ရိမ့ၤ 3
3
1မ့မ့ၢ်ဒ်န့ၣ်ဒီး, မ့ၢ်ပှၤယူဒၤဖိအိၣ်ဒီးတၢ်အဘျုးအါန့ၢ်ပှၤကလုာ်ဂၤတဖၣ်တမံၤမံၤဧါ. ဒီးတၢ်ဒိးတၢ်ကူးတရံးန့ၣ် အလုၢ်အပှ့ၤမ့ၢ်အအိၣ်တမံၤမံၤဧါ. 2အိၣ်အါဝဲနီၢ်နီၢ်လၢကျဲကိးဘိဒဲးန့ၣ်လီၤ. အခီၣ်ထံးကတၢၢ်တမံၤန့ၣ်, ကစၢ်ယွၤဟ့ၣ်လီၤအးလီၤအတၢ်ကစီၣ်လၢပှၤယူဒၤဖိတဖၣ်န့ၣ်လီၤ. 3အဝဲသ့ၣ်အကျါတနီၤအကလုၢ်မ့ၢ်တတီဘၣ်ဒီးတၢ်ကမၤအသးဒ်လဲၣ်. မ့ၢ်အတၢ်ကလုၢ်တတီအံၤကမၤဟးဂီၤကွံာ်ကစၢ်ယွၤအတၢ် ကလုၢ်တီန့ၣ်ဧါ. 4တမ့ၢ်ဒ်န့ၣ်ဘၣ်. ပှၤကညီကိးဂၤဒဲးမ့မ့ၢ်ပှၤလီတၢ်သနာ်က့, ကစၢ်ယွၤတီဝဲလိၤဝဲလီၤ. ဒ်တၢ်ကွဲးအသးစံးဝဲအသိး,
“နကဘၣ်တၢ်ပာ်တီပာ်လိၤနၤလၢ
နတၢ်ကတိၤတဖၣ်အပူၤ,
ဒီးနကမၤနၢၤတၢ်ဖဲ နဘၣ်တၢ်လိာ်ကွီၢ်နၤန့ၣ်လီၤ.”
5ဘၣ်ဆၣ်ဒီး, ပတၢ်မၤကမၣ်တၢ်န့ၣ်မ့ၢ်မၤဖျါထီၣ်ကစၢ်ယွၤ အတၢ်မၤလၢအဘၣ်န့ၣ်ဒီးဆှံဆှံပစံးမနုၤကသ့န့ၣ်လဲၣ်. မ့ၢ်ပကစံးလၢကစၢ်ယွၤမၤကမၣ်တၢ်ဖဲအဝဲစံၣ်ညီၣ်ပှၤန့ၣ်ဧါ. (ယကတိၤတၢ်ဒ်ပှၤကညီအသိးလီၤ.) 6တမ့ၢ်ဒ်န့ၣ်ဘၣ်. ယွၤမ့ၢ်တတီတလိၤဘၣ်ဒီး, အဝဲစံၣ်ညီၣ်ဟီၣ်ခိၣ်ကသ့လၢကျဲဒ်လဲၣ်.
7ဘၣ်ဆၣ်ဒီး, ယတၢ်တတီတလိၤဘၣ်န့ၣ်မ့ၢ်မၤဖျါဂ့ၤဒိၣ်ထီၣ် ကစၢ်ယွၤအတၢ်တီတၢ်လိၤလၢကစၢ်ယွၤအလၤကပီၤအဂီၢ်ဒီး, ဘၣ်မနုၤအဃိလၢယကဘၣ်တၢ်စံၣ်ညီၣ်ဒံးယၤဒ်ပှၤတၢ်ဒဲးဘးဖိ တဂၤအသိးန့ၣ်လဲၣ်. 8မ့မ့ၢ်ဒ်န့ၣ်ဒီးမ့ၢ်ပကစံး, “မ်ပကမၤသကိးတၢ်အၢဒ်သိးတၢ်ဂ့ၤကမၤအသးအဂီၢ်န့ၣ်ဧါ.” ပှၤတနီၤနီၤဒုၣ်ဒွဲၣ်စံးအၢယၤဒီးပာ်တၢ်ကမၣ်လၢယလိၤလၢယစံး ကတိၤတၢ်ဒ်အံၤန့ၣ်လီၤ. အဝဲသ့ၣ်ကဘၣ်တၢ်စံၣ်ညီၣ်ဃၣ်အီၤဒ်အကြၢးဝဲဒီးအီၤအသိး န့ၣ်လီၤ.
