စံးထီၣ်ပတြၢၤ 40
40
တၢ်စံးထီၣ်ပတြၢၤအတၢ်သးဝံၣ်
1ယအိၣ်ခိးကွၢ်လၢ်ယွၤအတၢ်မၤစၢၤလၢ
တၢ်သးစူၤအပူၤလီၤ.
အဝဲဒိကနၣ်ယၤဒီးနၢ်ဟူတ့ၢ်ယတၢ်ကိးထီၣ်န့ၣ်လီၤ.
2အဝဲထုးထီၣ်ကွံာ်တ့ၢ်ယၤလၢတၢ်ပူၤလၢအလီၤပျံၤ
လၢတၢ်သံအမဲးလီၤဘျၢၣ်အပူၤန့ၣ်လီၤ.
အဝဲပာ်ယခိၣ်လၢလၢၢ်အဖီခိၣ်
ဒီးမၤဂၢၢ်မၤကျၢၤယခီၣ်အတၢ်ထွဲတဖၣ်လီၤ.
3အဝဲသိၣ်လိတ့ၢ်ယၤလၢယကသးဝံၣ်တၢ်သးဝံၣ်အသီ,
တၢ်သးဝံၣ်စံးထီၣ်ပတြၢၤဆူပကစၢ်ယွၤန့ၣ်လီၤ.
ပှၤအါဂၤလၢအထံၣ်တၢ်အံၤ
ကအိၣ်ဒီးတၢ်ပျံၤဒီးတၢ်နာ်လၢယွၤအပူၤန့ၣ်လီၤ.
4ပှၤလၢအပာ်ယွၤလၢအတၢ်သန့ၤအသး,
ပှၤလၢအတဃၣ်အသးဆူတၢ်ဂီၤတၢ်ဖီၣ်,
မ့တမ့ၢ်ပှၤလၢအတဒုးစဲဘူးအသးလၢ
ကစၢ်လၢအတမ့ၢ်တတီသ့ၣ်တဖၣ်န့ၣ်,
ဘၣ်ဆိၣ်ဂ့ၤဝဲလီၤ.
5ယွၤပကစၢ်ယွၤဧၢ,
နမၤတ့ၢ်တၢ်လီၤလးအါမးလၢပဂီၢ်လီၤ.
ပှၤဒ်သိးဒီးနၤတအိၣ်နီတဂၤဘၣ်.
နအိၣ်ဒီးတၢ်ကူၣ်ထီၣ်ဖးလီၤလၢ
အလီၤလးအါမးလၢပဂီၢ်န့ၣ်လီၤ.
ယစံးလၢအဂ့ၢ်တလၢာ်နီတဘျီဘၣ်.
အါန့ၢ်ယဂံၢ်သ့တက့ၢ်လီၤ.
6နတသးလီတၢ်လုၢ်တၢ်ပာ်ဒီး
တၢ်လုၢ်မၤဘူၣ်တဖၣ်န့ၣ်ဘၣ်.
နတဃ့တၢ်လုၢ်မ့ၣ်အူ
ဒီးတၢ်လုၢ်တၢ်ဒဲးဘးန့ၣ်ဘၣ်.
မ့မ့ၢ်နအိးထီၣ်ယနၢ်လၢ
ယကနၢ်ဟူနၤအဂီၢ်န့ၣ်လီၤ.
7လၢတၢ်န့ၣ်အဃိယစံးဆၢယဲ, ‘‘ယအိၣ်ဖဲအံၤလီၤ.
နတၢ်သိၣ်လိသီလိလၢယဂီၢ်တဖၣ်အိၣ်ကွဲးအသး
လၢလံာ်တၢ်သိၣ်တၢ်သီအပူၤလီၤ.
8ယကစၢ်ယွၤဧၢ, ယသးခုမၤယဲနတၢ်ဘၣ်နသးန့ၣ်လီၤ.
ယပၢၤဃာ်နတၢ်သိၣ်တၢ်သီလၢယသးပူၤလီၤ.’’
9ယွၤဧၢ, လၢနပှၤဂီၢ်မုၢ်အတၢ်အိၣ်ဖှိၣ်ရိဖှိၣ်ဖးဒိၣ်အ ပူၤ,
ယတဲဖျါတ့ၢ်ယဲတၢ်ကစီၣ်အမုာ်လၢ
နမၤပူၤဖျဲးပှၤလီၤ.
နသ့ၣ်ညါနဲလၢယတဆိကတီၢ်
တဲတၢ်အံၤနီတဘျီဘၣ်.
