လံာ်ကွဲးနီၣ်တၢ်ခံဘ့ၣ်တဘ့ၣ် 25
25
ကီၢ်ယူဒၤအစီၤပၤစီၤအမၤစယါ
(၂စီၤပၤ ၁၄:၂-၆)
1စီၤအမၤစယါကဲထီၣ်စီၤပၤဖဲအသးအိၣ်ခံဆံယဲၢ်နံၣ်, ဒီးအဝဲပၢတ့ၢ်တၢ်လၢဝ့ၢ်ယရူၤၡလ့ၣ်အပူၤခံဆံခွံနံၣ်န့ၣ်လီၤ. အဝဲအမိၢ်မ့ၢ်ဝဲ, နီၢ်ယဟိဧဒၣ်လၢဝ့ၢ်ယရူၤၡလ့ၣ်န့ၣ်လီၤ. 2အဝဲမၤတ့ၢ်တၢ်လၢအဘၣ်ယွၤအသး, ဘၣ်ဆၣ်မၤဒၣ်ဝဲလၢတၢ်သူၣ်တဆူၣ်သးတဆူၣ်အပူၤန့ၣ်လီၤ. 3တုၤအဝဲအိၣ်ဂၢၢ်ကျၢၤလၢတၢ်စိတၢ်ကမီၤအပူၤတဘျီ ဃီန့ၣ်အဝဲမၤသံကွံာ်ပဒိၣ်ပပှၢ်တဖၣ်လၢအမၤသံတ့ၢ်အပၢ်န့ၣ်လီၤ. 4ဘၣ်ဆၣ်ဒီးအဝဲတမၤသံကွံာ်ဘၣ်အဝဲသ့ၣ်အဖိတဖၣ်န့ၣ်ဘၣ်. မ့မ့ၢ်ပိာ်ထွဲဝဲတၢ်လၢယွၤမၤလိာ်တ့ၢ်လၢစီၤမိၤၡ့အယူဒၤ တၢ်သိၣ်တၢ်သီအလံာ်ပူၤလၢအစံးဝဲ, “မိၢ်ပၢ်တဖၣ်တကြၢးဘၣ်တၢ်မၤသံအီၤလၢတၢ်ကမၣ်တဖၣ်လၢအဖိ တဖၣ်မၤတ့ၢ်ဝဲအဃိဘၣ်, ဒီးဖိတဖၣ်တကြၢးဘၣ်တၢ်မၤသံအီၤလၢတၢ်ကမၣ်တဖၣ်လၢအဝဲသ့ၣ် အမိၢ်ပၢ်တဖၣ်မၤတ့ၢ်ဝဲအဃိဘၣ်. ပှၤတဂၤကဘၣ်တၢ်မၤသံဒၣ်အီၤထဲဒၣ်လၢတၢ်ကမၣ်တမံၤလၢအဝဲအကစၢ် ဒၣ်ဝဲမၤတ့ၢ်အဃိန့ၣ်လီၤ.”
တၢ်ဒုးတၢ်ယၤထီဒါကီၢ်အဒိၣ်
(၂စီၤပၤ ၁၄:၇)
5စီၤပၤအမၤစယါကရၢကရိထီၣ်ကယဲၢ်ပှၤပိာ်ခွါခဲလၢာ်လၢယူဒၤ ဒီးဘံၣ်ယၤမံၣ်အဒူၣ်တဖၣ်အပူၤဆူသုးမုၢ်တဖုဘၣ်တဖုဒ်ဒူၣ်ထၢ တဖၣ်လၢအဝဲသ့ၣ်ဘၣ်ထွဲဝဲအသိး, ဒီးပာ်လီၤသုးခိၣ်တဖၣ်လၢကကဲခိၣ်ကဲနၢ်လၢပှၤပိာ်ခွါတဖုလၢ အအိၣ်တကထိအဖီခိၣ်မ့ၢ်ဂ့ၤ, ပှၤပိာ်ခွါတဖုလၢအအိၣ်တကယၤအဖီခိၣ်မ့ၢ်ဂ့ၤန့ၣ်လီၤ. တၢ်အံၤအိၣ်ဃုာ်ဝဲဒီးကယဲၢ်ပှၤပိာ်ခွါလၢအသးအနံၣ်ခံဆံမ့ၢ်ဂ့ၤ, အသးပှၢ်န့ၢ်အနံၣ်ခံဆံမ့ၢ်ဂ့ၤ, ပှၤခဲလၢာ်အဂၤသၢကလီၢ် န့ၣ်လီၤ. အဝဲသ့ၣ်မ့ၢ်သုးဖိတဖၣ်လၢအဘၣ်တၢ်ဃုထၢလီၤဆီအီၤ, ပှၤအိၣ်ကတဲာ်ကတီၤအသးလၢတၢ်ဒုးအဂီၢ်, အိၣ်ဒီးတၢ်သ့တၢ်ဘၣ်လၢတၢ်သူဘီတဖၣ်ဒီးကတီၤတဖၣ်န့ၣ်လီၤ. 6အါန့ၢ်တၢ်အံၤအဝဲဒိးလဲန့ၢ်ပှၤသုးဖိအဂၤတကလီၢ် လၢကီၢ်အံၣ်စရ့လး, လၢတၢ်အပှ့ၤလီၤလၢဝဲစ့လီၤတယၢၢ် အကံကၢ်တကထိန့ၣ်လီၤ. 7ဘၣ်ဆၣ်ဝံတဂၤလဲၤဃီၤဆူစီၤပၤအအိၣ်ဒီးစံးဘၣ်အီၤ, “လဲၤကိးဃုာ်ပှၤအံၣ်စရ့လးအသုးဖိတဖၣ်အံၤဒီးနၤတဂ့ၤ. ယွၤတအိၣ်ဘၣ်ဒီးပှၤတဖၣ်အံၤလၢအဟဲလၢကလံၤစိးဘီမုၢ် တခီန့ၣ်ဘၣ်. 8နကဆိကမိၣ်လၢအဝဲသ့ၣ်ကမၤဂံၢ်ဆူၣ်ဘါဆူၣ်အါထီၣ်နၤလၢတၢ်ဒုး အပူၤ, ဘၣ်ဆၣ်ပှၤလၢအအိၣ်ဒီးတၢ်စိတၢ်ကမီၤလၢကဟ့ၣ်တၢ်မၤနၢၤမ့ၢ် ဂ့ၤ, တၢ်ဃၣ်ကွံာ်မ့ၢ်ဂ့ၤန့ၣ်မ့ၢ်ဒၣ်ကစၢ်ယွၤဒီးအဝဲကပျဲနဒုၣ်နဒါ တဖၣ်မၤနၢၤနၤန့ၣ်လီၤ.”
9စီၤအမၤစယါသံကွၢ်ဝံန့ၣ် “မ့မ့ၢ်ဒ်န့ၣ်ဒီးကယဲၢ်စ့လၢယဟ့ၣ် လီၤလံလၢတၢ်ဒိးလဲအဝဲသ့ၣ်အဂီၢ်န့ၣ်, ပကမၤဒ်လဲၣ်.”
ဝံန့ၣ်စံးဆၢအီၤ, “ယွၤဟ့ၣ်က့ၤနၤအါန့ၢ်အလီၢ်သ့ဝဲလီၤ.” 10လၢတၢ်န့ၣ်အဃိစီၤအမၤစယါပျၢ်ကွံာ်ပှၤသုးဖိတဖၣ်လၢအဒိးလဲ န့ၢ်ဝဲ, ဒီးတဲဘၣ်အဝဲသ့ၣ်လၢကက့ၤဆူအဟံၣ်န့ၣ်လီၤ. အန့ၣ်ဒီး, အဝဲသ့ၣ်က့ၤဆူအဟံၣ်ပှဲၤဒီးတၢ်သးဒိၣ်ထီၣ်ကီၢ်ယူဒၤ အပှၤဂီၢ်မုၢ်နးနးကလဲာ်န့ၣ်လီၤ.
