လံာ်မးသဲ 26
26
တၢ်ကူၣ်အၢထီဒါယ့ၣ်ၡူး
(မၢ်. ၁၄:၁-၂; လူၤ. ၂၂:၁-၂; ယိၤ. ၁၁:၄၅-၅၃)
1တုၤယ့ၣ်ၡူးမၤကတၢၢ်က့ၤတၢ်ကတိၤတဖၣ်န့ၣ်ခဲလၢာ်ဒီး, အဝဲစံးဘၣ်အပျဲၢ်အဘီၣ်တဖၣ်, 2“ဒ်သုသ့ၣ်ညါအသိး, လၢခံသီဝံၤအလီၢ်ခံန့ၣ်ဘူၣ်လဲၤကပာ်ကဘၣ်ဝဲ, ဒီးပှၤကညီဖိခွါကဘၣ်တၢ်ဟ့ၣ်လီၤကွံာ်အီၤဒ်သိးအကဘၣ် တၢ်ပျၤထီကွံာ်အီၤအဂီၢ်လီၤ.”
3အကတီၢ်ဖဲန့ၣ်, ပှၤလုၢ်တၢ်အခိၣ်အဒိၣ်တဖၣ်ဒီးပှၤယူဒၤဖိကရၢ အခိၣ်အနၢ်တဖၣ်ထံၣ်လိာ်အသးလၢပှၤလုၢ်တၢ်အခိၣ်အဒိၣ် ကတၢၢ်စီၤကၤယါဖၤအနီပူၤ, 4ဒီးသုးကျဲၤကူၣ်ထီၣ်ဖးလီၤသကိးဝဲလၢကဖီၣ်ခူသူၣ်ယ့ၣ်ၡူး ဒီးမၤသံကွံာ်အီၤန့ၣ်လီၤ. 5ဘၣ်ဆၣ်အဝဲသ့ၣ်စံး, “ပတဘၣ်မၤတၢ်အံၤဖဲဘူၣ်အကတီၢ်အံၤဘၣ်, ပှၤဂီၢ်မုၢ်ကတၢထီၣ်တၢလီၤဘၣ်ဖုးလီၤ.”
ယ့ၣ်ၡူးဘၣ်တၢ်ဖှူအီၤလၢသိဖဲသဝီဘ့ၤသနံ
(မၢ်. ၁၄:၃-၉; ယိၤ. ၁၂:၁-၈)
6အကတီၢ်ဖဲန့ၣ်, ယ့ၣ်ၡူးအိၣ်လၢသဝီဘ့ၤသနံလၢပှၤဘၣ်တ့ၢ်တၢ်ဆါ အၢစီၤၡံမိၣ်အဟံၣ်ပူၤလီၤ. 7ဒီးဖဲယ့ၣ်ၡူးအီၣ်တၢ်အဖၢမုၢ်န့ၣ်, ပိာ်မုၣ်တဂၤဟဲဆူအအိၣ်စိာ်ဃုာ်ဒီးပလီလၢၢ်ဝါပှဲၤဒီး သိနၢမူလၢအလုၢ်ဒိၣ်ပှ့ၤဒိၣ်နီၢ်မးတပလီ, ဒီးလူလီၤသိနၢမူန့ၣ်လၢယ့ၣ်ၡူးအခိၣ်လိၤလီၤ. 8ယ့ၣ်ၡူးအပျဲၢ်အဘီၣ်တဖၣ်ထံၣ်တၢ်အံၤဒီး, အဝဲသ့ၣ်သးဒိၣ်ထီၣ်ဒီးစံး, “မၤလၢာ်ဂီၤကလီတၢ်ဒ်အံၤဘၣ်မနုၤလဲၣ်. 9သိနၢမူအံၤမ့ၢ်ဘၣ်တၢ်ဆါလီၤအီၤလၢအပှ့ၤဖးဒိၣ်ဒီး, စ့လၢအန့ၢ်န့ၣ် တၢ်ဟ့ၣ်မၤစၢၤပှၤဖှီၣ်ဖိသ့ဝဲလီၤ.”
