ດສ່ຳ ເລີ໌ຍ-ຫລັດ 28

ໝວັງ ຫວ່າ ຕຸ໊ ເຍີຍ ຟຸ

(ເປີ໊ຍ ໝັ່ງ ເລວີ 26:3-13; ດສ່ຳ ເລີ໌ຍ-ຫລັດ 7:12-24)

1ເຊ ກ໊ອງ ເມີ່ຍ ບົວ ໝວັງ ຫລົງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ ເຍີຍ ຫວ່າ, ຕສຽບ ຕສົ໊ວະ ເຍີຍ ເອີຍ ຈ໊ຽນ ເຢຍ ອີ້ ຮນອຍ ຈິວ ປຸນ ເມີ່ຍ ບົວ ເຍີຍ ຢຽດ ຕສູ໊ງ ຫລີ່ງ, ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຕສ່ຽວ ປຸນ ເມີ່ຍ ບົວ ເກົ້າ ໂຮລ ເຈ໋ຍ ລູ່ງ ເດ໊ຍ ເຍີຍ ໝ່ານ ຝີງ. #ດສ່ຳ ເລີ໌ຍ-ຫລັດ 11:13-17 2ເຊ ກ໊ອງ ເມີ່ຍ ບົວ ໝວັງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຍີຍ ຫວ່າ, ເມີ່ຍ ບົວ ຕສ່ຽວ ຕຸ໊ ເດສ່ງ ນ້າຍ ເຕີ໋ຍ ຟຸ.

3ຢຽມ ຕສີ້ງ ກະຍົ໌ວ ເມີ່ຍ ບົວ ອ໋ອຍ ຕຸ໊ ຟຸ, ຢຽມ ລີ່ງ ເຕີ່ຍ ຢ່າ ຕຸ໊ ຟຸ.

4 ຕສ໊ຽວ ອ໋ອຍ ເຖສີຍ ຟຸ ປຸນ ເມີ່ຍ ບົວ ຕຸ໊ ຝຸຈ໊ວຍ ທສ້ຳ, ປຸນ ເດົາ ທສວດ ແກງ-ຕສວັ໋ງ ຫລົງ, ປຸນ ແຊງ-ຄູ້ ຫຮຢາງ, ປຸນ ງົ່ງ ເຖສົາ ປະກີ ຢູ້ງ ເອຈ່ຍ ຕອນ ທສ້ຳ.

5 ຕສ໊ຽວ ອ໋ອຍ ເຖສີຍ ຟຸ ເມີ່ຍ ບົວ ເຍີຍ ເຮມີ້ຍ-ດານ ເຖສົາ ເມີ່ຍ ບົວ ຫລົ່ງ ໂຕສ໋ວ ຫຍັ່ນ ໂຕສ໋ວ ຮົບ ເຍີຍ ຈາ-ຕ໋ອງ. #28:5 ຮິບລູ ຫວ່າ ກ໊ອງ ໄຖສ ອຈົ໊ວ ເຍີຍ ໂຕສ້.

6ເມີ່ຍ ບົວ ທສວດ ຢ່າ ຕຸ໊ ຟຸ, ເປັຍ ຢ່າ ຕຸ໊ ໂຫລະ.

7ຕ້າຍ ເບ໊າະ ເມີ່ຍ ບົວ ວົ້ວ ເຕີ໋ຍ ວິນ-ວັ້ງ, ຕສ໊ຽວ ອ໋ອຍ ປຸນ ຢຽມ ເມີ່ຍ ບົວ ເຍີຍ ດສະຮມຽນ ຕສຸ ເຊວີຍ. ນິ່ນ ບົວ ຢັ້ງ ຢຽດ ຕິ້ວ ເຈົ໊າ ຕ້າຍ ເບ໊າະ ເມີ່ຍ ບົວ, ມປ່າ ເປຢົ໋າ ທສວດ ເສ່ຍ ຕິ້ວ ເຈົ໊າ.

8 ຕສ໊ຽວ ອ໋ອຍ ເຖສີຍ ຟຸ ເມີ່ຍ ບົວ ໂຕສ໋ວ ເຍີຍ ຢຽດ ຕສູ໊ງ ສີ່, ຢ່າ ປຸນ ເມີ່ຍ ບົວ ເຍີຍ ລ໌ຳ ມ່າຍ ລ່າງ ຕສິ ປວັ໊ງ. ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຈິວ ປຸນ ເມີ່ຍ ບົວ ເຍີຍ ເຕີ່ຍ-ປູງ, ນິ່ນ ອ໋ອຍ ເຖສີຍ ຟຸ ປຸນ ເມີ່ຍ ບົວ.

