လံာ်ပှၤစံၣ်ညီၣ်ကွီၢ် 15
15
1ဒီးလၢမုၢ်နံၤတဖၣ်အလီၢ်ခံ, ဖဲတၢ်ကူးဘုကၠူၣ်အဆၢကတီၢ်န့ၣ် စီၤၡံၣ်ၡိၣ်လဲၤအိၣ်သကိးအမါ, ဒီးလဲၤစိာ်န့ၢ်အီၤမဲာ်တဲးလဲးလီၤ. အဝဲစံးဘၣ်ပိာ်မုၣ်န့ၣ်အပၢ်, “ယအဲၣ်ဒိးလဲၤဆူယမါအဒၢးန့ၣ်လီၤ.”
ဘၣ်ဆၣ်ဒီးအဝဲတပျဲလဲၤနုာ်အီၤဘၣ်. 2အဝဲစံးဘၣ်စီၤၡံၣ်ၡိၣ်, “ယဆိကမိၣ်သပှၢ်ကတၢၢ်လၢနသးဟ့ အီၤအဃိဒီးယဟ့ၣ်လီၤအီၤဆူနတံၤသကိးလီၤ. ဘၣ်ဆၣ်ဒီး, အပုၢ်ပိာ်မုၣ်န့ၣ်ဃံလၤဒိၣ်တက့ၢ်လီၤ. နဟံးန့ၢ်အီၤလၢအလီၢ် သ့ဝဲလီၤ.”
3ဒီးစီၤၡံၣ်ၡိၣ်စံး, “အအံၤတစု, ယမ့ၢ်မၤဘၣ်ပှၤဖလ့ၡသးဖိတဖၣ်န့ၣ်တမ့ၢ်ယတၢ်ကမၣ်ဘၣ်.” 4မၤသးဒ်န့ၣ်ဒီးအဝဲလဲၤဒီးဖီၣ်န့ၢ်ထွံၣ်မံၤအဒုသၢကယၤန့ၣ်လီၤ. အဝဲစၢဃာ်ထွံၣ်မံၤခံဒုအမဲၣ်ဃုာ်ဒီးဆှိတကဒိၣ်စုာ်စုာ်န့ၣ်လီၤ. 5တုၤနုၤတစု, အဝဲဒွဲၣ်ထီၣ်ဆှိကဒိၣ်တဖၣ်န့ၣ်လၢမ့ၣ်အူဒီး ပျၢ်လီၤကွံာ်ထွံၣ်မံၤတဖၣ်န့ၣ်ဆူပှၤဖလ့ၡသးဖိအဘုခ့စံာ် ပျီပူၤန့ၣ်လီၤ. လၢကျဲဒ်သိးအံၤန့ၣ်အဝဲဆူးကဲၤကွံာ်ဘုခ့လၢတၢ်ကူးက့ၤဝံၤ တဖၣ်တကးဘၣ်ဘုခ့လၢအအိၣ်ဒံးလၢစံာ်ပျီပူၤတဖၣ်ဒီးသ့ၣ်စၤ ယံးအတၤသၣ်လီၢ်တဖၣ်ဒၣ်လဲာ်န့ၣ်လီၤ. 6ဖဲပှၤဖလ့ၡသးဖိတဖၣ်သံကွၢ်ဝဲ, မ့ၢ်မတၤမၤတၢ်အံၤလဲၣ်ဒီး သ့ၣ်ညါဝဲလၢစီၤၡံၣ်ၡိၣ်မၤတၢ်အံၤလီၤ. အဂ့ၢ်ဒ်အံၤ, အမံၤပှၢ်ပှၤတံးမနးဖိတဂၤန့ၣ်ဟ့ၣ်လီၤကွံာ်စီၤၡံၣ်ၡိၣ်အမါ ဆူစီၤၡံၣ်ၡိၣ်အတံၤသကိးတဂၤအအိၣ်အဃိန့ၣ်လီၤ. မၤသးဒ်န့ၣ်ဒီး, ပှၤဖလ့ၡသးဖိတဖၣ်လဲၤဒွဲၣ်သံကွံာ်ပိာ်မုၣ် န့ၣ်ဒီးဆူးကဲၤထီၣ်ကွံာ်အပၢ်အဟံၣ်စ့ၢ်ကီးလီၤ.