10ယ့ၣ်ၡူးသ့ၣ်ညါတၢ်လၢအဝဲသ့ၣ်စံးလိာ်အသးဒီးတဲဘၣ်အဝဲသ့ၣ်, “ဘၣ်မနုၤလၢသုမၤတံာ်တာ်ပိာ်မုၣ်အံၤလဲၣ်. တၢ်လၢအဝဲမၤဘၣ်ယၤအံၤ မ့ၢ်တၢ်မၤလၢအဂ့ၤဒီးဃံလၤမးတမံၤလီၤ. 11ပှၤဖှီၣ်ဖိယာ်ဖိတဖၣ်ကအိၣ်လၢသုသိးသုကျါထီဘိလီၤ. မ့မ့ၢ်ယဲဒၣ်အံၤယတအိၣ်ဒီးသုထီဘိဘၣ်. 12တၢ်လၢအဝဲမၤန့ၣ် မ့ၢ်တၢ်လူလီၤသိနၢမူအံၤလၢယနီၢ်ခိအလိၤ, ဒ်သိးကကတဲာ်ကတီၤယၤလၢတၢ်ခူၣ်လီၤကွံာ်အဂီၢ်လီၤ. 13နာ်ယၤတက့ၢ်. ဖဲတၢ်သးခုအကစီၣ်အံၤဘၣ်တၢ်စံၣ်တဲၤတဲလီၤအီၤတပူၤလၢ်လၢ်လၢ ဟီၣ်ခိၣ်ချၢဒီဘ့ၣ်ညါအံၤန့ၣ်, တၢ်လၢပိာ်မုၣ်မၤတ့ၢ်ဝဲအံၤကဘၣ်တၢ်စံၣ်ဃဲၤအီၤလၢ တၢ်သ့ၣ်နီၣ်ထီၣ်က့ၤအီၤအဂီၢ်လီၤ.”
စီၤယူဒၤအၢၣ်လီၤလၢကဆါလီၤကွံာ်ယ့ၣ်ၡူး
(မၢ်. ၁၄:၁၀-၁၁; လူၤ. ၂၂:၃-၆)
14တၢ်န့ၣ်ဝံၤဒီး, အပျဲၢ်အဘီၣ်တဆံခံဂၤအကျါတဂၤလၢအဘၣ်တၢ်ကိးအီၤလၢစီၤယူဒၤ အံၣ်စကၤရံၤအိာ်န့ၣ်, လဲၤဆူပှၤလုၢ်တၢ်အခိၣ်အဒိၣ်တဖၣ်အအိၣ်, 15ဒီးသံကွၢ်ဝဲ, “ယမ့ၢ်ဟ့ၣ်လီၤကွံာ်ယ့ၣ်ၡူးဆူသုစုပူၤန့ၣ်, သုကဟ့ၣ်ယၤတၢ်မနုၤလဲၣ်.” ဒီးအဝဲသ့ၣ်ဂံၢ်န့ၢ်စ့ညၣ်အဘ့ၣ်သၢဆံဝံၤဟ့ၣ်လီၤအီၤန့ၣ်လီၤ. 16စးထီၣ်အဆၢကတီၢ်ဖဲန့ၣ်, စီၤယူဒၤဃုခိးကွၢ်လၢ်တၢ်အခွဲးဂ့ၤယာ်ဘၣ်လၢအကဟ့ၣ်လီၤကွံာ် ယ့ၣ်ၡူး, ဆူအဝဲသ့ၣ်အစုပူၤအဂီၢ်လီၤ.
ယ့ၣ်ၡူးအီၣ်သကိးဘူၣ်လဲၤကပာ်ဒီး အပျဲၢ်အဘီၣ်တဖၣ်
(မၢ်. ၁၄:၁၂-၂၁; လူၤ. ၂၂:၇-၁၄,၂၁-၂၃; ယိၤ. ၁၃:၂၁-၃၀)
17လၢဘူၣ်ကိၣ်တအိၣ်ဘၣ်ဒီးကိၣ်မံၣ်အခီၣ်ထံးကတၢၢ်တသီန့ၣ်, ယ့ၣ်ၡူးအပျဲၢ်အဘီၣ်တဖၣ်ဟဲဆူအအိၣ်ဒီးသံကွၢ်အီၤ, “နအဲၣ်ဒိးလၢပကကတဲာ်ကတီၤန့ၢ်တၢ်လီၢ်လၢနကအီၣ် ဘူၣ်လဲၤကပာ်အဂီၢ်ဖဲလဲၣ်.”
18ယ့ၣ်ၡူးစံးဘၣ်အဝဲသ့ၣ်, “လဲၤဆူပှၤအိၣ်လၢဝ့ၢ်ပူၤတဂၤန့ၣ် အအိၣ်, ဒီးတဲဘၣ်အီၤဒ်အံၤ, ‘ပသရၣ်စံးဝဲလၢအနၣ်ရံၣ်တုၤဃီၤလံ, ဒီးအဝဲဒီး အပျဲၢ်အဘီၣ်တဖၣ်ကအီၣ်သကိးဘူၣ်လဲၤကပာ် လၢနဟံၣ်ပူၤလီၤ.’ ”
19အပျဲၢ်အဘီၣ်တဖၣ်မၤဝဲဒ်ယ့ၣ်ၡူးမၤလိာ်အဝဲသ့ၣ်အသိး, ဒီးကတဲာ်ကတီၤဘူၣ်လဲၤကပာ်အတၢ်အီၣ်တၢ်အီန့ၣ်လီၤ.
