စံးထီၣ်ပတြၢၤ 5
5
တၢ်ထုကဖၣ်လၢတၢ်ကဟုကယာ်အဂီၢ်
1ယွၤဧၢ, ဒိကနၣ်ယတၢ်ကတိၤ,
ဒီးပာ်သူၣ်ပာ်သးလၢယတၢ်ကအုကစွါန့ၣ်တက့ၢ်.
2ကနၣ်ယတၢ်ကိးထီၣ်လၢတၢ်မၤစၢၤအဂီၢ်,
ယကစၢ်ယွၤဒီးယစီၤပၤဧၢ,
အဂ့ၢ်ဒ်အံၤ, ယဃ့ဘါထုကဖၣ်တၢ်လၢနၤလီၤ.
3ယွၤဧၢ, လၢမုၢ်ဂီၤန့ၣ်နနၢ်ဟူယကလုၢ်,
ဒီးလၢမုၢ်ဟဲထီၣ်အကတီၢ်န့ၣ်
ယလုၢ်ထီၣ်ယတၢ်ထုကဖၣ်ဒီးခိးကွၢ်လၢ်နၤလီၤ.
4အဂ့ၢ်ဒ်အံၤ,
နတမ့ၢ်ကစၢ်ယွၤတဂၤလၢအဘၣ်သူၣ်ဘၣ်သးလၢ
တၢ်တတီတလိၤန့ၣ်ဘၣ်.
တၢ်အၢတၢ်သီတအိၣ်တဆိးဘၣ်ဒီးနၤဘၣ်.
5ပှၤပာ်ကဖိအသးန့ၣ်တဆၢထၢၣ်ဘၣ်လၢနမဲာ်ညါ,
နသးဟ့ကယဲၢ်ပှၤမၤတၢ်အၢတၢ်သီခဲလၢာ်န့ၣ်လီၤ.
6နမၤဟးဂီၤပှၤလၢအကတိၤကဘျံးကဘျၣ်တၢ်လီၤ.
ပှၤလၢအအဲၣ်ဒိးတၢ်ဂၢ်သွံၣ်ဂၢ်စီၤ,
ဒီးပှၤလီတၢ်သ့ၣ်တဖၣ်န့ၣ် နသးဘၣ်အၢအီၤလီၤ.
7မ့မ့ၢ်ယဲဒၣ်အံၤ,
ခီဖျိနတၢ်အဲၣ်ဂၢၢ်ကျၢၤလၢအဒိၣ်ဝဲအါဝဲန့ၣ်,
ယကဟဲနုာ်ဘၣ်ဆူနဟံၣ်ပူၤ,
ယကဘူၣ်ထီၣ်ဘါထီၣ်ဘၣ်နၤလၢ
နတၢ်လုၢ်ဟံၣ်စီဆှံအပူၤ
လၢတၢ်ပျံၤဒီးတၢ်ယူးယီၣ်ပာ်ကဲနၤအပူၤန့ၣ်လီၤ.
8ယွၤဧၢ, ဆှၢယၤလၢနကျဲမ့ၢ်ကျဲတီအပူၤ
မ့ၢ်လၢယအိၣ်ဒီးယဒုၣ်ယဒါအါမးအဃိန့ၣ်တက့ၢ်.
မၤလိၤမၤပျီနကျဲလၢယမဲာ်ညါတက့ၢ်.
9အဂ့ၢ်ဒ်အံၤ, တၢ်ကတိၤအမ့ၢ်အတီ
တအိၣ်ဘၣ်လၢအထးခိၣ်နီတထံၣ်ဘၣ်.
လၢအသးကံၢ်ပူၤန့ၣ်အိၣ်ထဲ
တၢ်သးအိၣ်မၤဟးဂီၤတၢ်န့ၣ်လီၤ.
အကိာ်ပူၤန့ၣ်လီၤဂာ်ဒီးတၢ်သွၣ်ခိၣ်အပူၤ
အိၣ်အိးထီၣ်အသး,
အပျ့ၤတဖၣ်ပှဲၤဒီးတၢ်ကတိၤအူသဖှိထီၣ်တၢ်လၢ
ကလီန့ၢ်ပှၤအဂီၢ်လီၤ.
10ကစၢ်ယွၤဧၢ, စံၣ်ညီၣ်ဒီးသိၣ်ဃီၣ်အဝဲသ့ၣ်န့ၣ်တက့ၢ်.
မ်အတၢ်ကူၣ်အၢဒၣ်ဝဲ
ကမၤဟးဂီၤက့ၤအဝဲသ့ၣ်န့ၣ်တက့ၢ်.
မ့ၢ်လၢအတၢ်ဒဲးဘးအါဝဲဒီးအတၢ်ပူထီၣ်နၤအဃိ,
နီၣ်ထီၣ်ကွံာ်အဝဲသ့ၣ်လၢနမဲာ်ညါန့ၣ်တက့ၢ်.
11မ့မ့ၢ်ကယဲၢ်ပှၤလၢအအိၣ်တဒၢလၢနပူၤန့ၣ်
မ်အသူၣ်ခုသးခု, သူၣ်ဖှံသးညီတက့ၢ်.
မ်အသူၣ်ဝံၣ်သးဆၢတၢ်လၢတၢ်သးခုအပူၤ
တဘိယူၢ်ဃီတက့ၢ်.
ပှၤလၢအအဲၣ်နမံၤန့ၣ်ကဟုကယာ်အီၤ,
ဒ်သိးကသူၣ်ဖှံသးညီလၢနပူၤန့ၣ်တက့ၢ်.
12အဂ့ၢ်ဒ်အံၤ, ယွၤဧၢ, နဆိၣ်ဂ့ၤပှၤအတီအလိၤ,
နတၢ်အဲၣ်ကဟုဘံၣ်ကယာ်ဘၢအီၤ
ဒ်ကတီၤတဘ့ၣ်အသိးန့ၣ်လီၤ.
Currently Selected:
စံးထီၣ်ပတြၢၤ 5: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
