လံာ်တၢ်ဂံၢ် 34
34
ကီၢ်အထံဆၢကီၢ်ဆၢတဖၣ်
1-2ယွၤဟ့ၣ်လီၤစီၤမိၤၡ့လၢ, တၢ်သိၣ်လိနဲၣ်ယုၤတဖၣ်လၢကီၢ်အံၣ်စရ့လးအပှၤဂီၢ်မုၢ်အဂီၢ်ဒ် လၢလာ်အံၤအသိးန့ၣ်လီၤ. “တုၤသုနုာ်လီၤဆူကီၢ်ကနၤဧၣ်, ကီၢ်လၢယဟ့ၣ်လီၤသုအပူၤန့ၣ်ဒီး, သုလီၢ်ကဝီၤအထံဆၢကီၢ်ဆၢတဖၣ်ကမ့ၢ်ဒ်လၢလာ်အသိး အံၤန့ၣ်လီၤ. 3ကလံၤစိးကီၢ်ဆၢကစးထီၣ်လၢပှၢ်မုၢ်ကနၢစံၣ်ယံၤတုၤလၢကီၢ် အဒိၣ်အကီၢ်ဆၢန့ၣ်လီၤ. တၢ်န့ၣ်ကစးထီၣ်လၢမုၢ်ထီၣ်တခီဖဲပီၣ်လဲၣ်သံအကလံၤထံး အကတၢၢ်န့ၣ်လီၤ. 4အန့ၣ်ဝံၤဒီးကတရံးအသးဆူကလံၤထံးလိၤလိၤလၢတၢ်လဲၤနုာ်ဆူ ဧးကရးဘံၣ်ဒီးကလဲၤဆူညါဖျိကွံာ်ပှၢ်မုၢ်ကနၢစံၣ်, ယံၤတုၤလၢကလံၤထံးဖဲကၤဒ့ၣ်ဘၢ်န့လီၤ. ဝံၤဒီးတရံးက့ၤဆူမုၢ်နုာ်ကလံၤစိးဆူဃးစၢ်အးဒၢ်ဒီးလဲၤဆူဧၤစမိၣ်, 5တၢ်လီၢ်ဖဲကတရံးက့ၤလိၤလိၤဆူတၢ်တြီၤအိၣ်လၢကီၢ်အဲၤကူ ပတူးကီၢ်ဆၢဒီးကကတၢၢ်လၢပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ် န့ၣ်လီၤ.”
6မုၢ်နုာ်အထံဆၢကီၢ်ဆၢန့ၣ်ကမ့ၢ်ဝဲပီၣ်လဲၣ်ဖးဒိၣ်မဲးဒံးထၢၣ်ရ့နယၢၣ်န့ၣ်လီၤ.
7ကလံၤစိးအကီၢ်ဆၢတခီကပိာ်ထီၣ်တၢ်တကျိၤစးထီၣ်လၢပီၣ်လဲၣ်ဖး ဒိၣ်မဲးဒံးထၢၣ်ရ့နယၢၣ်ဆူကစၢၢ်ဃိၢ်, 8ဒီးဖဲန့ၣ်တုၤလၢဃမါသးအကျဲစၢၤလီၤ. ဒီးကလဲၤဆူညါဆူစဒး, 9ဒီးဆူစံးဖြၣ်ဒီးကကတၢၢ်ဝဲဖဲဃစၢ်ဧ့နၣ်န့ၣ်လီၤ.
10ကီၢ်ဆၢလၢမုၢ်ထီၣ်တခီကပိာ်ထီၣ်တၢ်ကျိၤတကျိၤစးထီၣ်လၢဃစၢ် ဧ့နၣ်တုၤဆူၡဖၣ်န့ၣ်လီၤ. 11အန့ၣ်ဝံၤဒီးကလဲၤဆူကလံၤထံးတုၤလၢဃၤဘအ့လးအိၣ်လၢဧ့ၣ် အမုၢ်ထီၣ်တခီဒီးထီၣ်ဆူပီၣ်လဲၣ်ကၤလံၤလါအမုၢ်ထီၣ်တၢ်လူၢ် တဖၣ်အဒီခိၣ်, 12ဝံၤဒီးဆူကလံၤထံးစးထီၣ်လၢထံကျိယၢ်ဒ့ၣ်တရဲာ်ဃီဆူပီၣ် လဲၣ်သံန့ၣ်လီၤ. တၢ်အံၤကမ့ၢ်သုထံသုကီၢ်အကီၢ်ဆၢတဖၣ်လွံၢ်ကပၤန့ၣ်လီၤ.”