20တုၤမုၢ်ဟါလီၤဒီး, ယ့ၣ်ၡူးဆ့ၣ်နီၤသန့ၤဃုာ်ဒီးအပျဲၢ်အဘီၣ် တဆံခံဂၤလၢအကအီၣ်တၢ်အဂီၢ်လီၤ. 21ဖဲအအီၣ်သကိးတၢ်အဖၢမုၢ်န့ၣ်, ယ့ၣ်ၡူးစံးဘၣ်အဝဲသ့ၣ်, “ယစံးဘၣ်တဲဘၣ်သု, သုဝဲအကျါတဂၤကဆါလီၤကွံာ်ယၤလီၤ.”
22အပျဲၢ်အဘီၣ်တဖၣ်သးအုးဝဲဒိၣ်မး, ဒီးသံကွၢ်ယ့ၣ်ၡူးတဂၤဝံၤတဂၤ, “ကစၢ်ဧၢ, မ့ၢ်ယၤဧါ.”
23ယ့ၣ်ၡူးစံးဆၢအဝဲသ့ၣ်, “ပှၤလၢအဘျၢလီၤအကိၣ်လၢလီခီတဘ့ၣ်ဃီဒီးယၤန့ၣ်, ကဆါလီၤကွံာ်ယၤလီၤ. 24ပှၤကညီဖိခွါအံၤကဘၣ်သံဝဲ ဒ်တၢ်ကွဲးအသးစီဆှံစံးတ့ၢ်ဝဲ အသိးလီၤ. ဘၣ်ဆၣ်ဒီး, ပှၤကညီလၢအဆါလီၤကွံာ်ပှၤကညီဖိခွါအံၤကဘၣ်အဖှီၣ်ဆံးဒိၣ် လဲၣ်. အဝဲမ့ၢ်တအိၣ်ဖျဲၣ်ထီၣ်ဘၣ်န့ၣ်, ကဂ့ၤဒိၣ်ဒၣ်တၢ်တက့ၢ်လၢအဂီၢ်လီၤ.”
25စီၤယူဒၤအံၣ်စကၤရံၤအိာ်လၢအဆါလီၤကွံာ်ယ့ၣ်ၡူးတဂၤ ကတိၤထီၣ်တၢ်ဒီးစံး,
“သရၣ်ဧၢ, မ့ၢ်ယၤဧါ.” ယ့ၣ်ၡူးစံးဆၢအီၤ,
“နစံးတ့ၢ်လံနဲလံ.”
ကစၢ်အတၢ်အီၣ်လၢဟါ
(မၢ်. ၁၄:၂၂-၂၆; လူၤ. ၂၂:၁၄-၂၀; ၁ကရံၣ်. ၁၁:၂၃-၂၅)
26ဖဲအဝဲသ့ၣ်အီၣ်တၢ်အဖၢမုၢ်န့ၣ်, ယ့ၣ်ၡူးဟံးန့ၢ်ကိၣ်, စံးထီၣ်ပတြၢၤယွၤအဘျုး, ဒီးစိၢ်ဘျဲးဝဲ, ဒီးဟ့ၣ်လီၤဝဲအပျဲၢ်အဘီၣ်တဖၣ်ဒီးစံး, “ဟံးန့ၢ်ဒီးအီၣ်တက့ၢ်. တၢ်အံၤမ့ၢ်ယနီၢ်ခိလီၤ.”
27ဝံၤဒီးဟံးထီၣ်ဝဲလီခီတဖျၢၣ်, စံးထီၣ်ပတြၢၤယွၤ, ဒီးဟ့ၣ်လီၤအဝဲသ့ၣ်ဒီးစံး, “သုဝဲခဲလၢာ်, ဟံးန့ၢ်အီတက့ၢ်. 28တၢ်အံၤမ့ၢ်ယသွံၣ်, လၢအစဲပနီၣ်ဃာ်ကစၢ်ယွၤအတၢ်အၢၣ်လီၤအီ လီၤ, ယသွံၣ်လၢအဘၣ်တၢ်ဂၢ်လီၤကွံာ်အီၤ, ဒ်သိးပှၤအါဂၤအတၢ်ဒဲးဘးကဘၣ်တၢ်ပျၢ်ကွံာ်အီၤအဂီၢ်လီၤ. 29ယစံးဘၣ်တဲဘၣ်သု, တချုးဒံးဘၣ်လၢမုၢ်တနံၤဖဲယအီစပံးထံ အသီဒီးသုလၢယပၢ်အဘီအမုၢ်အပူၤန့ၣ်, ယတအီစပံးထံအံၤနီ တဘျီလၢၤဘၣ်.”
30ဝံၤဒီးအဝဲသ့ၣ်သးဝံၣ်ထါသးဝံၣ်တယုၢ်, ဒီးလဲၤထီၣ်ဝဲဆူကစၢၢ်သ့ၣ်စၤယံးအလိၤန့ၣ်လီၤ.
