လံာ်မၢ်ကူး 3
3
ပှၤစုသံတခီပၤတဂၤ
(မး. ၁၂:၉-၁၄; လူၤ. ၆:၆-၁၁)
1ယ့ၣ်ၡူးလဲၤနုာ်ကဒီးတဘျီဆူဘူၣ်ဘျီၣ်လၢအမ့ၢ်တၢ်ဘါလီၢ်အ ပူၤ, ဒီးဖဲန့ၣ်ပှၤစုသံတခီပၤအိၣ်ဝဲတဂၤလီၤ. 2ပှၤအိၣ်စ့ၢ်ကီးဖဲန့ၣ်တနီၤလၢအအဲၣ်ဒိးပာ်တၢ်ကမၣ်လၢယ့ၣ်ၡူး အလိၤသတးဒီးကွၢ်ဟုၣ်ကွၢ်စုာ်ဝဲမ့ၢ်အဝဲဒၣ်ကမၤဘျါက့ၤ ပှၤတဂၤန့ၣ်လၢပှၤယူဒၤဖိအမုၢ်အိၣ်ဘှံးနံၤဧါန့ၣ်လီၤ. 3ယ့ၣ်ၡူးစံးဘၣ်ပှၤတဂၤန့ၣ်, “ဟဲထီၣ်ဆူတၢ်မဲာ်ညါအံၤတက့ၢ်.” 4အန့ၣ်ဝံၤသံကွၢ်ပှၤအိၣ်ဖဲန့ၣ်တဖၣ်, “မ့ၢ်ပတၢ်သိၣ်တၢ်သီဟ့ၣ်ပှၤတၢ်ပျဲလၢ ပကမၤဘၣ်တၢ်ဒ်လဲၣ်တကလုာ်လၢပှၤယူဒၤဖိအမုၢ်အိၣ်ဘှံးနံၤန့ၣ်လဲၣ်. လၢပကမၤဂ့ၤတၢ်အဂီၢ်ဧါ. မ့တမ့ၢ်လၢပကမၤအၢတၢ်အဂီၢ်လဲၣ်. လၢပကမၤပူၤဖျဲးပှၤအသးသမူဧါ. မ့တမ့ၢ်လၢပကမၤသံပှၤတခီန့ၣ်လဲၣ်.”
ဘၣ်ဆၣ်ဒီး, ပှၤသ့ၣ်တဖၣ်န့ၣ်အိၣ်ဝဲဘှီၣ်ကလာ်လီၤ. 5ယ့ၣ်ၡူးကွၢ်ဃီၤပှၤတဖၣ်လၢအအိၣ်ဝးတရံးအီၤဒီး အသးဒိၣ်ဘၣ်အဝဲသ့ၣ်လီၤ. ဘၣ်ဆၣ်ဒီးတဘျီဃီဖဲန့ၣ်အသးအုးဝဲလၢအဝဲသ့ၣ်တဖၣ်ပာ်ကိၤ အသးဒိၣ်ဒိၣ်ကလဲာ်ဒီးအတၢ်ပာ်သးကမၣ်အဃိလီၤ. အန့ၣ်ဝံၤစံးဘၣ်ပှၤတဂၤန့ၣ်, “ယူာ်ထီၣ်နစုတက့ၢ်.” အဝဲဒၣ်ယူာ်ထီၣ်အစုဒီးအစုန့ၣ်ဂ့ၤထီၣ်က့ၤဝဲဒၣ်လီၤ. 6ပှၤဖၤရံၤၡဲတဖၣ်ဟးထီၣ်ကွံာ်ဖဲဘူၣ်ဘျီၣ်လၢအမ့ၢ်တၢ်ဘါလီၢ် အပူၤန့ၣ်, ဒီးတဘျီဃီလဲၤဃုထံၣ်လိာ်သးဒီးပှၤဟ့ၤရိာ်ကရၢဖိ တဖၣ်ဒီးကူၣ်ထီၣ်ဖးလီၤသကိးဝဲလၢအကမၤသံယ့ၣ်ၡူးန့ၣ်လီၤ.
