လံာ်မးသဲ 20
20
ပှၤမၤတၢ်ဖိလၢစပံးလီၢ်တဖၣ်
1မူခိၣ်အဘီအမုၢ်န့ၣ်မၤအသးဒ်အံၤလီၤ. တဘျီပှၤအိၣ်ဝဲတဂၤလၢအဟးထီၣ်လၢအဟံၣ်ဂီၤဂီၤ, ဒ်သိးကဒိးလဲန့ၢ်ပှၤမၤတၢ်ဖိလၢအကဟဲမၤတၢ်လၢအစပံးလီၢ် အပူၤန့ၣ်လီၤ. 2အဝဲအၢၣ်လီၤပှၤမၤတၢ်ဖိတဖၣ်လၢအကဟ့ၣ်အဝဲသ့ၣ်လၢစ့ညၣ်တဘ့ၣ်, ဒီးဆှၢလီၤအဝဲသ့ၣ်ဆူအစပံးလီၢ်န့ၣ်လီၤ. 3ဖဲခွံနၣ်ရံၣ်ဃၣ်ဃၣ်န့ၣ်, အဝဲဟးထီၣ်ကဒီးတဘျီ, ဒီးထံၣ်ဘၣ်ပှၤတနီၤဆၢထၢၣ်အိၣ်ကလီကလီလၢဖၠါပူၤလီၤ. 4အဝဲစံးဘၣ်အဝဲသ့ၣ်, ‘လဲၤစ့ၢ်ကီးသုဝဲဆူစပံးလီၢ်ဒီးမၤတၢ်ဖဲန့ၣ်တက့ၢ်. ဒီးတၢ်အဘူးအလဲဖဲအကြၢးအဘၣ်န့ၣ်, ယကဟ့ၣ်သုလီၤ.’ တုၤနုၤတစုအဝဲသ့ၣ်လဲၤဝဲလီၤ. 5မၤကဒီး, လၢတဆံခံနၣ်ရံၣ်ဒီးဟါသၢနၣ်ရံၣ်ဃၣ်ဃၣ်န့ၣ်ဟး ထီၣ်ကဒီးဝဲ, ဒီးမၤဝဲဒ်န့ၣ်အသိးလီၤ. 6လၢဟါခီယဲၢ်နၣ်ရံၣ်ဃၣ်ဃၣ်န့ၣ်ဟးထီၣ်ကဒီးဝဲဆူဖၠါပူၤ, ဒီးထံၣ်ဒံးပှၤတနီၤဆၢထၢၣ်ဝဲဖဲန့ၣ်, ဒီးစံးဘၣ်အဝဲသ့ၣ်, ‘ဘၣ်မနုၤလၢသုဆၢထၢၣ်အိၣ်ကလီကလီသ့တနံၤကျၢၤန့ၣ်လဲၣ်.’ 7အဝဲသ့ၣ်စံးဆၢအီၤ, ‘မ့ၢ်လၢပှၤတမၢလဲပှၤနီတဂၤအဃိလီၤ.’ ဒီးစံးဘၣ်အဝဲသ့ၣ်, ‘လဲၤစ့ၢ်ကီးသုဝဲဆူစပံးလီၢ်အပူၤ, ဒီးမၤတၢ်ဖဲန့ၣ်တက့ၢ်.’