ယ့ၣ်ၡူးကတိၤဆိပာ်စၢၤလၢစီၤပ့းတရူးကသမၢအီၤ
(မၢ်. ၁၄:၂၇-၃၁; လူၤ. ၂၂:၃၁-၃၄; ယိၤ. ၁၃:၃၆-၃၈)
31တုၤနုၤတစု, ယ့ၣ်ၡူးစံးဘၣ်အဝဲသ့ၣ်, “တနၤအံၤ, သုဝဲခဲလၢာ် သုကဃ့ၢ်သဒၣ်ကွံာ်ဒီးပာ်တ့ၢ်ယၤလီၤ. အဂ့ၢ်ဒ်အံၤ, တၢ်ကွဲးအသးစံးဝဲ, ‘ကစၢ်ယွၤကမၤသံပှၤကွၢ်သိ, ဒီးသိလၢသိကရၢၢ်အပူၤတဖၣ်ကလီၤပြံလီၤပြါလီၤ.’ 32ဘၣ်ဆၣ်ဒီး, ဖဲတၢ်ဒုးဂဲၤဆၢထၢၣ်ယၤလၢတၢ်သံဝံၤအလီၢ်ခံ, ယကလဲၤဆိပာ်စၢၤဆူကီၢ်ကၤလံၤလါလၢသုမဲာ်ညါလီၤ.”
33စီၤပ့းတရူးစံးဘၣ်ယ့ၣ်ၡူး, “ပှၤအဂၤခဲလၢာ်မ့ၢ်သးဟးဂီၤဒီးပာ်တ့ၢ်ကွံာ်နၤဘၣ်ဆၣ်, ယတပာ်တ့ၢ်နၤနီတဘျီဘၣ်.”
34ယ့ၣ်ၡူးစံးဘၣ်စီၤပ့းတရူး, “ယစံးဘၣ်တဲဘၣ်နၤ, တနၤအံၤတချုးလၢဆီဖါကီၢ်အိၣ်အိထီၣ်န့ၣ်, နကသမၢဒီးစံးလၢနတသ့ၣ်ညါယၤဘၣ်န့ၣ်သၢဘျီလီၤ.”
35စီၤပ့းတရူးစံးဆၢအီၤ, “ယမ့ၢ်ဘၣ်သံဃုာ်ဒီးနၤဒၣ်လဲာ်, ယတသမၢနၤနီတဘျီဘၣ်.”
ဒီးအပျဲၢ်အဘီၣ်အဂၤတဖၣ်ခဲလၢာ်စံးတၢ်တမံၤဃီလီၤ.
ယ့ၣ်ၡူးဃ့ဘါထုကဖၣ်လၢက့ၤသစ့းမနၤ
(မၢ်. ၁၄:၃၂-၄၂; လူၤ. ၂၂:၃၉-၄၆)
36တုၤနုၤတစု, ယ့ၣ်ၡူးလဲၤဃုာ်ဒီးအပျဲၢ်အဘီၣ်တဖၣ်, ဆူတၢ်လီၢ်တတီၤလၢအဘၣ်တၢ်ကိးအီၤလၢက့ၤသစ့းမနၤလီၤ. ဒီးအဝဲစံးဘၣ်အပျဲၢ်အဘီၣ်တဖၣ်, “ဖဲယလဲၤဖဲန့ၣ်ဒီးဘါထုကဖၣ်တၢ်အခါ, ဆ့ၣ်နီၤအိၣ်သုဝဲဖဲအံၤတက့ၢ်.” 37အဝဲလဲၤကိးဃုာ်စီၤပ့းတရူးဒီးစီၤစ့းဘ့းဒဲအဖိခွါခံဂၤန့ၣ်လီၤ. အသူၣ်အုးသးအုးဒီးသူၣ်ကိၢ်သးဂီၤဝဲဒိၣ်မးလီၤ. 38ဒီးအဝဲဒၣ်စံးဘၣ်ပှၤသၢဂၤန့ၣ်, “တၢ်သူၣ်အုးသးအုးလၢယသးပူၤအံၤဒိၣ်မးဝဲတုၤဒၣ်လဲာ် ကမၤသဘှံးယၤလီၤ. အိၣ်ဖဲအံၤဒီးဆိးသီဒီးယၤတက့ၢ်.”
39အဝဲလဲၤယံၤထီၣ်ဝဲတစဲး, ထိၣ်လီၤပှီၤအသး, ဒီးကျးလီၤအမဲာ်လၢဟီၣ်ခိၣ်လိၤ, ဒီးဃ့ဘါထုကဖၣ်ယွၤဒီးစံး, “ယပၢ်ဧၢ, မ့ၢ်သ့ဒီးဟံးန့ၢ်ကွံာ်တၢ်နးတၢ်ဖှီၣ်အလီခီအံၤ လၢယအိၣ်တက့ၢ်. ဘၣ်ဆၣ်ဒီး, မ်အသုတမ့ၢ်ဒ်ယသးအတၢ်အဲၣ်ဒိးတဂ့ၤ. မ်အကမ့ၢ်ဒၣ်ဝဲဒ်နသးအတၢ်အဲၣ်ဒိးန့ၣ်တက့ၢ်.”
