လံာ်သိၣ်လီၤသီလီၤတၢ် 32
32
1ဟီၣ်ခိၣ်ဒီးမူကပိာ်လိၤဧၢ, နၢ်ဟူယတၢ်ကတိၤတဖၣ်, ဒိကနၣ်တၢ်လၢယတဲအီၤလီၤတံၢ်လီၤဆဲးတက့ၢ်.
2ယတၢ်သိၣ်လိကမၤအသးဒ်တၢ်စူၤထံအလီၤစီၤတဖၣ်လၢအဟဲလီၤတဲာ်အသိး, ဒီးဒုးအိၣ်ထီၣ်ပစီၤထံလၢဟီၣ်ခိၣ်လိၤအသိးန့ၣ်လီၤ.
ယတၢ်ကတိၤတဖၣ်ကမၤအသးဒ်ထံလူလီၤအသးအါအါဂီၢ်ဂီၢ် လၢတၢ်မုၢ်တၢ်ဘိမဲထီၣ်သီတဖၣ်အလိၤအသိး,
လီၤဂာ်ဒ်တၢ်လီၤသဖှံၣ်လၢတပံာ်လၢအစၢ်အလိၤအသိးန့ၣ်လီၤ.
3ယကစံးထီၣ်ပတြၢၤယွၤအမံၤ, ဒီးအဝဲအပှၤဂီၢ်မုၢ်ကတဲတၢ်ဘၣ်ထွဲဒီးအဝဲအတၢ်ဒိၣ်တၢ်မုၢ်အဂ့ၢ်န့ၣ်လီၤ.
4ယွၤမ့ၢ်သုပှၤကဟုကယာ်သုလၢအဂံၢ်ဆူၣ်ဘါဆူၣ်,
လၢဝဲပှဲၤဝဲဒီးတီဝဲလိၤဝဲလၢကယဲၢ်အကျဲခဲလၢာ်အပူၤန့ၣ်လီၤ.
သုကစၢ်ယွၤမ့ၢ်ပှၤလၢအသူၣ်တီသးရၤဒီးမ့ၢ်ဝဲတီဝဲ,
အဝဲမၤတၢ်လၢအဘၣ်ဒီးအတီန့ၣ်လီၤ.
5မ့မ့ၢ်, သုမ့ၢ်ပှၤသူၣ်တတီသးတရၤဒီးတကြၢးဝဲဘၣ်ဝဲလၢကမ့ၢ် အဝဲအပှၤဂီၢ်မုၢ်ဘၣ်,
ပှၤကလုာ်လၢအမၤဒဲးဘးတၢ်ဒီးလီတၢ်ဝ့ၤတၢ်န့ၣ်လီၤ.
6သုဝဲပှၤဟးဂီၤဖိ, ပှၤဂီၢ်မုၢ်လၢတဂိာ်တသီၣ်ဘၣ်တၢ်ဧၢ, တၢ်အံၤမ့ၢ်အမ့ၢ်ကျဲလၢသုကဘၣ်မၤဘၣ် ယွၤန့ၣ်ဧါ.
အဝဲမ့ၢ်သုပၢ်, သုတၢ်တ့အကစၢ်, အဝဲဒုးကဲထီၣ်တ့သုလၢပှၤ တကလုာ်န့ၣ်လီၤ.
7ဆိကမိၣ်ထီၣ်တၢ်မၤအသးလၢအပူၤကွံာ်, လၢတၢ်ဆၢကတီၢ်လၢယံာ်တ့ၢ်မးလံ အဂ့ၢ်, မၢသုပၢ်တဖၣ်တဲဘၣ်သုတၢ်လၢမၤတ့ၢ်အသး,
မၢပှၤသးပှၢ်တဖၣ်တဲသုတၢ်လၢအပူၤကွံာ်အဂ့ၢ် န့ၣ်တက့ၢ်.
