လံာ်မးသဲ 24
24
ယ့ၣ်ၡူးကတိၤတၢ်ဘၣ်ဃးဒီးတၢ်မၤလီၤပှီၢ်ကွံာ်တၢ်လုၢ်ဟံၣ်
(မၢ်. ၁၃:၁-၂; လူၤ. ၂၁:၅-၆)
1ဖဲယ့ၣ်ၡူးဟးထီၣ်လၢတၢ်လုၢ်ဟံၣ်ပူၤအဖၢမုၢ်န့ၣ်, အပျဲၢ်အဘီၣ်တဖၣ်ဟဲဆူအအိၣ်ဒီးဒုးနဲၣ်အီၤလၢတၢ်လုၢ်ဟံၣ် အတၢ်သူၣ်ထီၣ်တဖၣ်လီၤ. 2ဒီးယ့ၣ်ၡူးစံးဘၣ်အဝဲသ့ၣ်, “တၢ်တဖၣ်အံၤသုထံၣ်သုဝဲတမ့ၢ်ဘၣ်ဧါ. ယစံးဘၣ်တဲဘၣ်သုတၢ်မ့ၢ်တၢ်တီ, တၢ်သူၣ်ထီၣ်အလၢၢ်တဖၣ်အံၤကဘၣ်တၢ်မၤလီၤပှီၢ်ကွံာ်အီၤခဲလၢာ်, ဒီးတအိၣ်လၢၤလၢအလီၢ်ဒၣ်ဝဲနီတဖျၢၣ်လၢၤဘၣ်.”
တၢ်ကီတၢ်ခဲဒီးတၢ်မၤနးမၤဖှီၣ်တဖၣ်
(မၢ်. ၁၃:၃-၁၃; လူၤ. ၂၁:၇-၁၉)
3ဖဲယ့ၣ်ၡူးဆ့ၣ်နီၤဝဲလၢကစၢၢ်သ့ၣ်စၤယံးအဒီခိၣ်န့ၣ်, အပျဲၢ်အဘီၣ်တဖၣ်ဟဲဆူအအိၣ်ကစုဒုဒီးစံးဘၣ်အီၤ, “တဲဘၣ်ပှၤတက့ၢ်. တၢ်အံၤတဖၣ်ကမၤအသးအခါဖဲလဲၣ်. ဒီးတၢ်မနုၤကမၤအသးလၢအကဒုးနဲၣ်ပှၤလၢနတၢ်ဟဲက့ၤဒီးတၢ် အစိၤအကတၢၢ်န့ၣ်လဲၣ်.”
4ယ့ၣ်ၡူးစံးဆၢအဝဲသ့ၣ်, “ပလီၢ်သုသးဒ်သိးပှၤသုတလီန့ၢ်သုနီတဂၤတဂ့ၤ. 5ပှၤအါဂၤကဟဲလၢယမံၤဒီးစံး, ‘ယမ့ၢ်ခရံာ်’ လီၤ. ဒီးအဝဲသ့ၣ်ကလီန့ၢ်ပှၤအါဂၤလီၤ. 6သုကနၢ်ဟူဘၣ်တၢ်ဒုးတၢ်ယၤလၢအဘူးတဖၣ်အသီၣ်အသဲ, ဒီးတၢ်ဒုးတၢ်ယၤလၢအယံၤတဖၣ်အကစီၣ် ဘၣ်ဆၣ်ဒီးတဘၣ် သူၣ်ကိၢ်သးဂီၤတဂ့ၤ. တၢ်တဖၣ်အံၤကဘၣ်မၤအသး, ဘၣ်ဆၣ်ဒီး, တမ့ၢ်ဒံးဘၣ်တၢ်အစိၤအကတၢၢ်တုၤဃီၤလံန့ၣ်ဘၣ်. 7ပှၤတကလုာ်ဒီးတကလုာ်ကထီဒါလိာ်အသး, ဘီမုၢ်တဘ့ၣ်ဒီးတဘ့ၣ်ကဒုးလိာ်ယၤလိာ်အသး, တၢ်သၣ်ဝံၤလီၤဒိတဖၣ်ကအိၣ်ထီၣ်, ဒီးဟီၣ်ခိၣ်ကဟူးဝးဝဲသကုၤဆးဒးလီၤ. 8တၢ်တဖၣ်အံၤခဲလၢာ် မ့ၢ်ဒံးဒၣ်တၢ်လၢအလီၤဂာ်ဒီးပှၤဟုးဆါထီၣ်သီန့ၣ်လီၤ.
