လံာ်တၢ်ဘူၣ်ထီၣ်ဘါထီၣ် 20
20
တၢ်စံၣ်ညီၣ်လၢတၢ်တဒိကနၣ်အဂီၢ်
1-2ဒီးယွၤစံးဘၣ်စီၤမိၤၡ့, လၢကစံးဘၣ်ပှၤအံၣ်စရ့လးဖိတဖၣ်, “ကယဲၢ်ပှၤတဂၤဂၤလၢသုကျါမ့ၢ်ဂ့ၤ, ပှၤတခီဘီမုၢ်ဖိအိၣ်လၢသုကျါမ့ၢ်ဂ့ၤ, လၢအဟ့ၣ်လီၤအဖိအလံၤတဂၤဂၤလၢတၢ်ဘူၣ်ထီၣ်ဘါထီၣ်ကစၢ်မိလးန့ၣ် ကဘၣ်တၢ်ကွံာ်သံအီၤလၢလၢၢ်လၢပှၤဂီၢ်မုၢ်န့ၣ်လီၤ. 3ကယဲၢ်ပှၤတဂၤလၢ်လၢ်လၢအဟ့ၣ်လီၤအဖိတဂၤဂၤဆူကစၢ်မိလးဒီးမၤ တကဆှီယလီၢ်စီဆှံဒီးမၤဘၣ်အၢယမံၤစီဆှံန့ၣ်ယ ကထီဒါအီၤဒီးကဘၣ်တၢ်ပာ်အီၤဒ်အတမ့ၢ်လၢၤဘၣ်ပှၤတဂၤလၢယပှၤ ဂီၢ်မုၢ်အကျါလၢၤဘၣ်န့ၣ်လီၤ. 4ဘၣ်ဆၣ်ဒီးပှၤဂီၢ်မုၢ်မ့ၢ်ကွၢ်ကပာ်ကွံာ်တၢ်လၢအမၤဝဲဒီးတမၤသံကွံာ်အီၤဘၣ်န့ၣ်, 5ယနီၢ်ကစၢ်ဒၣ်ယဲယကထီဒါပှၤတဂၤန့ၣ်ဒီးအဒူၣ်ဖိထၢဖိခဲလၢာ်, ဒီးပှၤကိးဂၤဒဲးလၢအမၤထွဲအခံဒီးအသးတတီဘၣ်ဒီးယၤဘၣ်, ဒီးဘါထီၣ်မိလးန့ၣ်ယတပာ်အီၤဒ်ယပှၤဂီၢ်မုၢ်အသိးလၢၤဘၣ်.
6ဒီးကယဲၢ်ပှၤတဂၤဂၤလၢအလဲၤဃ့တၢ်ဟ့ၣ်ကူၣ်ဟ့ၣ်ဖးလၢပှၤကတိၤ တၢ်ဒီးပှၤသံအကလၤတဖၣ်န့ၣ်ယကထီဒါအီၤဒီးယ တပာ်အီၤဒ်ပှၤတဂၤလၢယပှၤဂီၢ်မုၢ်အကျါလၢၤဘၣ်. 7ဒီးမၤစီဆှံလီၤသုသးဒီးကဲထီၣ်ပှၤစီဆှံတက့ၢ်. အဂ့ၢ်ဒ်အံၤ, ယမ့ၢ်ယွၤ, သုကစၢ်ယွၤန့ၣ်လီၤ. 8သုဘၣ်တိၢ်န့ၢ်ယတၢ်သိၣ်တၢ်သီတဖၣ်န့ၣ်လီၤ. အဂ့ၢ်ဒ်အံၤ, ယမ့ၢ်ယွၤလၢအမၤစီဆှံသုလီၤ.
9ဒီးကယဲၢ်ပှၤတဂၤဂၤလၢအဆိၣ်အၢအမိၢ်အပၢ်န့ၣ်ကဘၣ်တၢ်မၤသံအီၤ န့ၣ်လီၤ. ပှၤလၢအဆိၣ်အၢအမိၢ်အပၢ်န့ၣ်အိၣ်ဒီးတၢ်ကမၣ်လၢကြၢးဘၣ်တၢ်မၤသံအီၤန့ၣ်လီၤ.