13မၤသးဒ်န့ၣ်ဒီး, စီၤမိၤၡ့စံးဘၣ်ပှၤအံၣ်စရ့လးဖိတဖၣ်, “အအံၤမ့ၢ်ကီၢ်တဘ့ၣ်လၢသုကဒိးန့ၢ်ဘၣ်အီၤခီဖျိတၢ်ဖီၣ်တၢ် ဖးတဖၣ်, ကီၢ်တဘ့ၣ်လၢယွၤဟ့ၣ်လီၤဆူပှၤအဒူၣ်ခွံဒူၣ်ဒီးတခီဒူၣ်, အအိၣ်န့ၣ်လီၤ. 14ဒူၣ်တဖၣ်လၢအမ့ၢ်, ရူၤဘ့ၣ်, ကးဒီးမနၤၡ့ၣ်အဒူၣ်တဝာ်လၢမုၢ် ထီၣ်တခီန့ၣ်, ဒိးန့ၢ်လံအဝဲသ့ၣ်အတၢ်စုလီၢ်ခီၣ်ခိၣ်, နီၤဖးလီၤအသး, ဒ်အဟံၣ်ဒူၣ်ဃီထၢဒၣ်ဝဲအိၣ်အသိး, 15လၢထံကျိယၢ်ဒ့ၣ်အမုၢ်ထီၣ်တကပၤသဃီၤဒီးဝ့ၢ်ယရံၤဃိန့ၣ်လီၤ.”
ပှၤခိၣ်ပှၤနၢ်ဘၣ်မူဘၣ်ဒါတဖၣ် လၢတၢ်နီၤဖးထံကီၢ်အဂီၢ်
16-17ယွၤစံးဘၣ်စီၤမိၤၡ့, “ပှၤလုၢ်တၢ်အခိၣ်စီၤအလၤဧစၢ်ဒီးစီၤနိၣ်အဖိခွါစီၤယိၤၡူ ကနီၤဖးကီၢ်န့ၣ်လၢပှၤဂီၢ်မုၢ်အဂီၢ်လီၤ.
18ကိးစ့ၢ်ကီးခိၣ်နၢ်တဂၤလၢပှၤတဒူၣ်စုာ်စုာ်အပူၤလၢကမၤစၢၤအ ဝဲသ့ၣ်လၢတၢ်နီၤဖးအတၢ်မၤန့ၣ်တက့ၢ်.” 19-28ဒီးအအံၤမ့ၢ်ပှၤတဖၣ်လၢယွၤဃုထၢထီၣ်အီၤန့ၣ်လီၤ.
| ပှၤအဒူၣ် | ခိၣ်နၢ် |
|---|---|
| ယူဒၤ | စီၤယဖူန့ၤအဖိခွါစီၤကၤလ့း |
| စူၤမ့းအိၣ် | စီၤဧးမံၤဟူးအဖိခွါစီၤၡံမူၤအ့လး |
| ဘံၣ်ယၤမံၣ် | စီၤကံးစလိၣ်အဖိခွါစီၤအလံဒး |
| ဒၣ် | စီၤယၤကလံၤအဖိခွါစီၤဘူးကံၤ |
| မနၤၡ့ၤ | စီၤအ့ဖိးအဖိခွါစီၤဃနံၤအ့လး |
| အ့ဖရဲၣ် | စီၤၡံးဖတၣ်အဖိခွါစီၤကမူၤအ့လး |
| စဘူလိၣ် | စီၤပၢ်နးအဖိခွါစီၤအလံစဖၣ် |
| ယံးစၣ်ကၣ် | စီၤဧးစၣ်အဖိခွါစီၤပးလတံၤအ့လး |
| အၤၡ့ၢ် | စီၤၡလိၤမံအဖိခွါစီၤအဃံဟူး |
| နးသၤလံ | စီၤဧးမံဟူးအဖိခွါစီၤပဒၤအ့လး |
29အဝဲသ့ၣ်တဖၣ်န့ၣ်မ့ၢ်ပှၤတဖၣ်လၢယွၤဟ့ၣ်လီၤအီၤမူဒါဒ်သိး ကနီၤဖးတၢ်စုလီၢ်ခီၣ်ခိၣ်လၢကီၢ်အံၣ်စရ့လးအပှၤဂီၢ်မုၢ်အဂီၢ် လၢကီၢ်ကနၤဧၣ်အပူၤန့ၣ်လီၤ.
Currently Selected:
လံာ်တၢ်ဂံၢ် 34: KSWC
Highlight
Share
Compare
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