ပှၤဂီၢ်မုၢ်လၢပီၣ်လဲၣ်ကၤလံၤလါအနံၤ
7ယ့ၣ်ၡူးသုးကစီၤကွံာ်အသးဃုာ်ဒီးအပျဲၢ်အဘီၣ်တဖၣ်ဒီးလဲၤဝဲ ဆူပီၣ်လဲၣ်ကၤလံၤလါအနံၤ, ဒီးပှၤဂီၢ်မုၢ်ဖးဒိၣ်ပိာ်ထီၣ်အခံလီၤ. အဝဲသ့ၣ်တဖၣ်ဟဲဝဲလၢကီၢ်ကၤလံၤလါ, လၢကီၢ်ယူဒၤ, 8လၢဝ့ၢ်ယရူၤၡလ့ၣ်, လၢကီၢ်အဒိၣ်, လၢကီၢ်အိၣ်လၢယၢ်ဒ့ၣ်မုၢ်ထီၣ်တကပၤဒီးတၢ်လီၢ်တၢ်ကျဲအိၣ်ဘူး အိၣ်တံၢ်ဒီးဝ့ၢ်ထါယၢၣ်ဒီးဝ့ၢ်စံဒိၣ်တဖၣ်လီၤ. ပှၤသ့ၣ်တဖၣ်အံၤဟဲဝဲဆူယ့ၣ်ၡူးအအိၣ်မ့ၢ်လၢအဝဲသ့ၣ်နၢ်ဟူ ဘၣ်တ့ၢ်လံတၢ်တဖၣ်လၢအဝဲဒၣ်မၤဝဲအဃိလီၤ. 9မ့ၢ်လၢပှၤဂီၢ်မုၢ်အိၣ်အါဒိၣ်မးအဃိ, ဒ်သိးအသုတဆီၣ်သနံးဘၣ်အီၤ တဂ့ၤဒီးယ့ၣ်ၡူးမၢအပျဲၢ်အဘီၣ်တဖၣ်ကတဲာ်ကတီၤပာ်စၢၤချံတဘ့ၣ်လီၤ. 10အဝဲဒၣ်မၤဘျါက့ၤတ့ၢ်လံပှၤဆူးပှၤဆါအါဒံအါဂၤသတးဒီး, ကယဲၢ်ပှၤအိၣ်ဒီးတၢ်ဆူးတၢ်ဆါတမံၤလၢ်လၢ်တဖၣ်န့ၣ်ဟဲဆီၣ် သနံးလိာ်အသးဆူအအိၣ်ဒ်သိးကထိးဘၣ်အီၤအဂီၢ်န့ၣ်လီၤ. 11ဒီးတဘျီလၢ်လၢ်ဖဲပှၤလၢတၢ်နါဒိးအီၤတဖၣ်ထံၣ်ဘၣ်အီၤန့ၣ်, အဝဲသ့ၣ်ထိၣ်လီၤဃံၤအသးလၢအဝဲဒၣ်အမဲာ်ညါဒီးကိးပသူထီၣ်ဝဲ, “နဲဒၣ်အံၤနမ့ၢ်ကစၢ်ယွၤအဖိခွါန့ၣ်လီၤ.” 12ယ့ၣ်ၡူးမၤလိာ်တၢ်နါတဖၣ်န့ၣ်လၢတၢ်ကတိၤဆူၣ်ဆူၣ်ကလဲာ်အပူၤ ဒ်သိးအသုတတဲဖျါထီၣ်အဝဲအဂ့ၢ်လၢပှၤနီတဂၤတဂ့ၤအဂီၢ်န့ၣ် လီၤ.
ယ့ၣ်ၡူးဃုထၢထီၣ်တၢ်မၢဖိတဆံခံဂၤ
(မး. ၁၀:၁-၄; လူၤ. ၆:၁၂-၁၆)
13အန့ၣ်ဝံၤအလီၢ်ခံ, ယ့ၣ်ၡူးလဲၤထီၣ်ဆူတၢ်လူၢ်ဒီခိၣ်ဒီးကိးဃီၤပှၤလၢ အဝဲဘၣ်အသးတဖၣ်, ဒီးအဝဲသ့ၣ်ဟဲဆူအအိၣ်လီၤ. 14အဝဲဒၣ်ဃုထၢထီၣ်ပှၤတဆံခံဂၤဒီးကိးန့ၢ်ဝဲအမံၤလၢပှၤတၢ် မၢဖိတဖၣ်လီၤ. ယ့ၣ်ၡူးစံးဘၣ်အဝဲသ့ၣ်, “ယဃုထၢသုလၢသုကအိၣ်ဒီးယၤဒီးယကမၢလီၤသုဒ်သိးသုကဟး ထီၣ်ဒီးစံၣ်တဲၤတဲလီၤတၢ်, 15ဒီးသုကအိၣ်ဒီးတၢ်စိတၢ်ကမီၤလၢသုကဟီထီၣ်ကွံာ်တၢ်နါတဖၣ် အဂီၢ်လီၤ.”
