လံာ်တၢ်ကူၣ်သ့အတၢ်ကတိၤ 3
3
တၢ်ဟ့ၣ်ကူၣ်ဆူပှၤပိာ်ခွါသးစၢ်တဖၣ်
1ယဖိခွါဧၢ, သးပ့ၤနီၣ်ယသိၣ်က့ၤသီက့ၤတၢ်တဂ့ၤ. တၢ်လၢယမၤလိာ်နၤဒ်သိးနကမၤအီၤန့ၣ်ဟံးဃာ်အီၤထီဘိ တက့ၢ်. 2ယတၢ်သိၣ်က့ၤသီက့ၤကဟ့ၣ်နၤတၢ်အိၣ်ကၢအိၣ်ခိးဒီးတၢ်အိၣ်မူ လၢအဘီၣ်ထီၣ်ညီထီၣ်ဝဲန့ၣ်လီၤ. 3ဒုးလဲၤသဒၣ်တၢ်သးတီဒီးတၢ်သူၣ်တီသးရၤလၢနအိၣ်တဂ့ၤ. စၢထီၣ်အီၤလၢနကိာ်အလိၤဒီးကွဲးအီၤလၢနသးအလိၤတက့ၢ်. 4နမ့ၢ်မၤတၢ်အံၤဒီး, ကစၢ်ယွၤဒီးပှၤကညီကသးမုာ်သးခုလၢနဃိ လီၤ.
5သန့ၤနသးလၢယွၤလၢနသးဒီဖျၢၣ်ညါတက့ၢ်. ဒီးသုတသန့ၤနသးလၢတၢ်လၢနဆိကမိၣ်နသ့ၣ်ညါန့ၣ်တဂ့ၤ. 6သ့ၣ်ညါအၢၣ်လီၤယွၤလၢနကျဲခဲလၢာ်အပူၤတက့ၢ်. ဒီးအဝဲဒၣ်ကဒုးနဲၣ်နၤကျဲအဘၣ်လီၤ. 7ပျဲနတၢ်ဆိကမိၣ်ဆှၢနၤလၢနကူၣ်တၢ်သ့န့ၢ်ဒံးနမ့ၢ်တၢ်န့ၣ်တဂ့ၤ. စူၢ်ဒၣ်ထဲယွၤဒီးဂ့ၢ်လိာ်တၢ်မၤကမၣ်တၢ်တက့ၢ်. 8နမ့ၢ်မၤဒ်အံၤဒီးကမ့ၢ်ကသံၣ်ဖီၣ်အဂ့ၤလၢအကမၤဘျါက့ၤနပူၤလီၢ် တဖၣ်အဂီၢ်ဒီးမၤကိညၢ်ထီၣ်က့ၤနတၢ်ဆါန့ၣ်လီၤ. 9မၤလၤကပီၤယွၤလၢနတၢ်လုၢ်ထီၣ်ပာ်ထီၣ်တမံၤ, လၢအမ့ၢ်တၢ်အဂ့ၤကတၢၢ်လၢတၢ်လၢနဟီၣ်ခိၣ်အတၤသၣ်အကျါတက့ၢ်. 10နမ့ၢ်မၤဒီး, နသိၣ်ဧိၤဖီဧိၤကပှဲၤဒီးဘုဧိၤဟုဧိၤဒီး နစပံးထံကအါဝဲတုၤဒၣ်လဲာ်တၢ်ပာ်ဖှိၣ်အီၤခဲလၢာ်အဂီၢ်တၢ်လီၢ် တအိၣ်လၢၤဘၣ်န့ၣ်လီၤ.