9ເຊ ກ໊ອງ ເມີ່ຍ ບົວ ເອີຍ ຈ໊ຽນ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ ເຍີຍ ຫລີ່ງ ຢ່າ ຢັ້ງ ນິ່ນ ເຍີຍ ໂຕ໌-ເລີ໌ຍ, ຕສ໊ຽວ ອ໋ອຍ ຕສິ໋ວ ນິ່ນ ເຖສົາ ເມີ່ຍ ບົວ ໂຮ້ວ ເຍີຍ ຫວ່າ ຫລຽບ ເມີ່ຍ ບົວ ໂຕສ໋ວ ນິ່ນ ກັ້ນ ເຍີຍ ທສີງ-ເດສ່ງ ແປະ ຝີງ. 10ລູ່ງ ເດ໊ຍ ໝ່ານ ຝີງ ມ່ຽນ ປວັດ ເມີ່ຍ ບົວ ເປ໋ນ ຕສ໊ຽວ ເຍີຍ ແປະ ຝີງ, #28:10 ຮິບລູ ຫວ່າ ກ໊ອງ “ເມີ່ຍ ບົວ ຕຸ໊ ກັນ ຕສ໊ຽວ ເຍີຍ ບົ໋ວ ເຫ່ວ”. ນິ່ນ ບົວ ຕສ່ຽວ ກ້ຳ ເດສ໋ຍ ເມີ່ຍ ບົວ. 11ເມີ່ຍ ບົວ ຢຽມ ຕສ໊ຽວ ໂຮ້ວ ປຸນ ເມີ່ຍ ບົວ ເຍີຍ ອົງ-ຖາຍ ອ໋ອຍ ປຸນ ເມີ່ຍ ບົວ ເຍີຍ ເຕີ່ຍ-ປູງ, ຕສ໊ຽວ ອ໋ອຍ ປຸນ ເມີ່ຍ ບົວ ປູ໋ງ-ຕສົວະ, ປຸນ ເມີ່ຍ ບົວ ຕຸ໊ ຝຸຈ໊ວຍ ທສ້ຳ, ປຸນ ແຊງ-ຄູ້ ຫຮຢາງ, ຢ່າ ປຸນ ເມີ່ຍ ບົວ ເຍີຍ ເດົາ ທສວດ ແກງ-ຕສວັ໋ງ ຫລົງ.

12 ຕສ໊ຽວ ອ໋ອຍ ຄອຍ ອກອຍ ທິນ-ໂຟ້ວ ເຍີຍ ໂຂວ, ຕສິ໋ວ ທສຸນ-ທສຽວ ປຸນ ລູ່ງ ຕຸ້ຍ ບຢູ່ງ ເອຈ່ຍ ເມີ່ຍ ບົວ ເຍີຍ ເຕີ່ຍ-ປູງ, ຢ່າ ອ໋ອຍ ເຖສີຍ ຟຸ ເມີ່ຍ ບົວ ເຍີຍ ປົ໌ວ ໂຕສ໋ວ ເຍີຍ ຫຍູ່ງໆ ກົງ. ເມີ່ຍ ບົວ ຕສ່ຽວ ມ່າຍ ກ໊າ ປຸນ ທສ້ຳ-ຝີງ ມ່ຽນ, ມປ່າ ເມີ່ຍ ບົວ ໄມ້ ຕສຸ ເຖງ ຫາຍ ຝີງ ກ໊າ ຫາຍ ຫຍູ່ງ. 13ເຊ ກ໊ອງ ເມີ່ຍ ບົວ ເອີຍ ຈ໊ຽນ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ ເຍີຍ ເລີ໌ຍ-ຫລັດ, ຕົ້ງ ເຢຍ ອີ້ ຮນອຍ ຫັດ ເມີ່ຍ ບົວ ເຍີຍ ຫວ່າ, ເມີ່ຍ ບົວ ຕຸ໊ ໂຕສ໋ວ ໂຮລ ເຈ໋ຍ ໄມ້ ເຕສີ໌ຍ ໄຝ ເຈ໋ຍ. #28:13 ຮິບລູ ຫວ່າ ກ໊ອງ “ໂຕສ໋ວ ມອກ໊ອງ ໄມ້ ເຕສີ໌ຍ ໂຕສ໋ວ ເຕວີ໊ຍ”. ເມີ່ຍ ບົວ ຢ່າ ໂຕສ໋ວ ຮລັງ ຈ໊ຽນ ຝາວ, ໄມ້ ເຕສີ໌ຍ ໄອ໊ ຈ໊ຽນ ເອຈ່ຍ. 14ໄມ້ ຕູ໋ງ ແຫງ່ງ ເຢຍ ອີ້ ຮນອຍ ຫັດ ເມີ່ຍ ບົວ ເຍີຍ ຫາຍ ໂຈ໋ວ ຫວ່າ, #28:14 ຮິບລູ ຫວ່າ ກ໊ອງ“ໄມ້ ຕູ໋ງ ມີ່ງ ຕສ໋າຍ ມີ່ງ ບຢ່າວ ຕສ່ຽວ ຕ່ອງ ເຈົ໊າ...” ໄມ້ ຕູ໋ງ ປົວະ ຕສັ່ງ ກັ້ນ ເຕົ້າ ຕສ້ຽນ.

