လံာ်စီၤနဃ့မယၤ 9
9
ပှၤဂီၢ်မုၢ်တဲလီၤကျဲၤလီၤက့ၤအတၢ်ဒဲးဘးတဖၣ်
1လၢလါတလါဃီအံၤထီၣ်ခံဆံလွံၢ်သီတသီန့ၣ်ကီၢ်အံၣ်စရ့လး အပှၤဂီၢ်မုၢ်အိၣ်ဖှိၣ်ရိဖှိၣ်ဒီးဒုၣ်တၢ်အီၣ်ဒ်သိးကပာ်ဖျါ အတၢ်သူၣ်အုးသးအုးလၢအတၢ်ဒဲးဘးတဖၣ်အဃိန့ၣ်လီၤ. 2ဒီးအဝဲသ့ၣ်မၤလီၤဖးအသးဒီးပှၤတခီဘီမုၢ်ဖိတဖၣ်န့ၣ်လီၤ. ဒီးအဝဲသ့ၣ်ကူသိးဝဲထၢၣ်တၢ်ကံးညာ်ဒီးဖှံအခိၣ်လၢဟီၣ်ခိၣ် အကမူၣ်ဒ်အမ့ၢ်တၢ်သူၣ်အုးသးအုးအတၢ်ပနီၣ်န့ၣ်လီၤ. ဒီးအဝဲသ့ၣ်ဂဲၤဆၢထၢၣ်ဒီးတဲလီၤကျဲၤလီၤတၢ်ဒဲးဘးတဖၣ်လၢ အဝဲသ့ၣ်ဒီးအမိၢ်ပၢ်ဖံဖုလၢပျၢၤတဖၣ်မၤတ့ၢ်ဝဲန့ၣ်လီၤ. 3ယွၤ, အဝဲသ့ၣ်အကစၢ်ယွၤအတၢ်သိၣ်တၢ်သီလၢပှၤယူဒၤဖိ အဂီၢ်ဘၣ်တၢ်ဖးန့ၢ်အဝဲသ့ၣ်သၢနၣ်ရံၣ်ဝံၤဒီးလၢခံသၢနၣ်ရံၣ် န့ၣ်အဝဲသ့ၣ်တဲလီၤကျဲၤလီၤက့ၤအတၢ်ဒဲးဘးတဖၣ်ဒီးဘူၣ်ထီၣ် ဘါထီၣ်ယွၤ, အဝဲသ့ၣ်အကစၢ်ယွၤန့ၣ်လီၤ.
4စိၤမိၤအိၣ်ဝဲတဖျၢၣ်လၢပှၤလ့ၤဝံဖိတဖၣ်အဂီၢ်, ဒီးစီၤယ့ၤၡူ, စီၤဘၤနံ, စီၤကးမံၤအ့လး, စီၤၡဘၤနယၤ, စီၤဘူနံၤ, စီၤၡ့ရ့ဘယၤ, စီၤဘၤနံ, စီၤကနၤနံသ့ၣ်တဖၣ်ဆၢထၢၣ်လၢအဖီခိၣ်န့ၣ်လီၤ. အဝဲသ့ၣ်ဘါထုကဖၣ်လၢအကလုၢ်ဖးဒိၣ်ဆူယွၤ, အဝဲသ့ၣ်အကစၢ်ယွၤအအိၣ်န့ၣ်လီၤ.
5ဒီးပှၤလ့ၤဝံဖိ, စီၤယ့ၤၡူ, စီၤကးမံၤအ့လး, စီၤၡကၤနယၤ, စီၤဘၤနံ, စီၤဃၡၤဘံယၤ, စီၤၡ့ရ့ဘယၤ, စီၤဟိၤဒံယၤ, စီၤၡဘၤနယၤ, စီၤပသၤဃယၤတဖၣ်စံးဝဲဒၣ်
“ဂဲၤဆၢထၢၣ်ဒီးစံးထီၣ်ပတြၢၤယွၤသုကစၢ်ယွၤတက့ၢ်.
စံးထီၣ်ပတြၢၤအီၤလီၤစိၤလီၤထီတက့ၢ်.
မ်ပှၤကိးဂၤဒဲးစံးထီၣ်ပတြၢၤအတၢ်လၤကပီၤအမံၤတက့ၢ်. မ်အဘၣ်တၢ်စံးထီၣ်ပတြၢၤအီၤလၢတၢ်ခဲလၢာ်အဖီခိၣ်တက့ၢ်.”