40တုၤနုၤတစု, အဝဲဟဲက့ၤကဒါက့ၤဆူအပျဲၢ်အဘီၣ်သၢဂၤအအိၣ်ဒီး ထံၣ်လၢအဝဲသ့ၣ်မံဘၣ်အသးလီၤ. ဒီးယ့ၣ်ၡူးစံးဘၣ်စီၤပ့းတရူး, “ဘၣ်မနုၤလၢသုသကိးသၢဂၤအံၤသုဆိးသီဒီးယၤထဲ တနၣ်ရံၣ်ဧိၤတကဲဘၣ်န့ၣ်လဲၣ်. 41ဆိးသီဒီးဃ့ဘါထုကဖၣ်ယွၤ, ဒ်သိးသုသုတလီၤဃံၤလၢတၢ်လ့ပစီအဃိတဂ့ၤန့ၣ်တက့ၢ်. သးအဂံၢ်အဘါမ့ၢ်ဆူၣ်သနာ်က့, နီၢ်ခိအဂံၢ်အဘါစၢ်ဝဲလီၤ.”
42ယ့ၣ်ၡူးလဲၤကဒီးဝဲခံဘျီတဘျီဒီးဃ့ဘါထုကဖၣ်ယွၤဒီး စံး, “ယပၢ်ဧၢ, တၢ်နးတၢ်ဖှီၣ်အလီခီအံၤ, တၢ်ထုးကွံာ်အီၤလၢယအိၣ်မ့ၢ်တသ့ဘၣ်ဒီး, ယမ့ၢ်ဘၣ်အီအီၤန့ၣ်, မ်အကမ့ၢ်ဒၣ်ဝဲဒ်တၢ်ဘၣ်နသးအသိးန့ၣ်တက့ၢ်.” 43အဝဲဟဲက့ၤကဒီးတဘျီဒီးထံၣ်ဝဲလၢအပျဲၢ်အဘီၣ်သၢဂၤ မံဘၣ်အသးလီၤ. အဝဲသ့ၣ်အမဲာ်ဖံးဃၢဒီးစီၣ်ထီၣ်အမဲာ်တန့ၢ်ဘၣ်လီၤ.
44မၤကဒီးတစု, ယ့ၣ်ၡူးပာ်တ့ၢ်အဝဲသ့ၣ်ဒီးလဲၤကဒီးဝဲ, ဒီးဃ့ဘါထုကဖၣ်ယွၤသၢဘျီတဘျီဒီးစံးတၢ်ကတိၤတမံၤဃီလီၤ. 45တုၤနုၤတစု, ယ့ၣ်ၡူးဟဲက့ၤကဒါက့ၤဆူအပျဲၢ်အဘီၣ်တဖၣ်အအိၣ်ဒီးစံး, “မ့ၢ်သုမံဒီးအိၣ်ဘှံးဒံးဒၣ်အဖၢမုၢ်ဧါ. ကွၢ်တက့ၢ်. နၣ်ရံၣ်လၢပှၤကညီဖိခွါအံၤ ကဘၣ်တၢ်ဟ့ၣ်လီၤကွံာ်အီၤဆူပှၤ တၢ်ဒဲးဘးဖိတဖၣ်အစိကမီၤအစုပူၤန့ၣ်, တုၤဃီၤဝဲလံ. 46ဂဲၤဆၢထၢၣ်. မ်ပလဲၤသကိးပဝဲတက့ၢ်. ကွၢ်တက့ၢ်. ပှၤလၢအဆါလီၤကွံာ်ယၤန့ၣ် ဟဲတုၤဖဲအံၤလံ.”
တၢ်ဖီၣ်ယ့ၣ်ၡူး
(မၢ်. ၁၄:၄၃-၅၀; လူၤ. ၂၂:၄၇-၅၃; ယိၤ. ၁၈:၃-၁၂)
47ယ့ၣ်ၡူးကတိၤဒံးတၢ်အဖၢမုၢ်ဒီး, အပျဲၢ်အဘီၣ်တဆံခံဂၤအကျါတဂၤ လၢအမ့ၢ်စီၤယူဒၤဟဲတုၤဝဲ အိၣ်ဃုာ်ဒီးပှၤဂီၢ်မုၢ်ဖးဒိၣ်လၢအစိာ်ဒီးနးဒီးနီၣ်တီၢ်တဖၣ်, လၢအဘၣ်တၢ်မၢလီၤအီၤလၢပှၤလုၢ်တၢ်အခိၣ်အဒိၣ်တဖၣ်ဒီးပှၤ ယူဒၤဖိကရၢအခိၣ်အနၢ်တဖၣ်လီၤ. 48ပှၤဆါလီၤကွံာ်ယ့ၣ်ၡူးတဂၤဟ့ၣ်ပာ်ပှၤဂီၢ်မုၢ်တၢ်ပနီၣ်တမံၤ ဒီးစံးဝဲ, “ပှၤလၢယနၢမူအီၤန့ၣ်, မ့ၢ်ပှၤလၢသုသးလီအီၤတဂၤလီၤ. ဖီၣ်အီၤတက့ၢ်.”