11ယဖိခွါဧၢ, ဖဲယွၤသိၣ်ဃီၣ်နၤန့ၣ်ပာ်သူၣ်ပာ်သးသပှၢ်ပှၢ်ဒီး တူၢ်လိာ်အီၤဒ်တၢ်ဟ့ၣ်ပလီၢ်တမံၤအသိးတက့ၢ်. 12ယွၤသိၣ်ဃီၣ်ပှၤလၢအအဲၣ်ဝဲတဖၣ်, ဒ်ပၢ်တဂၤသိၣ်ဃီၣ် အဖိခွါတဂၤလၢအဒိးဘၣ်တၢ်လၤကပီၤလၢအဃိသ့ဝဲအသိးန့ၣ်လီၤ. 13ပှၤလၢအကဲထီၣ်ပှၤကူၣ်သ့ဒီးမၤန့ၢ်တၢ်သ့ၣ်ညါနၢ်ပၢၢ်န့ၣ် ဘၣ်ဆိၣ်ဂ့ၤဝဲနီၢ်နီၢ်လီၤ. 14အဂ့ၢ်ဒ်အံၤ, တၢ်န့ၢ်ဘၣ်လၢအီၤန့ၣ်, ဂ့ၤဒိၣ်န့ၢ်တၢ်န့ၢ်ဘၣ်လၢ စ့ညၣ်တက့ၢ်ဒီးအဘျုးအဖှိၣ်န့ၣ်ဂ့ၤဒိၣ်န့ၢ်ထူတက့ၢ်လီၤ. 15တၢ်ကူၣ်သ့အံၤအလုၢ်အပှ့ၤအိၣ်ဒိၣ်န့ၢ်တၢ်မျၢ်ပလဲတဖၣ်တက့ၢ်လီၤ. ကယဲၢ်တၢ်လၢနသးလီအီၤခဲလၢာ်န့ၣ်နထိၣ်သတြီၤဒီးအီၤတန့ၢ် ဘၣ်. 16တၢ်ကူၣ်သ့ဟ့ၣ်နၤတၢ်အိၣ်ကၢအိၣ်ခိး, ဃုာ်ဒီးတၢ်ထူးတၢ်တီၤ ဒီးတၢ်လၤကပီၤစ့ၢ်ကီးလီၤ. 17တၢ်ကူၣ်သ့မၤမုာ်မၤခုၣ်နတၢ်အိၣ်မူ, ဒီးဆှၢနၤလၢကျဲမုာ် ကျဲခုၣ်သ့ဝဲန့ၣ်လီၤ. 18ပှၤလၢအကဲထီၣ်ပှၤကူၣ်သ့တဖၣ်န့ၣ်, ဘၣ်ဆိၣ်ဂ့ၤဝဲနီၢ်နီၢ်လီၤ. တၢ်ကူၣ်သ့ကဟ့ၣ်အဝဲသ့ၣ်လၢတၢ်မူလီၤ.
19ယွၤတ့လီၤတ့ၢ်ဟီၣ်ခိၣ်လၢအတၢ်ကူၣ်သ့,
ဒီးလၢအတၢ်သ့ၣ်ညါဒၣ်ဝဲန့ၣ်ကျဲၤလီၤပာ်လီၤမူခိၣ်လၢအလီၢ် အကျဲလီၤ.
20အတၢ်ကူၣ်သ့ဒုးယွၤလီၤထံကျိတဖၣ်,
ဒီးတၢ်အၢၣ်တဖၣ်ဒ်သိးကဟ့ၣ်တၢ်စူၤထံလၢဟီၣ်ခိၣ်လီၤ.
21ယဖိခွါဧၢ, ဟံးဃာ်နတၢ်ကူၣ်သ့ဒီးတၢ်ထံၣ်တၢ်လၢသးအမဲာ်တက့ၢ်. ပျဲတၢ်သ့ၣ်ညါတဖၣ်အံၤဟးဖးဒီးနၤလ့ၤတက့ၤတဂ့ၤ. 22အဝဲသ့ၣ်ကဟ့ၣ်နၤလၢတၢ်မူ, တၢ်မူလၢအအိၣ်ဒီးတၢ်သူၣ်ဖှံ သးညီဒီးတၢ်ဘၣ်ဆိၣ်ဂ့ၤနီၢ်နီၢ်န့ၣ်လီၤ. 23နကလဲၤဘၣ်လၢနကျဲပူၤဒုၣ်ပူၤဒါ, ဒီးနခီၣ်တဘၣ်တိၢ်ဒၣ်လဲာ်ဘၣ် လီၤ. 24တုၤနမံလီၤလၢလီၢ်မံခိၣ်ဒီးနတပျံၤဘၣ်တၢ်ဘၣ်. ဒီးနကမံလၢတၢ်သူၣ်တုၤလီၤသးတုၤလီၤအပူၤသီတနၤကျၢၤလီၤ. 25နတဘၣ်ဘၣ်ယိၣ်လၢတၢ်တတၢးတနါသတူၢ်ကလာ်တဖၣ်က ဟဲဘၣ်နၤ, ဒ်ကလံၤမုၢ်ဟဲဘၣ်ပှၤတတီတလိၤတဖၣ်အသိးန့ၣ်ဘၣ်. 26ယွၤကအံးထွဲကွၢ်ထွဲနၤလီၤ. တပျဲနလီၤတဲာ်ကွံာ်ဆူ ပျံၤသကွီၤအပူၤဘၣ်.