10ဒီးပှၤလၢအအဲၣ်ဘၢအမါဒီးမံဃုာ်ဒီးပှၤလၢအဃၢၤအမါန့ၣ်, ကဘၣ်တၢ်မၤသံကွံာ်အီၤခံဂၤလိာ်လီၤ. 11ဒီးပှၤလၢအမံဃုာ်ဒီးအပၢ်အမါတဂၤန့ၣ်မ့ၢ်အမၤမဲာ်ဆှးအပၢ်လီၤ. ဒီးကဘၣ်တၢ်မၤသံကွံာ်အီၤခံဂၤလိာ်န့ၣ်လီၤ. အဝဲသ့ၣ်အိၣ်ဒီးတၢ်ကမၣ်လၢကြၢးဘၣ်တၢ်မၤသံအီၤန့ၣ်လီၤ. 12ဒီးပှၤလၢအမံဃုာ်ဒီးအဒဲၣ်မုၣ်န့ၣ်, ကဘၣ်တၢ်မၤသံကွံာ်အီၤခံဂၤလိာ်န့ၣ်လီၤ. အဝဲသ့ၣ်အိၣ်ဒီးတၢ်ကမၣ်လၢကြၢးဘၣ်တၢ်မၤသံအီၤန့ၣ်လီၤ. 13ဒီးပှၤပိာ်ခွါတဂၤလၢအမံဃုာ်ဒီးပိာ်ခွါအဂၤတဂၤန့ၣ်မ့ၢ်အမၤတၢ်လီၤသးဘၣ်အၢလီၤ. ဒီးပှၤခံဂၤလိာ်အံၤကဘၣ်တၢ်မၤသံကွံာ်အီၤန့ၣ်လီၤ. အဝဲသ့ၣ်အိၣ်ဒီးတၢ်ကမၣ်လၢကြၢးဘၣ်တၢ်မၤသံအီၤန့ၣ်လီၤ. 14ပှၤလၢအဟံးန့ၢ်ပိာ်မုၣ်တဂၤဒီးပိာ်မုၣ်န့ၣ်အမိၢ်ဒ်အမါအသိးန့ၣ်, မၤတ့ၢ်ဝဲတၢ်မဲာ်ဆှးလီၤ. ပှၤသၢဂၤလိာ်အံၤကဘၣ်တၢ်ဆိၣ်ကဲၤကွံာ်အီၤလၢမ့ၣ်အူဒ်သိးတၢ် အၢတၢ်သီအသုတအိၣ်လၢသုကျါတဂ့ၤလီၤ. 15ပှၤလၢအမံဃုာ်ဒီးဆၣ်ဖိကီၢ်ဖိတဒုန့ၣ်အဝဲဒီးဆၣ်ဖိကီၢ်ဖိန့ၣ်က ဘၣ်တၢ်မၤသံကွံာ်အီၤန့ၣ်လီၤ. 16ပိာ်မုၣ်လၢအမံဃုာ်ဒီးဆၣ်ဖိကီၢ်ဖိတဒုန့ၣ်, အဝဲဒီးဆၣ်ဖိကီၢ်ဖိ တဒုန့ၣ်ကဘၣ်တၢ်မၤသံကွံာ်အီၤန့ၣ်လီၤ. အဝဲသ့ၣ်အိၣ်ဒီးတၢ်ကမၣ်လၢကြၢးဘၣ်တၢ်မၤသံအီၤန့ၣ်လီၤ.
17ပှၤလၢအဟံးန့ၢ်အဒီပုၢ်ဝဲၢ်မုၣ်မ့ၢ်ဂ့ၤ, အပၢ်မ့တမ့ၢ်အမိၢ်အဖိ မုၣ်မ့ၢ်ဂ့ၤကဘၣ်တၢ်မၤမဲာ်ဆှးအီၤလၢကမျၢၢ်အမဲာ်ညါဒီးကဘၣ် တၢ်နီၣ်ဟးထီၣ်ကွံာ်အီၤလၢကမျၢၢ်အကျါန့ၣ်လီၤ. မ့ၢ်လၢအမံဃုာ်ဒီးအဒီပုၢ်ဝဲၢ်မုၣ်အဃိကဘၣ် တူၢ်အတၢ်ဒဲးဘးအဘူးအလဲန့ၣ်လီၤ. 18ပှၤလၢအမံဃုာ်ဒီးပိာ်မုၣ်တဂၤဖဲအသွံၣ်ဟဲအကတီၢ် န့ၣ်အဝဲသ့ၣ်ခံဂၤလိာ်ကဘၣ်တၢ်နီၣ်ဟးကွံာ်အီၤလၢကမျၢၢ် အကျါလီၤ. အဂ့ၢ်ဒ်အံၤ, မ့ၢ်လၢအခီပတာ်တၢ်သိၣ်တၢ်သီဘၣ်ဃးဒီးတၢ်တ ကဆှီဘၣ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးအဃိန့ၣ်လီၤ.