ຫລາຍ ໄມ້ ໝວັງ ຫວ່າ ຕສຸ ຕສ໋ຽວ

(ເປີ໊ຍ ໝັ່ງ ເລວີ 26:14-46)

15ມປ່າ ເຊ ກ໊ອງ ເມີ່ຍ ບົວ ໄມ້ ໝວັງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຍີຍ ຫວ່າ, ໄມ້ ຕສຽບ ຕສົ໊ວະ ເຍີຍ ເອີຍ ຈ໊ຽນ ເຢຍ ອີ້ ຮນອຍ ຈິວ ປຸນ ເມີ່ຍ ບົວ ເຍີຍ ຢຽດ ຕສູ໊ງ ຫລີ່ງ ເຖສົາ ເລີ໌ຍ-ຫລັດ, ເມີ່ຍ ບົວ ຕສ່ຽວ ຕສຸ ນ້າຍ ເຕີ໋ຍ ຢຽດ ຕສູ໊ງ ຕສ໋ຽວ ເຍີຍ ຫວ່າ ເຍີຍ ເຕສະ ໜ່ານ.

16ເມີ່ຍ ບົວ ຢຽມ ຕສີ້ງ ກະຍົ໌ວ ອ໋ອຍ ຕສຸ ຕສ໋ຽວ, ຢຽມ ລີ່ງ ເຕີ່ຍ ຢ່າ ອ໋ອຍ ຕສຸ ຕສ໋ຽວ ອ໊ະ.

17ເມີ່ຍ ບົວ ເຍີຍ ເຮມີ້ຍ-ດານ ເຖສົາ ຫລົ່ງ ໂຕສ໋ວ ຫຍັ່ນ ຮົບ ເຍີຍ ຈາ-ຕ໋ອງ #28:17 ເປີ໊ຍ ໝັ່ງ ດສ່ຳ ເລີ໌ຍ-ຫລັດ 28:5. ອ໋ອຍ ຕສຸ ຕສ໋ຽວ ອ໊ະ.

18ເມີ່ຍ ບົວ ອ໋ອຍ ຕສຸ ຕສ໋ຽວ, ຕສ່ຽວ ປຸນ ເມີ່ຍ ບົວ ໄມ້ ມ່າຍ ຝຸຈ໊ວຍ ທສ້ຳ, ປຸນ ເດົາ ເຍີຍ ແກງ-ຕສວັ໋ງ ໄມ້ ເປ໋ນ, ປຸນ ເມີ່ຍ ບົວ ເຍີຍ ງົ່ງ ຕອນ ເຖສົາ ປະກີ ຢູ້ງ ຕອນ ຢ່າ ໂຕສະ.

19ປຸນ ເມີ່ຍ ບົວ ທສວດ ຢ່າ ຕສຸ ຕສ໋ຽວ, ເປັຍ ຢ່າ ຕສຸ ຕສ໋ຽວ.