8တုၤမုၢ်ဟါလီၤဒီး, စပံးလီၢ်အကစၢ်စံးဘၣ်အပှၤကွၢ်ထွဲတၢ်မၤအခိၣ် တဂၤဒီးစံး, ‘ကိးန့ၢ်ပှၤမၤတၢ်ဖိတဖၣ်, ဒီးဟ့ၣ်လီၤအီၤလၢအဘူးအလဲ, စးထီၣ်လၢပှၤဟဲတုၤလၢခံကတၢၢ်တဂၤ, တုၤလီၤလၢပှၤဟဲတုၤလၢညါကတၢၢ်တဂၤတက့ၢ်.’ 9ပှၤလၢအဟဲစးထီၣ်မၤတၢ်လၢဟါယဲၢ်နၣ်ရံၣ်တဖၣ်, တဂၤဒိးန့ၢ်ဘၣ်စ့ညၣ်တဘ့ၣ်စုာ်စုာ်လီၤ. 10ဒီးတုၤပှၤလၢအဘၣ်တၢ်မၢလဲအီၤအဆိကတၢၢ်တဖၣ်ဟဲဟံးန့ၢ်အဘူး အလဲဒီး, ဆိကမိၣ်ဝဲလၢအဝဲသ့ၣ်ကဒိးန့ၢ်ဘၣ်ဝဲအါန့ၢ်ပှၤဂၤတက့ၢ်လီၤ. ဘၣ်ဆၣ်ဒီး, အဝဲသ့ၣ်ဒိးန့ၢ်စ့ၢ်ကီးစ့ညၣ်တဘ့ၣ်စုာ်စုာ်န့ၣ်လီၤ. 11အဝဲသ့ၣ်ဒိးန့ၢ်အဘူးအလဲဝံၤ, ကဒူးကဒ့ၣ်တၢ်လၢစပံးလီၢ်အကစၢ်အလိၤ 12ဒီးစံး, ‘ပှၤလၢအဘၣ်တၢ်မၢလဲအီၤလၢခံကတၢၢ်တဖၣ်အံၤ, မၤတၢ်ထဲတနၣ်ရံၣ်ဧိၤလီၤ. ဒီးနပာ်ပှၤတဖၣ်အံၤထဲသိးဒီးပဝဲလၢအမၤဘၣ်တၢ်ဒီတနံၤ ညါလၢတၢ်ကိၢ်ကျါတဖၣ်မးလဲၣ်.’ 13ဘၣ်ဆၣ်, စပံးလီၢ်အကစၢ်စံးဆၢပှၤလၢအဝဲသ့ၣ်အကျါတဂၤဒီးစံး, ‘တံၤသကိးဧၢ, ယတလီအီၣ်နၤဘၣ်. နအၢၣ်လီၤတ့ၢ်ယၤလၢနကမၤတၢ်လၢတနံၤအဘူး အလဲလၢစ့ညၣ်တဘ့ၣ်အဂီၢ်, တမ့ၢ်ဘၣ်ဧါ. 14ဟံးန့ၢ်တၢ်လၢအဘၣ်ဃးဒီးနၤ, ဒီးက့ၤတက့ၢ်. ယသးအိၣ်ဟ့ၣ်ပှၤလၢအဘၣ်တၢ်မၢလဲအီၤလၢခံ ကတၢၢ်တဂၤ, ဒ်ယဟ့ၣ်နၤအသိးလီၤ. 15မ့ၢ်ယတအိၣ်ဘၣ်ဒီးတၢ်အခွဲးအယာ်လၢယကသူယကျိၣ်ယစ့ဒၣ်ယဲ, ဒ်ယသးအိၣ်အသိးဘၣ်ဧါ. မ့တမ့ၢ်ဘၣ်ဒီး, မ့ၢ်ယသးအိၣ်ဟ့ၣ်ညီတၢ်အဃိဒီး, နသးကါနဲစ့ၢ်ကီးဧါ.’
16ဒ်န့ၣ်အသိး, ပှၤအါဂၤလၢအအိၣ်လၢခံကတၢၢ်ကအိၣ်က့ၤလၢညါ ကတၢၢ်, ဒီးပှၤအိၣ်လၢညါကတၢၢ်ကအိၣ်က့ၤလၢခံကတၢၢ်လီၤ.”
ယ့ၣ်ၡူးကတိၤတၢ်ဘၣ်ဃးဒီးအတၢ်သံအဂ့ၢ်
သၢဘျီတဘျီ
(မၢ်. ၁၀:၃၂-၃၄; လူၤ. ၁၈:၃၁-၃၄)
17ဖဲယ့ၣ်ၡူးလဲၤတၢ်လၢကျဲဆူဝ့ၢ်ယရူၤၡလ့ၣ်အဖၢမုၢ်န့ၣ်, အဝဲကိးန့ၢ်ထဲအပျဲၢ်အဘီၣ်တဆံခံဂၤကစုဒု, ဒီးစံးဘၣ်အဝဲသ့ၣ်, 18“ကနၣ်တက့ၢ်. ပကလဲၤထီၣ်ဆူဝ့ၢ်ယရူၤၡလ့ၣ်, ဒီးပှၤကညီဖိခွါအံၤကဘၣ်တၢ်ဟ့ၣ်လီၤအီၤဆူပှၤလုၢ်တၢ်အခိၣ် အဒိၣ်တဖၣ်ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်အစုပူၤ, လၢအဝဲသ့ၣ်ကစံၣ်ညီၣ်လၢအကဘၣ်တၢ်မၤသံအီၤအဂီၢ်, 19ဒီးကဟ့ၣ်လီၤအီၤဆူပှၤကလုာ်ဂၤတဖၣ်အစုပူၤ, ဒ်သိးကဘၣ်တၢ်ဒုၣ်ဒွဲၣ်အီၤ, တၢ်တီၢ်အီၤ, ဒီးပျၤထီအီၤလၢထူၣ်စုညါအလိၤ, ဒီးသၢသီတသီန့ၣ်ကဘၣ်တၢ်မၤမူထီၣ်က့ၤအီၤလၢယွၤလီၤ.”