8တၢ်ထီကတၢၢ်တဂၤန့ၣ်ပာ်လီၤန့ၢ်တ့ၢ်ပှၤကလုာ်တဖၣ်လၢအဝဲသ့ၣ် အထံအကီၢ်တဖၣ်,
ဒီးအဝဲစံၣ်ညီၣ်တဲာ်တ့ၢ်ဝဲလၢပှၤဂီၢ်မုၢ်တဖၣ်ကဘၣ်အိၣ်ဆိးဖဲ လဲၣ်န့ၣ်လီၤ. ပှၤတကလုာ်စုာ်စုာ်အဂီၢ်န့ၣ်အဝဲပာ်လီၤန့ၢ်အီၤအကလူးလၢကအံး ထွဲကွၢ်ထွဲအီၤန့ၣ်လီၤ.
9မ့မ့ၢ်စီၤယၤကိာ်အစၢၤအသွဲၣ်တဖၣ်န့ၣ်, အဝဲဃုထၢတ့ၢ်အီၤလၢ အဂီၢ်ဒၣ်ဝဲလီၤ.
10အဝဲထံၣ်ဘၣ်အဝဲသ့ၣ်ဟးဝ့ၤဝီၤတၢ်ခီဖျိပှၢ်မုၢ်ကနၢ,
တၢ်အိၣ်သယုၢ်အလီၢ်တပူၤ, ပှၢ်မုၢ်ကနၢဖဲကလံၤအူတၢ်န့ၣ်လီၤ.
အဝဲဒီဒၣ်အိၣ်ပှိၤတ့ၢ်အဝဲသ့ၣ်ဒီးကဟုကယာ်အံးထွဲကွၢ်ထွဲ အဝဲသ့ၣ်, ဒ်အဝဲကဒီဒၣ်အိၣ်ပှိၤလီၤက့ၤအသးဒၣ်ဝဲအသိးန့ၣ်လီၤ.
11ဒ်လံာ်ကြီကြာ်တဘ့ၣ်သိၣ်လိအဖိဆံးလၢကယူၤဝဲ,
ဖီၣ်န့ၢ်အဝဲသ့ၣ်ပူၤပူၤဖျဲးဖျဲးလၢအဒံးဆ့လၢအသလၣ်ထီၣ်အသး တဖၣ်အလိၤအသးန့ၣ်,
ယွၤဟံးဃာ်ဂၢၢ်ကျၢၤကီၢ်အံၣ်စရ့လးလၢအသုတလီၤတဲာ်ကွံာ်တဂ့ၤ အဂီၢ်န့ၣ်လီၤ.
12ထဲယွၤတဂၤဧိၤဆှၢအပှၤဂီၢ်မုၢ်
တအိၣ်ဘၣ်ဒီးကလုာ်ဂၤအကစၢ်တဂၤအတၢ်မၤစၢၤအီၤဘၣ်န့ၣ်လီၤ.
13အဝဲဒုးပၢဘၣ်တ့ၢ်အဝဲသ့ၣ်လၢတၢ်လီၢ်အထီတဖၣ်,
ဒီးအဝဲသ့ၣ်အီၣ်ဘၣ်တ့ၢ်တၢ်လၢအမဲထီၣ်လၢစံာ်ပျီတဖၣ်အပူၤန့ၣ်လီၤ.
အဝဲသ့ၣ်ထံၣ်န့ၢ်ကနဲအမံၤအစီလၢလၢၢ်တဖၣ်အကျါ,
အဝဲသ့ၣ်အသ့ၣ်စၤယံးတဖၣ်ဒိၣ်ထီၣ်တ့ၢ်လၢလၢၢ်ခိၣ်န့ၣ်လီၤ.
14အဝဲသ့ၣ်အဂီၤဖံးမိၢ်တဖၣ်ဒီးအမဲာ်တဲးလဲးတဖၣ်ဟ့ၣ်ထီၣ်တၢ်နုၢ်ထံအါအါဂီၢ်ဂီၢ်,
အဝဲသ့ၣ်အိၣ်ဒီးသိအဂ့ၤကတၢၢ်တဖၣ်, မဲာ်တဲးလဲးအဂ့ၤကတၢၢ်တဖၣ်ဒီးဂီၤဘုၣ်ဂီၤဖံးအဂ့ၤကတၢၢ်တဖၣ်,
ဘုကၠူၣ်အဂ့ၤကတၢၢ်ဒီးစပံးထံအဂ့ၤကတၢၢ်န့ၣ်လီၤ.