10ယတပာ်ခူသူၣ်နတၢ်မၤပူၤဖျဲးအဂ့ၢ်လၢ
ယသးပူၤန့ၣ်ဘၣ်.
ယစံးဘၣ်တဲဘၣ်လံယဲနတၢ်သူၣ်တီသးလိၤဒီး
နတၢ်မၤပူၤမၤဖျဲးအဂ့ၢ်န့ၣ်လံ.
ယတပာ်ခူသူၣ်နတၢ်အဲၣ်ဂၢၢ်ကျၢၤဒီး
နတၢ်သူၣ်တီသးလိၤအဂ့ၢ်
လၢပှၤဂီၢ်မုၢ်အတၢ်အိၣ်ဖှိၣ်ရိဖှိၣ်န့ၣ်ဘၣ်.
11ယွၤဧၢ,
မ်နသုတထုးကွံာ်နတၢ်သးကညီၤလၢယၤတဂ့ၤ.
မ်နတၢ်အဲၣ်ဂၢၢ်ကျၢၤဒီးနတၢ်သူၣ်တီသးတီ
ပၢၤယၤတထံၣ်ဃီတက့ၢ်.
တၢ်ထုကဖၣ်လၢတၢ်မၤစၢၤအဂီၢ်
(စံး. ၇၀)
12ယဘၣ်တၢ်ကဝီၤဃာ်ယၤလၢတၢ်ကိၢ်တၢ်ဂီၤတဖၣ်
ဒီးအါဝဲဒိၣ်မးလၢယကဂံၢ်အီၤဒၣ်လဲာ်န့ၣ်လီၤ.
ယတၢ်ဒဲးဘးသ့ၣ်တဖၣ်ချုးန့ၢ်ယၤ
ဒီးယတထံၣ်တၢ်လၢၤဘၣ်.
အဝဲသ့ၣ်အါန့ၢ်ဒံးယခိၣ်သူအဘိတဖၣ်
ဒီးယတၢ်သူၣ်ဒူသးဒူလီၤမၢ်န့ၢ်ယၤလီၤ.
13ယွၤဧၢ, ဟဲဒီးမၤပူၤမၤဖျဲးယၤတက့ၢ်.
ယွၤဧၢ, မၤချ့ချ့လၢနကမၤစၢၤယၤတက့ၢ်.
14မ်ပှၤလၢအဂုာ်ကျဲးစၢးမၤသံယၤတဖၣ်
ဘၣ်တၢ်မၤနၢၤဒီးဘၣ်တၢ်မၤသဘံၣ်ဘုၣ်ကွံာ်အီၤ
လၢာ်လၢာ်ဆ့ဆ့
မ်ပှၤလၢအသးခုလၢယတၢ်ဘၣ်ကိၢ်ဘၣ်ဂီၤအဃိန့ၣ်,
ဘၣ်တၢ်မၤဃၣ်ကွံာ်အီၤဒီး
ဘၣ်တၢ်မၤမဲာ်ဆှးအီၤန့ၣ်တက့ၢ်.
15မ်ပှၤလၢအနံၤဘၣ်ဖၣ်လဲယၤတဖၣ်န့ၣ်
အမဲာ်ဆှးလီၤက့ၤအသးတုၤ
အမၤက့ၤတၢ်မၤတသ့ဘၣ်နီတမံၤန့ၣ်တက့ၢ်.
16မ်ပှၤလၢအဟဲဆူနအိၣ်ခဲလၢာ်
ကသူၣ်ခုသးခုဒီးသူၣ်ဖှံသးညီန့ၣ်တက့ၢ်.
မ်ပှၤလၢအစံးဘျုးနၤလၢ
နတၢ်အုၣ်က့ၤခီၣ်က့ၤအဂီၢ်ခဲလၢာ်
စံးထီဘိ, ‘‘ယွၤန့ၣ်ဒိၣ်ဝဲလီၤ’’ န့ၣ်တက့ၢ်.
17ယွၤဧၢ, ယဂံၢ်ယဘါစၢ်ဒီးယဖှီၣ်ယဲလီၤ.
ဘၣ်ဆၣ်နတသးပ့ၤနီၣ်တ့ၢ်ယၤဘၣ်.
နမ့ၢ်ပှၤလၢအမၤပူၤဖျဲးယၤဒီးယကစၢ်ယွၤလီၤ.
မၤယံာ်နသးလၢနကမၤစၢၤယၤအဂီၢ်န့ၣ်တဂ့ၤ.
Currently Selected:
စံးထီၣ်ပတြၢၤ 40: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
