လံာ်စီၤယိၤဘး 33
33
1ခဲကနံၣ်အံၤစီၤယိၤဘးဧၢ, ဒိကနၣ်ကယဲၢ်တၢ်လၢယစံးကတိၤ ခဲလၢာ်ထံထံတက့ၢ်.
2ကွၢ်ကွၢ်ယအိၣ်ကတဲာ်ကတီၤလံယသးလၢယကစံးကတိၤ တၢ်လၢယသးကံၢ်ပူၤန့ၣ်လီၤ.
3ယတၢ်ကတိၤတဖၣ်ပာ်ဖျါယသးအတၢ်တီတၢ်လိၤ, ဒီးယပျူၤကတိၤတၢ်မ့ၢ်တၢ်တီနီၢ်နီၢ်လီၤ.
4ကစၢ်ယွၤအသးတ့လီၤယၤဒီးသ့တၢ်လၢာ်အတၢ်သါဟ့ၣ် ယၤတၢ်မူလီၤ.
5နကတိၤဆၢက့ၤယၤမ့ၢ်သ့ဒီးကတိၤတက့ၢ်. ကတဲာ်ကတီၤနတၢ် ကတိၤဆၢက့ၤဒီးဆၢထၢၣ်လၢယမဲာ်ညါတက့ၢ်.
6ကွၢ်ကွၢ်, လၢကစၢ်ယွၤအမဲာ်ညါန့ၣ်, နၤဒီးယၤပမ့ၢ်တၢ်ဒ်သိး သိးလီၤ. ပဘၣ်တၢ်တ့ပှၤလၢကပံာ်ခံဂၤလိာ်လီၤ.
7မ်ဒ်န့ၣ်ဒီးအလီၢ်တအိၣ်လၢနကပျံၤယၤန့ၣ်ဘၣ်. ယတမၤနၢၤမၤပ့ၤနၤန့ၣ်ဘၣ်.
8ဒီးခဲကနံၣ်အံၤယနၢ်ဟူတ့ၢ်တၢ်လၢနစံးအီၤလီၤ.
9ယကဆှီယဲ, ယတၢ်ကမၣ်တအိၣ်ဘၣ်. ယစီယဲဒီးတၢ်ဒဲးဘး တအိၣ်လၢယပူၤန့ၣ်ဘၣ်.
10ဘၣ်ဆၣ်ဒီးကစၢ်ယွၤဃုထံၣ်တၢ်ဂ့ၤတဖၣ်လၢကထီဒါယၤဒီး ပာ်ယၤဒ်အဒုၣ်အဒါအသိးန့ၣ်လီၤ.
11ကျီၤဃာ်ယခီၣ်လၢသိးပူၤဒီးကွၢ်ဟုၣ်ကယဲၢ်တၢ်လၢ ယမၤအီၤန့ၣ်လီၤ.
12ဘၣ်ဆၣ်ဒီးစီၤယိၤဘးဧၢ, လၢတၢ်အံၤအဂ့ၢ်န့ၣ်နကမၣ်လံ. အဂ့ၢ်ဒ်အံၤ, ကစၢ်ယွၤဒိၣ်န့ၢ်ပှၤကညီတက့ၢ်လီၤ.
13နကဒူးကဒ့ၣ်လၢကစၢ်ယွၤအလိၤဒီးစံးလၢအတစံးဆၢဘၣ် ပှၤကညီအတၢ်ကတိၤနီတဘျီဘၣ်န့ၣ်, မ့ၢ်အဘၣ်မနုၤလဲၣ်.
14ကစၢ်ယွၤကတိၤတၢ်ဒ်အံၤတဘျီဝံၤစံးကဒီးလၢကျဲအဂၤ တဘိဒၣ်လဲာ်ဒီးတၢ်လၢအစံးဝဲန့ၣ်ပှၤကညီတပာ်သူၣ်ပာ်သးလၢ အဂ့ၢ်နီတဂၤဘၣ်.
15လၢမုၢ်နၤလၢပှၤကညီမံအခါကစၢ်ယွၤကတိၤတၢ်လၢတၢ်မံ မီၢ်တဖၣ်ဒီးတၢ်ထံၣ်လၢညါခီတဖၣ်လီၤ.
16အဝဲကတိၤတၢ်လၢပှၤကညီအနၢ်ပူၤဒီးမၤပျံၤမၤဖုးအီၤလၢ အတၢ်ဟ့ၣ်ပလီၢ်တဖၣ်န့ၣ်လီၤ.
17ကစၢ်ယွၤမၢအဆိကတီၢ်လၢအမၤတၢ်ဒဲးဘးဒီးတြီအီၤဒ်သိး အသုတပာ်ထီၣ်ထီအသးတဂ့ၤန့ၣ်လီၤ.
18တပျဲအဝဲသ့ၣ်ကဘၣ်တၢ်မၤဟးဂီၤအီၤဘၣ်. ဒီးတြီအသးသမူဒ်သိးအသုတသံလၢနးတဂ့ၤလီၤ.
