ໂຢຊູວາ 3
3
ອິສະລາເອນ ມ່ຽນ ເຈ໋ຍ ຈໍແດນ ດ້າຍ
1ຕະເຫຍີ່ຍ ດອມ ດສ໊ຽວ ເຍີຍ, ໂຢຊູວາ ເຖສົາ ອິສະລາເອນ ເຍີຍ ຢຽດ ຕສູ໊ງ ມ່ຽນ ຢຽມ ຊິດທິມ ທສວດ ເຈົ໊າ ມີ່ງ ຈໍແດນ ດ້າຍ ເຮລນ. ເຖົາ ວົ້ວ, ນິ່ນ ບົວ ທສອງ ດົ໊ບ-ລິ່ວ ຕສົ໊ວ ຈ໊ຽນ ເຈ໋ຍ ດ້າຍ. 2ເຈ໋ຍ ລິ໌ວ ປົວ ຮນອຍ, ໂຕສ໋ວ ເປຢີ໊ຍ ເຍີຍ ມ່ຽນ ມີ່ງ ກ໋ອມ ດົ໊ບ-ລິ່ວ ທສຢັ້ງ, 3ກ໊ອງ ບົ໋ວ ແປະ ຝີງ, “ເມີ່ຍ ບົວ ຫາຍ ຕສັ່ນ ປວັດ ເລວີ ໄຊ ມ່ຽນ ແກງ ຈ໊ຽນ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຍີຍ ແລ໌ງ ແຫງ່ງ ຫວ່າ ຟາງ ມີ່ງ ນໍ, ອ໋ອຍ ຕສຸ ທສວດ ເມີ່ຍ ບົວ ຢຽມ ເຍີຍ ຕ໋ອງ ກັນ ຈ໊ຽນ ຟາງ ມີ່ງ ອ໊ະ. 4ເມີ່ຍ ບົວ ຕສ່ຽວ ຮິ້ວ ຕຸ໊ ອ໋ອຍ ຕສຸ ຢັ້ງ ຫາຍ ຕິ້ວ ເຈົ໊າ ມີ່ງ, ເຫວີ່ຍ ຕສຸ ເມີ່ຍ ບົວ ໄມ້ ແກ້ງ ຢັ້ງ ເຈ໋ຍ ນ້າຍ ຕິ້ວ ເຈົ໊າ. ເມີ່ຍ ບົວ ອ໋ອຍ ຕສຸ ເລີ່ຍ ແລ໌ງ ແຫງ່ງ ຫວ່າ ຟາງ ອີ ທສິນ ເດາະ ເຍີຍ ຕ໋ອງ. ໄມ້ ຕູ໋ງ ມີ່ງ ຟັດ.”
5ໂຢຊູວາ ກ໊ອງ ບົ໋ວ ຕສວັ໋ງ ແປະ ຝີງ, “ເມີ່ຍ ບົວ ອ໋ອຍ ຕສຸ ສາ ກັ້ນ ທສີງ-ເດສ່ງ ຕ້າຍ, ເຫວີ່ຍ ຕສຸ ອຈັງ ຮນອຍ ຕສ໊ຽວ ອ໋ອຍ ຢຽມ ເມີ່ຍ ບົວ ບຸດົ໋ງ ໂຕສ໋ວ ບົວະ ຮ່ອງ ເຍີຍ ສີ່.”
6ໂຢຊູວາ ກ໊ອງ ບົ໋ວ ໄຊ ມ່ຽນ, “ອ໋ອຍ ຕສຸ ແກງ ຈ໊ຽນ ແລ໌ງ ແຫງ່ງ ຫວ່າ ຟາງ ເຈ໋ຍ ແປະ ຝີງ ວົ້ວ ດ່າງ ແໝງ.” ນິ່ນ ບົວ ຕສ່ຽວ ແກງ ຈ໊ຽນ ແລ໌ງ ແຫງ່ງ ຫວ່າ ຟາງ ມີ່ງ ດ່າງ ແປະ ຝີງ.