15ယွၤအပှၤဂီၢ်မုၢ်ထူးထီၣ်တီၤထီၣ်ဝဲ, ဘၣ်ဆၣ်ထီဒုၣ်ထီဒါတၢ်,
အဝဲသ့ၣ်ဘီၣ်ထီၣ်သိထီၣ်ဒီးပှဲၤလုာ်ကွံာ်ဒီးတၢ်အီၣ်တၢ်အီ လီၤ.
အဝဲသ့ၣ်လဲၤသဒၣ်ကွံာ်ကစၢ်ယွၤအဝဲသ့ၣ်အတၢ်ဘၣ်တ့အကစၢ်
ဒီးစူးကွံာ်ညိကွံာ်အတၢ်အုၣ်က့ၤခီၣ်က့ၤကစၢ်လၢအဒိၣ်ဝဲမုၢ်ဝဲန့ၣ်လီၤ.
16အဝဲသ့ၣ်အတၢ်ဘူၣ်ထီၣ်ဘါထီၣ်တၢ်ဂီၤတၢ်ဖီၣ်န့ၣ်ဒုးအိၣ်ထီၣ်ယွၤ အတၢ်သးက့ၣ်,
တၢ်အၢတၢ်သီလၢအဝဲသ့ၣ်မၤတ့ၢ်န့ၣ်, မၤသးဒိၣ်ထီၣ်အီၤလီၤ.
17အဝဲသ့ၣ်လုၢ်ထီၣ်ပာ်ထီၣ်တၢ်ဆူကစၢ်တဖၣ်လၢတမ့ၢ်တတီဘၣ်,
ကစၢ်အသီတဖၣ်လၢအဝဲသ့ၣ်အမိၢ်ပၢ်ဖံဖုလၢပျၢၤတဖၣ်တသ့ၣ်ညါတ့ၢ်ဝဲ,
ကစၢ်တဖၣ်လၢကီၢ်အံၣ်စရ့လးတစူၢ်တ့ၢ်ဘၣ်အီၤနီတစုန့ၣ်လီၤ.
18အဝဲသ့ၣ်သးပ့ၤနီၣ်ကွံာ်အကစၢ်ယွၤ, အတၢ်အုၣ်က့ၤခီၣ်က့ၤကစၢ်လၢအဒိၣ်ဝဲမုၢ်ဝဲ,
ကစၢ်တဂၤလၢအဟ့ၣ်လီၤတ့ၢ်အဝဲသ့ၣ်တၢ်မူန့ၣ်လီၤ.
19တုၤယွၤထံၣ်ဘၣ်တၢ်အံၤန့ၣ်, အဝဲအသးဒိၣ်ထီၣ်,
ဒီးစူးကွံာ်ညိကွံာ်အဖိခွါတဖၣ်ဒီးအဖိမုၣ်တဖၣ်န့ၣ်လီၤ.
20အဝဲစံးဝဲ, “ယတမၤစၢၤလၢၤအဝဲသ့ၣ်ဘၣ်.
အန့ၣ်ဒီး, ယကထံၣ်တၢ်လၢအမၤအသးဒီးအဝဲသ့ၣ်,
လၢအမ့ၢ်ပှၤလၢအခိၣ်ကိၤ, ပှၤဂီၢ်မုၢ်လၢအသူၣ်တတီသးတရၤဘၣ်အဃိ န့ၣ်လီၤ.
21အဝဲသ့ၣ်မၤသးဒိၣ်ထီၣ်ယၤဒီးအတၢ်ဂီၤတၢ်ဖီၣ်တဖၣ်လၢအဘှီဝဲ,
မၤသးက့ၣ်ယၤလၢကစၢ်ဒ်န့ၣ်အသိးတဖၣ်,
ကစၢ်တဖၣ်လၢတမ့ၢ်ဘၣ်ကစၢ်အမ့ၢ်အတီတဖၣ်ဘၣ်န့ၣ်လီၤ.
လၢတၢ်န့ၣ်အဃိ, ယကသူပှၤဒ်န့ၣ်အသိးတကလုာ်လၢကမၤသးဒိၣ်ထီၣ် အဝဲသ့ၣ်,
ယကဒုးသးက့ၣ်အဝဲသ့ၣ်လၢပှၤကလုာ်လၢအမ့ၢ်ပှၤဟးဂီၤဖိတဖၣ်န့ၣ်လီၤ.
