စံးထီၣ်ပတြၢၤ 71
71
ပှၤသးပှၢ်တဂၤအတၢ်ထုကဖၣ်
1ယွၤဧၢ, ယသန့ၤယသးလၢနၤ,
မ်ယသုတဘၣ်တၢ်မဲာ်ဆှးနီတစုတဂ့ၤ.
2မၤပူၤမၤဖျဲးယၤဒီးအုၣ်က့ၤခီၣ်က့ၤယၤလၢ
နတၢ်တီတၢ်လိၤအပူၤန့ၣ်တက့ၢ်.
ဒိးနနၢ်လၢယၤဒီးအုၣ်က့ၤခီၣ်က့ၤယၤတက့ၢ်.
3ကဲထီၣ်တၢ်အိၣ်တဒၢအလ့တဖျၢၣ်လၢယဂီၢ်,
တိာ်ခၢၣ်သနၢၣ်လၢယတၢ်ပူၤဖျဲးအဂီၢ်န့ၣ်တက့ၢ်.
အဂ့ၢ်ဒ်အံၤ, နမ့ၢ်ယလ့, ဒီးယတိာ်န့ၣ်လီၤ.
4ကစၢ်ယွၤဧၢ, မၤထူၣ်ဖျဲးယၤလၢပှၤတတီတလိၤအစုပူၤ,
လၢပှၤမၤအၢတၢ်ဒီးပှၤမၤနးမၤဖှီၣ်တၢ်
အတၢ်ဖီၣ်ဃာ်န့ၣ်တက့ၢ်.
5အဂ့ၢ်ဒ်အံၤတၢ်ထီကတၢၢ်ယွၤဧၢ, နမ့ၢ်ယတၢ်မုၢ်လၢ်န့ၣ်လီၤ.
ယွၤဧၢ, နမ့ၢ်ယတၢ်သန့ၤယသးအလီၢ်
လၢယသးစၢ်လံၤလံၤန့ၣ်လီၤ.
6ယသန့ၤတ့ၢ်ယသးလၢနၤစးထီၣ်လၢယအိၣ်ဖျဲၣ်,
နမ့ၢ်ပှၤလၢအထုးထီၣ်ယၤလၢ
ယမိၢ်အဟၢဖၢအပူၤန့ၣ်လီၤ.
ယကစံးထီၣ်ပတြၢၤနၤတထံၣ်ဃီလီၤ.
7ယတၢ်အိၣ်မူမ့ၢ်တ့ၢ်တၢ်အဒိအတဲာ်
တမံၤလၢ ပှၤအါဂၤအဂီၢ်, မ့ၢ်လၢနမ့ၢ်တ့ၢ်
ပှၤဒီဒၣ်အိၣ်ဖှိၤယၤလၢ အဂံၢ်ဆူၣ်ဘါဆူၣ်အဃိလီၤ. 8ယထးခိၣ်ပှဲၤဒီးတၢ်စံးထီၣ်ပတြၢၤနၤ,
ဒီးနလၤကပီၤကိးမုၢ်နံၤဒဲးလီၤ.
9လၢယသးပှၢ်အဆၢကတီၢ်န့ၣ်ကွံာ်တ့ၢ်ကွံာ်ယၤတဂ့ၤ.
ဖဲယဂံၢ်ယဘါလၢာ်ဒီးလဲၤသဒၣ်ယၤတဂ့ၤ.
10အဂ့ၢ်ဒ်အံၤ, ယဒုၣ်ယဒါကတိၤတဖၣ်ထီဒါယၤ,
ဒီးပှၤလၢအကွၢ်ဟုၣ်ယသးန့ၣ်
ကူၣ်ထီၣ်ဖးလီၤတၢ်အၢတပူၤဃီထီဒါယၤလီၤ.
11ဒီးစံးဝဲ, “ကစၢ်ယွၤလဲၤသဒၣ်တ့ၢ်လံအီၤလံ,
လူၤဒီးဖီၣ်န့ၢ်အီၤတက့ၢ်. အဂ့ၢ်ဒ်အံၤ,
ပှၤကမၤပူၤဖျဲးအီၤတအိၣ်နီတဂၤဘၣ်.”
12ကစၢ်ယွၤဧၢ, အိၣ်ယံၤဒီးယၤတဂ့ၤ.
ယကစၢ်ယွၤဧၢ, မၤချ့ချ့လၢတၢ်မၤစၢၤယၤအဂီၢ်န့ၣ်တက့ၢ်.
13ပှၤလၢအဃုယသး ဒ်သိးကမၤဟးဂီၤယၤန့ၣ်
မ်အဘၣ်တၢ်မဲာ်ဆှးဒီးဟးဂီၤကွံာ်န့ၣ်တက့ၢ်.
