စံးထီၣ်ပတြၢၤ 27
27
တၢ်စံးထီၣ်ပတြၢၤအတၢ်ထုကဖၣ်
1ယွၤမ့ၢ်ယတၢ်ကပီၤဒီးယတၢ်အုၣ်က့ၤခီၣ်က့ၤလီၤ.
ယကပျံၤမတၤတဂၤလဲၣ်.
ယွၤမ့ၢ်ယသးသမူအဂံၢ်အဘါလီၤ.
ယကပျံၤမတၤတဂၤလဲၣ်.
2တုၤပှၤအၢပှၤသီတဖၣ်ထီဒါယၤဒ်သိး
အကအီၣ်ကွံာ်ယဖံးယညၣ်န့ၣ်ဒီး,
အဝဲသ့ၣ်အခီၣ်ဘၣ်တိၢ်ဒီးလီၤဃံၤဝဲန့ၣ်လီၤ.
3သုးမုၢ်ဒီတဖုမ့ၢ်သူၣ်ဒဲဝးတရံးယၤဒၣ်လဲာ်,
ယတပျံၤတၢ်ဘၣ်.
ယဒုၣ်ယဒါတဖၣ်မ့ၢ်ထီဒါယၤဒၣ်လဲာ်
ယနာ်ဒံးကစၢ်ယွၤန့ၣ်လီၤ.
4ယဃ့တ့ၢ်ယွၤလၢတၢ်တမံၤအဂီၢ်,
ယဆၢန့ၢ်ဘၣ်ထဲတၢ်တမံၤဧိၤ,
ဒ်သိးယကအိၣ်ကဆိးဘၣ်လၢယွၤအဟံၣ်ပူၤတစိၤဒၣ်ယၤ,
လၢယကထံၣ်ဘၣ်ယွၤအတၢ်ဂ့ၤတၢ်ဝါ
ဒီးဃ့န့ၢ်ယွၤအတၢ်ပၢတၢ်ဆှၢန့ၣ်လီၤ.
5အဂ့ၢ်ဒ်အံၤ, လၢတၢ်ကိၢ်တၢ်ဂီၤအမုၢ်နံၤန့ၣ်,
အဝဲကပာ်ခူသူၣ်ယၤ,
ကမၤပူၤဖျဲးယၤလၢအတၢ်လုၢ်ဟံၣ်အပူၤ
ဒီးပာ်ယၤလၢလၢၢ်ထီၣ်ထီအဖီခိၣ်န့ၣ်လီၤ.
6ယကမၤနၢၤယဒုၣ်ယဒါတဖၣ်လၢ
အအိၣ်ဝးတရံးယၤလီၤ.
လၢတၢ်ကိးပသူထီၣ်လၢတၢ်သးခုအပူၤ
ယကလုၢ်ထီၣ်ပာ်ထီၣ်တၢ်လၢ
အတၢ်လုၢ်ဟံၣ်အပူၤန့ၣ်လီၤ.
ယကသးဝံၣ်တၢ်, ယကစံးထီၣ်ပတြၢၤယွၤန့ၣ်လီၤ.
7ယွၤဧၢ, တုၤယကိးထီၣ်နၤဒီးကနၣ်တက့ၢ်.
သူၣ်ကညီၤသးကညီၤဒီးစံးဆၢယၤတက့ၢ်.
8တုၤနစံး, “ဃုယမဲာ်တက့ၢ်.” န့ၣ်ဒီး,
ယစံးဆၢယဲ, “ယွၤဧၢ, နမဲာ်န့ၣ်ယဃုယဲလီၤ.”
9ပာ်တဒၢနမဲာ်လၢယၤတဂ့ၤ.
ဟီထီၣ်ကွံာ်နခ့နပှၤလၢ
တၢ်သးထီၣ်အပူၤတဂ့ၤ.
နမ့ၢ်တ့ၢ်ယတၢ်မၤစၢၤ,
လဲၤသဒၣ်ယၤတဂ့ၤ. ညိကွံာ်ယၤတဂ့ၤ,
ပှၤအုၣ်က့ၤခီၣ်က့ၤယၤ, ကစၢ်ယွၤဧၢ.
10ယပၢ်ဒီးယမိၢ်မ့ၢ်ညိကွံာ်ယၤဘၣ်ဆၣ်,
ယွၤကအံးထွဲကွၢ်ထွဲဒံးယၤလီၤ.
11ယွၤဧၢ, တၢ်လၢနဆၢလၢယကမၤန့ၣ်,
သိၣ်လိယၤတက့ၢ်.
ဒီးဆှၢယၤလၢကျဲအမုာ်အပၢၤအပူၤ,
အဂ့ၢ်မ့ၢ်လၢယအိၣ်ဒီးဒုၣ်ဒါအါဂၤအဃိန့ၣ်လီၤ.
12တဘၣ်ဟ့ၣ်လီၤကွံာ်ယၤဆူယဒုၣ်ယဒါသ့ၣ်တဖၣ်
အတၢ်ဘၣ်အသးအပူၤတဂ့ၤ,
အဂ့ၢ်ဒ်အံၤ, ပှၤလၢအအုၣ်အသးကဘျံးကဘျၣ်
တဖၣ် ဂဲၤဆၢထၢၣ်ထီဒါယၤ
ဒီးသါတဖှိထီၣ်တၢ်စုဆူၣ်ခီၣ်တကးန့ၣ်လီၤ.
13ယနာ်လၢယကအိၣ်မူထံၣ်ဘၣ်ယွၤအတၢ်ဂ့ၤတၢ်ဝါလၢပှၤ အမူတဖၣ်အကီၢ်အပူၤန့ၣ်လီၤ.
14မုၢ်လၢ်တၢ်လၢယွၤတက့ၢ်.
ပာ်ဆူၣ်နသးတက့ၢ်.
အိၣ်ဒီးတၢ်သူၣ်ဒူသးဒူတက့ၢ်.
မုၢ်လၢ်တၢ်လၢယွၤတက့ၢ်.
Currently Selected:
စံးထီၣ်ပတြၢၤ 27: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