တၢ်တဲလီၤကျဲၤလီၤတၢ်ကမၣ်အတၢ်ထုကဖၣ်
6ဒီးကီၢ်အံၣ်စရ့လးအပှၤဂီၢ်မုၢ်ဘါထုကဖၣ်ဝဲ,
“နဲဒၣ်ယွၤဧၢ, နမ့ၢ်ယွၤထဲတဂၤဧိၤလီၤ. နတ့လီၤမူခိၣ်အလီၢ်တဖၣ်ဒီးဆၣ်တဖၣ်လၢမူခိၣ်ကပိၤလိၤန့ၣ်လီၤ.
နတ့လီၤဟီၣ်ခိၣ်ဒီးပီၣ်လဲၣ်, ဒီးကယဲၢ်တၢ်လၢအအိၣ်လၢအပူၤခဲ လၢာ်
ဒီးနဟ့ၣ်အဝဲသ့ၣ်ခဲလၢာ်လၢတၢ်မူန့ၣ်လီၤ.
ဒီးမူခိၣ်အသုးမုၢ်ဂီၢ်မုၢ်တီၤလီၤဒီးဘူၣ်ထီၣ် ဘါထီၣ်နၤလီၤ.
7နဲဒၣ်ယွၤ, ကစၢ်ယွၤဧၢ, နဃုထၢစီၤအၤဘြၣ်
ဒီးနကိးထီၣ်ကွံာ်အီၤလၢဝ့ၢ်အူၢ်လၢကီၢ်ဘၤဘူၤလိၣ်
ဒီးနလဲလိာ်ကွံာ်အမံၤဆူစီၤအၤဘြၤဟၣ်လီၤ.
8နထံၣ်တ့ၢ်လၢအဝဲမ့ၢ်ပှၤသးတီဒီးနၤ
ဒီးနမၤတၢ်အၢၣ်လီၤအီလီၤတမံၤဒီးအီၤန့ၣ်လီၤ.
နအၢၣ်လီၤတ့ၢ်လၢနကဟ့ၣ်အီၤလၢပှၤကနၤဧၣ်ဖိ,
ပှၤဃ့ၤသးဖိ, ပှၤအမိၢ်ဖိ, ပှၤပရးစၤဖိ, ပှၤယဘူၣ်ဖိ, ဒီးပှၤကံၣ်ကၣ်ဖိတဖၣ်အကီၢ်
လၢကမ့ၢ်ကီၢ်တဘ့ၣ်လၢအဝဲအစၢၤအသွဲၣ်တဖၣ်ကအိၣ်ဝဲဆိးဝဲန့ၣ် လီၤ.
နဟံးဃာ်ဂၢၢ်ကျၢၤနတၢ်အၢၣ်လီၤမ့ၢ်လၢနကလုၢ်တီဝဲ အဃိန့ၣ်လီၤ.
9နထံၣ်တ့ၢ်လံပမိၢ်ပၢ်ဖံဖုလၢပျၢၤတဖၣ်တူၢ်ဘၣ်တၢ်လၢကီၢ်အဲၤ ကူပတူးအပူၤ,
ဒီးနနၢ်ဟူတ့ၢ်လံအဝဲသ့ၣ်အတၢ်ကိးထီၣ်လၢတၢ်မၤစၢၤအဂီၢ်လၢ ပီၣ်လဲၣ်ဂီၤန့ၣ်လီၤ.
10နမၤတ့ၢ်တၢ်လီၤကမၢကမၣ်လီၤလးတဖၣ်ထီဒါစီၤပၤ,
ထီဒါအပဒိၣ်ပပှၢ်တဖၣ်ဒီးပှၤဂီၢ်မုၢ်လၢအထံအကီၢ် န့ၣ်လီၤ.
အဂ့ၢ်ဒ်အံၤ, နသ့ၣ်ညါတ့ၢ်လံအဝဲသ့ၣ်အတၢ်မၤအၢနပှၤကလုာ်ဒ်လဲၣ် န့ၣ်လီၤ.
နမံၤဟူထီၣ်သါလီၤတ့ၢ်စးထီၣ်ဖဲန့ၣ်ဒီးအိၣ်ဝဲတုၤမုၢ်မဆါ တနံၤအံၤန့ၣ်လီၤ.
