စံးထီၣ်ပတြၢၤ 51
51
တၢ်ထုကဖၣ်လၢတၢ်ပျၢ်တၢ်ကမၣ်အဂီၢ်
1ကစၢ်ယွၤဧၢ, သူၣ်ကညီၤသးကညီၤလၢ်ယၤ,
ဒ်နတၢ်အဲၣ်ဂၢၢ်ကျၢၤအိၣ်ဝဲအသိး,
ဒီးဒ်နတၢ်သးကညီၤအိၣ်အါအါကလဲာ်အသိးန့ၣ်
တြူာ်ကွံာ်ယတၢ်မၤကမၣ်တၢ်တဖၣ်န့ၣ်တက့ၢ်.
2သ့စီယၤလၢယတၢ်အၢစီစီ,
ဒီးမၤကဆှီယၤလၢယတၢ်ဒဲးဘးတက့ၢ်.
3အဂ့ၢ်ဒ်အံၤ, ယသ့ၣ်ညါယတၢ်မၤကမၣ်တၢ်တဖၣ်,
ဒီးယတၢ်ဒဲးဘးအိၣ်လၢယမဲာ်ညါတထံၣ်ဃီလီၤ.
4ယမၤကမၣ်ဘၣ်တ့ၢ်လံနၤ, ထဲနၤတဂၤဧိၤ,
ဒီးမၤတၢ်အၢလၢနမဲာ်ညါလံ.
မၤသးဒ်န့ၣ်ဒီး, နမၤတၢ်တီတၢ်လိၤလၢ
နတၢ်စံၣ်ညီၣ်ယၤအပူၤ
ဒီးတၢ်ပာ်တၢ်ကမၣ်အလီၢ်တအိၣ်လၢ
နတၢ်စံၣ်ညီၣ်အပူၤဘၣ်န့ၣ်လီၤ.
5ကွၢ်ကွၢ်, ယအိၣ်ဖျဲၣ်ထီၣ်လၢတၢ်အၢတၢ်သီအပူၤ,
ဒီးယမိၢ်ဒၢထီၣ်ယၤလၢတၢ်ဒဲးဘးအပူၤလီၤ.
6တၢ်သူၣ်တီသးလိၤဒီးတၢ်မ့ၢ်တၢ်တီန့ၣ်
မ့ၢ်တၢ်လၢနသးလီန့ၣ်လီၤ.
မၤပှဲၤယသးလၢနတၢ်ကူၣ်သ့န့ၣ်တက့ၢ်.
7မၤကဆှီယၤလၢကဖျီၣ်အ့စိးတက့ၢ်.
ဒီးယကကဆှီထီၣ်လီၤ.
သ့စီယၤတက့ၢ်, ဒီးယကဝါန့ၢ်မူခိၣ်ဖီလီၤ.
8ဒုးနၢ်ဟူယၤလၢတၢ်သူၣ်ဖှံသးညီ,
ဒီးတၢ်သူၣ်ခုသးခုတက့ၢ်.
မ်တၢ်ဃံတၢ်ကွဲလၢနမၤကၢ်အီၤန့ၣ်
သူၣ်ဖှံသးညီကဒီးတက့ၢ်.
9ပာ်တဒၢနမဲာ်လၢယတၢ်ဒဲးဘး,
ဒီးတြူာ်ကွံာ်ယတၢ်အၢတၢ်သီခဲလၢာ်န့ၣ်တက့ၢ်.
10ကစၢ်ယွၤဧၢ, တ့လီၤသးအကဆှီလၢယပူၤ,
ဒီးသူၣ်သီသးသီဒီးသူၣ်ဂၢၢ်သးကျၢၤလၢ
ယပူၤတက့ၢ်.
11ညိကွံာ်ယၤလၢနမဲာ်ညါတဂ့ၤ,
ဒီးဟံးထီၣ်ကွံာ်နသးစီဆှံလၢယၤတဂ့ၤ.
12ဒုးအိၣ်ထီၣ်က့ၤန့ၢ်ယၤလၢနတၢ်အုၣ်က့ၤခီၣ်က့ၤ
အတၢ်သူၣ်ခုသးခု
ဒီးမၤစၢၤယၤဒ်သိးယကဒိကနၣ်နၤန့ၣ်တက့ၢ်.
13အန့ၣ်ဒီးယကဒုးနဲၣ်ပှၤမၤကမၣ်တၢ်ဖိလၢ
နကျဲဧိၤကပူၤဧိၤ
ဒီးပှၤတၢ်ဒဲးဘးဖိကဃၣ်လိၤက့ၤအသး
ဆူနအိၣ်လီၤ.
14ကစၢ်ယွၤဧၢ, မၤပူၤမၤဖျဲးယၤလၢတၢ်သံန့ၣ်တက့ၢ်.
နမ့ၢ်ယတၢ်အုၣ်က့ၤခီၣ်က့ၤအကစၢ်,
ဒီးယပျ့ၤကသးဝံၣ်ထီၣ်နၤဒိၣ်ဒိၣ်
လၢနတၢ်မၤပူၤဖျဲးအဃိလီၤ.
15ယွၤဧၢ, မၤစၢၤယၤလၢယကစံးကတိၤတၢ်
ဒီးယကစံးထီၣ်ပတြၢၤနၤလီၤ.
16အဂ့ၢ်ဒ်အံၤ, နတဘၣ်ဘၣ်နသးလၢတၢ်လုၢ်ဘၣ်.
မ့ၢ်ယကဟ့ၣ်နၤတၢ်လုၢ်မ့ၣ်အူလၢ
နတဘၣ်ဘၣ်နသးန့ၣ်ဧါ.
17ကစၢ်ယွၤဧၢ, ယတၢ်လုၢ်န့ၣ်မ့ၢ်တၢ်သူၣ်ကၢ်သးလီၤလီၤ.
ကစၢ်ယွၤဧၢ, တၢ်သူၣ်ကၢ်သးလီၤဒီး
တၢ်ပီၢ်ယၢ်လီၤက့ၤသးန့ၣ်
နတမၤအီၤတရီတပါဘၣ်.
18ကစၢ်ယွၤဧၢ, သူၣ်ကညီၤသးကညီၤစံယိၣ်
ဒီးမၤစၢၤအီၤတက့ၢ်.
သူၣ်ထီၣ်က့ၤယရူၤၡလ့ၣ်အဝ့ၢ်ခိၣ်ဒူတက့ၢ်.
19တုၤနုၤတစု, နကဘၣ်နသးလၢ
တၢ်တီတၢ်လိၤအတၢ်လုၢ်တဖၣ်
ဒီးလၢပတၢ်လုၢ်မ့ၣ်အူတဖၣ်န့ၣ်လီၤ.
ဒီးဂီၤဖံးဖါတဖၣ်ကဘၣ်တၢ်လုၢ်ထီၣ်အီၤလၢ
နတၢ်လုၢ်လီၢ်အဖီခိၣ်န့ၣ်လီၤ.
Currently Selected:
စံးထီၣ်ပတြၢၤ 51: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