ပှၤလၢအဃုယတၢ်ဟးဂီၤတဖၣ်န့ၣ်
မ်အဘၣ်တၢ်လုၣ်ဘၢကွံာ်အီၤလၢတၢ်ဒုၣ်ဒွဲၣ်,
ဒီးတၢ်မၤမဲာ်ဆှးန့ၣ်တက့ၢ်.
14မ့မ့ၢ်, ယဲဒၣ်အံၤယကမုၢ်လၢ်တၢ်တထံၣ်ဃီ
ဒီးယကစံးထီၣ်ပတြၢၤနၤဒံးယံာ်ဒံးအါလီၤ.
15ယထးခိၣ်ကတဲဖျါထီၣ်နတၢ်တီတၢ်လိၤ
အတၢ်ဖံးတၢ်မၤတဖၣ်,
နတၢ်အုၣ်က့ၤခီၣ်က့ၤသ့သ့တနံၤလီၤ.
အဂ့ၢ်ဒ်အံၤ, ယတသ့ၣ်ညါဘၣ်
အတၢ်ဂံၢ်တဖၣ်ဘၣ်.
16ယကလဲၤတၢ်လၢကစၢ်ယွၤအဂံၢ်အဘါလီၤ.
ယကစံးလၢနတၢ်တီတၢ်လိၤ, ထဲနဝဲဧိၤလီၤ.
17ကစၢ်ဧၢ, လၢယသးစၢ်လံၤလံၤနသိၣ်လိတ့ၢ်ယၤလံ,
ဒီးယဒုးနဲၣ်နမၤတၢ်လီၤလးတဖၣ်
တုၤခဲကနံၣ်အံၤလီၤ.
18ကစၢ်ယွၤဧၢ, တုၤလီၤလၢယသးပှၢ်ဒီးခိၣ်ဝါ,
ယတချုးဒုးနဲၣ်ဒံးဘၣ်နတၢ်ဂံၢ်တၢ်ဘါဒီးနစိနကမီၤ
လၢကယဲၢ်ပှၤလၢအကဟဲတဖၣ်ဒံးဘၣ်န့ၣ်,
လဲၤသဒၣ်ကွံာ်ဒံးယၤတဂ့ၤ.
19ကစၢ်ယွၤဧၢ, နတၢ်တီတၢ်လိၤတုၤဃီၤဆူ
မူခိၣ်လၢအထီန့ၣ်လီၤ.
ပှၤလၢအမၤတၢ်အဒိၣ်တဖၣ်တဂၤဧၢ,
မ့ၢ်မတၤမၤသးဒ်နၤအသိးန့ၣ်တဂၤလဲၣ်, ယွၤဧၢ.
20နမ့ၢ်ပှၤလၢအဒုးထံၣ်တ့ၢ်လံယၤလၢ
တၢ်ကိၢ်တၢ်ဂီၤအဒိၣ်
ဘၣ်ဆၣ်နကမၤဆူၣ်ထီၣ်ကဒီးယၤလီၤ.
လၢဟီၣ်ခိၣ်အတၢ်ယိာ်တဖၣ်အပူၤန့ၣ်
နကဒုးဟဲက့ၤထီၣ်ကဒီးယၤလီၤ.
21နကမၤအါထီၣ်ယတၢ်ကဲဒိၣ်
ဒီးမၤမုာ်ထီၣ်က့ၤယၤန့ၣ်လီၤ.
22ယကစံးထီၣ်ပတြၢၤစ့ၢ်ကီးနၤလၢသီတူၢ်,
လၢနတၢ်မ့ၢ်တၢ်တီအဃိန့ၣ်လီၤ.
ယကစၢ်ယွၤ. အံၣ်စရ့လးအတၢ်စီဆှံတဂၤဧၢ,
ယကသးဝံၣ်စံးထီၣ်ပတြၢၤနၤလၢတနၢ်န့ၣ်လီၤ.
23ယနိးဖံးကကိးထီၣ်လၢတၢ်သးခုလီၤ.
တုၤယသးဝံၣ်စံးထီၣ်ပတြၢၤနၤန့ၣ်ဒီး,
ယသးလၢနမၤပူၤဖျဲးတ့ၢ်စ့ၢ်ကီး
သးဝံၣ်စံးထီၣ်ပတြၢၤနၤလီၤ.
24ဒီးယပျ့ၤကစံးကတိၤနတၢ်တီတၢ်လိၤ
အတၢ်မၤစၢၤသ့သ့တနံၤလီၤ.
အဂ့ၢ်ဒ်အံၤ, ပှၤလၢအဃုမၤဟးဂီၤယၤတဖၣ်န့ၣ်
အမဲာ်ဆှးဒီးဘၣ်တၢ်ပာ်မဲာ်ဆှးအီၤလီၤ.
Currently Selected:
စံးထီၣ်ပတြၢၤ 71: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