11နမၤတ့ၢ်ကျဲတဘိလၢနပှၤဂီၢ်မုၢ်အဂီၢ်လၢပီၣ်လဲၣ်ပူၤ
ဒီးဆှၢခီဖျိအဝဲသ့ၣ်လၢဟီၣ်ခိၣ်ဃ့အလိၤန့ၣ်လီၤ. ပှၤတဖၣ်လၢအလူၤအဝဲသ့ၣ်န့ၣ်လီၤအုးကွံာ်လၢထံယိာ်အပူၤ
ဒ်လၢၢ်တဖျၢၣ်လီၤဘျၢကွံာ်လၢပီၣ်လဲၣ်လၢအလပီဒိၣ်အပူၤအသိး န့ၣ်လီၤ.
12ဒီးလၢမုၢ်ဆါန့ၣ်နဆှၢအဝဲသ့ၣ်လၢတၢ်အၢၣ်ဒီးလၢမုၢ်နၤန့ၣ် နမၤကပီၤထီၣ်အကျဲဒီးမ့ၣ်အူန့ၣ်လီၤ.
13နဟဲလီၤလၢမူခိၣ်ဖဲကစၢၢ်စံၤနါအလိၤ,
နကတိၤတ့ၢ်တၢ်ဒီးနပှၤဂီၢ်မုၢ်
ဒီးဟ့ၣ်အဝဲသ့ၣ်လၢတၢ်သိၣ်တၢ်သီအဂ့ၤတဖၣ်ဒီးတၢ်သိၣ်လိလၢအ ကြၢးဝဲဘၣ်ဝဲတဖၣ်န့ၣ်လီၤ.
14နသိၣ်လိတ့ၢ်အဝဲသ့ၣ်လၢကတိၢ်န့ၢ်ဖံးဃာ်တၢ်ပာ်စီဆှံမုၢ်အိၣ် ဘှံးနံၤ,
ဒီးနဟ့ၣ်လီၤအဝဲသ့ၣ်လၢနတၢ်သိၣ်တၢ်သီတဖၣ်ခီဖျိနခ့နပှၤစီၤမိၤၡ့န့ၣ်လီၤ.
15တုၤတၢ်သၣ်ဝံၤအဝဲသ့ၣ်အသးဒီးနဟ့ၣ်အီၤကိၣ်လၢမူခိၣ်ဒီးတုၤ တၢ်သူအဝဲသ့ၣ်အသးလၢထံ
ဒီးနဒုးဟဲထီၣ်ထံလၢလၢၢ်တဖျၢၣ်အပူၤန့ၣ်လီၤ.
နတဲဘၣ်တ့ၢ်အဝဲသ့ၣ်လၢကပၢထံဧိၤကီၢ်ဧိၤ
လၢနအၢၣ်လီၤတ့ၢ်လၢနကဟ့ၣ်အဝဲသ့ၣ်န့ၣ်လီၤ.
16ဘၣ်ဆၣ်ပမိၢ်ပၢ်ဖံဖုလၢပျၢၤတဖၣ်ပာ်ထီၣ်ထီအသးဒီးအ သးကိၤဝဲ,
ဒီးဂ့ၢ်လိာ်တ့ၢ်လၢကစူၢ်နတၢ်မၤလိာ်တဖၣ်န့ၣ်လီၤ.
17အဝဲသ့ၣ်ဂ့ၢ်လိာ်ဝဲလၢကစူၢ်တၢ်,
အဝဲသ့ၣ်သးပ့ၤနီၣ်ကွံာ်တၢ်လၢနမၤတ့ၢ်ခဲလၢာ်လီၤ. အဝဲသ့ၣ်သးပ့ၤနီၣ်ကွံာ်လံတၢ်လီၤလးတဖၣ်လၢနမၤတ့ၢ်ဝဲ န့ၣ်လီၤ.
လၢအတၢ်ပာ်ထီၣ်ထီသးအပူၤန့ၣ်အဝဲသ့ၣ်ဃုထၢအခိၣ်အနၢ်တဂၤလၢ ကဆှၢကဒါက့ၤအဝဲသ့ၣ်ဆူတၢ်မၢကဲကုၢ်အလီၢ်လၢကီၢ်အဲၤကူပတူး အပူၤန့ၣ်လီၤ.
