လံာ်မၢ်ကူး 11
11
တၢ်မၤနၢၤအတၢ်လဲၤနုာ် ဆူဝ့ၢ်ယရူၤၡလ့ၣ်အပူၤ
(မး. ၂၁:၁-၁၁; လူၤ. ၁၉:၂၈-၄၀; ယိၤ. ၁၂:၁၂-၁၉)
1တုၤအဝဲသ့ၣ်လဲၤဘူးထီၣ်ဒီးဝ့ၢ်ယရူၤၡလ့ၣ်, ဖဲအထံၣ်စိဃီၤဝဲသဝီဘ့ၤသဖၤက့ဒီးဘ့ၤသနံတဖၣ်ဘူးဒီး ကစၢၢ်သ့ၣ်စၤယံးန့ၣ်, ယ့ၣ်ၡူးပျဲလီၤဆိအပျဲၢ်အဘီၣ်ခံဂၤ, 2ဒီးစံးဘၣ်အဝဲသ့ၣ်, “လဲၤနုာ်ဆူသဝီအိၣ်လၢသုမဲာ်ညါန့ၣ်တ က့ၢ်. သုလဲၤနုာ်တဘျီဃီသုကထံၣ်ဘၣ်ကသ့ၣ်ယီၤဖိတဒုလၢပှၤ တဒိးဘၣ်ဒံးအီၤနီတဘျီ, ဘၣ်တၢ်စၢဃာ်အီၤန့ၣ်လီၤ. ဃ့ၣ်လီၤအပျံၤဒီးဟဲက့ၤမိၤအီၤတက့ၢ်. 3ပှၤတဂၤဂၤမ့ၢ်သံကွၢ်သု, ဘၣ်မနုၤသုဘၣ်မၤတၢ်ဒ်န့ၣ်လဲၣ်ဒီး, စံးဘၣ်အီၤလၢကစၢ်လိၣ်ဘၣ်အီၤ, ဒီးသူဝဲဝံၤတဘျီဃီကဆှၢကဒါက့ၤဝဲန့ၣ်လီၤ.”
4အန့ၣ်ဒီးအဝဲသ့ၣ်ဟးထီၣ်ဒီးလဲၤဝဲဒီးထံၣ်ဘၣ်ကသ့ၣ်ယီၤဖိ တဒုလၢပှၤစၢဃာ်အီၤဘူးဒီးဟံၣ်တဖျၢၣ်အတြဲၤ, ဒီးအိၣ်ဆၢထၢၣ်ဝဲလၢကျဲမုၢ်ခိၣ်လီၤ. ဖဲအဝဲသ့ၣ်ဃ့ၣ်လီၤကသ့ၣ်ယီၤဖိန့ၣ်အပျံၤအခါ, 5ပှၤတနီၤလၢအဆၢထၢၣ်အိၣ်ဖဲတၢ်ကပၤန့ၣ်သံကွၢ်အဝဲသ့ၣ်, “သုဃ့ၣ်လီၤကသ့ၣ်ယီၤဖိအပျံၤဘၣ်မနုၤလဲၣ်.”
6အဝဲသ့ၣ်စံးဆၢက့ၤဒ်ယ့ၣ်ၡူးစံးဘၣ်တ့ၢ်အဝဲသ့ၣ်အသိး, ဒီးပှၤသ့ၣ်တဖၣ်ပျဲအဝဲသ့ၣ်က့ၤမိၤအီၤလီၤ. 7အဝဲသ့ၣ်မိၤဃီၤကသ့ၣ်ယီၤဖိန့ၣ်ဆူယ့ၣ်ၡူးအအိၣ်ဝံၤ, ပာ်ထီၣ်အဆ့ကၤတဖၣ်လၢအပျိၢ်လိၤ, ဒီးယ့ၣ်ၡူးဒိးထီၣ်အီၤလီၤ. 8ပှၤအါဂၤဒါလီၤအဆ့ကၤလၢကျဲလိၤ, ဒီးအဂၤတဖၣ်ကျီန့ၢ်သ့ၣ်ဒ့ပှဲၤဒီးအလၣ်တဖၣ်လၢပျီပူၤ ဒီးဟဲက့ၤဒါလီၤဝဲလၢကျဲလိၤလီၤ. 9ဒီးပှၤတဖၣ်လၢအလဲၤလၢတၢ်မဲာ်ညါဒီးပှၤတဖၣ်လၢ အပိာ်ထီၣ်အခံန့ၣ်ကိးပသူထီၣ်ဝဲ, “အုၣ်က့ၤခီၣ်က့ၤပှၤတက့ၢ်. ပှၤလၢအဟဲလၢကစၢ်အမံၤတဂၤအံၤမ်ကစၢ်ယွၤဆိၣ်ဂ့ၤအီၤတက့ၢ်. 10ပပၢ်စီၤဒၤဝံးအဘီမုၢ်လၢကဟဲအိၣ်ထီၣ်ဝဲအံၤန့ၣ်, မ်ကစၢ်ယွၤဆိၣ်ဂ့ၤဝဲတက့ၢ်. မ်ကစၢ်ယွၤအမံၤဘၣ်တၢ်စံးထီၣ်ပတြၢၤအီၤတက့ၢ်.”