22ယတၢ်သးဒိၣ်ကမၤသးဒ်မ့ၣ်အူကဲၤထီၣ် ဒီးအီၣ်ကွံာ်ကယဲၢ်တၢ်ခဲလၢာ်လၢဟီၣ်ခိၣ်အသိးန့ၣ်လီၤ.
တၢ်န့ၣ်ကတုၤဃီၤဆူဟီၣ်ခိၣ်လာ်ဒီးအီၣ်လၢာ်ဂီၤကွံာ် ကစၢၢ်ကလိတဖၣ်အခီၣ်ထံးတဖၣ်န့ၣ်လီၤ.
23ယကဟဲစိာ်တၢ်တတၢးတနါတဖၣ်လၢအကတၢၢ်တအိၣ်ဘၣ်လၢအဝဲသ့ၣ်အလိၤ,
ဒီးသူကယဲၢ်ယပျၢ်တဖၣ်ခဲလၢာ်ထီဒါအဝဲသ့ၣ်န့ၣ်လီၤ.
24အဝဲသ့ၣ်ကသံဝဲလၢတၢ်သၣ်ဝံၤလီၤဒိဒီးတၢ်လိၤကိၢ်အဃိ, အဝဲသ့ၣ်ကသံဝဲလၢတၢ်ဆူးတၢ်ဆါတဖၣ်လၢအလီၤပျံၤလီၤဖုးအဃိ န့ၣ်လီၤ.
ယကမၢလီၤဆၣ်ဖိကီၢ်ဖိအမံၤတဖၣ်လၢကဟဲထီၣ်အ့ၣ်ဖှီအဝဲသ့ၣ်,
ဒီးဂုၢ်တဖၣ်လၢအစုၣ်အၢန့ၣ်ကအ့ၣ်အဝဲသ့ၣ်လီၤ.
25တၢ်ဒုးတၢ်ယၤကဟဲစိာ်တၢ်သံလၢကျဲတဖၣ်အပူၤ, တၢ်လီၤပျံၤလီၤဖုးတဖၣ်ကမၤဒၢၣ်တၢ်လၢဟံၣ်တဖၣ်အပူၤလီၤ.
ပိာ်ခွါသးစၢ်တဖၣ်ဒီးပိာ်မုၣ်သးစၢ်တဖၣ်ကသံဝဲ
ဒီးဖိသၣ်ဆံးတဖၣ်မ့ၢ်ဂ့ၤ, ပှၤသးပှၢ်တဖၣ်မ့ၢ်ဂ့ၤဒၣ်လဲာ်, တၢ်တပာ်မူတ့ၢ်လၢၤအီၤဘၣ်.
26ယကမၤဟးဂီၤကွံာ်အဝဲသ့ၣ်လၢာ်လၢာ်ဆ့ဆ့တုၤဒၣ်လဲာ်ပှၤတသ့ၣ် နီၣ်ထီၣ်က့ၤဘၣ်အဝဲသ့ၣ်နီတဂၤဘၣ်.
27ဘၣ်ဆၣ်ယတပျဲဘၣ်အဝဲသ့ၣ်အဒုၣ်အဒါတဖၣ်ကကတိၤဒိၣ်ကတိၤသွါလီၤ အသးလၢအဝဲသ့ၣ်မၤနၢၤကွံာ်ယပှၤဂီၢ်မုၢ်အဃိ,
ဖဲတၢ်န့ၣ်မ့ၢ်ဒၣ်ယကစၢ်ဒၣ်ယဲလၢအမၤလီၤကလဲကွံာ်အဝဲသ့ၣ်တခီလီၤ, အဃိန့ၣ်ဘၣ်.
28အံၣ်စရ့လးမ့ၢ်ပှၤတကလုာ်လၢအတၢ်သ့ၣ်ညါနၢ်ပၢၢ်တအိၣ်ဘၣ်, အဝဲသ့ၣ်တအိၣ်ဘၣ်ဒီးတၢ်ကူၣ်သ့နီတမံၤဘၣ်.