ဘၣ်ဆၣ်နမ့ၢ်နဲကစၢ်ယွၤတဂၤလၢအပျၢ်တၢ်ကမၣ်, နပှဲၤဒီးတၢ်ဘျုးတၢ်ဖှိၣ်ဒီးတၢ်အဲၣ်, ဒီးနတသးထီၣ်ညီကဒၣ်ဘၣ်.
နတၢ်သူၣ်ကညီၤသးကညီၤန့ၣ်ဒိၣ်ဝဲဒီးနတလဲၤသဒၣ်အဝဲသ့ၣ်ဘၣ်.
18အဝဲသ့ၣ်မၤတ့ၢ်ဂီၤဖံးဖိတဒုအဂီၤ
ဒီးစံးဝဲဒၣ်လၢမ့ၢ်ကစၢ်လၢအဒုးဟးထီၣ်ကွံာ်အဝဲသ့ၣ်လၢကီၢ် အဲၤကူပတူးအပူၤန့ၣ်လီၤ.
ယွၤဧၢ, မ့ၢ်အဝဲသ့ၣ်မၤတရီတပါနၤဆံးဒိၣ်လဲၣ်.
19ဘၣ်ဆၣ်နတလဲၤသဒၣ်အဝဲသ့ၣ်ဖဲန့ၣ်လၢပှၢ်မုၢ်ကနၢအပူၤန့ၣ်ဘၣ်.
အဂ့ၢ်ဒ်အံၤ, နတၢ်သးကညီၤဒိၣ်ဝဲနီၢ်မးန့ၣ်လီၤ.
နတဟံးထီၣ်ကွံာ်တၢ်အၢၣ်မ့ၢ်ဂ့ၤ, မ့ၣ်အူမ့ၢ်ဂ့ၤ
လၢအဒုးနဲၣ်အဝဲသ့ၣ်ကျဲလၢမုၢ်နံၤဒီးမုၢ်နၤန့ၣ်ဘၣ်.
20လၢနတၢ်ဂ့ၤတၢ်ဝါအပူၤန့ၣ်, နတဲဘၣ်အဝဲသ့ၣ်တၢ်လၢအ ကြၢးမၤဝဲ,
နလုၢ်အီၣ်တ့ၢ်အဝဲသ့ၣ်လၢကိၣ်မၤနၤဒီးဟ့ၣ်အီၤထံလၢကအီဝဲ အဂီၢ်န့ၣ်လီၤ.
21ဒီးအနံၣ်လွံၢ်ဆံလၢပှၢ်မုၢ်ကနၢအပူၤန့ၣ်နဟ့ၣ်ကယဲၢ် တၢ်လၢအလိၣ်ဘၣ်ဝဲ, ဒီးအကူအသိးတလီၢ်လံၤဘၣ်ဝဲဘၣ်. ဒီးအခီၣ်တညိးထီၣ်လၢတၢ်ဆါအဃိန့ၣ်ဘၣ်.
22နဒုးမၤနၢၤကွံာ်အဝဲသ့ၣ်လၢပှၤကလုာ်တဖၣ်ဒီးထံကီၢ်တဖၣ်,
ကီၢ်လၢအအိၣ်ဝးတရံးအဝဲသ့ၣ်အကီၢ်န့ၣ်လီၤ.
အဝဲသ့ၣ်မၤနၢၤကွံာ်ကီၢ်ဃ့ၡဘိၣ်လၢစီၤစံဃိၣ်ပၢဝဲ,
ဒီးကီၢ်ဘၤၡၣ်လၢစီၤပၤဧိာ်ပၢဝဲဒၣ်န့ၣ်လီၤ.
23နဟ့ၣ်အီၤအဖိတဖၣ်အါအါဂီၢ်ဂီၢ်ဒ်ဆၣ်လၢမူကပိာ်လိၤအသိး
ဒီးပျဲအမၤနၢၤကွံာ်ဒီးအိၣ်ဝဲဆိးဝဲလၢထံဧိၤကီၢ်ဧိၤ
လၢနအၢၣ်လီၤတ့ၢ်အမိၢ်ပၢ်ဖံဖုလၢပျၢၤတဖၣ်လၢနကဟ့ၣ် အဝဲသ့ၣ်အပူၤန့ၣ်လီၤ.
