လံာ်သိၣ်လီၤသီလီၤတၢ် တၢ်ကတိၤဆှၢနုာ်
တၢ်ကတိၤဆှၢနုာ်
လံာ်သိၣ်လီၤသီလီၤတၢ်အံၤဘၣ်တၢ်ပာ်ဖှိၣ်ထီၣ်အီၤဒ်စီၤမိၤၡ့ အတၢ်ကတိၤလီၤတၢ်တဖၣ်လၢအပိာ်ထွဲလိာ်အခံတမံၤဘၣ်တမံၤ ဆူကီၢ်အံၣ်စရ့လးအပှၤဂီၢ်မုၢ်လၢပှၤမိၤအးဖိအကီၢ်ပူၤန့ၣ်လီၤ. ဖဲန့ၣ်အဝဲသ့ၣ်အိၣ်ဆိကတီၢ်လၢအပှၢ်မုၢ်ကနၢအတၢ်လဲၤဖးထီ အကတၢၢ်ဒီးဘူးထီၣ်လၢအကနုာ်လီၤဒီးမၤန့ၢ်ကီၢ်ကနၤဧၣ်လံန့ၣ်လီၤ. တၢ်ဂ့ၢ်တၢ်ကျိၤအကါဒိၣ်တနီၤလၢအဘၣ်တၢ်ကွဲးနီၣ်အီၤလၢလံာ် အံၤအပူၤမ့ၢ်ဝဲဒ်လၢလာ်အသိးန့ၣ်လီၤ.
၁. စီၤမိၤၡ့တဲကဒါက့ၤတၢ်မၤတ့ၢ်အသးအဂ့ၢ်ဖးဒိၣ်တဖၣ်လၢ အပူၤကွံာ်အနံၣ်လွံၢ်ဆံအတီၢ်ပူၤန့ၣ်လီၤ. အဝဲထုးန့ၢ်က့ၤပှၤဂီၢ်မုၢ်အသးလၢကသ့ၣ်နီၣ်ထီၣ် ကစၢ်ယွၤဆှၢတ့ၢ်အဝဲသ့ၣ်ခီဖျိကွံာ်ပှၢ်မုၢ်ကနၢဒ်လဲၣ်ဒ်လဲၣ်ဒီးကဘၣ်စူၢ် ကစၢ်ယွၤအကလုၢ်ဒီးသူၣ်တီသးရၤဒီးအီၤအဂ့ၢ်န့ၣ်လီၤ.
၂. စီၤမိၤၡ့ကွၢ်ကဒါက့ၤတၢ်မၤလိာ်အထံၣ်တဆံဒီးတဲဖျါလီၤ ဆီတၢ်အကါဒိၣ်ဘၣ်ဃးဒီးတၢ်မၤလိာ်အခီၣ်ထံးကတၢၢ်တတီၤ, ဒီးသဆၣ်ထီၣ်ပှၤဂီၢ်မုၢ်အခံလၢကပာ်ဒိၣ်ထဲယွၤတဂၤဧိၤန့ၣ်လီၤ. အန့ၣ်ဝံၤဒီးအဝဲကွၢ်ကဒါက့ၤတၢ်ဘူၣ်တၢ်ဘါအတၢ်သိၣ်တၢ်သီ အကလုာ်ကလုာ်လၢကပၢကီၢ်အံၣ်စရ့လးအတၢ်အိၣ်မူလၢကီၢ်တၢ်စံးပာ်အပူၤန့ၣ်လီၤ.
၃. စီၤမိၤၡ့ဒုးသ့ၣ်နီၣ်ထီၣ်ပှၤဂီၢ်မုၢ်လၢ ကစၢ်ယွၤအတၢ်အၢၣ်လီၤအီလီၤဒီးအဝဲသ့ၣ်အခီပညီ, ဒီးကိးထီၣ်အဝဲသ့ၣ်လၢကမၤသီထီၣ်က့ၤအတၢ်ဟ့ၣ်လီၤအးလီၤအသး ဆူမူဒါလၢကဘၣ်မၤပှဲၤဝဲလၢတၢ်သိၣ်တၢ်သီန့ၣ်အဂီၢ်လီၤ.