20ເຊ ກ໊ອງ ເມີ່ຍ ບົວ ໂຕສ໋ວ ຫວ່າຍ, ໂຕສ໋ວ ເອ໊າະ, ກວັ່ງ ຕສ໊ຽວ, ເມີ່ຍ ບົວ ຕສູ໊ງ ອ໋ອຍ ຕສຸ ຕສ໋ຽວ ຢ່າ ຫລຸ່ນ ເດສ່ງ. ເມີ່ຍ ບົວ ເຍີຍ ປົ໌ວ ໂຕສ໋ວ ເຍີຍ ກົງ ຢ່າ ໂຕສ໋ວ ໄມ້ ທສວດ ຫາຍ ຫຍູ່ງ ເຖົາ ເມີ່ຍ ບົວ ຊຽບໆ ເຍີຍ ຕສຸ ປ່າຍ, ຕສຸ ໝຽດ ເດສ່ງ. 21ຕສ໊ຽວ ອ໋ອຍ ປຸນ ເມີ່ຍ ບົວ ຕສຸ ຕົ້ມ ວວນ-ແປ່ງ ເຖົາ ເມີ່ຍ ບົວ ຕສຸ ໝຽດ ເດສ່ງ, ໄມ້ ຕຸ໊ ຢຽມ ເມີ່ຍ ບົວ ເປັຍ ມີ່ງ ຕຸ໊ ເປ໋ນ ເມີ່ຍ ບົວ ເຍີຍ ປ່ວນ ເຕີ່ຍ-ປູງ. 22ຕສ໊ຽວ ອ໋ອຍ ປຸນ ເມີ່ຍ ບົວ ປຸ໊ດ ແປ່ງ-ງ໌າຍ, ຊິນ ຈອມ, ອົ໋ມ, ປຸນ ລູ່ງ ຮ໌ານ, ຢົ໊ວະ, ມ່າຍ ຫຍຸດ ໂຕ໌ວ ປົ໊ວ, ປຸນ ເມີ່ຍ ບົວ ເຍີຍ ກະນ້າຍ-ຕສວັ໋ງ ມ່າຍ ແປ່ງ, ເຊ ເຈ໋ຍ ບົ໊ວ ປຸ໊ດ ລັດ-ໂຕ໌ວ. ນ້າຍ ເຕີ໋ຍ ຫຍູ່ງໆ ອ໋ອຍ ຫ່ອຍ ເຖົາ ເມີ່ຍ ບົວ ຕສຸ ໝຽດ. 23ເມີ່ຍ ບົວ ເຍີຍ ມອກ໊ອງ ກູ້ ຫງວ່າຍ ເຍີຍ ລູ່ງ ອ໋ອຍ ຮນັ້ງ ຕົ້ງ ຢັ້ງ. ຢຽມ ເມີ່ຍ ບົວ ເຍີຍ ເຕສົ໋າ ກະເດ໊ຍ ເຍີຍ ເດົາ ຢ່າ ຮນັ້ງ ເຮລັຍ ນໍ. 24ຕສ໊ຽວ ອ໋ອຍ ປຸນ ຕຸ້ຍ ເມີ່ຍ ບົວ ເຍີຍ ເຕີ່ຍ-ປູງ ວົ້ວ ເຕີ໋ຍ ບຢູ່ງ ເປ໋ນ ເນຍ-ບູງ ເຖສົາ ຊາ-ຕສຽວ ບູງ ຢຽມ ວົ້ວ ລູ່ງ ເອຈ່ຍ ຕ້າຍ ຫ່ອຍ ເມີ່ຍ ບົວ ເຖົາ ເມີ່ຍ ບົວ ຕສຸ ໝຽດ ເດສ່ງ.