24အဝဲသ့ၣ်မၤနၢၤကွံာ်ကီၢ်ကနၤဧၣ်ဒီးနမၤနၢၤကွံာ် ပှၤအိၣ်ဖဲန့ၣ်တဖၣ်န့ၣ်လီၤ.
နဟ့ၣ်နပှၤဂီၢ်မုၢ်လၢတၢ်စိတၢ်ကမီၤလၢကမၤ ကီၢ်ကနၤဧၣ်အပှၤဂီၢ်မုၢ်ဒီးအစီၤပၤတဖၣ် ဒ်အသးဒၣ်ဝဲအသိးန့ၣ်လီၤ.
25နပှၤဂီၢ်မုၢ်မၤနၢၤကွံာ်ဝ့ၢ်အိၣ်ဒီးတိာ်ဧိၤတာ်ဧိၤတဖၣ်, ကီၢ်လၢဟီၣ်ခိၣ်ညၣ်ထ့ၣ်ဂ့ၤဝဲ, ဟံၣ်တဖၣ်လၢအပှဲၤဒီးတၢ်ထူးတၢ် တီၤ, ထံကမါအိၣ်ခူၣ်လီၤပာ်စၢၤအသးတဖၣ်,
သ့ၣ်စၤယံးတဖၣ်သ့ၣ်အိၣ်ဒီးအသၣ်တဖၣ်ဒီးစပံးမုၢ်အလီၢ်တဖၣ်န့ၣ်လီၤ.
အဝဲသ့ၣ်အီၣ်တၢ်လၢအအဲၣ်ဒိးအီၣ်ဝဲဒီးဘီၣ်ထီၣ်ညီထီၣ်မုာ်လၤ သးခုဒီးကယဲၢ်တၢ်ဂ့ၤတဖၣ်လၢနဟ့ၣ်အဝဲသ့ၣ်န့ၣ်လီၤ.
26ဘၣ်ဆၣ်နပှၤဂီၢ်မုၢ်ထီဒါနၤဒီးတစူၢ်နၤဘၣ်.
အဝဲသ့ၣ်ဃၣ်ဒူချၢကွံာ်အသးလၢနတၢ်သိၣ်တၢ်သီလၢနဟ့ၣ်လီၤပှၤ ယူဒၤဖိန့ၣ်လီၤ.
အဝဲသ့ၣ်မၤသံကွံာ်ဝံတဖၣ်လၢအဟ့ၣ်ပလီၢ်အဝဲသ့ၣ်ဒ်သိးကဃၣ်က့ၤ အသးဆူနအိၣ်န့ၣ်လီၤ. အဝဲသ့ၣ်မၤတရီတပါနၤတဘျီဝံၤတဘျီန့ၣ်လီၤ.
27ဒီးလၢတၢ်န့ၣ်အဃိနပျဲအဝဲသ့ၣ်အဒုၣ်အဒါတဖၣ်မၤနၢၤအီၤဒီး ပၢဘၣ်အဝဲသ့ၣ်န့ၣ်လီၤ.
လၢအဝဲသ့ၣ်အတၢ်ကိၢ်တၢ်ဂီၤအပူၤန့ၣ်, အဝဲသ့ၣ်ကိးထီၣ်နၤလၢတၢ် မၤစၢၤအဂီၢ်,
ဒီးနစံးဆၢအဝဲသ့ၣ်လၢမူခိၣ်န့ၣ်လီၤ.
ဒီးလၢနတၢ်သးကညီၤဖးဒိၣ်အပူၤနဆှၢလီၤန့ၢ်အဝဲသ့ၣ်လၢခိၣ် နၢ်တဖၣ်လၢကအုၣ်က့ၤခီၣ်က့ၤအဝဲသ့ၣ်လၢအဒုၣ်အဒါတဖၣ်န့ၣ်လီၤ.
28တုၤတၢ်ဃူတၢ်ဖိးန့ၢ်ကဒါန့ၣ်, အဝဲသ့ၣ်မၤဒဲးဘးတ့ၢ်ကဒီးတၢ် ဒီးနပျဲက
ဒီးအဒုၣ်အဒါမၤနၢၤအဝဲသ့ၣ်န့ၣ်လီၤ. အန့ၣ်ဒၣ်လဲာ်ဖဲအဝဲသ့ၣ်ပီၢ်ယၢ်လီၤက့ၤအသး,
ဒီးဃ့တၢ်မၤစၢၤလၢနၤလၢနကမၤပူၤဖျဲးအဝဲသ့ၣ်န့ၣ်,
နနၢ်ဟူအတၢ်ဃ့လၢမူခိၣ်ဒီးလၢနတၢ်သးကညီၤဖးဒိၣ်အပူၤ, နမၤပူၤဖျဲးအဝဲသ့ၣ်တဘျီဝံၤတဘျီန့ၣ်လီၤ.