7ဒီးစီၤၡံၣ်ၡိၣ်တဲဘၣ်အဝဲသ့ၣ်, “မ့ၢ်လၢသုမၤတၢ်ဒ်အံၤအဃိ ဒီးယဆိၣ်တၢ်လၢယမ့ၢ်တဟ့ၣ်ကၣ်ဘၣ်သုဘၣ်ဒီးယတဆိကတီၢ်ဘၣ်ယဲဘၣ်.” 8ဒီးအဝဲမၤဒၢၣ်ကွံာ်ပှၤဖလ့ၡသးဖိနးနးကလဲာ်ဒီးမၤသံကွံာ်အီၤအါဂၤလီၤ. တုၤနုၤတစု, အဝဲလဲၤအိၣ်လၢလ့ကအိပူၤဖဲ ဧ့ၤတၣ်န့ၣ်လီၤ.
စီၤၡံၣ်ၡိၣ်မၤနၢၤပှၤဖလ့ၡသးဖိတဖၣ်
9ဒီးပှၤဖလ့ၡသးဖိတဖၣ်ဟဲဒီးသူၣ်အဒဲဖဲကီၢ်ယူဒၤဒီးဒုးဝဲ ဝ့ၢ်လ့ၤဃံန့ၣ်လီၤ. 10ယူဒၤအပှၤတဖၣ်သံကွၢ်အဝဲသ့ၣ်, “ဘၣ်မနုၤသုဟဲဒုးပှၤလဲၣ်.”
ဒီးအဝဲသ့ၣ်စံးဆၢဝဲ, “ပဟဲဒ်သိးပကဖီၣ်စီၤၡံၣ်ၡိၣ်ဒီးမၤ အီၤဒ်အမၤပှၤအသိးန့ၣ်လီၤ.” 11မၤသးဒ်န့ၣ်ဒီးယူဒၤအပှၤသၢကထိဂၤလဲၤဆူလ့ကအိဖဲဧ့ၤတၣ် ဒီးစံးဘၣ်စီၤၡံၣ်ၡိၣ်, “မ့ၢ်နတသ့ၣ်ညါဘၣ်ပှၤဖလ့ၡသးဖိတဖၣ်န့ၣ်မ့ၢ်ပှၤပၢဆှၢဘၣ်ပှၤဧါ. မ့ၢ်နမၤပှၤဒ်လဲၣ်.”
အဝဲစံးဆၢဝဲဒၣ်, “ယမၤအဝဲသ့ၣ်ဒ်အမၤယၤအသိးလီၤ.”
12ဒီးအဝဲသ့ၣ်စံးဘၣ်အီၤ, “ပဟဲဒ်သိးပကစၢဃာ်နၤဒီးဟ့ၣ်လီၤ နၤဆူအဝဲသ့ၣ်အစုပူၤလီၤ.”
ဒီးစီၤၡံၣ်ၡိၣ်စံးဆၢ, “အၢၣ်လီၤယၤလၢသုတမၤသံယၤလၢ သုနီၣ်ကစၢ်ဒၣ်သုဝဲဘၣ်န့ၣ်တက့ၢ်.”
13အဝဲသ့ၣ်စံး, “ဂ့ၤလံ, ပကစၢဃာ်နၤဒီးဟ့ၣ်လီၤနၤဆူအဝဲသ့ၣ်အစုပူၤလီၤ. ပတမၤသံနၤဘၣ်.” မၤသးဒ်န့ၣ်ဒီးအဝဲသ့ၣ်စၢဃာ်အီၤလၢပျံၤအသီခံဘိဒီးက့ၤစိာ်အီၤန့ၣ်လီၤ.