ပှၤတတီတလိၤနီတဂၤဘၣ်
9မ့မ့ၢ်ဒ်န့ၣ်ဒီး, ပဝဲပှၤယူဒၤဖိတဖၣ်မ့ၢ်ပဂ့ၤန့ၢ်ဒံးပှၤ ကလုာ်ဂၤတဖၣ်န့ၣ်ဧါ. တမ့ၢ်ဒ်န့ၣ်ဘၣ်. ယပာ်ဖျါတ့ၢ်လၢပှၤယူဒၤဖိဒီးပှၤကလုာ်ဂၤခဲလၢာ်အိၣ် ဒၣ်လၢတၢ်ဒဲးဘးအစိကမီၤအဖီလာ်ဒ်သိးသိးန့ၣ်လီၤ. 10ဒ်တၢ်ကွဲးအသးစီဆှံစံးဝဲအသိး,
“ပှၤအတီအလိၤတအိၣ်နီတဂၤဘၣ်.
11ပှၤသူၣ်ဖးသးဖးတအိၣ်နီတဂၤဘၣ်,
ဒီးပှၤလၢအဃုကစၢ်ယွၤတအိၣ်နီတဂၤဘၣ်.
12ပှၤကညီခဲလၢာ်ဃၣ်ကဒါကွံာ်အသးလၢကစၢ်ယွၤအအိၣ်,
အဝဲသ့ၣ်ခဲလၢာ်လဲၤကမၣ်က့ၤကမၣ်လၢာ်လံ.
ပှၤမၤတၢ်အဂ့ၤအဘၣ်တအိၣ်နီတဂၤဘၣ်,
ထဲတဂၤဧိၤဒၣ်လဲာ်တအိၣ်ဘၣ်.
13အဝဲသ့ၣ်အကိာ်ပူၤတဖၣ်လီၤဂာ်ဒ်
တၢ်သွၣ်ခိၣ်အပူၤအိၣ်အိးထီၣ်အသးအသိး,
တၢ်လီတၢ်ဝ့ၤအအၢအသီတဖၣ်
ဟဲထီၣ်လၢအပျ့ၤအလိၤ,
ဒီးတၢ်ကတိၤအအၢအသီဒ်
ဂုၢ်အၢအစုၣ်အပျၢ်အသိးတဖၣ်န့ၣ်
ဟးထီၣ်လၢအထးခိၣ်,
14အကိာ်ပူၤတဖၣ်ပှဲၤဝဲဒီးတၢ်ဆိၣ်အၢဆိၣ်သီ
လၢအခၣ်တဖၣ်န့ၣ်လီၤ.
15အဝဲသ့ၣ်ပ့ၢ်ချ့လၢကမၤဆါဒီးမၤသံတၢ်လီၤ.
16ဖဲအဝဲသ့ၣ်လဲၤဝဲတပူၤလၢ်လၢ်န့ၣ်, အဝဲသ့ၣ်ပာ်တီၢ်တၢ်မၤဟးဂီၤတၢ်ဒီး တၢ်နးတၢ်ဖှီၣ်န့ၣ်လီၤ.
17ဒီးတၢ်ဃူတၢ်ဖိးအကျဲန့ၣ်, အဝဲသ့ၣ်တသ့ၣ်ညါဝဲဘၣ်.
18ဒီးတသ့ၣ်ညါပျံၤကစၢ်ယွၤစ့ၢ်ကီးဘၣ်.”