11ယ့ၣ်ၡူးလဲၤနုာ်လီၤဝဲလၢဝ့ၢ်ယရူၤၡလ့ၣ်အပူၤဒီးလဲၤနုာ်ဝဲ ဆူတၢ်လုၢ်ဟံၣ်ပူၤလီၤ. ဖဲန့ၣ်အဝဲဒၣ်ကွၢ်တၢ်ကိးမံၤဒဲးဝးတရံးအီၤ, ဒီးမ့ၢ်လၢမုၢ်ကလီၤနုာ်ဘူးတ့ၢ်လံအဃိ, အဝဲဒၣ်ဟးထီၣ်ကွံာ်ဖဲန့ၣ်ဒီးလဲၤဝဲဆူသဝီဘ့ၤသနံ ဃုာ်ဒီးအပျဲၢ်အဘီၣ်တဆံခံဂၤန့ၣ်လီၤ.
ယ့ၣ်ၡူးဆိၣ်ဃီၣ်ဝဲချၢၣ်ဒၢတထူၣ်
(မး. ၂၁:၁၈-၁၉)
12လၢခံတနံၤဖဲအဝဲသ့ၣ်ဟဲက့ၤလၢသဝီဘ့ၤသနံန့ၣ်, တၢ်သၣ်ဝံၤယ့ၣ်ၡူးအသးလီၤ. 13အဝဲဒၣ်ထံၣ်စိဃီၤချၢၣ်ဒၢတထူၣ်လၢအယံၤလၢအအိၣ်ပှဲၤဒီး အလၣ်ဒီးလဲၤဃီၤဝဲဒ်သိးကထံၣ်န့ၢ်အသၣ်လၢအလိၤလီၤ. ဘၣ်ဆၣ်ဒီးဖဲအလဲၤတုၤဃီၤတခီထံၣ်ဝဲထဲအလၣ်လီၤ. မ့ၢ်လၢအသၣ်အဆၢကတီၢ်တဘၣ်ဒံးဘၣ်အဃိန့ၣ်လီၤ. 14ယ့ၣ်ၡူးစံးဘၣ်သ့ၣ်တထူၣ်န့ၣ်, “လီၤစိၤလီၤဃၣ်မ်ပှၤသုတအီၣ်ဘၣ်လၢၤနသၣ်နီတဂၤတဂ့ၤ.”
ဒီးအပျဲၢ်အဘီၣ်တဖၣ်နၢ်ဟူဝဲအတၢ်ကတိၤအံၤန့ၣ်လီၤ.
ယ့ၣ်ၡူးလဲၤဝဲဆူတၢ်လုၢ်ဟံၣ်
(မး. ၂၁:၁၂-၁၇; လူၤ. ၁၉:၄၅-၄၈; ယိၤ. ၂:၁၃-၂၂)
15တုၤအဝဲသ့ၣ်လဲၤတုၤလၢဝ့ၢ်ယရူၤၡလ့ၣ်ဒီး, ယ့ၣ်ၡူးလဲၤဆူတၢ်လုၢ်ဟံၣ်ဒီးဟီထီၣ်ကွံာ်ပှၤပှ့ၤတၢ်ဆါတၢ် ဖဲန့ၣ်တဖၣ်လီၤ. အဝဲဒၣ်မၤလီၤတကျၢၢ်ကွံာ်ပှၤခီလဲကျိၣ်ခီလဲစ့အစီၢ်နီၤ ခိၣ်တဖၣ်ဒီးပှၤဆါထိၣ်လွံၢ်အလီၢ်ဆ့ၣ်နီၤတဖၣ်, 16ဒီးတပျဲပှၤစိာ်ခီဖျိတၢ်နီတမံၤနီတဂၤလၢတၢ်လုၢ်ဟံၣ် အဂၢၤပူၤန့ၣ်ဘၣ်. 17အန့ၣ်ဝံၤအဝဲဒၣ်သိၣ်လီၤသီလီၤပှၤသ့ၣ်တဖၣ်ဒီးစံး, “တၢ်ကွဲးအသးစီဆှံပာ်ဖျါထီၣ်ကစၢ်ယွၤစံးဝဲ, ယတၢ်လုၢ်ဟံၣ်ကဘၣ်မ့ၢ်ပှၤကလုာ်ခဲလၢာ်အတၢ်ထုကဖၣ်အဟံၣ်လီၤ. ဘၣ်ဆၣ်ဒီးသုမၤကဲထီၣ်အီၤလၢတၢ်လီၢ်တပူၤလၢတမျိးတမျာ်တဖၣ်ကအိၣ် ခူသူၣ်အဂီၢ်လံ.”