19ကစၢ်ယွၤဆှၢလီၤတၢ်ဆူးတၢ်ဆါဒီးမၤပှဲၤပှၤကညီအနီၢ်ခိလၢ တၢ်ဆိးကဲၤဒ်သိးအကသိၣ်ဃီၣ်အီၤလီၤ.
20ပှၤဘၣ်ဆူးဘၣ်ဆါတဖၣ်အသးလၢာ်ကွံာ်တၢ်အီၣ်အဝံၣ်အဆၢဒီးသး ဘၣ်အၢတၢ်အီၣ်အဂ့ၤကတၢၢ်တဖၣ်ဒၣ်လဲာ်လီၤ.
21အဝဲအဖံးအညၣ်လီၤကွံာ်ဝဲဒီးနထံၣ်ကယဲၢ်အဃံခဲလၢာ်သ့,
22ဒီးဘူးတ့ၢ်မးလၢအဝဲကလဲၤဆူတၢ်သံအကီၢ်န့ၣ်လီၤ.
23ဘၣ်သ့ၣ်သ့ၣ် ကလူးတဂၤ, လၢအမ့ၢ်ကစၢ်ယွၤအကလူးအကထိ တဖၣ်အကျါတဂၤ ကဟဲမၤစၢၤအီၤဒီး ဒုးသ့ၣ်နီၣ်ပှၤကညီ လၢအမူအဒါန့ၣ်လီၤ.
24လၢတၢ်သးကညီၤအပူၤ, ကလူးန့ၣ်ကစံးဘၣ်အီၤ, “ပျၢ်ဖျဲးအီၤတက့ၢ်. အဝဲတဘၣ်လဲၤလီၤဆူ တၢ်သံအကီၢ် ဘၣ်. အအံၤမ့ၢ်တၢ်ပှ့ၤထီၣ်က့ၤတၢ်လၢ ကမၤထူၣ်ဖျဲးအီၤအဂီၢ်လီၤ.”
25အဝဲအနီၢ်ခိကဒိၣ်ထီၣ်ဒ် ပှၤအသးစၢ်ဒီး ဂံၢ်ဆူၣ်ဘါဆူၣ်ထီၣ် ကဒီးအသိးန့ၣ်လီၤ.
26တုၤအဝဲဃ့ဘါထုကဖၣ်တၢ်ဒီးကစၢ်ယွၤကစံးဆၢအီၤ, ဒီးကဘူၣ်ထီၣ်ဘါထီၣ်ကစၢ်ယွၤလၢတၢ်သူၣ်ဖှံသးညီအပူၤလီၤ. ကစၢ်ယွၤကမၤဘၣ်လီၢ်ဘၣ်စးက့ၤတၢ်လၢ အဂီၢ်လီၤ.
27အဝဲစံးတၢ်လၢပှၤဂီၢ်မုၢ်အမဲာ်ညါ, “ယမၤတ့ၢ်လံတၢ်ဒဲးဘးလံ. ယတမၤတၢ်လၢ အဘၣ်ဘၣ်. ဘၣ်ဆၣ်ဒီးကစၢ်ယွၤပျၢ်ဖျဲးယၤလီၤ.
28အဝဲတပျဲယလဲၤဆူ တၢ်သံအကီၢ်ပူၤဘၣ်. ဒီးယအိၣ်မူဒံးယဲလီၤ.”
29ကစၢ်ယွၤမၤကယဲၢ်တၢ်ခဲလၢာ်အံၤဒီးပှၤကညီခံဘျီ, ဒီးတုၤလၢသၢဘျီဒၣ်လဲာ်,
30ဒ်သိးကဒုးဟဲက့ၤကဒါက့ၤအီၤလၢတၢ်သံအကီၢ်ပူၤ, ဒ်သိးကဒုးကပီၤဘၣ်အီၤတၢ်မူအတၢ်ကပီၤလီၤ.
31ဒီးခဲကနံၣ်အံၤစီၤယိၤဘးဧၢ, ဒိကနၣ်တၢ်လၢယစံးဘၣ်တဲဘၣ် နၤ, အိၣ်ဘှီၣ်ဒီးပျဲယကတိၤတၢ်တက့ၢ်.
32နကတိၤတၢ်အလီၢ်မ့ၢ်အိၣ်ဒီးစံးဆၢယၤတက့ၢ်. ကတိၤတၢ်တက့ၢ်. အဂ့ၢ်ဒ်အံၤဘၣ်ယသးလၢနကဖျါ တီဖျါလိၤလီၤ.
33မ့တမ့ၢ်ဒ်န့ၣ်ဘၣ်ဒီးအိၣ်ဃိကလာ်ဒီးဒိကနၣ်ယၤတက့ၢ်. ဒီးယကသိၣ်လိနၤလၢနကကဲထီၣ်ပှၤကူၣ်ဘၣ်ကူၣ်သ့ဒ်လဲၣ်န့ၣ်လီၤ.
Currently Selected:
လံာ်စီၤယိၤဘး 33: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