29နဟ့ၣ်ပလီၢ်တ့ၢ်အဝဲသ့ၣ်လၢကစူၢ်နတၢ်သိၣ်လိတဖၣ်,
ဘၣ်ဆၣ်လၢတၢ်ပာ်ကဖၢလၢသးအပူၤ,
အဝဲသ့ၣ်တၢၤကွံာ်နတၢ်သိၣ်တၢ်သီတဖၣ်ဖဲ တၢ်တိၢ်န့ၢ်ဖံးဃာ်နတၢ်သိၣ်တၢ်သီလၢ ပှၤယူဒၤဖိအဂီၢ်မ့ၢ်ကျဲဆူတၢ်မူအခါန့ၣ်လီၤ.
အဝဲသ့ၣ်ထီဒါနၤ, လၢအတၢ်သးကိၤဒီးအခိၣ်ကိၤ အပူၤဂ့ၢ်လိာ်လၢကစူၢ်နၤအဂီၢ်န့ၣ်လီၤ.
30လၢတၢ်သူၣ်စူၤသးစူၤအပူၤနဟ့ၣ်ပလီၢ်အဝဲသ့ၣ် တနံၣ်ဝံၤတနံၣ်န့ၣ်လီၤ.
နထိၣ်ဂဲၤထီၣ်နဝံတဖၣ်အသးလၢကစံးကတိၤတၢ်, ဘၣ်ဆၣ်နပှၤဂီၢ်မုၢ်တဖၣ်အနၢ်တအၢဝဲဒၣ်န့ၣ်လီၤ. လၢတၢ်န့ၣ်အဃိနပျဲအဝဲသ့ၣ်ဘၣ်တၢ်မၤနၢၤကွံာ်အီၤလၢပှၤကလုာ် အဂၤတဖၣ်န့ၣ်လီၤ.
31ဘၣ်ဆၣ်ဒီးလၢနတၢ်သးကညီၤဒိၣ်ဝဲအဃိ,
နတလဲၤသဒၣ်အဝဲသ့ၣ်မ့ၢ်ဂ့ၤ, မၤဟးဂီၤကွံာ်အဝဲသ့ၣ်မ့ၢ်ဂ့ၤဘၣ်.
နမ့ၢ်ကစၢ်ယွၤတဂၤလၢအသးအိၣ်တၢ်ဒီး အသးကညီၤတၢ်န့ၣ်လီၤ.
32အိယွၤ, ပကစၢ်ယွၤဧၢ, နဒိၣ်ဝဲထီဝဲဆံးဒိၣ်လဲၣ်. နလီၤပျံၤဒီးနစိကမီၤဒိၣ်ဝဲဆံးဒိၣ်လဲၣ်.
နဟံးဃာ်ဂၢၢ်ကျၢၤနတၢ်အၢၣ်လီၤလၢတၢ်သးတီ အပူၤလီၤ. စးထီၣ်လၢကီၢ်အၤၡူၢ်အစီၤပၤတဖၣ် မၤနးမၤဖှီၣ်ပှၤဒီး
တုၤခဲကနံၣ်အံၤဒၣ်လဲာ်ပတူၢ်ဘၣ်ခီၣ်ဘၣ်တၢ်ထဲလဲၣ်.
ပစီၤပၤတဖၣ်, ပခိၣ်ပနၢ်တဖၣ်, ပပှၤလုၢ်တၢ်အခိၣ်တဖၣ်, ပဝံတဖၣ်,
ပမိၢ်ပၢ်ဖံဖုလၢပျၢၤတဖၣ်ဒီးပပှၤဂီၢ်မုၢ်တဖၣ်တူၢ်ဘၣ်တ့ၢ်လံ တၢ်န့ၣ်လီၤ.
သ့ၣ်နီၣ်ထီၣ်ပတူၢ်ဘၣ်တ့ၢ်တၢ်ထဲလဲၣ်န့ၣ်တက့ၢ်.