19ပှၤလၢအမံဃုာ်ဒီးအမုၢ်ဂၢ်န့ၣ်, အဝဲသ့ၣ်ခံဂၤလိာ်ကဘၣ်တူၢ်အတၢ်ဒဲးဘးအဘူးအလဲန့ၣ်လီၤ. 20ပှၤလၢအမံဃုာ်ဒီးအဖါတံၢ်အမါန့ၣ်မ့ၢ်အမၤမဲာ်ဆှးအဖါတံၢ်လီၤ. အဝဲဒီးပိာ်မုၣ်န့ၣ်ကဘၣ်တူၢ်တၢ်စံၣ်ညီၣ်ဒီးကသံဝဲတူာ်ဖိလီၤ. 21ပှၤလၢအဟံးန့ၢ်အဒီပုၢ်ဝဲၢ်ခွါအမါဒ်အမါအသိးန့ၣ်, အဝဲသ့ၣ်ခံဂၤလိာ်ကဘၣ်သံတူာ်ဖိန့ၣ်လီၤ. အဂ့ၢ်ဒ်အံၤ, အဝဲသ့ၣ်မၤတၢ်လၢအတကဆှီဘၣ်ဒ်တၢ်ဘူၣ်တၢ်ဘါအလုၢ် အလၢ်အိၣ်ဝဲအသိးဒီးမၤမဲာ်ဆှးအဒီပုၢ်ဝဲၢ်ခွါန့ၣ်လီၤ.”
22ဒီးယွၤစံးဝဲဒၣ်, “သုဘၣ်တိၢ်န့ၢ်ယတၢ်သိၣ်တၢ်သီဒီးတၢ်မၤလိာ်တဖၣ်, ဒ်သိးသုသုတဘၣ်တၢ်ဘှိးထီၣ်ကွံာ်သုလၢကီၢ်က နၤဧၣ်လၢယဆှၢနုာ်သုဆူအပူၤတဂ့ၤအဂီၢ်န့ၣ်လီၤ. 23မၤထွဲပှၤကလုာ်တဖၣ်လၢယဟီထီၣ်ကွံာ်အီၤလၢသုမဲာ်ညါအလုၢ်အလၢ် တဂ့ၤ. အဂ့ၢ်ဒ်အံၤ, အဝဲသ့ၣ်အတၢ်မၤခဲလၢာ်န့ၣ်ယသးဘၣ်အၢလီၤ. 24ဒီးယအၢၣ်လီၤအီလီၤတၢ်ဒီးသုလၢကီၢ်လၢအယွၤဝဲဒီးတၢ်နုၢ် ထံဒီးကနဲစီန့ၣ်ကမ့ၢ်သုတၢ်န့ၢ်သါန့ၣ်လီၤ. ယဲဒၣ်အံၤယမ့ၢ်ယွၤသုကစၢ်ယွၤလၢအပာ်လီၤဆီသုဒီးပှၤကလုာ် ဂၤတဖၣ်န့ၣ်လီၤ. 25မၤသးဒ်န့ၣ်ဒီး, သုဘၣ်နီၤဖးဆၣ် ဖိကီၢ်ဖိဒီးထိၣ်ဖိလံာ်ဖိလၢအကဆှီဒီးတကဆှီဘၣ်န့ၣ်လီၤ. ဒီးသုတဘၣ်မၤဘၣ်အၢသုသးလၢဆၣ်ဖိကီၢ်ဖိဒီးထိၣ်ဖိ လံာ်ဖိလၢယပာ်လီၤဖးဒီးသုလၢအတကဆှီဘၣ်န့ၣ်တဂ့ၤ. 26ဒီးသုကဘၣ်စီဆှံလၢယဂီၢ်လီၤ. အဂ့ၢ်ဒ်အံၤ, တၢ်လၢယၤယွၤအံၤယစီဆှံဝဲဒၣ်န့ၣ်လီၤ. ဒီးယပာ်လီၤဆီသုဒီးပှၤကလုာ်ဂၤတဖၣ်ဒ်သိးသုကမ့ၢ်ယတၢ်လီၤ.
27ဒီးကယဲၢ်ပှၤတဂၤလၢ်လၢ်, ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ, လၢအလဲၤဃ့တၢ်ဟ့ၣ်ကူၣ်ဟ့ၣ်ဖးလၢပှၤသံအကလၤန့ၣ်ကဘၣ်တၢ် ကွံာ်သံအီၤလၢလၢၢ်န့ၣ်လီၤ. ပှၤတဂၤလၢ်လၢ်လၢအမၤတၢ်အံၤန့ၣ်အိၣ်ဒီးတၢ်ကမၣ်လၢကြၢးဘၣ်တၢ် မၤသံအီၤန့ၣ်လီၤ.”
Currently Selected:
လံာ်တၢ်ဘူၣ်ထီၣ်ဘါထီၣ် 20: KSWC
Highlight
Share
Compare
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