27ဖဲနမၤသ့တဘျီလၢ်လၢ်န့ၣ်, မၤဂ့ၤပှၤလၢလိၣ်ဘၣ်အီၤတဖၣ်န့ၣ်တက့ၢ်. 28နမၤစၢၤအီၤခဲအံၤမ့ၢ်သ့ဒီး, တဲပှၤလၢနဃၢၤနီတစုလၢအကအိၣ်ခိးဝဲ တုၤခဲမုၢ်ဆ့ၣ်တဂ့ၤ. 29ကူၣ်အၢတၢ်တမံၤမံၤလၢကမၤဘၣ်ဒိဆါပှၤလၢနဃၢၤလၢအအိၣ်ဘူး ဒီးနၤဒီးနာ်န့ၢ်နၤန့ၣ်တဂ့ၤ. 30ဂ့ၢ်လိာ်ဘှီလိာ်တၢ်ကလီကလီဒီးပှၤတဂၤဂၤဖဲအဝဲတမၤဆါတ့ၢ် ဘၣ်နၤနီတမံၤန့ၣ်တဂ့ၤ. 31သူၣ်က့ၣ်သးကါပှၤမၤအၢမၤသီတၢ်တဖၣ်မ့ၢ်ဂ့ၤဆၢမၤတၢ်ဒ်အဝဲသ့ၣ် မၤဝဲအသိးမ့ၢ်ဂ့ၤန့ၣ်တဂ့ၤ. 32အဂ့ၢ်ဒ်အံၤ, ယွၤသးဟ့ပှၤလၢအမၤတၢ်အၢတၢ်သီလီၤ. မ့မ့ၢ်ပှၤအတီအလိၤတဖၣ်န့ၣ်တူၢ်လိာ်ဝဲဆူအတၢ်ရ့လိာ်မုာ်လိာ် အပူၤလီၤ. 33ယွၤပာ်ဖှိၣ်တၢ်ဆိၣ်အၢတမံၤလၢပှၤတတီတလိၤအဟံၣ်တဖၣ်အဖီခိၣ် လီၤ. မ့မ့ၢ်ဆိၣ်ဂ့ၤပှၤအတီအလိၤတဖၣ်အတၢ်အိၣ်တၢ်ဆိးအလီၢ်န့ၣ်လီၤ. 34အဝဲဒုၣ်ဒွဲၣ်ပှၤဒုၣ်ဒွဲၣ်တၢ်တဖၣ်ဒီးဒုးနဲၣ်ဖျါထီၣ်အဘျုး အဖှိၣ်လၢပှၤဆီၣ်လီၤအသးတဖၣ်န့ၣ်လီၤ. 35ပှၤကူၣ်တၢ်သ့တဖၣ်ကန့ၢ်သါတၢ်လၤကပီၤလီၤ. မ့မ့ၢ်ပှၤဟးဂီၤဖိတဖၣ်န့ၣ်ကပာ်ဖှိၣ်အါထီၣ်ဒၣ်အတၢ်မဲာ်ဆှး န့ၣ်လီၤ.
Currently Selected:
လံာ်တၢ်ကူၣ်သ့အတၢ်ကတိၤ 3: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.