9တုၤနုၤတစု, သုကဘၣ်တၢ်ဖီၣ်န့ၢ်ဒီးဘၣ်တၢ်ဟ့ၣ်လီၤသုလၢ တၢ်စံၣ်ညီၣ်ဃၣ်အဂီၢ်ဒီးသုကဘၣ်တၢ်မၤသံသုလီၤ. ပှၤဟီၣ်ခိၣ်ဖိခဲလၢာ်ကသးဟ့သုလၢယဃိလီၤ. 10တုၤနုၤတစု, ပှၤအါဂၤကညိကွံာ်အတၢ်စူၢ်တၢ်နာ်ဖဲအကတီၢ်န့ၣ်လီၤ. အဝဲသ့ၣ်ကဆါလီၤအီၣ်ကွံာ်အသးတဂၤဒီးတဂၤဒီးကသးဟ့လိာ် အသးသကိးသကိးလီၤ. 11ဒီးဝံအဘျၣ်တဖၣ်ကပၢၢ်ထီၣ်အါဂၤဒီးကလီန့ၢ်ပှၤအါဂၤလီၤ. 12တၢ်အၢတၢ်သီကအါထီၣ်ဂီၢ်ထီၣ်ဒ်န့ၣ်, တုၤဒၣ်လဲာ်ပှၤဟီၣ်ခိၣ်ဖိအါဂၤ အတၢ်အဲၣ်တၢ်ကွံကဆံးလီၤစှၤလီၤဝဲလီၤ. 13ဘၣ်ဆၣ်ဒီး, ပှၤတဂၤလၢ်လၢ်လၢအတူၢ်တၢ်တဖၣ်အံၤန့ၢ်ဝဲ, ဒီးအိၣ်ဂၢၢ်ဆိးကျၢၤဝဲတုၤအကတၢၢ်န့ၣ်, ကဘၣ်တၢ်အုၣ်က့ၤခီၣ်က့ၤအီၤလီၤ. 14ဒီးတၢ်သးခုအကစီၣ်ဘၣ်ဃးဒီးဘီမုၢ်အံၤ, ကဘၣ်တၢ်စံၣ်တဲၤတဲလီၤအီၤသကုၤဟီၣ်ခိၣ်ချၢ, ဒ်သိးကကဲထီၣ်တၢ်အုၣ်အသးလၢပှၤဟီၣ်ခိၣ်ဖိခဲလၢာ်အဂီၢ်လီၤ. တုၤနုၤတစု, တၢ်အစိၤကကတၢၢ်ဝဲလီၤ.
တၢ်လီၤပျံၤလီၤဖုးလၢအလီၤသးဘၣ်အၢ ဒိၣ်ဒိၣ်ကလဲာ်
(မၢ်. ၁၃:၁၄-၂၃; လူၤ. ၂၁:၂၀-၂၄)
15တၢ်လီၤပျံၤလီၤဖုးလၢအလီၤသးဘၣ်အၢဒိၣ်ဒိၣ်ကလဲာ်, လၢစီၤဒၤနံးယ့လးကတိၤတ့ၢ်လၢအဂ့ၢ်န့ၣ်, သုကထံၣ်အအိၣ်ဆၢထၢၣ်လၢတၢ်စီဆှံအလီၢ်လီၤ. (ပှၤဖးတၢ်ဖိမ်အနၢ်ပၢၢ်တၢ်အံၤအခီပညီတက့ၢ်.) 16တုၤနုၤတစု, ပှၤအိၣ်လၢကီၢ်ယူဒၤအပူၤတဖၣ်, မ်အဃ့ၢ်ပူၤဖျဲးအသးဆူကစၢၢ်ကလိအကျါတက့ၢ်. 17ဒီးပှၤတဂၤလၢအအိၣ်လၢအဟံၣ်ခိၣ်ဒုးအဖီခိၣ်န့ၣ်, မ်အသုတဟံးန့ၢ်တၢ်ဆၢကတီၢ်လၢကက့ၤနုာ်ဆူဟံၣ်အပူၤ, ဒ်သိးအကဟံးန့ၢ်အတၢ်ဖိတၢ်လံၤတဖၣ်လၢအအိၣ်လၢ အဟံၣ်ပူၤန့ၣ်တဂ့ၤ. 