မိၢ်တဂၤအတၢ်ဃ့ကညး
(မၢ်. ၁၀:၃၅-၄၅)
20တုၤနုၤတစု, စီၤစ့းဘ့းဒဲအမါဟဲဒီးအဖိခွါခံဂၤဆူယ့ၣ်ၡူးအအိၣ်, တီၤလီၤကဒွံကျိာ်လၢအမဲာ်ညါ, ဒီးဃ့တၢ်တမံၤလၢအီၤလီၤ.
21ဒီးယ့ၣ်ၡူးသံကွၢ်အီၤ, “နသးလီမနုၤလဲၣ်.”
အဝဲစံးဆၢဝဲ, “အၢၣ်လီၤယၤလၢယဖိခွါခံဂၤအံၤ, ကဆ့ၣ်နီၤတဂၤလၢနစုထွဲဒီးတဂၤလၢနစုစ့ၣ်, လၢနဘီနမုၢ်အပူၤတက့ၢ်.”
22ဘၣ်ဆၣ်ယ့ၣ်ၡူးစံးဆၢအဝဲသ့ၣ်ဒီးစံး, “သုဃ့တၢ်မနုၤမနုၤ လဲၣ်န့ၣ်, သုတသ့ၣ်ညါဘၣ်. တၢ်နးတၢ်ဖှီၣ်အလီခီလၢယကဘၣ်အီန့ၣ်, မ့ၢ်သုအီကကဲကစီဒီဧါ.”
အဝဲသ့ၣ်စံးဆၢအီၤ, “ကဲကစီဒီလီၤ.”
23ယ့ၣ်ၡူးစံးဆၢအဝဲသ့ၣ်, “သုကအီဘၣ်ယလီခီသပှၢ်ကတၢၢ်လီၤ. ဘၣ်ဆၣ်ဒီး, တၢ်ဆ့ၣ်နီၤလၢယစုစ့ၣ်မ့ၢ်ဂ့ၤယစုထွဲမ့ၢ်ဂ့ၤန့ၣ်, တအိၣ်လၢယစုပူၤလၢယကပျဲသုဘၣ်. မ့မ့ၢ်, တၢ်လီၢ်တဖၣ်အံၤ, မ့ၢ်ဒၣ်ပှၤလၢယပၢ်ကတဲာ်ကတီၤပာ်တ့ၢ်လၢအဂီၢ်တဖၣ်အတၢ်လီၤ.”