29ဘၣ်မနုၤအဃိအဝဲသ့ၣ်ဘၣ်တၢ်မၤနၢၤအီၤလဲၣ်န့ၣ်, အဝဲသ့ၣ်ထံၣ်ဝဲတသ့ဘၣ်,
တၢ်လၢအမၤတ့ၢ်အသးန့ၣ်အဝဲသ့ၣ်နၢ်ပၢၢ်ဝဲ တသ့ဘၣ်.
30ဘၣ်မနုၤအဃိပှၤတကထိဂၤဘၣ်တၢ်မၤနၢၤကွံာ်အီၤလၢပှၤတဂၤ, ဒီးပှၤတကလးဂၤလၢပှၤထဲခံဂၤဧိၤန့ၣ်လဲၣ်.
ယွၤ, အဝဲသ့ၣ်အကစၢ်ယွၤလဲၤသဒၣ်ကွံာ်အဝဲသ့ၣ်လံ.
အဝဲသ့ၣ်အကစၢ်ယွၤလၢအဒိၣ်ဝဲမုၢ်ဝဲန့ၣ်ဟ့ၣ်လီၤကွံာ်အဝဲ သ့ၣ်န့ၣ်လီၤ.
31အဝဲသ့ၣ်အဒုၣ်အဒါတဖၣ်သ့ၣ်ညါဝဲလၢအဝဲသ့ၣ်အကစၢ်တဖၣ်လၢ အဘူၣ်ဝဲဘါဝဲန့ၣ်အဂံၢ်စၢ်ဘါစၢ်,
ဒီးတဒိၣ်ဝဲမုၢ်ဝဲထဲသိးကီၢ်အံၣ်စရ့လးအကစၢ်ယွၤ ဘၣ်န့ၣ်လီၤ.
32အဝဲသ့ၣ်အဒုၣ်အဒါတဖၣ်လၢအလီၤရၢၢ်လီၤစၢၢ်ဝဲဒ် ဝ့ၢ်စဒိၣ်ဒီးဝ့ၢ်ဂမိရၤအသိးန့ၣ်,
လီၤဂာ်ဒီးစပံးမုၢ်တဖၣ်လၢအသၣ်ထီၣ်စပံးသၣ်လၢအခၣ်ဝဲဒီးအိၣ် ဒီးအစုၣ်အပျၢ်,
33အဝဲသ့ၣ်လီၤဂာ်ဒီးစံးထံလၢတၢ်မၤန့ၢ်အီၤလၢဂုၢ်တဖၣ်အစုၣ် န့ၣ်လီၤ.
34ယွၤသ့ၣ်နီၣ်ထီၣ်တၢ်လၢအဝဲသ့ၣ်အဒုၣ်အဒါတဖၣ် မၤတ့ၢ်ဝဲ,
အဝဲအိၣ်ခိးတၢ်ဆၢဂ့ၤကတီၢ်ဘၣ်လၢကစံၣ်ညီၣ် အဝဲသ့ၣ်အဒုၣ်အဒါတဖၣ်အဂီၢ်န့ၣ်လီၤ.
35ယွၤကဟ့ၣ်ကၣ်တၢ်ဒီးစံၣ်ညီၣ်အဝဲသ့ၣ်,
တၢ်ဆၢကတီၢ်ကတုၤဝဲဖဲအဝဲသ့ၣ်ကဟးဂီၤကွံာ်,
အဝဲသ့ၣ်အတၢ်ဘၣ်စံၣ်ညီၣ်ဃါမနၤအမုၢ်နံၤန့ၣ် ဘူးထီၣ်ဝဲလံ.
36ယွၤကမၤပူၤဖျဲးပှၤဂီၢ်မုၢ်,
ဖဲအဝဲထံၣ်ဘၣ်လၢအဝဲသ့ၣ်အဂံၢ်အဘါလၢာ်ကွံာ်လံန့ၣ်လီၤ.
အဝဲကအိၣ်ဒီးတၢ်သးကညီၤဘၣ်ပှၤတဖၣ်လၢ အမၤအတၢ်,
ဖဲအဝဲထံၣ်ဘၣ်လၢအဝဲသ့ၣ်အတၢ်မၤစၢၤလၢာ်ကွံာ်ဝဲလံန့ၣ်လီၤ.