11စီၤအမၤစယါပာ်ဆူၣ်ထီၣ်က့ၤအတၢ်သူၣ်ဒူသးဒူဒီးဆှၢဃီၤအသုး မုၢ်ဆူကစၢၢ်ကဆူးအံသၣ်န့ၣ်လီၤ. ဖဲန့ၣ်အဝဲသ့ၣ်ဒုးတၢ်ဒီးမၤသံကွံာ်ပှၤအဒိၣ်သုးဖိတကလး ဂၤ, 12ဒီးဖီၣ်န့ၢ်အါထီၣ်ဝဲအဂၤ တကလး ဂၤန့ၣ်လီၤ. အဝဲသ့ၣ်လဲၤကိးထီၣ်ပှၤလၢအဘၣ်တၢ်ဖီၣ်န့ၢ်အီၤတဖၣ်ဆူ ဝ့ၢ်စ့လၤအကစၢၢ်အလ့ကဘျၣ်ဖးထီအဒီခိၣ်ဒီးကွံာ်လီၤကွံာ်အဝဲသ့ၣ်, ဒ်သိးကသံကွံာ်လၢလၢၢ်လၢကစၢၢ်ခီၣ်ထံးအလိၤန့ၣ်လီၤ.
13ဖဲအခါန့ၣ်, ပှၤအံၣ်စရ့လးအသုးဖိတဖၣ်လၢစီၤအမၤစယါတပျဲဘၣ် အီၤလၢကလဲၤဆူတၢ်ဒုးဒီးအီၤန့ၣ်, လဲၤထီၣ်ဒုးကီၢ်ယူဒၤအဝ့ၢ်တဖၣ်ဖဲဝ့ၢ်ၡၤမရံဒီးဝ့ၢ်ဘ့ၤသဃိ ရိၣ်အဘၢၣ်စၢၤ, မၤသံကွံာ်ပှၤပိာ်ခွါအဂၤ သၢကထိ ဒီးမၤန့ၢ်တၢ်ဂုာ်န့ၢ်အါအါဂီၢ်ဂီၢ်န့ၣ်လီၤ.
14ဖဲစီၤအမၤစယါဟဲက့ၤကဒါက့ၤလၢအတၢ်မၤနၢၤပှၤအဒိၣ်ဖိ တဖၣ်အခါန့ၣ်, အဝဲဟဲက့ၤစိာ်အဝဲသ့ၣ်အတၢ်ဂီၤတၢ်ဖီၣ်တဖၣ်ဃုာ် ဒီးအီၤ, ပာ်ထီၣ်ဝဲ, ဘူၣ်ထီၣ်ဘါထီၣ်ဝဲ, ဒီးဆိၣ်ကဲၤတၢ်နၢမူဆူအဝဲ သ့ၣ်အအိၣ်န့ၣ်လီၤ. 15တၢ်အံၤမၤသးဒိၣ်ထီၣ်ယွၤအဃိအဝဲဆှၢလီၤဝံတဂၤဆူ စီၤအမၤစယါအအိၣ်န့ၣ်လီၤ. ဝံန့ၣ်သံကွၢ်ဆူၣ်အီၤ, “နဘၣ်ဘူၣ်ထီၣ်ဘါထီၣ်ပှၤတခီဘီမုၢ်အကစၢ်တဖၣ်လၢ အအုၣ်က့ၤခီၣ်က့ၤဒၣ်လဲာ်အပှၤဂီၢ်မုၢ်ဒၣ်ဝဲလၢ နတၢ်စိတၢ်ကမီၤအပူၤတသ့န့ၣ်ဘၣ်မနုၤလဲၣ်.”
16စီၤအမၤစယါမၤတံာ်တာ်ကွံာ်ဝံအတၢ်ကတိၤဒီးစံးဝဲ, “ပဒုးကဲထီၣ်နၤလၢပှၤဟ့ၣ်ကူၣ်စီၤပၤန့ၣ်, စးထီၣ်အခါဖဲလဲၣ်. ဆိကတီၢ်ကတိၤတၢ်တက့ၢ်. မ့တမ့ၢ်ယကမၢပှၤမၤသံဘၣ်နၤလီၤ.”
တချုးလၢဝံဆိကတီၢ်ကွံာ်အတၢ်ကတိၤန့ၣ်, ဝံစံးဝဲဒၣ်, “ခဲအံၤယသ့ၣ်ညါလၢကစၢ်ယွၤပာ်လီၤလံအသးလၢ ကမၤဟးဂီၤကွံာ်နၤ, မ့ၢ်လၢနမၤတ့ၢ်ကယဲၢ်တၢ်ခဲလၢာ်အံၤဒီးတပာ်ကဲဘၣ်ယတၢ်ဟ့ၣ်ကူၣ် အဃိန့ၣ်လီၤ.”