7 ຕສ໊ຽວ ກ໊ອງ ບົ໋ວ ໂຢຊູວາ, “ອີ້ ຮນອຍ ເຢຍ ອ໋ອຍ ຕອງ ຈ໊ຽນ ອິສະລາເອນ ມ່ຽນ ທ່າຍ ເມີ່ຍ ໂຕສ໋ວ ໂຮລ, ເຫວີ່ຍ ປຸນ ນິ່ນ ບົວ ຮິ້ວ ຕຸ໊ ເຢຍ ຮນັ້ງ ຫາຍ ນໍ ເຖສົາ ໂມເຊ ຢຽມ, ເຢຍ ຢ່າ ຮນັ້ງ ວົ້ວ ນໍ ເຖສົາ ເມີ່ຍ ຢຽມ. 8ເມີ່ຍ ອ໋ອຍ ຕສຸ ບົ໋ວ ແກງ ແລ໌ງ ແຫງ່ງ ຫວ່າ ຟາງ ວົ້ວ ເຕີ໋ຍ ໄຊ ມ່ຽນ, ‘ເມີ່ຍ ບົວ ມີ່ງ ເຖົາ ຈໍແດນ ດ້າຍ ເຮລນ ອ໋ອຍ ຕສຸ ເປັຍ ມີ່ງ ໂຊ້ວ ຈ໊ຽນ ດ້າຍ ກະຍົ໌ວ.’”
9ໂຢຊູວາ ກ໊ອງ ບົ໋ວ ອິສະລາເອນ ມ່ຽນ, “ຕ້າຍ ຟັດ ເຕີ໋ຍ ມ່າະ! ຕ້າຍ ໝວັງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຍີຍ ຫວ່າ.” 10ໂຢຊູວາ ກ໊ອງ, “ເມີ່ຍ ບົວ ຮນັ້ງ ນ້າຍ ນໍ ໄຮ່ ຮິ້ວ ຕຸ໊ ຕສຢັ້ງ ຈ໊ຽນ ເຍີຍ ທິນ-ຮູ່ງ ຢຽມ ເມີ່ຍ ບົວ ບຸດົ໋ງ. ເມີ່ຍ ບົວ ຢ່າ ໄຮ່ ຮິ້ວ ຕຸ໊ ນິ່ນ ດົ່ງ ຫາຍ ຕສູ໊ງ ອ໋ອຍ ຢຽມ ເມີ່ຍ ບົວ ເຍີຍ ວົ້ວ ດ່າງ ແໝງ ຕສຸ່ນ ທສວດ ຄານາອັນ ມ່ຽນ, ຮິດໄທ ມ່ຽນ, ຮີໄວ ມ່ຽນ, ເປລິດຊີ ມ່ຽນ, ເກກາຊີ ມ່ຽນ, ອາໂມໄລ ມ່ຽນ ເຖສົາ ເຢບຸດ ມ່ຽນ. 11ໝັ່ງ ມ່າະ! ລູ່ງ ເດ໊ຍ ເຍີຍ ຕສ໊ຽວ ເຍີຍ ແລ໌ງ ແຫງ່ງ ຫວ່າ ຟາງ ອ໋ອຍ ເປັຍ ຈໍແດນ ດ້າຍ ດ່າງ ເມີ່ຍ ບົວ. 12ເຫວີ່ຍ ນ້າຍ, ອີ້ ຕສັ່ນ ອ໋ອຍ ຕສຸ ຢຽມ ອິສະລາເອນ ມ່ຽນ ເຍີຍ ຝີງ ບຸດົ໋ງ ກິ໊ນ ຕສຽບ ເຫຍີ່ຍ ລ່ານ ມ່ຽນ, ຢຽດ ຝີງ ຢຽດ ລ່ານ. 13ໄຊ ມ່ຽນ ແກງ ຈ໊ຽນ ຕສ໊ຽວ ເຍີຍ ແລ໌ງ ແຫງ່ງ ຫວ່າ ຟາງ, ເຊ ລູ່ງ ເດ໊ຍ ເຍີຍ ຕສ໊ຽວ ເຍີຍ ຟາງ, ມີ່ງ ວົ້ວ ຕສັ່ນ, ນິ່ນ ບົວ ເຍີຍ ເຕສົ໋າ #3:13 ຮິບລູ ຫວ່າ ກ໊ອງ ເຕສົ໋າ-ເປ໊ນ. ຢ໊ຽດ ທສ້າຍ ເອຈ່ຍ ຈໍແດນ ດ້າຍ, ຈໍແດນ ດ້າຍ ເຍີຍ ວວມ ຕສ່ຽວ ຕີ້ງ, ໄມ້ ຫລ່ຽວ ເອຈ່ຍ ອ໊ະ. ວົ້ວ ເຈ໋ຍ ເຍີຍ ວວມ ຕສ່ຽວ ດຸຍ ຈ໊ຽນ ວົ້ວ.”