49စီၤယူဒၤဟဲတဘျီဃီဆူယ့ၣ်ၡူးအအိၣ်ဒီးစံး, “သရၣ်ဧၢ, မ်တၢ်ဃူတၢ်မုာ် အိၣ်ဒီးနၤတက့ၢ်.” စံးတၢ်န့ၣ်ဝံၤဒီးနၢမူအီၤလီၤ.
50ယ့ၣ်ၡူးစံးဆၢအီၤ, “တံၤသကိးဧၢ, တၢ်လၢနကမၤန့ၣ်မၤအီၤချ့ချ့ တက့ၢ်.”
တုၤနုၤတစု, ပှၤသ့ၣ်တဖၣ်န့ၣ်ဟဲဆူယ့ၣ်ၡူးအအိၣ်, ဖီၣ်န့ၢ်အီၤဒီးဟံးဃာ်အီၤကျၢၤကျၢၤလီၤ. 51ပှၤလၢအအိၣ်ဒီးယ့ၣ်ၡူး အကျါတဂၤ, ထုးထီၣ်အနးဒီးကျီပှၤလုၢ်တၢ်အခိၣ်အဒိၣ်ကတၢၢ် အကုၢ်အပှၤတဂၤ, ဘၣ်လၢအနၢ်ဒီးတဲာ်ကွံာ်ဝဲလီၤ. 52ယ့ၣ်ၡူးစံးဘၣ်အီၤ, “ပာ်က့ၤနနးလၢအလီၢ်ဒၣ်ဝဲတက့ၢ်. အဂ့ၢ်ဒ်အံၤပှၤလၢအဖီၣ်ထီၣ်နးန့ၣ်ကသံလၢနးခဲလၢာ်လီၤ. 53မ့ၢ်နတသ့ၣ်ညါလၢယကိးထီၣ်တၢ်မၤစၢၤလၢယပၢ်အအိၣ်သ့ဝဲ, ဒီးတဘျီဃီ ကဆှၢလီၤန့ၢ်ယၤကလူးအသုးမုၢ်အါန့ၢ်ဒံးတဆံခံဖုန့ၣ်ဘၣ်ဧါ. 54ဘၣ်ဆၣ် တၢ်မ့ၢ်မၤအသးဒ်န့ၣ်ဒီး, တၢ်ကွဲးအသးစီဆှံလၢအစံးလၢတၢ်ကဘၣ်မၤအသးဒ်အံၤလီၤန့ၣ်, ကလၢထီၣ်ပှဲၤထီၣ်ဝဲလၢကျဲဒ်လဲၣ်.”
55တုၤနုၤတစု, ယ့ၣ်ၡူးကတိၤတၢ်ဒီးပှၤဂီၢ်မုၢ်ဒီးစံး, “မ့ၢ်သုဘၣ်ဟဲစိာ်နးဒီးနီၣ်တီၢ်လၢ သုကဖီၣ်န့ၢ်ယၤအဂီၢ်, ဒ်ပှၤလၢအမၤကမၣ်တၢ်သိၣ်တၢ်သီတဂၤအသိးန့ၣ်ဧါ. ကိးနံၤဒဲးယဆ့ၣ်နီၤဒီးသိၣ်လီၤသီလီၤတၢ်လၢတၢ်လုၢ်ဟံၣ် အပူၤ, ဒီးသုတဖီၣ်ယၤမးလဲၣ်. 56ဘၣ်ဆၣ်ဒီး, တၢ်တဖၣ်အံၤမၤတ့ၢ်အသး, ဒ်သိးဒီးတၢ်လၢဝံတဖၣ်ကွဲးတ့ၢ်ဝဲလၢတၢ်ကွဲးအသးစီဆှံတဖၣ်အပူၤ, ကလၢထီၣ်ပှဲၤထီၣ်ဝဲအဂီၢ်လီၤ.”
တုၤနုၤတစု, အပျဲၢ်အဘီၣ်ခဲလၢာ်ပာ်တ့ၢ်ဒီးဃ့ၢ်သဒၣ်ကွံာ်အီၤ လီၤ.
