोंसए खोबै कोलोमैंलाइ धोंलेन् क्हेमैंलाज्यै या लोदा सैंदा लबर प्ह्रिब् ग। 15तलेबिस्याँ क्हेमैंलाइ ख्रीष्‍टए ताँ लोमिंबै म्हिमैं हजार च्‍युन् मुँलेया ख्रीष्‍टउँइँले खबै सैं तोंबै ताँ धाँसे ओंसो क्हेमैंने बिमिंसि क्हेमैंलाइ ख्रीष्‍ट ङो सेल् लमिंबै क्हेमैंए आबा ङन् ग। 16छतसि ङइ लब् धोंन् लद् बिसि ङ क्हेमैंने यो छ्युँ लम्।#१ कोर ११:१; फिलि ३:१७ 17ङइ क्हेमैं ङाँर प्रभुए फिर बिश्‍वास लबै खोबै तिमोथी कुलइमुँ। च ङए च्‍ह धोंन् तब् ग। ङइ क्ल्ह्‍यो-क्ल्ह्‍योर्बै बिश्‍वासीमैंलाइ लोमिंब् धोंलेन् ख्रीष्‍टर ङइ खैबै छ्ह थोइमुँ बिबै ताँ चइ क्‍हेमैंने बिब्‍मुँ।

18ङ क्हेमैं ङाँर आखलै ङ्हाँसि क्‍हेमैंए न्‍होंरै या को-कोइ थेब् प्हैंसि प्रइमुँ रो। 19दिलेया प्रभुए सैं मुइबिस्‍याँ ङ क्‍हेमैं ङाँर युनन् खब्मुँ। धै च थेब् प्हैंसि प्रब्मैंए ताँ आङिं, चमैंए के लबै शक्‍ति क्होब्मुँ। 20तलेबिस्याँ परमेश्‍वरए ग्याल्स म्हिमैंइ पोंबै ताँर आङिं, खीउँइँलेन् खबै शक्‍तिर मुँ। 21क्‍हेमैंए सैंर खै ङ्हाँमुँ, ङ क्‍हेमैं ङाँर प्हरे छेसि खले उ? म्हाँया नेरो लोदा सैंदा लबर खले?

Currently Selected:

१ कोरिन्थी 4: GCMB

Highlight

Copy

Compare