14ဖဲအဝဲတုၤဃီၤဆူဝ့ၢ်လ့ၤဃံန့ၣ်ပှၤဖလ့ၡသးဖိတဖၣ်ဟဲဃ့ၢ်ဆူအအိၣ်, ဒီးကိးပသူထီၣ်ဝဲလီၤ. သတူၢ်ကလာ်ယွၤအစိကမီၤမၤဆူၣ်ထီၣ်အဂံၢ်အဘါ ဒီးအဝဲမၤထီၣ်တဲာ်ကွံာ်ပျံၤတဖၣ်လၢအစၢဃာ်အစုဒုၣ်စုတီၤ, ဒ်လုၣ်ဖျ့လၢမ့ၣ်အူအီၣ်ကွံာ်အီၤအသိးလီၤ. 15တုၤနုၤတစု, အဝဲထံၣ်န့ၢ်ကသ့ၣ်ယီၤသံတယံာ်ဒံးဘၣ်အခၣ်ဃံတဘိ န့ၣ်လီၤ. အဝဲထၢထီၣ်ဝဲဒီးမၤသံကွံာ်ပှၤတကထိဂၤန့ၣ်လီၤ. 16မၤသးဒ်န့ၣ်ဒီး, စီၤၡံၣ်ၡိၣ်သးဝံၣ်ထီၣ်ဝဲ,
“လၢကသ့ၣ်ယီၤခၣ်ဃံတဘိယမၤသံပှၤအဂၤတကထိ,
လၢကသ့ၣ်ယီၤခၣ်ဃံတဘိယပူၣ်ထီၣ်အီၤထီၣ်စိ.” 17တၢ်န့ၣ်အလီၢ်ခံဒီး, အဝဲစူးကွံာ်တၢ်အခၣ်ဃံန့ၣ်လီၤ. ဒီးတၢ်လီၢ်ဖဲတၢ်မၤတ့ၢ်အသးန့ၣ်တၢ်ကိးအီၤလၢရၤမးလ့ၤဃံန့ၣ်လီၤ.
18တုၤနုၤတစု, စီၤၡံၣ်ၡိၣ်အသးသူထံနးမးအဃိအဝဲကိးထီၣ်ယွၤ ဒီးစံး, “နဟ့ၣ်ယၤလၢတၢ်မၤနၢၤဖးဒိၣ်အံၤ, ဒီးခဲအံၤမ့ၢ်ယကဘၣ်သံ လၢယသးသူထံအဃိဒီးဘၣ်တၢ်ဖီၣ်န့ၢ်ယၤလၢပှၤဖလ့ၡသးဖိ လၢတစူၢ်တနာ်ယွၤတဖၣ်န့ၣ်ဧါ.” 19တုၤနုၤတစု, ယွၤအိးထီၣ်တၢ်လီၤကအိတတီၤလၢဟီၣ်ခိၣ်လာ်ဖဲ ဝ့ၢ်လ့ၤဃံ, ဒီးထံဟဲထီၣ်လၢအပူၤလီၤ. စီၤၡံၣ်ၡိၣ်အီထံ ဒီးအိၣ်မုာ်ထီၣ်က့ၤဝဲလီၤ. မၤသးဒ်န့ၣ်ဒီး, ထံထီၣ်ပၢၢ်အံၤဘၣ်တၢ်ကိးအမံၤလၢဧ့ၣ်ဟးကိ ရ့ၤဒီးအိၣ်ဒံးဖဲဝ့ၢ်လ့ၤဃံန့ၣ်လီၤ.
20ဒီးစီၤၡံၣ်ၡိၣ်ဆှၢပှၤအံၣ်စရ့လးဖိအနံၣ်ခံဆံဖဲပှၤဖလ့ၡသးဖိပၢဘၣ်ကီၢ်အခါန့ၣ်လီၤ.
Currently Selected:
လံာ်ပှၤစံၣ်ညီၣ်ကွီၢ် 15: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