18ပှၤလၢအအိၣ်လၢစံာ်ပျီပူၤတဂၤန့ၣ်, မ်အသုတက့ၤကဒါက့ၤ, ဒ်သိးအကဟံးန့ၢ်အဆ့ကၤဖးထီတဂ့ၤ. 19လၢမုၢ်နံၤအဝဲန့ၣ်တဖၣ်အကတီၢ်န့ၣ်, တၢ်ကနးကဖှီၣ်ဝဲဒိၣ်မးလၢပိာ်မုၣ်တဖၣ်လၢအအိၣ်ဟုးအိၣ်သး, ဒီးမိၢ်လၢအအိၣ်ဒီးဖိဆံးအီနုၢ်ထံတဖၣ်အဂီၢ်န့ၣ်လီၤ. 20ဃ့ထုကဖၣ်ကစၢ်ယွၤ, ဒ်သိးသုသုတဃ့ၢ်ပူၤဖျဲးဘၣ်သုသးလၢ တၢ်ဂိၢ်ခါအကတီၢ်မ့ၢ်ဂ့ၤ, လၢမုၢ်အိၣ်ဘှံးအနံၤမ့ၢ်ဂ့ၤ, တဂ့ၤန့ၣ်တက့ၢ်. 21အဂ့ၢ်ဒ်အံၤ, အကတီၢ်ဖဲန့ၣ်အတၢ်နးတၢ်ဖှီၣ်န့ၣ်ကလီၤပျံၤလီၤဖုးဒိၣ်န့ၢ်အါန့ၢ်ဒံးတၢ်လၢ အမၤတ့ၢ်အသး, စးထီၣ်လၢဟီၣ်ခိၣ်အိၣ်ထီၣ်သီတုၤလၢမုၢ်မဆါတနံၤအံၤ, ဒီးတၢ်နးမးဒ်သိးအံၤန့ၣ်ဆူညါစ့ၢ်ကီးတမၤအသးနီတဘျီလၢၤဘၣ်. 22ဘၣ်ဆၣ်ဒီး ကစၢ်ယွၤမၤစှၤလီၤတ့ၢ်လံမုၢ်နံၤမုၢ်သီတဖၣ်န့ၣ်လီၤ. ဒီးမုၢ်နံၤမုၢ်သီတဖၣ်အံၤ, မ့ၢ်တဘၣ်တၢ်မၤစှၤလီၤတ့ၢ်အီၤဘၣ်ဒီး, ပှၤဟီၣ်ခိၣ်ဖိလၢအကမူတီၢ်တအိၣ်လၢၤနီတဂၤဘၣ်. ဘၣ်ဆၣ်ဒီး, လၢအပှၤဃုထၢဖိတဖၣ်အဃိယွၤကမၤစှၤလီၤမုၢ်နံၤမုၢ်သီတဖၣ်လီၤ.
23တုၤနုၤတစု, ပှၤတဂၤဂၤမ့ၢ်စံးဘၣ်သု, ‘ကွၢ်တက့ၢ်. ခရံာ်အိၣ်လၢအံၤ,’ မ့တမ့ၢ်ဘၣ်ဒီး, ‘ခရံာ်အိၣ်ဖဲန့ၣ်’ န့ၣ်, နာ်အီၤတဂ့ၤ. 24အဂ့ၢ်ဒ်အံၤ, ခရံာ်အဘျၣ်ဒီးဝံအဘျၣ်တဖၣ်ကပၢၢ်ထီၣ်, ဒီးကဒုးနဲၣ်တၢ်အပနီၣ် ဒီးတၢ်လီၤလးအဒိၣ်အမုၢ်တဖၣ်ဒ်သိးဒီး, မ့ၢ်သ့မ့ၢ်ဘၣ်န့ၣ်, ကလီန့ၢ်ပၢၢ်တုၤလၢကစၢ်ယွၤအပှၤဃုထၢဖိတဖၣ်ဒၣ်လဲာ်လီၤ. 25ကနၣ်တက့ၢ်. ယတဲဆိပာ်စၢၤသုလၢတၢ်တချုးမၤအသးဒံးဘၣ်န့ၣ်လီၤ.