ယ့ၣ်ၡူးလၢပှၤယူဒၤဖိအကီၣ်ကးအမဲာ်ညါ
(မၢ်. ၁၄:၅၃-၆၅; လူၤ. ၂၂:၅၄-၅၅,၆၃-၇၁; ယိၤ. ၁၈:၁၃-၁၄,၁၉-၂၄)
57ပှၤလၢအဖီၣ်န့ၢ်ယ့ၣ်ၡူးတဖၣ်န့ၣ်, က့ၤကိးအီၤဆူပှၤလုၢ်တၢ်အခိၣ် အဒိၣ်ကတၢၢ်လၢအမ့ၢ်စီၤကၤယါဖၤအဟံၣ်, ဖဲပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီး ပှၤယူဒၤဖိကရၢအခိၣ်အနၢ်တဖၣ် အိၣ်ဖှိၣ်ရိဖှိၣ်သကိးဝဲအလီၢ် န့ၣ်လီၤ. 58စီၤပ့းတရူးပိာ်ထီၣ်အဝဲသ့ၣ်အခံလၢအယံၤ, ပၢၢ်တုၤလၢပှၤလုၢ်တၢ်အခိၣ်အဒိၣ်ကတၢၢ် အဟံၣ်အကရၢၢ်ပူၤန့ၣ် လီၤ. အဝဲလဲၤနုာ်ဆူကရၢၢ်ပူၤတၢ်လီၤပျီအလီၢ်, ဒီးဆ့ၣ်နီၤသကိးဝဲဒီးပှၤခိးတၢ်ပၢၤတၢ်ဖိတဖၣ်, ဒ်သိးကသ့ၣ်ညါတၢ်ကမၤအသးလၢခံကတၢၢ်ဒ်လဲၣ်အဂီၢ်န့ၣ်လီၤ. 59ပှၤလုၢ်တၢ်အခိၣ်အဒိၣ်တဖၣ်, ဒီးကီၣ်ကးဒီဖုညါကျဲးစၢးဃုတၢ်အုၣ်အသးကဘျံးကဘျၣ် ထီဒါယ့ၣ်ၡူးဒ်သိးကမၤသံဘၣ်အီၤအဂီၢ်လီၤ. 60ပှၤအါဂၤဟဲဒီးစံးဘၣ်တဲဘၣ်တၢ်ကဘျံးကဘျၣ်အါမံၤအါ ကလုာ်ထီဒါယ့ၣ်ၡူး, ဘၣ်ဆၣ်ဒီးတထံၣ်န့ၢ်ဝဲတၢ်ဂ့ၢ်လီၤတံၢ်လီၤဆဲးနီ တမံၤဘၣ်. လၢခံကတၢၢ်ပှၤဟဲထီၣ်ဆူတၢ်မဲာ်ညါခံဂၤ 61ဒီးစံး, “ပှၤအံၤစံးဝဲ, ‘ယမၤလီၤပှီၢ်ကွံာ်ကစၢ်ယွၤအတၢ် လုၢ်ဟံၣ်ဒီးလၢသၢသီအတီၢ်ပူၤန့ၣ် ယဘှီထီၣ်က့ၤအီၤသ့လီၤ.’ ”
62ပှၤလုၢ်တၢ်အခိၣ်အဒိၣ်ကတၢၢ်ဆၢထၢၣ်ဒီးသံကွၢ်ယ့ၣ်ၡူး, “တၢ်ကမၣ်လၢပှၤတဖၣ်အံၤဃုတုာ်နၤခဲအံၤန့ၣ်, မ့ၢ်တၢ်လၢနကတဲဆၢအီၤတအိၣ်ဘၣ်နီတမံၤဘၣ်ဧါ.” 63ဘၣ်ဆၣ်ယ့ၣ်ၡူးအိၣ်ဘှီၣ်ကလာ်လီၤ. မၤကဒီးတဘျီပှၤလုၢ်တၢ်အခိၣ်အဒိၣ်ကတၢၢ် ကတိၤတၢ်လၢယ့ၣ်ၡူးဒီးစံး, “အခဲအံၤယမၢနဆိၣ်လီၤနသး လၢကစၢ်ယွၤလၢအမူဝဲတဂၤအမံၤအပူၤလီၤ. တဲဘၣ်ပှၤ, မ့ၢ်နမ့ၢ်ခရံာ်, ကစၢ်ယွၤအဖိခွါန့ၣ်ဧါ.”
64ယ့ၣ်ၡူးစံးဆၢအီၤ, “နစံးတ့ၢ်လံနဲလံ. မ့မ့ၢ်ယတဲဘၣ်သုခဲလၢာ် လၢစးထီၣ်ခဲအံၤဒီးဆူညါသုကထံၣ်ပှၤကညီဖိခွါဆ့ၣ်နီၤလၢတၢ် သ့တၢ်လၢာ်တဂၤအစုထွဲဒီးဟဲဒိးဝဲမူခိၣ်အတၢ်အၢၣ်တဖၣ်လီၤ.”
65ထဲန့ၣ်တဘျီ, ပှၤလုၢ်တၢ်အခိၣ်အဒိၣ်ကတၢၢ်တဂၤ ဖှီယာ် အကူအသိးဒၣ်ဝဲဒီးစံး, “ကတိၤတရီတပါလံယွၤလံ. ပမၤန့ၢ်တၢ်အုၣ်အသးအဂၤတဖၣ်အလီၢ်တအိၣ်လၢၤဘၣ်. ခဲအံၤဒၣ်လဲာ်သုနၢ်ဟူလံအတၢ်ကတိၤတရီတပါယွၤလံ. 66သုဆိကမိၣ်ဒ်လဲၣ်.”