25 ຕສ໊ຽວ ອ໋ອຍ ປຸນ ເມີ່ຍ ບົວ ຢຽມ ວິນ-ວັ້ງ ເຍີຍ ດສະຮມຽນ ຕສຸ ເຊວີຍ. ເມີ່ຍ ບົວ ຢັ້ງ ຢຽດ ຕິ້ວ ເຈົ໊າ ມີ່ງ ເບ໊າະ ນິ່ນ ບົວ, ມປ່າ ເປຢົ໋າ ທສວດ ເສ່ຍ ຕິ້ວ ເຈົ໊າ. ລູ່ງ ເດ໊ຍ ໝ່ານ ກົ໊ວະ ມ່ຽນ ປວັດ ເມີ່ຍ ບົວ ປວັ້ງ ເຍີຍ ສີ່ ຕສ່ຽວ ແຮະ ນິ່ນ ບົວ ກ້ຳ ເດສ໋ຍ ໄຫ່ ອ໊ະ. 26ດ໊າມ-ລູ່ງ ເຍີຍ ເໜາະ ເຖສົາ ກະເດ໊ຍ ເດົາ ເຍີຍ ເຮ່ຍ ຕສ້ອຍ ອ໋ອຍ ຕ້າຍ ຫຍັ່ນ ເມີ່ຍ ບົວ ເຍີຍ ເຊີຍ, ລ່ຽມ ໄມ້ ມ່າຍ ມ່ຽນ ແຮະ ເປຢົ໋າ. 27ຕສ໊ຽວ ອ໋ອຍ ປຸນ ເມີ່ຍ ບົວ ຕສຢັ້ງ ເຕສວີ້ຍ ຮນັ້ງ ຕສິ້ນ ດ່າງ ອີຢິ໊ບ ມ່ຽນ ຕສຢັ້ງ ວົ້ວ ນໍ. ນິ່ນ ຢ່າ ອ໋ອຍ ປຸນ ເມີ່ຍ ບົວ ຕສຢັ້ງ ກະນ້າຍ, ປຸ໊ດ ຟາງ, ຊິນ ຊຽດ, ເຊ ຕສໍ່ ໄມ້ ຫລົງ ເຍີຍ ແປ່ງ. 28ຕສ໊ຽວ ອ໋ອຍ ປຸນ ເມີ່ຍ ບົວ ປຸ໊ດ ດິນ, ປຸນ ມຕສີງ ແມ່ງ, ປຸນ ໂຮຍ້ວ ຮວາງ ໂຮຍ້ວ ຫລຸ່ນ. 29ລູ່ງ ອ໋ານ ຕສັ່ນ ເມີ່ຍ ບົວ ອ໋ອຍ ຫຮວາ ຈ໊ຽນ ມີ່ງ ຮນັ້ງ ມຕສີງ ແມ່ງ ມ່ຽນ ຢຽມ ຫຮມວັງ ນໍ. ເມີ່ຍ ບົວ ໂຕສ໋ວ ເຍີຍ ຕິ້ວໆ ເຈົ໊າ ຢ່າ ໄມ້ ໄຮ່ ຕຸ໊ ຫລົງ. ເມີ່ຍ ບົວ ຕສັ່ນໆ ຕສຸ ມ່ຽນ ຫ່ອຍ, ຕສຸ ມ່ຽນ ລູ້, ໄມ້ ມ່າຍ ຫາຍ ເຕົ້າ ໂອຈ໋ວ ເມີ່ຍ ບົວ.