26လၢတၢ်န့ၣ်အဃိ, ပှၤမ့ၢ်တဲဘၣ်သု, ‘အဝဲအိၣ်လၢပှၢ်မုၢ်ကနၢအပူၤလီၤ’ န့ၣ်, တဘၣ်လဲၤဖဲန့ၣ်တဂ့ၤ. မ့ၢ်စံးဝဲလၢ, ‘အဝဲအိၣ်ခူသူၣ်ဖဲအံၤလီၤ.’ န့ၣ်, တဘၣ်နာ်တဂ့ၤ. 27အဂ့ၢ်ဒ်အံၤ, ပှၤကညီဖိခွါကဟဲဝဲဒ်လီဝၢ်အဒံး, ဒီးဆဲးကပြုၢ်ထီၣ်ဘၣ်မူခိၣ်ဒီဘ့ၣ်ညါ, စးထီၣ်လၢမုၢ်ထီၣ်တုၤလီၤလၢမုၢ်နုာ်အသိးန့ၣ်လီၤ.
28တၢ်လီၢ်တပူၤလၢ်လၢ်ဖဲတၢ်သံစိၣ်အိၣ်ဝဲန့ၣ်, လီတာ်ကအိၣ်ဖှိၣ်ဖဲန့ၣ်လီၤ.
ပှၤကညီဖိခွါအတၢ်ဟဲ
(မၢ်. ၁၃:၂၄-၂၇; လူၤ. ၂၁:၂၅-၂၈)
29တၢ်နးတၢ်ဖှီၣ်အမုၢ်နံၤတဖၣ်ဝံၤတဘျီဃီ, မုၢ်ကခံးလီၤဝဲ, လါတကပီၤလၢၤဘၣ်, ဒီးဆၣ်တဖၣ်ကလီၤတဲာ်ကွံာ်လၢမူခိၣ်, ဒီးတၢ်စိတၢ်ကမီၤလၢမူကပိာ်လိၤတဖၣ် ကဘၣ်တၢ်တရုၤဆှဲးဆှိးကွံာ်အီၤလၢအကျဲအကျိၤဒၣ်ဝဲအပူၤလီၤ. 30တုၤနုၤတစု, ပှၤကညီဖိခွါအတၢ်ပနီၣ်ကဟဲအိၣ်ဖျါထီၣ်လၢမူ ခိၣ်, ဒီးပှၤကလုာ်ခဲလၢာ်လၢဟီၣ်ခိၣ်ချၢအံၤကဟီၣ်ကယၢၤတၢ်, ဖဲအထံၣ်ဘၣ်ပှၤကညီဖိခွါဟဲဝဲလၢတၢ်အၢၣ်လၢမူကပိာ်လိၤ အိၣ်ဒီးအစိအကမီၤဒီးအလၤအကပီၤဒိၣ်ဒိၣ်မုၢ်မုၢ်လီၤ. 31အဝဲကမၢလီၤအကလူးတဖၣ်, လၢအကွဲၤအသီၣ်ဖးဒိၣ်, ဒီးအဝဲသ့ၣ်ကထၢဖှိၣ်က့ၤယွၤအပှၤဃုထၢဖိတဖၣ်လၢဟီၣ်ခိၣ် အသနၢၣ်လွံၢ်သနၢၣ်, လၢဟီၣ်ခိၣ်ဒီဘ့ၣ်ညါန့ၣ်လီၤ.