16ပှၤသ့ၣ်တဖၣ်အံၤမ့ၢ်ဝဲစီၤၡံမိၣ် (လၢယ့ၣ်ၡူးယုၢ်န့ၢ်က့ၤအမံၤလၢစီၤပ့းတရူး) 17စီၤစ့းဘ့းဒဲအဖိခွါစီၤယၤကိာ်ဒီးအဒီပုၢ်ဝဲၢ်စီၤယိၤဟၣ် (ယ့ၣ်ၡူးဟ့ၣ်အဝဲသ့ၣ်အမံၤလၢဘအၤန့ၢ်က့း, အခီပညီ “လီသီၣ်အဖိခွါတဖၣ်,”) 18စီၤအၣ်ဒရ့း, စီၤဖံလံးပူး, စီၤဘၢ်သလီးမဲ, စီၤမးသဲ, စီၤသိၤမါ, စီၤအၤလဖဲအဖိခွါစီၤယၤကိာ်, စီၤသးဒဲ, ပှၤအဲၣ်အထံအကီၢ်စီၤၡံမိၣ်, 19ဒီးစီၤယူဒၤအံၣ်စကၤရံၤအိာ်, လၢအဟ့ၣ်လီၤကွံာ်ယ့ၣ်ၡူးဆူဒုၣ်ဒါ အစုပူၤန့ၣ်လီၤ.
ယ့ၣ်ၡူးဒီးဘဧၤလးစဘူာ်
(မး. ၁၂:၂၂-၃၂; လူၤ. ၁၁:၁၄-၂၃; ၁၂:၁၀)
20အန့ၣ်ဝံၤဒီး ယ့ၣ်ၡူးက့ၤဝဲဆူဟံၣ်လၢအလဲၤအိၣ်တ့ၢ်ဝဲန့ၣ်လီၤ. ပှၤဂီၢ်မုၢ်ဟဲပာ်ဖှိၣ်ထီၣ်ကဒီးအသးတုၤဒၣ်လဲာ် ယ့ၣ်ၡူးဒီးအပျဲၢ်အဘီၣ်တဖၣ်ကအီၣ်တၢ်အဂီၢ် တၢ်ဆၢကတီၢ်တအိၣ်လၢၤဘၣ်န့ၣ်လီၤ. 21တုၤအဒူၣ်ဖိထၢဖိတဖၣ်နၢ်ဟူဘၣ်တၢ်ဂ့ၢ်အံၤဒီး, အဝဲသ့ၣ်လဲၤဝဲဒ်သိးအကကိးဆူၣ်က့ၤအီၤအဂီၢ် မ့ၢ်လၢပှၤစံးလၢအဝဲပျုၢ်ထီၣ်လံအဃိလီၤ.
22ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတနီၤ လၢအဟဲလီၤလၢဝ့ၢ်ယရူၤၡလ့ၣ်စံးဝဲ, “ဘဧၤလးစဘူာ်ဒိးအီၤဒီး ခီဖျိတၢ်နါအခိၣ်တဒုအံၤဟ့ၣ်အီၤတၢ်စိတၢ်ကမီၤအဃိ, အဝဲဒၣ်ဟီထီၣ်ကွံာ်တၢ်နါတဖၣ်လီၤ.”
23အန့ၣ်ဒီးယ့ၣ်ၡူးကိးဃီၤအဝဲသ့ၣ်ဆူအအိၣ်ဒီးကတိၤတၢ်ဒီးအဝဲ သ့ၣ်လၢတၢ်ကတိၤဒိတဖၣ်ဒီးစံးဝဲ, “မုၣ်ကီၤလံၢ်ကဟီထီၣ်ကွံာ်မုၣ်ကီၤလံၢ်န့ၣ်ကသ့ဒ်လဲၣ်. 24လၢဘီမုၢ်တဘ့ၣ်အပူၤတၢ်လီၤမုၢ်လီၤဖးမ့ၢ်အိၣ်ထီၣ်ဒီး, ဘီမုၢ်အဝဲန့ၣ်ကလီၤပှီၢ်ကွံာ်ဝဲဒၣ်လီၤ. 25ပှၤဟံၣ်ဖိဃီဖိတဒူၣ်မ့ၢ်လီၤမုၢ်လီၤဖးဒီးအ့ၣ်လိာ်ဝာ်လိာ် အသးဒီးပှၤတဒူၣ်န့ၣ်အိၣ်ဂၢၢ်အိၣ်ကျၢၤတသ့ဝဲဘၣ်. 26ဒ်န့ၣ်အသိး, မုၣ်ကီၤလံၢ်မ့ၢ်ဂဲၤထၢၣ်ထီဒါလိာ်က့ၤ အသးဒၣ်ဝဲဒီးမ့ၢ်အိၣ်လီၤမုၢ်လီၤဖးလိာ်အသးန့ၣ်, အဘီအမုၢ်အိၣ်ဂၢၢ်ဆိးကျၢၤတသ့ဘၣ်ဒီးကကတၢၢ်ဝဲဒၣ်ဖဲန့ၣ်လီၤ.