30ເມີ່ຍ ບົວ ກ໊ອງ ຕສຢັ້ງ ເອົ໊າ ມປ່າ ກັ້ນ ເຕົ້າ ມ່ຽນ ອ໋ອຍ ມີ່ງ ເປວີ໋ຍ. ເມີ່ຍ ບົວ ກົ໊ມ ຊຢັງ-ເປຢົ໊າ ມປ່າ ໄມ້ ຕຸ໊ ຢຽມ. ເມີ່ຍ ບົວ ໂຕສ໋ວ ຫຮວີງ ຕສວັ໋ງ ອະຫງຸ່ນ ປ໊ຽວ ຢ່າ ໄມ້ ຕຸ໊ ຫຍັ່ນ. 31ມ່ຽນ ອ໋ອຍ ເຕສ໊າະ ເມີ່ຍ ບົວ ເຍີຍ ງົ່ງ ຕອງ ຈ໊ຽນ ເມີ່ຍ ບົວ ໄຕ໋ ມປ່າ ເມີ່ຍ ບົວ ໄມ້ ຕຸ໊ ຢຽດ ເຕີ໋ຍ ງົ່ງ ເຍີຍ ອໍ໊. ເມີ່ຍ ບົວ ກັ້ນ ເຍີຍ ມຕສີງ ປວັດ ຈ໊ຽນ ມ່ຽນ ທສ້າງ ເມີ່ຍ ບົວ ເຍີຍ ລໍ່ ຢ່າ ໄມ້ ຝູງ ດສ໋ວນ. ເມີ່ຍ ບົວ ເຍີຍ ປະກີ ຢູ້ງ ຕສຸ ຝູງ ປຸນ ວິນ-ວັ້ງ ຢ່າ ໄມ້ ມ່າຍ ຫາຍ ເຕົ້າ ເຖງ ເມີ່ຍ ບົວ. 32ເມີ່ຍ ບົວ ເຍີຍ ຕອນ, ເມີ່ຍ ບົວ ເຍີຍ ເຊັຍ, ຢ່າ ອ໋ອຍ ຕສຸ ຈິວ ປຸນ ກັ້ນ ຝີງ ມ່ຽນ. ຮນອຍໆ ໝັ່ງ ຈ໊ຽນ ເຈົ໊າ-ຄູ້ ອ໋ອຍ ປວັດ ນິ່ນ ບົວ ດສ໋ວນ. ໝັ່ງ ເກົາ, ມຕສີງ ຕສູ໊ງ ຮວາ ເດສ່ງ, ໄມ້ ປວັດ ນິ່ນ ບົວ ດສ໋ວນ, ຢ່າ ໄມ້ ມ່າຍ ປັ້ນ ເຕສີ່ຍ ເຖງ ອ໊ະ. 33ຕົ້ງ ເມີ່ຍ ບົວ ໄມ້ ຮິ້ວ ເຍີຍ ມ່ຽນ ອ໋ອຍ ຕ້າຍ ຫຍັ່ນ ເມີ່ຍ ບົວ ກັ້ນ ເຍີຍ ເດົາ ເຍີຍ ກະນ້າຍ ເຖສົາ ເມີ່ຍ ບົວ ກັ້ນ ດ໊ອດ ທຈະ ຕສວັ໋ງ ເຍີຍ ຢຽດ ຕສູ໊ງ ແກງ-ຕສວັ໋ງ. ເມີ່ຍ ບົວ ຕສັ່ນໆ ອ໋ອຍ ຕສຸ ມ່ຽນ ຫ່ອຍ, ຕສຸ ມ່ຽນ ເຕສີ໋ຍ. 34ເມີ່ຍ ບົວ ເຍີຍ ມຕສີງ ປວັດ ເຍີຍ ຫຍູ່ງໆ ສີ່ ຕສ່ຽວ ໂຕສ໋ວ ປຸນ ເມີ່ຍ ບົວ ໄມ້ ດສັງ. 35ຕສ໊ຽວ ອ໋ອຍ ປຸນ ເມີ່ຍ ບົວ ເຍີຍ ທສີ່ງ ເບາະ ຕສຢັ້ງ ໂຕະ ໄຫ່, ຕສໍ່ ໄມ້ ຫລົງ ເຍີຍ ເຕສວີ້ຍ, ຢ່າ ຢຽມ ເຕສົ໋າ-ເດ໊ຍ ຕສຢັ້ງ ເຖົາ ມອກ໊ອງ-ແປ້ງ.

36 ຕສ໊ຽວ ອ໋ອຍ ຕໍ້ ເມີ່ຍ ບົວ ເຖສົາ ເມີ່ຍ ບົວ ຫລຽບ ຕ້າຍ ກຸ໊ນ ເມີ່ຍ ບົວ ເຍີຍ ຮູ່ງ ມີ່ງ ເຖົາ ຕົ້ງ ເມີ່ຍ ບົວ ເຖສົາ ເມີ່ຍ ບົວ ເຍີຍ ອົງ-ຖາຍ ໄມ້ ຮິ້ວ ເຍີຍ ກົ໊ວະ. ຢຽມ ວົ້ວ ເມີ່ຍ ບົວ ຕສ່ຽວ ຕສັ່ງ ກັ້ນ ເຕົ້າ ຕສ້ຽນ, ເຊ ຫລົ່ງ ດຢັ໋ງ, ຫລົ່ງ ຫລະເປຢີ໊ຍ ໂຕສ໋ວ ຕ້າຍ ເຍີຍ ຕສ້ຽນ. 37ຢຽມ ຕສ໊ຽວ ຕໍ້ ເມີ່ຍ ບົວ ມີ່ງ ຢຽມ ວົ້ວ ເຕີ໋ຍ ນອມໆ ກົ໊ວະ ເຍີຍ ມ່ຽນ ປວັດ ເມີ່ຍ ບົວ ປວັ້ງ ເຍີຍ ສີ່, ຕສ່ຽວ ແຮະ ນິ່ນ ບົວ ກ້ຳ ເດສ໋ຍ. ເມີ່ຍ ບົວ ຕສຸ ນິ່ນ ບົວ ຕໍ້ ມີ່ງ ໂຕສ໋ວ ໂກ໊ວ ກ໊ອງ ຢ່າ ຮວວດ ເມີ່ຍ ບົວ.