18ပှၤလုၢ်တၢ်အခိၣ်အဒိၣ်တဖၣ်ဒီးပှၤသ့တၢ်ဘူၣ်တၢ်ဘါ အတၢ်သိၣ်တၢ်သီတဖၣ်နၢ်ဟူဘၣ်တၢ်ဂ့ၢ်အံၤသတးဒီး ဃုဝဲကျဲလၢအကမၤသံယ့ၣ်ၡူးအဂီၢ်လီၤ. အဝဲသ့ၣ်တဖၣ်ပျံၤဘၣ်အီၤ, မ့ၢ်လၢပှၤဂီၢ်မုၢ်ခဲလၢာ်ကမၢကမၣ်ဒိၣ်ဒိၣ်ကလဲာ်လၢယ့ၣ်ၡူး အတၢ်သိၣ်လိသီလိအဃိလီၤ.
19တုၤမုၢ်ဟါလီၤဒီး, ယ့ၣ်ၡူးဒီးအပျဲၢ်အဘီၣ်တဖၣ်ဟးထီၣ်ဝဲဒၣ် လၢဝ့ၢ်ပူၤန့ၣ်လီၤ.
တၢ်မၤလိလၢချၢၣ်ဒၢတထူၣ်အအိၣ်
(မး. ၂၁:၂၀-၂၂)
20လၢခံတနံၤဂီၤဂီၤကလဲာ်အဝဲသ့ၣ်လဲၤတၢ်လၢကျဲဒီးထံၣ်ဝဲ ချၢၣ်ဒၢတထူၣ်န့ၣ်ဃ့ထီကွံာ်ဒီထူၣ်ညါတုၤလီၤလၢအဂံၢ် တဖၣ်ဒၣ်လဲာ်လီၤ. 21စီၤပ့းတရူးသ့ၣ်နီၣ်ထီၣ်က့ၤတၢ်လၢအမၤတ့ၢ်အသးဒီးစံးဘၣ် ယ့ၣ်ၡူး, “ကွၢ်တက့ၢ်, သရၣ်ဧၢ, ချၢၣ်ဒၢတထူၣ်လၢနဆိၣ်ဃီၣ်တ့ၢ်အီၤန့ၣ်သံလံ.”
22ယ့ၣ်ၡူးစံးဆၢက့ၤအဝဲသ့ၣ်, “နာ်ကစၢ်ယွၤတက့ၢ်.
23ယစံးဘၣ်သုသပှၢ်ကတၢၢ်လီၤ. ပှၤတဂၤဂၤမ့ၢ်စံးဘၣ်ကစၢၢ်တဖျၢၣ်အံၤလၢအကထုးထီၣ်ကွံာ် အသးဖဲအလီၢ်အံၤဒီးကွံာ်လီၤအသးဆူပီၣ်လဲၣ်ပူၤဒီး တၢ်သးဒ့ဒီမ့တအိၣ်လၢအသးပူၤဘၣ်, မ့မ့ၢ်နာ်ဝဲလၢတၢ်ကမၤဒၣ်အသးဒ်အစံးဘၣ်ဝဲ အသိးန့ၣ်ဒီး, တၢ်န့ၣ်ကမၤဒၣ်အသးလၢအဂီၢ်လီၤ. 24လၢတၢ်န့ၣ်အဃိယစံးဘၣ်သု, တုၤသုဘါထုကဖၣ်ဒီးဃ့တၢ်တမံၤ မံၤန့ၣ်, နာ်လၢသုန့ၢ်ဘၣ်လံအီၤ, ဒီးသုကန့ၢ်ဘၣ်သုဝဲလီၤ. 25ဒီးတုၤသုဆၢထၢၣ်ဃ့ထုကဖၣ်ယွၤဒီး, ပှၤတဂၤလၢ်လၢ်အတၢ်ကမၣ်လၢသုစၢဃာ်လၢသုသးပူၤထီဒါအီၤမ့ၢ် အိၣ်တမံၤမံၤန့ၣ်, ပျၢ်ကွံာ်အီၤတက့ၢ်. လၢသုပျၢ်ပှၤဂၤအတၢ်ကမၣ်အဃိသုပၢ်အိၣ်လၢမူခိၣ်ကပျၢ်စ့ၢ် ကီးသုမၤကမၣ်တၢ်တဖၣ်လီၤ. 26(သုမ့ၢ်တပျၢ်ပှၤဂၤအတၢ်ကမၣ်ဘၣ်ဒီး, သုပၢ်အိၣ်လၢမူခိၣ်တပျၢ်သုမၤကမၣ်တၢ်တဖၣ်န့ၣ်ဘၣ်.)”