တၢ်ဒုးတၢ်ယၤထီဒါကီၢ်အံၣ်စရ့လး
(၂စီၤပၤ ၁၄:၈-၂၀)
17ကီၢ်ယူဒၤအစီၤပၤစီၤအမၤစယါဒီးအပှၤဟ့ၣ်ကူၣ်တၢ်တဖၣ်, ကူၣ်ထီၣ်တၢ်အၢထီဒါကီၢ်အံၣ်စရ့လးန့ၣ်လီၤ. အန့ၣ်ဒီး, အဝဲဆှၢလီၤတၢ်ကစီၣ်တမံၤဆူကီၢ်အံၣ်စရ့လးအစီၤပၤ စီၤယိၤအၣ်, လၢအမ့ၢ်စီၤယဟိအါဃးအဖိခွါဒီးစီၤယ့ၤဟူအလံၤခွါအအိၣ်, ဒီးတၤအီၤလၢကဒုးတၢ်အဂီၢ်န့ၣ်လီၤ. 18စီၤယိၤအၣ်ဆှၢလီၤက့ၤတၢ်စံးဆၢဆူစီၤအမၤစယါအအိၣ်ဒ်လာ် အံၤန့ၣ်လီၤ. “တဘျီန့ၣ်, တၤဆှုၣ်တပှီာ်တလိာ်လၢလဘၤနိၣ်ကစၢၢ်တဖၣ်အလိၤ, ဆှၢလီၤတၢ်ကစီၣ်တမံၤဆူသ့ၣ်ဆှိးအ့ရ့းတထူၣ်အအိၣ်ဒီးစံးဝဲ, ဟ့ၣ်လီၤနဖိမုၣ်လၢကဒိးတ့ဒိးဖျီအသးဒီးယဖိခွါအဂီၢ်တက့ၢ်. ဆၣ်ဖိကီၢ်ဖိအမံၤတဒုလဲၤခီဂာ်တၢ်ဒီးယီၢ်တံၢ်လီၤကလဲကွံာ် တၤဆှုၣ် တပှီာ်န့ၣ်လီၤ. 19ခဲကနံၣ်အံၤစီၤအမၤစယါဧၢ, နကတိၤဒိၣ်ကတိၤသွါလီၤနသးလၢ နမၤနၢၤကွံာ်ပှၤအဒိၣ်ဖိတဖၣ်ဘၣ်ဆၣ်ယဟ့ၣ်ကူၣ်နၤလၢနကအိၣ်ဒၣ်လၢ နဟံၣ်န့ၣ်လီၤ. ဘၣ်မနုၤအဃိနထိၣ်ဂဲၤထီၣ်တၢ်ကီ တၢ်ခဲလၢကဟဲစိာ်န့ၢ်နၤဒီးနပှၤဂီၢ်မုၢ်ထဲတၢ်တတၢးတနါဧိၤ န့ၣ်လဲၣ်.”
20ဘၣ်ဆၣ်စီၤအမၤစယါဂ့ၢ်လိာ်လၢကဒိကနၣ်ဝဲန့ၣ်လီၤ. တၢ်န့ၣ်မ့ၢ်ကစၢ်ယွၤအတၢ်ဘၣ်အသးလၢစီၤအမၤစယါကဘၣ်တၢ်မၤနၢၤ ကွံာ်အီၤ, မ့ၢ်လၢအဝဲဘူၣ်ထီၣ်ဘါထီၣ်ပှၤအဒိၣ်ဖိအတၢ်ဂီၤတၢ်ဖီၣ်တဖၣ် အဃိန့ၣ်လီၤ. 21လၢတၢ်န့ၣ်အဃိကီၢ်အံၣ်စရ့လးအစီၤပၤစီၤယိၤအၣ်လဲၤဆူ တၢ်ဒုးအပူၤထီဒါကီၢ်ယူဒၤအစီၤပၤစီၤအမၤစယါန့ၣ်လီၤ. အဝဲသ့ၣ်ဘၣ်သဂၢၢ်လိာ်အသးဖဲဝ့ၢ်ဘ့ၤသၡ့မ့ၢ်လၢကီၢ်ယူဒၤအပူၤ, 22ဒီးပှၤယူဒၤအသုးမုၢ်ဘၣ်တၢ်မၤနၢၤကွံာ်အီၤ, ဒီးပှၤသုးဖိတဖၣ်က့ၤဃ့ၢ်ဆူအဝဲသ့ၣ်အဟံၣ်ဒၣ်ဝဲန့ၣ်လီၤ. 