27ပှၤကလဲၤနုာ်ဆူပှၤဂံၢ်ဆူၣ်ဘါဆူၣ်တဂၤအဟံၣ်ပူၤဒီးဂုာ်န့ၢ် ဆူၣ်အတၢ်ဖိတၢ်လံၤန့ၣ်, တသ့ဘၣ်နီတဂၤဘၣ်. မ့မ့ၢ်ကဘၣ်စၢဃာ်ဆိပှၤဂံၢ်ဆူၣ်ဘါဆူၣ်အံၤဝံၤမးဒီး ဟံးန့ၢ်စိာ်ကွံာ်အတၢ်ဖိတၢ်လံၤခဲလၢာ်ကသ့ဝဲဒၣ်လီၤ.
28ယစံးဘၣ်တဲဘၣ်သုတၢ်မ့ၢ်တၢ်တီလီၤ. ပှၤကညီအတၢ်ဒဲးဘးခဲလၢာ်, ကယဲၢ်အတၢ်ကတိၤစံးအၢစံးသီလိာ်အသးတဂၤဒီးတဂၤပၢၢ်တုၤဒၣ် လဲာ်လၢတၢ်ကတိၤတရီတပါဘၣ်ယွၤန့ၣ်, ဘၣ်တၢ်ပျၢ်ကွံာ်အီၤသ့လီၤ. 29ဘၣ်ဆၣ်ဒီးပှၤလၢအကတိၤတရီတပါသးစီဆှံန့ၣ်, ယွၤတပျၢ်အတၢ်ဒဲးဘးနီတစုဘၣ်. အဂ့ၢ်ဒ်အံၤမ့ၢ်လၢအမၤဘၣ်တၢ်ဒဲးဘးလၢတၢ်ပျၢ်အီၤတသ့နီတစု ဘၣ်အဃိလီၤ.” 30(ယ့ၣ်ၡူးစံးတၢ်ဒ်သိးအံၤန့ၣ်, မ့ၢ်လၢပှၤတနီၤစံးဝဲ, “အဝဲဒၣ်တဂၤတၢ်နါဒိးအီၤ” အဃိလီၤ.)
ယ့ၣ်ၡူးအမိၢ်ဒီးအဒီပုၢ်ဝဲၢ်တဖၣ်
(မး. ၁၂:၄၆-၅၀; လူၤ. ၈:၁၉-၂၁)
31အန့ၣ်ဝံၤဒီးယ့ၣ်ၡူးအမိၢ်ဒီးအဒီပုၢ်ဝဲၢ်တဖၣ်ဟဲတုၤဝဲလီၤ. အဝဲသ့ၣ်အိၣ်ဆၢထၢၣ်လၢဟံၣ်အချၢဒီးမၢလီၤပှၤလဲၤနုာ်ဆူဟံၣ် ပူၤဒီးကိးန့ၢ်အီၤလီၤ. 32ပှၤဂီၢ်မုၢ်အိၣ်ဆ့ၣ်နီၤဝးတရံးယ့ၣ်ၡူးဒီးအဝဲသ့ၣ်စံးဘၣ် အီၤ, “နမိၢ်ဒီးနဒီပုၢ်ဝဲၢ်တဖၣ်အိၣ်လၢဟံၣ်အချၢ, ဒီးအဝဲသ့ၣ်အဲၣ်ဒိးထံၣ်ဘၣ်နၤလီၤ.
33ယ့ၣ်ၡူးစံးဆၢဝဲ, “ယမိၢ်ဒီးယဒီပုၢ်ဝဲၢ်မ့ၢ်မတၤတဖၣ်လဲၣ်.” 34ကွၢ်ဃီၤဝဲပှၤလၢအဆ့ၣ်နီၤအိၣ်ဝးတရံးအီၤတဖၣ်န့ၣ်ဒီးစံး ဝဲ, “ယမိၢ်ဒီးယဒီပုၢ်ဝဲၢ်တဖၣ်မ့ၢ်ဒၣ်ပှၤတဖၣ်အံၤလီၤ. 35ပှၤတဂၤလၢ်လၢ်လၢအမၤတၢ်ဘၣ်ယွၤအသးန့ၣ်, မ့ၢ်ယဒီပုၢ်ဝဲၢ်ခွါ, ယဒီပုၢ်ဝဲၢ်မုၣ်, ဒီးယမိၢ်လီၤ.”
Currently Selected:
လံာ်မၢ်ကူး 3: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