အဝဲသ့ၣ်စံးဆၢဝဲ, “အတၢ်ကမၣ်အိၣ်ဒီးကြၢးဘၣ်တၢ်မၤသံအီၤလီၤ.”
67တုၤနုၤတစု, အဝဲသ့ၣ်ထူးပှဲာ်ယ့ၣ်ၡူးအမဲာ်ဒီးဒိအီၤတီၢ်အီၤလီၤ. ပှၤလၢအဒဲယ့ၣ်ၡူးအမဲာ်တဖၣ် 68စံးဝဲ, “ခရံာ်ဧၢ, တယာ်ဒီးတဲတက့ၢ်. ပှၤလၢအဒဲနမဲာ်အံၤမ့ၢ်မတၤလဲၣ်.”
စီၤပ့းတရူးသမၢယ့ၣ်ၡူး
(မၢ်. ၁၄:၆၆-၇၂; လူၤ. ၂၂:၅၆-၆၂; ယိၤ. ၁၈:၁၅-၁၈,၂၅-၂၇)
69ဖဲစီၤပ့းတရူးဆ့ၣ်နီၤလၢတၢ်ချၢလၢတၢ်လီၢ်လီၤပျီအပူၤအဖၢ မုၢ်န့ၣ်, ပှၤလုၢ်တၢ်အခိၣ်အဒိၣ်ကတၢၢ်အကုၢ်ပိာ်မုၣ်ဖိတဖၣ် အကျါတဂၤဟဲဆူအအိၣ်ဒီးစံး, “နၤစ့ၢ်ကီး, နမ့ၢ်ပှၤလၢအအိၣ်သကိးတ့ၢ်ဒီးပှၤကၤလံၤလါဖိယ့ၣ်ၡူး လီၤ.”
70ဘၣ်ဆၣ်ဒီး, အဝဲသမၢဝဲလၢအဝဲသ့ၣ်ခဲလၢာ်အမဲာ်ညါဒီးစံး, “မ့ၢ်နတဲ တၢ်မနုၤလဲၣ်န့ၣ်ယတသ့ၣ်ညါဘၣ်.” 71ဝံၤဒီး, အဝဲဟးထီၣ်ဒီးလဲၤထီၣ်ဝဲဆူတၢ်လီၢ်လီၤပျီအံၤအကျဲစၢၤ လီၤ. ကုၢ်ပိာ်မုၣ်ဖိအဂၤတဂၤထံၣ်အီၤဒီးစံးဘၣ်ပှၤပိာ်ခွါတဖၣ်လၢ အအိၣ်ဖဲန့ၣ်ဒ်အံၤ, “အဝဲအိၣ်သကိးတ့ၢ်ဒီးပှၤနစၤရ့းဖိယ့ၣ်ၡူးလီၤ.”
72မၤကဒီးတဘျီစီၤပ့းတရူးသမၢတၢ်ဒီးစံး, “ယဆိၣ်လီၤယသးလၢ ယတသ့ၣ်ညါပှၤအဝဲန့ၣ်ဘၣ်.”
73တစိၢ်ဖိဝံၤအလီၢ်ခံ, ပှၤပိာ်ခွါလၢအအိၣ်ဆၢထၢၣ်ဖဲန့ၣ်တဖၣ် ဟဲဆူစီၤပ့းတရူးအအိၣ်ဒီးစံး, “သပှၢ်တၢၢ်, နမ့ၢ်ပှၤလၢအဝဲသ့ၣ်အကျါတဂၤလီၤ. နကတိၤတၢ်အသီၣ် လီၣ်ဖျါထီၣ်နၤလီၤ.”
74တုၤနုၤတစုစီၤပ့းတရူးစံးဝဲ, “ယဆိၣ်လီၤယသးလၢယကတိၤ တၢ်မ့ၢ်တၢ်တီလီၤ. ယမ့ၢ်တဲတၢ်လၢအတမ့ၢ်တတီဘၣ်ဒီး, မ်ကစၢ်ယွၤကစံၣ်ညီၣ်ဒၣ်ဝဲယၤတက့ၢ်. ယတသ့ၣ်ညါ ပှၤအဝဲန့ၣ်ဘၣ်.”
တကီၢ်ခါဖဲန့ၣ်ဆီဖါကီၢ်အိၣ်အိထီၣ်ဝဲလီၤ. 75တုၤနုၤတစု, စီၤပ့းတရူးသ့ၣ်နီၣ်ထီၣ်တၢ်လၢယ့ၣ်ၡူးစံးဘၣ် တ့ၢ်အီၤ, “တချုးလၢဆီဖါကီၢ်အိၣ်အိထီၣ်န့ၣ်, နကသမၢဒီးစံးလၢနတသ့ၣ်ညါယၤဘၣ်သၢဘျီလီၤ.” ဒီးအဝဲဟးထီၣ်ကွံာ်ဝဲဖဲန့ၣ် ဒီးဟီၣ်ဝဲလၢာ်သးလီၤ.
Currently Selected:
လံာ်မးသဲ 26: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