37အန့ၣ်ဒီး, ယွၤကသံကွၢ်အပှၤဂီၢ်မုၢ်,
“ကစၢ်တဖၣ်လၢအဒိၣ်ဝဲမုၢ်ဝဲလၢသုနာ်န့ၢ်တ့ၢ်အီၤန့ၣ်အိၣ်ဖဲ လဲၣ်.
38သုလုၢ်အီၣ်တ့ၢ်အဝဲသ့ၣ်ဒီးသုတၢ်လုၢ်တၢ်ပာ်တဖၣ်လၢအဘီၣ်
ဒီးလုၢ်ထီၣ်အဝဲသ့ၣ်လၢစပံးထံလၢကအီဝဲအဂီၢ်လီၤ.
မ်အဝဲသ့ၣ်ဟဲဒီးမၤစၢၤသုခဲအံၤ, မ်အဝဲသ့ၣ်ဟဲဃ့ၢ်ဝဲလၢ ကမၤပူၤဖျဲးသုအလီၢ်န့ၣ်တက့ၢ်.
39ယၤ, ဒီးထဲယၤတဂၤဧိၤ, မ့ၢ်ကစၢ်ယွၤန့ၣ်လီၤ.
ကစၢ်အဂၤန့ၣ်တမ့ၢ်တတီနီတဂၤဘၣ်.
ယမၤသံတၢ်ဒီးယဟ့ၣ်တၢ်မူ, ယမၤဘၣ်ဒိတၢ်ဒီးယမၤဘျါက့ၤတၢ်,
ဒီးတၢ်လၢယမၤအီၤန့ၣ်ပှၤထီဒါတသ့နီတဂၤဘၣ်.
40ဒ်ယမ့ၢ်နီၢ်နီၢ်ကစၢ်ယွၤလၢအမူဝဲတဂၤအသိးန့ၣ်,
ယယူာ်ထီၣ်ယစုဒီးဆိၣ်တၢ်,
41လၢကယကျ့အ့ၣ်ထီၣ်ယနးလၢအကတြ့ၣ်ကတြိၣ်တဘ့ၣ် ဒီးထံၣ်လၢတၢ်စံၣ်ညီၣ်တီမၤအသးန့ၣ်လီၤ.
ယကဟ့ၣ်ကၣ်တၢ်လၢယဒုၣ်ယဒါတဖၣ်အလိၤ,
ဒီးစံၣ်ညီၣ်ပှၤတဖၣ်လၢအသးဟ့ယၤန့ၣ်လီၤ.
42ယပျၢ်တဖၣ်လီၤစီၤဒီးအဝဲသ့ၣ်အသွံၣ်,
ဒီးယနးကမၤသံကယဲၢ်ပှၤလၢအထီဒါယၤန့ၣ်လီၤ.
ပှၤလၢအဒုးတၢ်ထီဒါယၤန့ၣ်, ယတပျၢ်ဖျဲးဘၣ်အီၤနီတဂၤဘၣ်,
ပှၤဘၣ်ဒိဘၣ်ထံးဒီးပှၤဘၣ်စၢဃာ်တဖၣ်ဒၣ်လဲာ် ကသံဝဲလီၤ.
43ပှၤကလုာ်တဖၣ်ဧၢ, သုကဘၣ်စံးထီၣ်ပတြၢၤယွၤအပှၤဂီၢ်မုၢ်,
အဝဲစံၣ်ညီၣ်ကယဲၢ်ပှၤလၢအမၤသံအဝဲသ့ၣ်န့ၣ်လီၤ.
အဝဲဟ့ၣ်ကၣ်တၢ်လၢအဒုၣ်အဒါတဖၣ်အလိၤ
ဒီးပျၢ်ကွံာ်အဝဲအပှၤဂီၢ်မုၢ်အတၢ်ဒဲးဘးတဖၣ်န့ၣ်လီၤ.”
44စီၤမိၤၡ့ဒီးစီၤနိၣ်အဖိခွါစီၤယိၤၡူယၢၤထီၣ်ရူးထီၣ် တၢ်သးဝံၣ်အံၤ, ဒ်သိးကီၢ်အံၣ်စရ့လးအပှၤဂီၢ်မုၢ်ကနၢ်ဟူဘၣ်အီၤအဂီၢ်န့ၣ်လီၤ.
