လံာ်စီၤယိၤဘး 37
37
1ကလံၤမုၢ်မၤစံၣ်ယသးတုၤယသူၣ်ကနိးသးကနိးန့ၣ်လီၤ.
2သုဝဲခဲလၢာ်ဒိကနၣ်ကစၢ်ယွၤအကလုၢ်, အထးခိၣ်အကလုၢ်လၢအဟဲလၢလီအသီၣ်န့ၣ်တက့ၢ်.
3အဝဲပျဲလီၤပျၢ်လီၤလီဝၢ်ဒံးလၢမူခိၣ်, ဆူဟီၣ်ခိၣ်အက တၢၢ်လၢအံၤတုၤလၢဘးခီအကတၢၢ်တစုန့ၣ်လီၤ.
4အန့ၣ်တစုကစၢ်ယွၤအကလုၢ်သီၣ်လီၤကညီၢ်န့ၣ်ဟူထီၣ်ဒ် လီသီၣ်ထီၣ်ကဟုကညီၢ်အသိး, ဒီးအကတီၢ်ဖဲန့ၣ်လီဝၢ် အဒံးတထံၣ်ဃီလီၤ.
5ဖဲကစၢ်ယွၤဟ့ၣ်လီၤအကလုၢ်န့ၣ်တၢ်လီၤလးသ့ၣ်တဖၣ်မၤ အသး, တၢ်လီၤကမၢကမၣ်လၢပနၢ်ပၢၢ်အီၤတသ့သ့ၣ်တဖၣ်န့ၣ်လီၤ.
6ကစၢ်ယွၤမၤလိာ်မူခိၣ်ဖီလၢကလီၤဝဲဆူဟီၣ်ခိၣ်လိၤ, ဒီးဒုးဟဲစူၤလီၤတၢ်ဆူၣ်ဆူၣ်ကလဲာ်လီၤ.
7အဝဲဒုးဆိကတီၢ်ကွံာ်ပှၤကညီအတၢ်မၤဒီးဒုးနဲၣ်အဝဲ သ့ၣ်တၢ်လၢအမၤဝဲသ့န့ၣ်လီၤ.
8ဆၣ်ဖိကီၢ်ဖိလၢအမံၤသ့ၣ်တဖၣ်လဲၤဝဲဆူအတဝၢတဖၣ် အပူၤလီၤ.
9ကလံၤတဝံးဟဲဝဲလၢကလံၤထံးဒီးတၢ်ခုၣ်တကံဟဲဝဲလၢ ကလံၤစိးန့ၣ်လီၤ.
10ကစၢ်ယွၤအတၢ်သါဒုးလီၤသကၤထံဒီးဒုးကဲထီၣ်ဝဲဆူထံလီၤ သကၤကိၢ်လိၢ်န့ၣ်လီၤ.
11လီဝၢ်ဒံးဆဲးကပြူၢ်ထီၣ်လၢတၢ်အၢၣ်တဖၣ်အကျါ,
12ဒီးသုးအသးဒ်ကစၢ်ယွၤအတၢ်ဘၣ်သးအသိးန့ၣ်လီၤ. အဝဲသ့ၣ်မၤတၢ်ကိးမံၤဒဲးဒ်ယွၤမၤလိာ်တၢ်အသိး, လၢတၢ်လီၢ် ကိးပူၤဒဲးသကုၤဟီၣ်ခိၣ်ဒီဘ့ၣ်ညါန့ၣ်လီၤ.
13ကစၢ်ယွၤဆှၢလီၤတၢ်စူၤထံဒ်သိးကမၤဘၣ်စီၣ်ဟီၣ်ခိၣ်န့ၣ်လီၤ. ဒီးလၢတၢ်သိၣ်ဃီၣ်ပှၤကညီမ့ၢ်ဂ့ၤ, တၢ်ဒုးထံၣ်အီၤလၢအတၢ် ဘၣ်အသးမ့ၢ်ဂ့ၤအဝဲကဆှၢလီၤဝဲလီၤ.