တၢ်သံကွၢ်ဘၣ်ဃးယ့ၣ်ၡူးအတၢ်စိတၢ်ကမီၤ
(မး. ၂၁:၂၃-၂၇; လူၤ. ၂၀:၁-၈)
27အဝဲသ့ၣ်လဲၤတုၤကဒီးတဘျီလၢဝ့ၢ်ယရူၤၡလ့ၣ်လီၤ. ဖဲယ့ၣ်ၡူးဟးဝဲလၢတၢ်လုၢ်ဟံၣ်အပူၤအခါ, ပှၤလုၢ်တၢ်အခိၣ်အဒိၣ်တဖၣ်, ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဒီးပှၤယူဒၤဖိကရၢအခိၣ်အနၢ်တဖၣ်ဟဲဃီၤဆူအအိၣ်, 28ဒီးသံကွၢ်အီၤ, “နမၤတၢ်တဖၣ်အံၤသ့ဝဲန့ၣ်မ့ၢ်နန့ၢ်ဘၣ်တၢ်စိတၢ်ကမီၤဖဲ လဲၣ်. မ့ၢ်မတၤတဂၤဟ့ၣ်စိဟ့ၣ်ကမီၤနၤန့ၣ်လဲၣ်.” 29ယ့ၣ်ၡူးစံးဆၢက့ၤအဝဲသ့ၣ်, “ယကသံကွၢ်သုတၢ်သံကွၢ်တထံၣ် လီၤ. စံးဆၢက့ၤယၤတက့ၢ်. သုမ့ၢ်စံးဆၢယၤဒီးယကတဲဘၣ်သု မ့ၢ်မတၤတဂၤဟ့ၣ်စိဟ့ၣ်ကမီၤယၤလဲၣ်န့ၣ်လီၤ.
30တဲယၤတက့ၢ်. တၢ်ဒိးဘျၢသးလၢထံလၢစီၤယိၤဟၣ်စံးဘၣ်တဲဘၣ်ပှၤလၢ အဂ့ၢ်န့ၣ်, မ့ၢ်အဟဲလၢကစၢ်ယွၤအအိၣ်ဧါ. မ့တမ့ၢ်, လၢပှၤကညီအအိၣ်တခီလဲၣ်.”
31အဝဲသ့ၣ်ကတိၤဂ့ၢ်လိာ်ဘှီလိာ်အသးတဂၤဒီးတဂၤဒီးစံးဝဲ, “ပမ့ၢ်စံးဘၣ်အီၤ, ‘ဟဲလၢကစၢ်ယွၤ’ ဒီးအဝဲဒၣ်ကသံကွၢ်က့ၤ ပှၤ, ‘မ့မ့ၢ်ဒ်န့ၣ်ဒီး, ဘၣ်မနုၤသုတနာ်အီၤဘၣ်လဲၣ်.’ 32ဘၣ်ဆၣ်ဒီးပမ့ၢ်စံးဘၣ်အီၤ, ‘ဟဲလၢပှၤကညီတခီ.’ ” ဒီး, (အဝဲသ့ၣ်ပျံၤဘၣ်ပှၤအိၣ်ဖဲန့ၣ်တဖၣ်, မ့ၢ်လၢပှၤကိးဂၤဒဲးပာ်ဝဲစီၤယိၤဟၣ်လၢအမ့ၢ်ဝံနီၢ်နီၢ် တဂၤအဃိန့ၣ်လီၤ.) 33အန့ၣ်သတးဒီးအဝဲသ့ၣ်စံးဆၢက့ၤယ့ၣ်ၡူး, “ပတသ့ၣ်ညါဘၣ်.”
ယ့ၣ်ၡူးစံးဘၣ်အဝဲသ့ၣ်, “မ့မ့ၢ်ဒ်န့ၣ်ဒီး, ယဲဒၣ်စ့ၢ်ကီးယမၤတၢ်တဖၣ်အံၤယအိၣ်ဒီး တၢ်အစိကမီၤလၢလဲၣ်န့ၣ်, ယတစံးဘၣ်သုဘၣ်.”
Currently Selected:
လံာ်မၢ်ကူး 11: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.