တၢ်မၤလိလၢချၢၣ်ဒၢအအိၣ်
(မၢ်. ၁၃:၂၈-၃၁; လူၤ. ၂၁:၂၉-၃၃)
32မၤလိတၢ်အဒိအတဲာ်လၢချၢၣ်ဒၢအအိၣ်တက့ၢ်. တုၤအဒ့တဖၣ်ဒိးစၢ်ထီၣ်ကပုာ်လုး, ဒီးအလၣ်တဖၣ်ဟဲထီၣ်ဝဲန့ၣ်, သုသ့ၣ်ညါလၢတၢ်ကိၢ်အကတီၢ်ဘူးထီၣ်လံန့ၣ်လီၤ. 33ဒ်န့ၣ်အသိး, တုၤသုထံၣ်ဘၣ်တၢ်တဖၣ်ခဲလၢာ်အံၤဒီး, သုကသ့ၣ်ညါလၢအကတီၢ်န့ၣ်ဘူးထီၣ်လံ. တၢ်အိၣ်ကတဲာ်ကတီၤအသးလၢတၢ်ကစးထီၣ်မၤအသးန့ၣ်လီၤ. 34သ့ၣ်နီၣ်ထီၣ်လၢ, တၢ်တဖၣ်အံၤခဲလၢာ်ကမၤအသးတချုးလၢ ပှၤတစိၤအံၤလဲၤပူၤကွံာ်ဒံးဘၣ်န့ၣ်လီၤ. 35မူခိၣ်ဒီးဟီၣ်ခိၣ်ကလဲၤပူၤကွံာ်ဝဲ, မ့မ့ၢ်ယကလုၢ်ယကထါတဖၣ်တလဲၤပူၤကွံာ်နီတဘျီဘၣ်.
မုၢ်နံၤဒီးနၣ်ရံၣ်ပှၤတသ့ၣ်ညါဘၣ်
(မၢ်. ၁၃:၃၂-၃၇; လူၤ. ၁၇:၂၆-၃၀,၃၄-၃၆)
36ဘၣ်ဆၣ်ဒီး, မုၢ်နံၤဒီးနၣ်ရံၣ်အဝဲန့ၣ်ကတုၤအခါဖဲလဲၣ်န့ၣ်, ပှၤတသ့ၣ်ညါနီတဂၤဘၣ်. ကလူးလၢမူခိၣ်တဖၣ်မ့ၢ်ဂ့ၤ, ဖိခွါမ့ၢ်ဂ့ၤတသ့ၣ်ညါဝဲဘၣ်. ပှၤသ့ၣ်ညါတၢ်အံၤမ့ၢ်ထဲ ပၢ်တဂၤဧိၤလီၤ. 37ပှၤကညီဖိခွါအတၢ်ဟဲန့ၣ်ကလီၤဂာ်ဒ်တၢ်မၤအသးလၢစီၤနိအၤ အမုၢ်နံၤတဖၣ်အသိးန့ၣ်လီၤ. 38ဖဲထံတချုးလုၣ်ဘၢဒံးဘၣ်တၢ်အမုၢ်နံၤတဖၣ်န့ၣ်, ပှၤအီၣ်တၢ်ဒီးအီတၢ်, ပှၤန့ၢ်မါန့ၢ်ဝၤတုၤလီၤလၢမုၢ်တနံၤလၢစီၤနိအၤလဲၤနုာ်လီၤဆူကဘီပူၤ န့ၣ်လီၤ. 39ဘၣ်ဆၣ်ဒီး, တချုးလၢထံလုၣ်ဘၢတၢ်ဒီးစိာ်ကွံာ်အဝဲသ့ၣ်ဒံးဘၣ် န့ၣ်, ပှၤတဖၣ်အံၤတသ့ၣ်ညါတၢ်လၢအမၤသးန့ၣ်ဘၣ်. တၢ်ကမၤအသးဒ်သိးအံၤဖဲပှၤကညီဖိခွါဟဲဝဲန့ၣ်လီၤ. 40အကတီၢ်ဖဲန့ၣ်န့ၣ်, ပှၤပိာ်ခွါခံဂၤကမၤတၢ်လၢစံာ်ပျီပူၤ လီၤ. တၢ်ကဟံးထီၣ်ကွံာ်တဂၤ, ဒီးအတဂၤကဘၣ်တၢ်ပာ်တ့ၢ်ကွံာ်အီၤလီၤ. 41ပိာ်မုၣ်ခံဂၤကဂံာ်သကိးဘုလီၤ. တဂၤကဘၣ်တၢ်စိာ်ထီၣ်ကွံာ်အီၤလီၤ. မ့မ့ၢ်အတဂၤကဘၣ်တၢ်ပာ်တ့ၢ်ကွံာ်အီၤလီၤ. 42လၢတၢ်န့ၣ်အဃိ, ဆိးသီတက့ၢ်. အဂ့ၢ်ဒ်အံၤ, သုကစၢ်ကဟဲဝဲအနံၤအသီန့ၣ်သုတသ့ၣ်ညါဘၣ်. 43ဟံၣ်ကစၢ်မ့ၢ်သ့ၣ်ညါဆိတၢ်ဘျၣ်ကဟဲအဆၢကတီၢ်ဒီး, သပှၢ်ကတၢၢ်အဝဲဒၣ်ကပာ်သူၣ်ပာ်သး, ဒီးကအိၣ်ခိးဝဲ, ဒီးတမ့ၢ်လၢအကပျဲတၢ်ဘျၣ်ဘၢၣ်ဖျိနုာ်ဆူ အဟံၣ်ပူၤန့ၣ်ဘၣ်လီၤ. 44လၢတၢ်န့ၣ်အဃိ, သုဝဲစ့ၢ်ကီးသုကဘၣ်အိၣ်ကတဲာ်ကတီၤ သုသးထီဘိလီၤ. အဂ့ၢ်မ့ၢ်လၢ, ပှၤကညီဖိခွါကဟဲဝဲလၢအကတီၢ်နၣ်ရံၣ်ဖဲသုတဆိကမိၣ် ဒီးမုၢ်လၢ်ဘၣ်ဝဲအခါန့ၣ်လီၤ.
