ရိမ့ၤ 12
12
တၢ်အိၣ်မူလၢယွၤအတၢ်မၤအပူၤ
1လၢတၢ်န့ၣ်အဃိယဒီပုၢ်ဝဲၢ်သ့ၣ်ဧၢ, မ့ၢ်လၢကစၢ်ယွၤအတၢ်သးကညီၤဒိၣ်ဝဲအါဝဲလၢပဖီခိၣ်အဃိ, ယဃ့ကညးသုလၢသုကလုၢ်ထီၣ်သုသး ဒ်တၢ်လုၢ်မူစီဆှံ ဆူကစၢ်ယွၤအအိၣ်အသိး, ပာ်စီဆှံသုသးလၢအတၢ်မၤအဂီၢ်, ဒီးမၤသးမုာ်သးခုအီၤတက့ၢ်. တၢ်အံၤမ့ၢ်တၢ်ဘူၣ်ထီၣ်ဘါထီၣ်အမ့ၢ်အတီလၢသုကြၢးမၤ အီၤန့ၣ်လီၤ. 2တဘၣ်အိၣ်မူထိၣ်သုသးလၢပှၤဟီၣ်ခိၣ်ဖိတဖၣ်အတၢ်အိၣ်မူ အတီၤတဂ့ၤ. မ့မ့ၢ်တခီ ပျဲယွၤလဲလိာ်သုလၢသုသူၣ်ကံၢ်သးလဲ ခီဖျိတၢ်လဲလိာ်ကွံာ်သုတၢ်ဆိကမိၣ်လၢာ်လၢာ်ဆ့ဆ့တက့ၢ်. အန့ၣ်ဒီး, သုကသ့ၣ်ညါကစၢ်ယွၤအတၢ်ဘၣ်အသး - တၢ်လၢ အဂ့ၤ, ဒီးတၢ်လၢအဒုးသးမုာ်သးခုအီၤ, ဒီးတၢ်လၢတၢ် ပှဲၤမ့ၢ်တၢ်ဒ်လဲၣ်ဒ်လဲၣ်န့ၣ်လီၤ.
3ဒီးမ့ၢ်ယွၤအတၢ်ဟ့ၣ်ဘျုးဟ့ၣ်ဖှိၣ်ယၤအဃိ, ယစံးဘၣ် တဲဘၣ်သုခဲလၢာ်လီၤ. တဘၣ်ဆိကမိၣ်လီၤသုသးဒိၣ်န့ၢ်ဒံး သုကြၢးဆိကမိၣ်န့ၣ်တဂ့ၤ. မ့မ့ၢ်တခီ, ဆိကမိၣ်လီၤသုသးဖဲ အဘၣ်အဘၣ်, ဒီးသုဝဲတဂၤဒီးတဂၤစံၣ်ညီၣ်လီၤသုသးဒ် တၢ်စူၢ်တၢ်နာ်လၢကစၢ်ယွၤဟ့ၣ်လီၤသုအသိးန့ၣ်တက့ၢ်. 4ပနီၢ်ခိတဂၤအံၤအက့ၢ်အဂီၤအိၣ်အါမံၤ, ဒီးက့ၢ်ဂီၤခဲလၢာ်အံၤအတၢ်မၤတဖၣ်လီၤဆီဝဲန့ၣ်လီၤ. 5ဒ်န့ၣ်အသိး, ပအိၣ်အါဂၤသနာ်က့ပမ့ၢ်နီၢ်တဂၤဃီလၢခရံာ် အပူၤဒီးပဘၣ်တၢ်ဒုးစဲဘူးပှၤတဂၤဒီးတဂၤဒ်နီၢ်ခိတဂၤဃီ အက့ၢ်အဂီၤလၢအလီၤဆီတဖၣ်အသိးန့ၣ်လီၤ. 