14စီၤယိၤဘးဧၢ, ဆိကတီၢ်တစိၢ်ဖိဒီးကနၣ်တက့ၢ်. ဒီးဆိကမိၣ်ထီၣ်တၢ်လီၤလးတဖၣ်လၢကစၢ်ယွၤမၤဝဲဒၣ်န့ၣ်တက့ၢ်.
15မ့ၢ်နသ့ၣ်ညါလၢကစၢ်ယွၤဟ့ၣ်လီၤအကလုၢ်ဒီးဒုးဆဲးကပြုၢ် လီဝၢ်ဒံးလၢတၢ်အၢၣ်တဖၣ်န့ၣ်ဧါ.
16ကစၢ်ယွၤအတၢ်သ့တၢ်ဘၣ်လီၤလိၢ်လီၤလးလၢအဒုးဟဲထီၣ် တၢ်အၢၣ်လၢမူခိၣ်န့ၣ်မ့ၢ်နသ့ၣ်ညါကစီဒီဧါ.
17နတသ့ၣ်ညါဘၣ်. နကကလၢၢ်ဘၣ်ထဲဒၣ်, တုၤကလံၤကိၢ်လၢကလံၤထံးဟဲအူဘၣ်နၤဒီးနတၢ် ကူတၢ်သိးတဖၣ်တဒုးတူၢ်ဘၣ်နၤလၢတၢ်ကိၢ် တၢ်ကဲၤဘၣ်န့ၣ်လီၤ.
18မ့ၢ်နမၤစၢၤကစၢ်ယွၤအတၢ်သလၣ်ထီၣ်မူခိၣ်ဒီးဒုးကျၢၤ အီၤဒ်မဲာ်ထံကလၤတဘ့ၣ်သိအသးအသိးဘၣ်ကသ့ဧါ.
19သိၣ်လိပှၤတၢ်လၢပကစံးဘၣ်ကစၢ်ယွၤတက့ၢ်. ပသးပတၢ်ဆိကမိၣ်တဖၣ်လီၤဟိလီၤဃီဝဲဒီးပကစံးတၢ်တအိၣ်နီ တမံၤလၢၤဘၣ်.
20ယတဃ့လၢယကကတိၤဘၣ်တၢ်ဒီးကစၢ်ယွၤဘၣ်. ဘၣ်မနုၤလၢယကဟ့ၣ်အီၤတၢ်ခွဲးတၢ်ယာ်လၢကမၤဟးဂီၤ ယၤန့ၣ်လဲၣ်.
21ဒီးခဲကနံၣ်အံၤတၢ်ကပီၤလၢမူခိၣ်န့ၣ်ကပြုၢ်ကပြီၤဝဲဒီး ကပီၤဆှုၣ်တုၤဒၣ်လဲာ်ပကွၢ်ထီၣ်တန့ၢ်ဘၣ်. ကလံၤမၤပျီကွံာ်တ့ၢ်လံမူခိၣ်လံ.
22တၢ်ကပီၤအယဲၤထူအိၣ်ဖျါထီၣ်လၢကလံၤစိးဒီးကစၢ်ယွၤ အလၤကပီၤမၤပှဲၤယသးဒီးတၢ်ယူးယီၣ်အီၤန့ၣ်လီၤ.
23ကစၢ်ယွၤအစိအကမီၤန့ၣ်ဒိၣ်ဝဲတုၤဒၣ်လဲာ်ပဟဲဘူးဒီးအီၤ တန့ၢ်ဘၣ်. အဝဲတီဝဲလိၤဝဲဒီးစံၣ်ညီၣ်တၢ်တီလၢအတၢ်ဘၣ် ထွဲဒီးပှၤကညီန့ၣ်လီၤ.
24မၤသးဒ်န့ၣ်ဒီးပှၤကိးဂၤဒဲးဆၢထၢၣ်လၢတၢ်ပျံၤတၢ်ယူး ယီၣ်အီၤအပူၤ, ဒီးတကနၣ်ဃုာ်ဝဲပှၤသ့ၣ်တဖၣ်လၢအစံးလီၤ အသးလၢအအိၣ်ဒီးတၢ်ကူၣ်သ့န့ၣ်ဘၣ်လီၤ.
Currently Selected:
လံာ်စီၤယိၤဘး 37: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