တၢ်အခ့အပှၤလၢအသးတီဒီး အသးတတီဘၣ်
(လူၤ. ၁၂:၄၁-၄၈)
45မ့မ့ၢ်ဒ်န့ၣ်ဒီး, တၢ်အခ့အပှၤလၢအသးတီဝဲဒီးကူၣ်ဘၣ်ကူၣ်သ့, လၢအကစၢ်ဟ့ၣ်မူဟ့ၣ်ဒါအီၤလၢအဟံၣ်ဖိဃီဖိခဲလၢာ်အဖီခိၣ်, ဒ်သိးကဟ့ၣ်အီၣ်ဟ့ၣ်အီအဝဲသ့ၣ်ဘၣ်ဆၢဘၣ်ကတီၢ်န့ၣ်, မ့ၢ်မတၤတဂၤလဲၣ်. 46တၢ်အခ့အပှၤလၢအကစၢ်ဟဲက့ၤဒီးထံၣ်ဘၣ်အမၤဝဲဒ် တၢ်မၢတ့ၢ်အီၤအသိးတဂၤန့ၣ်, ဘၣ်ဆိၣ်ဂ့ၤနီၢ်နီၢ်လီၤ. 47ယစံးဘၣ်သုတၢ်မ့ၢ်တၢ်တီ, အကစၢ်ကဟ့ၣ်လီၤအီၤလၢ အတၢ်ဖိတၢ်လံၤခဲလၢာ်လၢကပၢၤဝဲအဂီၢ်လီၤ. 48ဘၣ်ဆၣ်ဒီး, တၢ်အခ့အပှၤလၢအအၢတဂၤန့ၣ်, မ့ၢ်စံးဝဲလၢအသးကံၢ်ပူၤလၢအကစၢ်ကဟဲက့ၤအဆၢကတီၢ်ယံာ်ဒံး ဝဲ, 49ဒီးမ့ၢ်တီၢ်တၢ်အခ့အပှၤသကိးသကိးဒီးအီၤတဖၣ်, အီၣ်တၢ်အီတၢ်ဒီးပှၤအီသံးဖိတဖၣ်န့ၣ်, 50မုၢ်တနံၤန့ၣ်, ဖဲတၢ်အခ့အပှၤအံၤတမုၢ်လၢ်ဝဲဘၣ်ဒီး, တၢ်အဆၢကတီၢ်လၢအဝဲတသ့ၣ်ညါဝဲဘၣ်န့ၣ်, အကစၢ်ကဟဲက့ၤတုၤဝဲလီၤ. 51ဒီးအကစၢ်ကကျီတဲာ်ကွံာ်အီၤတကူာ်တကူာ်, ဝံၤဒီးကဒုးတူၢ်ဘၣ်အီၤတၢ်တမံၤဃီလၢပှၤပာ်မၤအသးတဖၣ် ဒိးန့ၢ်ဘၣ်ဝဲန့ၣ်လီၤ. ဖဲန့ၣ်အဝဲကဟီၣ်ကယၢၤဝဲ, ဒီးကအ့ၣ်စဃံးအမဲလီၤ.
Currently Selected:
လံာ်မးသဲ 24: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