6လၢတၢ်န့ၣ်အဃိ ပကဘၣ်သူပတၢ်ဟ့ၣ်လၢအလီၤဆီ တဖၣ်ဒ်သိးကလီၤပလိာ်ဒီးတၢ်ဘျုးတၢ်ဖှိၣ်လၢကစၢ် ယွၤဟ့ၣ်လီၤပှၤန့ၣ်လီၤ. ပတၢ်ဟ့ၣ်မ့မ့ၢ်တၢ်စံၣ်တဲၤတဲလီၤ ယွၤအတၢ်ကစီၣ်ဒီး, ပကမၤအီၤလီၤပလိာ်ဒီးတၢ်နာ်လၢ အအိၣ်ဒီးပှၤန့ၣ်လီၤ. 7မ့မ့ၢ်တၢ်မၤတၢ်ခ့တၢ်ပှၤအတၢ်မၤဒီး, ပကဘၣ်မၤတၢ်ခ့တၢ် ပှၤအတၢ်မၤလီၤ. မ့မ့ၢ်တၢ်သိၣ်လိတၢ်ဒီး, ပကဘၣ်သိၣ်လိ တၢ်လီၤ. 8မ့မ့ၢ်တၢ်ဟ့ၣ်ဂံၢ်ဟ့ၣ်ဘါပှၤဂၤတဖၣ်ဒီး, ပကဘၣ်ဟ့ၣ်ဂံၢ်ဟ့ၣ် ဘါတၢ်လီၤ. ပှၤတဂၤလၢ်လၢ်လၢအနီၤဟ့ၣ်တၢ်လၢအအိၣ်ဒီး အီၤလၢပှၤဂၤတဖၣ်န့ၣ်, ကဘၣ်မၤဝဲလၢတၢ်သူၣ်အိၣ်သးအိၣ် အပူၤန့ၣ်လီၤ. မ့မ့ၢ်ခိၣ်နၢ်တဂၤဂၤဒီး, ကဘၣ်မၤတၢ်ဆူၣ်ဆူၣ် လီၤ. ပှၤတဂၤလၢ်လၢ်လၢအဒုးနဲၣ်တၢ်သးကညီၤလၢပှၤဂၤ တဖၣ်န့ၣ်, ကဘၣ်မၤဝဲလၢတၢ်သူၣ်ခုသးခုအပူၤလီၤ.
9တၢ်အဲၣ်တၢ်ကွံကဘၣ်မ့ၢ်တၢ်လၢအပူၤဖျဲးဒီးတၢ်ပာ်မၤ အသးန့ၣ်လီၤ. သးဟ့တၢ်လၢအအၢ, ဒီးဟံးဃာ်တၢ် လၢအဂ့ၤန့ၣ်တက့ၢ်. 10အဲၣ်လိာ်သုသးတဂၤဒီးတဂၤတံၢ်တံၢ်နီၢ်နီၢ်ဒ်ဒီပုၢ်ဝဲၢ်တဖၣ် လၢခရံာ်အပူၤအသိး, ဒီးသးဆူၣ်ဒုးနဲၣ်တၢ်ယူးယီၣ်ပာ် ကဲလိာ်သးလၢတဂၤဒီးတဂၤအဂီၢ်န့ၣ်တက့ၢ်. 11မၤတၢ်ဆူၣ်ဆူၣ်ဒီးတဘၣ်ကၢၣ်တဂ့ၤ. မၤကစၢ်အတၢ်မၤလၢသးလၢအပှဲၤဒီးတၢ်အဲၣ်တၢ်ကွံ ဒီးတၢ်ဟ့ၣ်လီၤသးန့ၣ်တက့ၢ်. 12မ်သုတၢ်မုၢ်လၢ်ဒုးသးခုသု, အိၣ်ဒီးတၢ်ဝံသးစူၤလၢသုတၢ်ကီတၢ်ခဲတဖၣ်အပူၤ, ဒီးဃ့ဘါထုကဖၣ်တၢ်ကိးဆၢကတီၢ်ဒဲးန့ၣ်တက့ၢ်. 13နီၤဟ့ၣ်တၢ်လၢအအိၣ်ဒီးသုတဖၣ်လၢသုဒီပုၢ်ဝဲၢ်လၢ အလိၣ်ဘၣ်တၢ်တဖၣ်, ဒီးတူၢ်လိာ်ပှၤသမှံၤတဖၣ်လၢသုဟံၣ်သုဃီတဖၣ်အပူၤတက့ၢ်.