19ခဲအံၤပသ့ၣ်ညါလၢတၢ်မၤလိာ်ခဲလၢာ်လၢတၢ်သိၣ်တၢ်သီအပူၤန့ၣ်, ဘၣ်ထွဲဒီးပှၤလၢအအိၣ်လၢတၢ်သိၣ်တၢ်သီအဖီလာ်, ဒ်သိးပှၤဟီၣ်ခိၣ်ဖိအသုတကတိၤပူၤဖျဲးအသးနီတဂၤတဂ့ၤဒီး ဟီၣ်ခိၣ်ဒီဘ့ၣ်ကဒိးဘၣ်ကစၢ်ယွၤအတၢ်စံၣ်ညီၣ်အဂီၢ်န့ၣ်လီၤ. 20မ့ၢ်အဂ့ၢ်ဒ်လဲၣ်န့ၣ်, ပှၤကညီတဘၣ်တၢ်ပာ်တီပာ်လိၤအီၤလၢ ကစၢ်ယွၤအမဲာ်ညါလၢအမၤထွဲတၢ်သိၣ်တၢ်သီအခံအဃိနီ တဂၤဘၣ်. မ့မ့ၢ်တၢ်လၢတၢ်သိၣ်တၢ်သီမၤဝဲန့ၣ်, မ့ၢ်တၢ်ဒုးသ့ၣ်ညါပှၤဟီၣ်ခိၣ်ဖိလၢအဝဲမၤတၢ်ဒဲးဘးလံန့ၣ်လီၤ.
ကစၢ်ယွၤပာ်တီပာ်လိၤပှၤဟီၣ်ခိၣ်ဖိလၢကျဲဒ်လဲၣ်
21ဘၣ်ဆၣ်ဒီးခဲအံၤကစၢ်ယွၤအကျဲလၢအပာ်တီပာ်လိၤပှၤဟီၣ်ခိၣ်ဖိန့ၣ် ဘၣ်တၢ်လီၣ်ဖျါထီၣ်အီၤ, ဒီးတၢ်သိၣ်တၢ်သီဒီးဝံတဖၣ်မ့ၢ်ဟ့ၣ်တၢ်အုၣ်အသးလၢ အဂ့ၢ်သနာ်က့, တၢ်အံၤတဘၣ်ဃးဒီးတၢ်သိၣ်တၢ်သီနီတမံၤဘၣ်. 22ကစၢ်ယွၤပာ်တီပာ်လိၤပှၤဟီၣ်ခိၣ်ဖိခီဖျိအဝဲသ့ၣ်အတၢ်စူၢ်တၢ်နာ် ယ့ၣ်ၡူးခရံာ်န့ၣ်လီၤ. ကစၢ်ယွၤမၤတၢ်အံၤလၢပှၤလၢအစူၢ်က့ၤနာ်က့ၤခရံာ်ကိးဂၤဒဲးအဂီၢ်, မ့ၢ်လၢတၢ်လီၤဆီတအိၣ်ဘၣ်လၢပှၤယူဒၤဖိဒီးပှၤကလုာ်ဂၤ တဖၣ်အဘၢၣ်စၢၤအဃိလီၤ. 23ပှၤဟီၣ်ခိၣ်ဖိခဲလၢာ်မၤတၢ်ဒဲးဘးဒီးတချုးန့ၢ်ထီၣ်ဘးကစၢ်ယွၤ အလၤကပီၤဘၣ်. 24ဘၣ်ဆၣ်ဒီးအဝဲသ့ၣ်ခဲလၢာ်ဘၣ်တၢ်ပာ်တီပာ်လိၤအီၤလၢ ယွၤအဘျုးအဖှိၣ်လၢအဟ့ၣ်ကလီဝဲ, ခီဖျိယ့ၣ်ၡူးခရံာ်လၢအမၤထူၣ်ဖျဲးကွံာ်အဝဲသ့ၣ်အဃိန့ၣ်လီၤ. 25ကစၢ်ယွၤဟ့ၣ်လီၤယ့ၣ်ၡူးခရံာ်ဒ်သိးခီဖျိအတၢ်သံန့ၣ်, အဝဲကကဲထီၣ်ကျဲလၢပှၤဟီၣ်ခိၣ်ဖိတဖၣ်အတၢ်ဒဲးဘး ကဘၣ်တၢ်ပျၢ်အီၤအဂီၢ်လၢအဝဲသ့ၣ်အတၢ်နာ်အီၤအဃိန့ၣ်လီၤ. ကစၢ်ယွၤမၤတ့ၢ်တၢ်အံၤဒ်သိးအကဒုးနဲၣ်အတၢ်တီတၢ်လိၤ အဂီၢ်န့ၣ်လီၤ. လၢအပူၤကွံာ်န့ၣ်, ကစၢ်ယွၤဝံသးစူၤတၢ်ဒီးကွၢ်ကပာ်ကွံာ်ပှၤဟီၣ်ခိၣ်ဖိ တဖၣ်အတၢ်ဒဲးဘးန့ၣ်လီၤ. 26ဘၣ်ဆၣ်လၢဆၢကတီၢ်ခဲအံၤ, ကစၢ်ယွၤပာ်သူၣ်ပာ်သးလၢပှၤဟီၣ်ခိၣ်ဖိတဖၣ်အတၢ်ဒဲးဘး ဒ်သိးအကဒုးနဲၣ်အတၢ်တီတၢ်လိၤအဂီၢ်န့ၣ်လီၤ. လၢကျဲဒ် အံၤန့ၣ်, ကစၢ်ယွၤဒုးနဲၣ်ဝဲလၢအကစၢ်ဒၣ်ဝဲမ့ၢ်ပှၤတီပှၤလိၤ ဒီးအဝဲပာ်တီပာ်လိၤပှၤကိးဂၤဒဲးလၢအစူၢ်က့ၤနာ်က့ၤယ့ၣ်ၡူး န့ၣ်လီၤ.