14ຮນັ້ງ ໜ່າຍ ຕສວັ໋ງ ແປະ ຝີງ ແທສະ ນິ່ນ ບົວ ເຍີຍ ດົ໊ບ-ລິ່ວ ອ໋ອຍ ເຈ໋ຍ ຈໍແດນ ດ້າຍ ວົ້ວ ຕສັ່ນ, ແກງ ແລ໌ງ ແຫງ່ງ ຫວ່າ ຟາງ ເຍີຍ ໄຊ ມ່ຽນ ຕສ່ຽວ ມີ່ງ ດ່າງ ແປະ ຝີງ. 15ຕ໋ອຍ ຊຽວ ທສຸນ-ແກງ ເຍີຍ ຕສຢັ້ງ ໂຫ່, ຈໍແດນ ດ້າຍ ເຍີຍ ວວມ ຕສັ່ນໆ ຢ໋ຽມ ປວັ໊ງ ຂຳ ມ໌ຽນ ທສວດ. ມປ່າ ແກງ ແລ໌ງ ແຫງ່ງ ຫວ່າ ຟາງ ເຍີຍ ໄຊ ມ່ຽນ ເຖົາ ຈໍແດນ ດ້າຍ ນິ່ນ ບົວ ເຍີຍ ເຕສົ໋າ ຢ໊ຽດ ທສ້າຍ ເອຈ່ຍ ວວມ ຮນັ້ງ, 16ວົ້ວ ເຈ໋ຍ ຫລ່ຽວ ເອຈ່ຍ ເຍີຍ ວວມ ຕສ່ຽວ ຕີ້ງ ມີ່ງ ດຸຍ ຈ໊ຽນ ເປ໋ນ ຢຽດ ດຸຍ ຢຽມ ໂກ ເຍີຍ ຕ໋ອງ, ນິດ ສາເລທານ, ອາດຳ ຕສີ້ງ ວົ້ວ. ຫລ່ຽວ ເອຈ່ຍ ອາລາບາ ຄ້ອຍ ເຍີຍ ວວມ ຢ່າ ຕັ໋ງ ເດສ່ງ, ໄມ້ ຫລ່ຽວ ເອຈ່ຍ. ອາລາບາ ຄ້ອຍ, ເຊ ຄ້ອຍ-ເດສົ໊າ. #3:16 ຄ້ອຍ-ເດສົ໊າ ແອ໋ງ ມ່າຍ ນອມ ບົ໋ວ ເຫ່ວ ຄ້ອຍ-ໄຕ່. ອິສະລາເອນ ແປະ ຝີງ ຕສ່ຽວ ເຈ໋ຍ ເຢລີໂຄ ຕສີ້ງ ເຍີຍ ຕ໋ອຍ-ຫງ່ານ. 17ອິສະລາເອນ ເຍີຍ ຕສວັ໋ງ ມ່ຽນ ເຈ໋ຍ ເດົາ-ອກາຍ ວົ້ວ ຕສັ່ນ, ແກງ ຕສ໊ຽວ ເຍີຍ ແລ໌ງ ແຫງ່ງ ຫວ່າ ຟາງ ເຍີຍ ໄຊ ມ່ຽນ ໂຊ້ວ ຈ໊ຽນ ວົ້ວ ຈໍແດນ ດ້າຍ ບຸດົ໋ງ ເຍີຍ ເດົາ-ອກາຍ ຕສົ໊ວ ເຖົາ ຕສວັ໋ງ ແປະ ຝີງ ເຈ໋ຍ ເດສ່ງ ຈໍແດນ ດ້າຍ.
Currently Selected:
ໂຢຊູວາ 3: IuMiLAO
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Lao Script) © 2007 Thailand Bible Society, 2007.