14ဃ့တၢ်လၢကစၢ်ယွၤလၢကဆိၣ်ဂ့ၤပှၤလၢအမၤအၢမၤနး သုတဖၣ်တက့ၢ်. မ့ၢ်လီၤ. ဃ့အီၤလၢကဆိၣ်ဂ့ၤတၢ်အဂီၢ်, တမ့ၢ်လၢကဆိၣ်အၢတၢ်အဂီၢ်ဘၣ်. 15ပှၤလၢအသးခုတဖၣ်န့ၣ်သးခုဃုာ်ဒီးအီၤတက့ၢ်. ပှၤလၢအဟီၣ်တဖၣ်န့ၣ်ဟီၣ်ဃုာ်ဒီးအီၤတက့ၢ်. 16သူၣ်အိၣ်သးအိၣ်ပှၤကိးဂၤဒဲးဒ်သိးသိးတက့ၢ်. တဘၣ်ပာ်ထီၣ်ထီသုသးတဂ့ၤ, မ့မ့ၢ်ရ့တံၤရ့သကိးဒီးပှၤဖှီၣ်ဖိယာ်ဖိတဖၣ်တက့ၢ်. တဘၣ်ဆိကမိၣ်လီၤသုသးလၢသုကူၣ်ဘၣ်ကူၣ်သ့တဂ့ၤ.
17ပှၤတဂၤဂၤမ့ၢ်မၤအၢသုဒီး, တဘၣ်မၤဆၢအီၤလၢတၢ်အၢတ ဂ့ၤ. ကျဲးစၢးမၤတၢ်လၢပှၤခဲလၢာ်ဆိကမိၣ်ဝဲလၢအမ့ၢ်တၢ်ဂ့ၤ န့ၣ်တက့ၢ်. 18မ့မ့ၢ်သုဝဲတခီ, ဖဲသုသ့န့ၣ်အိၣ်ဃူလိာ်ဖိးလိာ်သုသး ဒီးပှၤခဲလၢာ်တက့ၢ်. 19ယတံၤသကိးသးဘိသ့ၣ်ဧၢ, တဘၣ်မၤကၣ်တၢ်တဂ့ၤ, မ့မ့ၢ်ပျဲကစၢ်ယွၤအတၢ်သးထီၣ်ကမၤဒၣ်ဝဲတက့ၢ်. အဂ့ၢ်ဒ် လဲၣ်န့ၣ်, တၢ်ကွဲးအသးစီဆှံစံးဝဲ, “ယကမၤကၣ်က့ၤတၢ်, ယကမၤဆၢက့ၤတၢ်, ကစၢ်စံးဝဲဒၣ်လီၤ.” 20အါန့ၢ်အန့ၣ်, ဒ်တၢ်ကွဲးအသးစီဆှံစံးဝဲအသိး, “နဒုၣ်နဒါတၢ်မ့ၢ်သၣ်ဝံၤအသးဒီးလုၢ်အီၣ်လုၢ်အီအီၤ တက့ၢ်. တၢ်မ့ၢ်သူအသးလၢထံဒီးဟ့ၣ်အီအီၤထံတက့ၢ်. လၢနမၤတၢ်ဒ်အံၤအဃိအဝဲကမဲာ်ဆှးလီၤက့ၤအသးလီၤ.” 21တဘၣ်ပျဲတၢ်အၢတၢ်သီမၤနၢၤသုတဂ့ၤ. မ့မ့ၢ်တခီ, မၤနၢၤတၢ်အၢလၢတၢ်ဂ့ၤန့ၣ်တက့ၢ်.
Currently Selected:
ရိမ့ၤ 12: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.