27မ့မ့ၢ်ဒ်န့ၣ်ဒီး, ပကပာ်ကဖၢလၢပသးလၢ မနုၤတမံၤအဃိလဲၣ်. တၢ်တအိၣ်နီတမံၤဘၣ်. ဒီးတၢ်အံၤမ့ၢ်လၢမနုၤအဃိန့ၣ်လဲၣ်. မ့ၢ်လၢပဒိကနၣ်တၢ်သိၣ်တၢ်သီအဃိဧါ. တမ့ၢ်ဘၣ်, မ့ၢ်လၢပစူၢ်က့ၤနာ်က့ၤတၢ်အဃိလီၤ. 28အဂ့ၢ်ဒ်အံၤပစံးသ့လၢပှၤကညီတဂၤဘၣ်တၢ်ပာ်တီပာ်လိၤ အီၤလၢယွၤခီဖျိဒၣ်ထဲလၢတၢ်စူၢ်တၢ်နာ်, ဒီးတမ့ၢ်ဘၣ်လၢအမၤထွဲတၢ်သိၣ်တၢ်သီအတၢ်မၤလိာ်တဖၣ် အခံအဃိန့ၣ်ဘၣ်. 29ကစၢ်ယွၤအံၤမ့ၢ်ဒၣ်ထဲပှၤယူဒၤဖိတဖၣ်အကစၢ်ယွၤဧိၤန့ၣ်ဧါ. မ့ၢ်အတမ့ၢ်စ့ၢ်ကီးပှၤကလုာ်ဂၤတဖၣ်အကစၢ်ယွၤဘၣ်ဧါ. မ့ၢ်သပှၢ်ကတၢၢ်ပှၤကလုာ်ဂၤတဖၣ်အကစၢ်ယွၤစ့ၢ်ကီးလီၤ. 30ကစၢ်ယွၤမ့ၢ်တဂၤဃီ, ဒီးအဝဲကမၤလိၤမၤဘၣ်ပှၤဒိးတၢ်ကူးတရံးဖိ တဖၣ်ဒီးအီၤခီဖျိအဝဲသ့ၣ်အတၢ်စူၢ်တၢ်နာ်, ဒီးပှၤတဒိးတၢ်ကူးတရံးတဖၣ်စ့ၢ်ကီးခီဖျိအဝဲသ့ၣ်အတၢ်စူၢ် တၢ်နာ်န့ၣ်လီၤ. 31တၢ်အဝဲအံၤအခီပညီမ့ၢ်ပတၢၤကွံာ်တၢ်သိၣ်တၢ်သီလၢတၢ် စူၢ်တၢ်နာ်အံၤန့ၣ်ဧါ. တမ့ၢ်ဒ်န့ၣ်ဘၣ်. မ့မ့ၢ်ပပာ်ဂၢၢ်ပာ်ကျၢၤတၢ်သိၣ်တၢ်သီအံၤတခီန့ၣ်လီၤ.
Currently Selected:
ရိမ့ၤ 3: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