33နမၤတ့ၢ်တၢ်အဘၣ်လၢတၢ်စံၣ်ညီၣ်ပှၤ, ပမၤတ့ၢ်တၢ်ဒဲးဘးဘၣ်ဆၣ်, နမ့ၢ်တ့ၢ်ပှၤလၢအသူၣ်တီသးရၤလီၤ.
34ပမိၢ်ပၢ်ဖံဖုလၢပျၢၤတဖၣ်, ပစီၤပၤတဖၣ်, ပခိၣ်ပနၢ်တဖၣ်, ပပှၤလုၢ်တၢ်အခိၣ်တဖၣ်
တတိၢ်န့ၢ်ဖံးဃာ်ဘၣ်နတၢ်သိၣ်တၢ်သီ လၢပှၤယူဒၤဖိအဂီၢ်ဘၣ်.
အဝဲသ့ၣ်တဒိကနၣ်နတၢ်မၤလိာ်ဒီးနတၢ်ဟ့ၣ်ပလီၢ်သ့ၣ်တဖၣ်န့ၣ်ဘၣ်.
35လၢနတၢ်ဆိၣ်ဂ့ၤဆိၣ်ဝါအပူၤန့ၣ်စီၤပၤတဖၣ်ပၢဘၣ် နပှၤဂီၢ် မုၢ်
ဖဲအဝဲသ့ၣ်အိၣ်ဆိးတ့ၢ်လၢထံကီၢ်လၢအလဲၢ်, ဒီးပှဲၤဒီးဟီၣ်ခိၣ်ညၣ်ထ့ၣ်လၢနဟ့ၣ်အဝဲသ့ၣ်အပူၤန့ၣ်လီၤ.
ဘၣ်ဆၣ်အဝဲသ့ၣ်တဃၣ်က့ၤအသးလၢတၢ်ဒဲးဘးဒီးမၤနတၢ်မၤန့ၣ်ဘၣ်.
36ဒီးခဲကနံၣ်အံၤပမ့ၢ်ကုၢ်တဖၣ်လၢထံကီၢ်လၢ နဟ့ၣ်တ့ၢ်ပှၤ,
ထံကီၢ်လၢဟီၣ်ခိၣ်ညၣ်ထ့ၣ်ဂ့ၤဝဲဒီးဟ့ၣ်ပှၤ တၢ်အီၣ်တၢ်အီအပူၤန့ၣ်လီၤ.
37တၢ်လၢဟီၣ်ခိၣ်ဟ့ၣ်ထီၣ်ဝဲတဖၣ်န့ၣ်လဲၤဝဲဆူစီၤပၤတဖၣ်
လၢနပာ်အီၤလၢပဖီခိၣ်အအိၣ်မ့ၢ်လၢပမၤတ့ၢ် တၢ်ဒဲးဘးအဃိန့ၣ်လီၤ.
အဝဲသ့ၣ်မၤဘၣ်ပှၤဒီးပဆၣ်ဖိကီၢ်ဖိတဖၣ်ဒ်အသးဒၣ်ဝဲ
ဒီးပအိၣ်လၢတၢ်ကိၢ်တၢ်ဂီၤယိာ်မးအပူၤန့ၣ်လီၤ.”
ပှၤဂီၢ်မုၢ်တဖၣ်ဆဲးလီၤအမံၤလၢ အတၢ်အၢၣ်လီၤအီလီၤတခါအပူၤ
38မ့ၢ်လၢတၢ်မၤအသးခဲလၢာ်သ့ၣ်တဖၣ်အံၤအဃိပဝဲကီၢ်အံၣ်စရ့လး အပှၤဂီၢ်မုၢ်, ပမၤတၢ်အၢၣ်လီၤသမှံၤသပှၢ်တခါလၢအအိၣ်ကွဲးလီၤအသး, ဒီးပခိၣ်ပနၢ်တဖၣ်, ပပှၤလ့ၤဝံဖိတဖၣ်ဒီးပပှၤလုၢ်တၢ်အခိၣ်တဖၣ် စဲဃာ်အီၤဒီးအဝဲသ့ၣ်အတၢ်ပနီၣ်တဖၣ်န့ၣ်လီၤ.
Currently Selected:
လံာ်စီၤနဃ့မယၤ 9: KSWC
Highlight
Share
Compare
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