23စီၤယိၤအၣ်ဖီၣ်န့ၢ်စီၤအမၤစယါဒီးက့ၤကိးအီၤဆူဝ့ၢ်ယရူၤ ၡလ့ၣ်န့ၣ်လီၤ. ဖဲန့ၣ်အဝဲမၤလီၤပှီၢ်ကွံာ်ဝ့ၢ်အခိၣ်ဒူစးထီၣ်လၢအ့ဖရဲၣ် အတြဲၤဖးဒိၣ်တုၤဆူတၢ်အသနၢၣ်အတြဲၤဖးဒိၣ်, စီၤစုၤယံၤဝဲအပျၢ်လွံၢ်ကယၤန့ၣ်လီၤ. 24ကယဲၢ်ထူဒီးစ့လၢယွၤအတၢ်လုၢ်ဟံၣ်အပူၤ, ယွၤအတၢ်လုၢ်ဟံၣ် အဃၢၤအဃိာ်တဖၣ်လၢအဘၣ်တၢ်ခိးပၢၤအီၤလၢစီၤဧိးဘ့ၤအ့ဒိၣ် အစၢၤအသွဲၣ်တဖၣ်, ဒီးစီၤပၤအနီအတၢ်လုၢ်ဒိၣ်ပှ့ၤဒိၣ်တဖၣ်န့ၣ်, အဝဲက့ၤစိာ်ဝဲဆူဝ့ၢ်ၡၤမရံဒ်တၢ်ဂုာ်န့ၢ်အသိးန့ၣ်လီၤ. အဝဲက့ၤကိးစ့ၢ်ကီးဝဲပှၤလၢအဘၣ်တၢ်ဟ့ၣ်ကီၤအီၤတဖၣ်ဃုာ်ဒီးအီၤ န့ၣ်လီၤ.
25ကီၢ်ယူဒၤအစီၤပၤစီၤအမၤစယါအိၣ်မူယံာ်န့ၢ်ဒံးကီၢ်အံၣ်စရ့ လးအစီၤပၤစီၤယိၤအၣ်တဆံယဲၢ်နံၣ်န့ၣ်လီၤ. 26ကယဲၢ်တၢ်ခဲလၢာ်လၢစီၤအမၤစယါမၤတ့ၢ်ဝဲစးထီၣ်လၢအတၢ်ပၢ အခီၣ်ထံးတုၤလၢအကတၢၢ်န့ၣ်ဘၣ်တၢ်ကွဲးနီၣ်ကွဲးဃါအီၤလၢကီၢ် ယူဒၤဒီးကီၢ်အံၣ်စရ့လးအစီၤပၤတဖၣ်အလံာ်တၢ်စံၣ်စိၤတဲစိၤ အပူၤန့ၣ်လီၤ. 27စးထီၣ်လၢအဝဲပူထီၣ်တၢ်ထီဒါယွၤလံၤလံၤန့ၣ်, တၢ်ပူထီၣ်ထီဒါအီၤအိၣ်ဝဲဒၣ်လၢဝ့ၢ်ယရူၤၡလ့ၣ်အပူၤန့ၣ်လီၤ. လၢခံကတၢၢ်အဝဲထွးထီၣ်ဃ့ၢ်ဝဲဆူဝ့ၢ်လၤကံၣ်, ဘၣ်ဆၣ်ဒီးအဒုၣ်အဒါတဖၣ်လူၤထွဲအီၤဖဲန့ၣ်ဒီးမၤသံကွံာ်အီၤ န့ၣ်လီၤ. 28အဝဲအစိၣ်ဘၣ်တၢ်ဟဲက့ၤစိာ်အီၤဆူဝ့ၢ်ယရူၤၡလ့ၣ်လၢကသ့ၣ်တဒု အလိၤဒီးအဝဲဘၣ်တၢ်ခူၣ်လီၤကွံာ်အီၤလၢစီၤပၤတဖၣ်အတၢ်သွၣ် ခိၣ်လၢစီၤဒၤဝံးအဝ့ၢ်ပူၤန့ၣ်လီၤ.
Currently Selected:
လံာ်ကွဲးနီၣ်တၢ်ခံဘ့ၣ်တဘ့ၣ် 25: KSWC
Highlight
Share
Compare
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