24တုၤအပျဲၢ်အဘီၣ်အဂၤတဆံဂၤနၢ်ဟူတၢ်ဂ့ၢ်အံၤဒီး, အဝဲသ့ၣ်အသးဒိၣ်ဘၣ်ပှၤဒီပုၢ်ဝဲၢ်ခွါခံဂၤန့ၣ်လီၤ. 25တုၤနုၤတစု, ယ့ၣ်ၡူးကိးဃီၤအဝဲသ့ၣ်ဆူအအိၣ်ဒီးစံးဘၣ်အဝဲသ့ၣ်, “သုသ့ၣ်ညါလၢပှၤပၢထံကီၢ်လၢအတသ့ၣ်ညါယွၤတဖၣ်ပၢတၢ်အိၣ် ဒီးတၢ်ပာ်ကစၢ်အသးဒီးဟံးန့ၢ်တၢ်စိတၢ်ကမီၤလၢထံဖိကီၢ်ဖိအဖီ ခိၣ်လီၤ. 26တၢ်ဒ်အံၤတဘၣ်မၤအသးလၢသုသိးသုကျါဘၣ်. မ့မ့ၢ်, ပှၤတဂၤလၢ်လၢ်လၢသုကျါအသးမ့ၢ်အိၣ်ကဲထီၣ်ပှၤအဒိၣ်ဒီး, ကဘၣ်မၤတၢ်အခ့အပှၤအတၢ်မၤလၢပှၤအဂၤတဖၣ်အဂီၢ်လီၤ. 27ဒီးပှၤတဂၤလၢ်လၢ်လၢသုကျါမ့ၢ်သးအိၣ်ကဲထီၣ်ပှၤအခိၣ်ဒီး, ကဘၣ်ကဲထီၣ်သုကုၢ်သုပှၤ 28ဒ်ပှၤကညီဖိခွါအသိး, လၢအဟဲဝဲတမ့ၢ်ဘၣ်လၢပှၤကမၤန့ၢ်တၢ်အခ့အပှၤ အတၢ်မၤလၢအဂီၢ်ဘၣ်. မ့ၢ်ဒ်သိးကမၤတၢ်အခ့အပှၤအတၢ်မၤလၢပှၤဂၤ အဂီၢ်, ဒီးကဟ့ၣ်လီၤအသးသမူလၢကအုၣ်က့ၤခီၣ်က့ၤပှၤအါဂၤအသးသမူ အဂီၢ်လီၤ.”
ယ့ၣ်ၡူးမၤဘျါက့ၤပှၤမဲာ်ဘျီၣ်ခံဂၤ
(မၢ်. ၁၀:၄၆-၅၂; လူၤ. ၁၈:၃၅-၄၃)
29တုၤယ့ၣ်ၡူးဒီးအပျဲၢ်အဘီၣ်တဖၣ်ဟးထီၣ်လၢဝ့ၢ်ယရံၤဃိဒီး, ပှၤဂီၢ်မုၢ်ဖးဒိၣ်ပိာ်ထီၣ်အခံလီၤ. 30ပှၤမဲာ်ဘျီၣ်လၢအဆ့ၣ်နီၤလၢကျဲကပၤခံဂၤ, တုၤအနၢ်ဟူလၢယ့ၣ်ၡူးလဲၤခီဂာ်တၢ်လီၢ်န့ၣ်ဒီး, အဝဲသ့ၣ်ကိးပသူထီၣ်ဒီးစံး, “စီၤဒၤဝံးအဖိခွါဧၢ, သူၣ်ကညီၤသးကညီၤပှၤတက့ၢ်.”
31ပှၤဂီၢ်မုၢ်အ့ၣ်လိာ်အဝဲသ့ၣ်အလိၤ, ဒီးမၢအဝဲသ့ၣ်အိၣ်ဘှီၣ် ကလာ်လီၤ. ဘၣ်ဆၣ်, အဝဲသ့ၣ်ကိးပသူထီၣ်ဒိၣ်ဒၣ်တၢ်တက့ၢ်, ဒီးစံး, “စီၤဒၤဝံးအဖိခွါ, ကစၢ်ဧၢ, သူၣ်ကညီၤသးကညီၤပှၤတက့ၢ်.”
32ယ့ၣ်ၡူးအိၣ်ကတီၢ်ဝဲ, ကိးဃီၤအဝဲသ့ၣ်ဒီးသံကွၢ်တၢ်ဒီးစံး, “သုအဲၣ်ဒိးယကမၤန့ၢ်တၢ်မနုၤလၢသုဂီၢ်လဲၣ်.”
33အဝဲသ့ၣ်စံးဆၢဝဲ, “ကစၢ်ဧၢ, ပအဲၣ်ဒိးလၢနကဒုးထံၣ်ထီၣ်က့ၤပှၤတၢ်လီၤ.”
34ယ့ၣ်ၡူးသးကညီၤအဝဲသ့ၣ်, ဒီးထိးဘၣ်အဝဲသ့ၣ်အမဲာ်ချံတဖၣ်လၢ အစု, ဒီးတကီၢ်ခါအဝဲသ့ၣ်ထံၣ်ထီၣ်က့ၤတၢ်, ဒီးပိာ်ထီၣ်အခံလီၤ.
Currently Selected:
လံာ်မးသဲ 20: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