၄. စီၤယိၤၡူဘၣ်တၢ်ဟ့ၣ်စိဟ့ၣ်ကမီၤအီၤဒ်ခိၣ်နၢ်လၢခံတဂၤ အသိးလၢကစၢ်ယွၤအပှၤဂီၢ်မုၢ်အဂီၢ်န့ၣ်လီၤ. ဖဲအသးဝံၣ်ထီၣ်ထါတယုၢ်လၢအမၤလၤကပီၤကစၢ်ယွၤအ တၢ်သူၣ်တီသးရၤ, ဒီးတဲဖျါထီၣ်တၢ်ဆိၣ်ဂ့ၤဆိၣ်ဝါတမံၤလၢ အံၣ်စရ့လးအဒူၣ်တဖၣ်အဂီၢ်ဝံၤအလီၢ်ခံန့ၣ်, စီၤမိၤၡ့သံဝဲလၢကီၢ်မိၤအးအပူၤ, လၢထံကျိယၢ်ဒ့ၣ်အမုၢ်ထီၣ်တကပၤန့ၣ်လီၤ.
လံာ်အံၤအတၢ်ဂ့ၢ်မိၢ်ပှၢ်ဖးဒိၣ်မ့ၢ်ဝဲကစၢ်ယွၤအုၣ်က့ၤခီၣ်က့ၤ တၢ်ဒီးဆိၣ်ဂ့ၤတ့ၢ်အဝဲအဃုထၢဖိအပှၤဂီၢ်မုၢ်လၢအအဲၣ်ဝဲ ဒၣ်န့ၣ်လီၤ. အဝဲအပှၤဂီၢ်မုၢ်ကဘၣ်သ့ၣ်နီၣ်ထီၣ်က့ၤတၢ်အံၤ, ဒီးအဲၣ်အီၤဒီးစူၢ်အီၤ, ဒ်သိးအဝဲသ့ၣ်ကဒိးန့ၢ်ဘၣ်တၢ်မူဒီး တၢ်ဆိၣ်ဂ့ၤတဘိယူၢ်ဃီအဂီၢ်န့ၣ်လီၤ.
လံာ်စီဆှံအဆၢဖိတဖၣ်လၢအမ့ၢ်လံာ်အံၤအနီၣ်ဝံာ်ခံန့ၣ်မ့ၢ်ဝဲ ၆:၄-၆, ဒီးအိၣ်ဃုာ်ဒီးတၢ်ကတိၤတဖၣ်လၢယ့ၣ်ၡူးကိးအီၤလၢတၢ် မၤလိာ်အဒိၣ်ကတၢၢ်လၢတၢ်မၤလိာ်တဖၣ်အကျါ, လၢအမ့ၢ်ဝဲ, “အဲၣ်ယွၤ, နကစၢ်ယွၤလၢနသးဒီဖျၢၣ်, ဃုာ်ဒီးနတၢ်ကူၣ်တၢ်ဆးဒီးနဂံၢ်နဘါခဲလၢာ်တက့ၢ်.” န့ၣ်လီၤ.
လံာ်အတကွီၣ်
စီၤမိၤၡ့အတၢ်စံၣ်တဲၤတဲလီၤအခီၣ်ထံးကတၢၢ် ၁:၁-၄:၄၉
စီၤမိၤၡ့အတၢ်စံၣ်တဲၤတဲလီၤခံယုၢ်တယုၢ် ၅:၁-၂၆:၁၉
က. တၢ်မၤလိာ်အထံၣ်တဆံ၅:၁-၁၀:၂၂
ခ. တၢ်သိၣ်တၢ်သီတဖၣ်, တၢ်သိၣ်တၢ်ဘျၢတဖၣ်, ဒီးတၢ်ဟ့ၣ်ပလီၢ်သးတဖၣ် ၁၁:၁-၂၆:၁၉
တၢ်သိၣ်လိနဲၣ်ယုၤတဖၣ်လၢတၢ်နုာ်လီၤဆူကီၢ်ကနၤဧၣ်အဂီၢ် ၂၇:၁-၂၈:၆၈
တၢ်မၤသီထီၣ်က့ၤတၢ်အၢၣ်လီၤအီလီၤ ၂၉:၁-၃၀:၂၀
စီၤမိၤၡ့အတၢ်ကတိၤလၢခံကတၢၢ်တဖၣ် ၃၁:၁-၃၃:၂၉
စီၤမိၤၡ့အတၢ်သံ ၃၄:၁-၁၂
Currently Selected:
လံာ်သိၣ်လီၤသီလီၤတၢ် တၢ်ကတိၤဆှၢနုာ်: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.