စီၤမိၤၡ့အတၢ်သိၣ်လိနဲၣ်ယုၤ လၢခံကတၢၢ်တဖၣ်
45တုၤစီၤမိၤၡ့ဟ့ၣ်လီၤကစၢ်ယွၤအတၢ်သိၣ်လိတဖၣ်ဆူပှၤဂီၢ်မုၢ် အအိၣ်ဝံၤန့ၣ်, 46အဝဲစံးဝဲ, “မၤလီၤတံၢ်လၢသုကစူၢ်ကယဲၢ်တၢ်မၤလိာ်တဖၣ်အံၤ လၢယဟ့ၣ်လီၤသုတနံၤအံၤန့ၣ်တက့ၢ်. တဲကဒါက့ၤအီၤဆူသုဖိတဖၣ်, ဒ်သိးအဝဲသ့ၣ်ကစူၢ်ကယဲၢ်ကစၢ် ယွၤအတၢ်သိၣ်လိတဖၣ်လၢတၢ်သူၣ်တီသးရၤအပူၤတက့ၢ်. 47တၢ်သိၣ်လိတဖၣ်အံၤတမ့ၢ်ဘၣ်တၢ်ကတိၤကလီကလီတဖၣ်ဘၣ်. အဝဲသ့ၣ်မ့ၢ်သုတၢ်မူနီၢ်နီၢ်န့ၣ်လီၤ. စူၢ်အီၤဒီးသုသးသမူကအိၣ်ကၢအိၣ်ခိးလၢကီၢ်တဘ့ၣ်လၢအအိၣ်လၢ ထံကျိယၢ်ဒ့ၣ်အဝၢ်ဘးခီလၢသုကမၤန့ၢ်အီၤအပူၤန့ၣ်လီၤ.” 48မုၢ်တနံၤဃီန့ၣ်ယွၤစံးဘၣ်စီၤမိၤၡ့,
49“လဲၤဆူဧဘါရံၣ်အကစၢၢ်ကလိတဖၣ်လၢကီၢ်မိၤအးအပူၤ, ဖဲဝ့ၢ်ယရံၤဃိအမဲာ်ကွၢ်သဃီၤတၢ်, လဲၤထီၣ်ဆူကစၢၢ်နဘိ အဒီခိၣ်ဒီးကွၢ်ဃီၤတၢ်ဆူကီၢ်ကနၤဧၣ်လၢယသါကဟ့ၣ်အီၤဆူကီၢ် အံၣ်စရ့လးအပှၤဂီၢ်မုၢ်န့ၣ်တက့ၢ်. 50ဒ်နဒီပုၢ်ဝဲၢ်ခွါစီၤအၤဟရိၣ်သံဝဲလၢကစၢၢ်ဃိၢ်အဒီခိၣ်အသိးန့ၣ်, နကသံလၢကစၢၢ်န့ၣ်အဒီခိၣ်, 51မ့ၢ်လၢသုဝဲခံဂၤလိာ်သုတသူၣ်တီသးရၤဘၣ်ဒီးယၤလၢကီၢ်အံၣ် စရ့လးအပှၤဂီၢ်မုၢ်အမဲာ်ညါအဃိန့ၣ်လီၤ. ဖဲသုအိၣ်လၢထံမရံၤဘါ, ဘူးဒီးဝ့ၢ်ကၤဒ့ၣ်လၢပှၢ်မုၢ်ကနၢ စံၣ်အခါန့ၣ်, သုတမၤလၤကပီၤဘၣ်ယၤလၢပှၤဂီၢ်မုၢ်အမဲာ်ညါဘၣ်လီၤ. 52နကကွၢ်စိဃီၤကီၢ်န့ၣ်လၢအယံၤ, ဘၣ်ဆၣ်နတလဲၤနုာ်ဘၣ်ဆူကီၢ်န့ၣ် လၢယသါကဟ့ၣ်လီၤကီၢ်အံၣ်စရ့လးအပှၤဂီၢ်မုၢ်အပူၤဘၣ်.”
Currently Selected:
လံာ်သိၣ်လီၤသီလီၤတၢ် 32: KSWC
Highlight
Copy
Compare
Share
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