38ຢຽມ ວົ້ວ ເດີ່ຍ ເມີ່ຍ ບົວ ຕສວັ໋ງ ຍິມ ທສ້ຳ, ມປ່າ ຊຽວ ຕຸ໊ ໂຕສະ, ເຫວີ່ຍ ຕສຸ ຈົ໊ບ-ເຫຍີ່ຍ ຫຍັ່ນ ໝີ່ ອ໊ະ. 39ເມີ່ຍ ບົວ ອ໋ອຍ ໂຕສ໋ວ ຫຮວີງ ຕສວັ໋ງ ອະຫງຸ່ນ ປ໊ຽວ ຝຽວ ຫລົງ, ເມີ່ຍ ບົວ ໄມ້ ຕຸ໊ ຊຽວ ອະຫງຸ່ນ ປ໊ຽວ ຢ່າ ໄມ້ ຕຸ໊ ຮົບ ອະຫງຸ່ນ ຕິ໊ວ ເຫວີ່ຍ ຕສຸ ແກງ ອ໋ອຍ ຫຍັ່ນ ເດສ່ງ. 40ຢຽມ ເມີ່ຍ ບົວ ເຍີຍ ເຕີ່ຍ-ປູງ ນອມໆ ຕ໋ອງ ມ່າຍ ກະລັ້ນ ດຢັ໋ງ ມປ່າ ເມີ່ຍ ບົວ ໄມ້ ຕຸ໊ ກະລັ້ນ ໂຢ້ວ ຫລົ່ງ ເຫວີ່ຍ ຕສຸ ກະລັ້ນ ປ໊ຽວ ໂປຢ້ ເດສ່ງ ໝີ່ ອ໊ະ. 41ເມີ່ຍ ບົວ ຢູ໌ງ ຕອນ ຢູ໌ງ ເຊັຍ, ນິ່ນ ບົວ ຢ່າ ໄມ້ ຕຸ໊ ຝຸນ ເປ໋ນ ເມີ່ຍ ບົວ ເຍີຍ, ເຫວີ່ຍ ຕສຸ ນິ່ນ ບົວ ຕສຸ ທສ້າງ ມີ່ງ. 42ຢຽມ ເມີ່ຍ ບົວ ເຍີຍ ເຕີ່ຍ-ປູງ ເຍີຍ ດຢັ໋ງ ເຖສົາ ລີ່ງ ເຕີ່ຍ ເຍີຍ ແກງ-ຕສວັ໋ງ ຕສຸ ຈົ໊ບ-ເຫຍີ່ຍ ຫຍັ່ນ ເດສ່ງ.

43ຢຽມ ເມີ່ຍ ບົວ ບຸດົ໋ງ ເຍີຍ ກັ້ນ ຝີງ ມ່ຽນ ອ໋ອຍ ກຸ໊ນ ໂຕສ໋ວ ກຸ໊ນ ຝາວ ຮລັງ. ເມີ່ຍ ບົວ ກັ້ນ ກຸ໊ນ ໂຕສ໋ວ ກຸ໊ນ ດ໊ອດ ເອຈ່ຍ ໄອ໊. 44ນິ່ນ ບົວ ຕສ່ຽວ ມ່າຍ ກ໊າ ປຸນ ເມີ່ຍ ບົວ ຫລົ່ງ, ມປ່າ ເມີ່ຍ ບົວ ໄມ້ ມ່າຍ ກ໊າ ປຸນ ນິ່ນ ບົວ. ນິ່ນ ບົວ ຕຸ໊ ໂຕສ໋ວ ໂຮລ ເຈ໋ຍ, ເມີ່ຍ ບົວ ໂຕສ໋ວ ໄຝ ເຈ໋ຍ. #28:44 ຮິບລູ ຫວ່າ ກ໊ອງ “ນິ່ນ ບົວ ຕຸ໊ ໂຕສ໋ວ ມອກ໊ອງ, ເມີ່ຍ ບົວ ຕສຸ ໂຕສ໋ວ ເຕວີ໊ຍ”.

45ເມີ່ຍ ບົວ ຕສ່ຽວ ຕສຸ ສ່ຽວ ນ້າຍ ເຕີ໋ຍ ຢຽດ ຕສູ໊ງ ຕສ໋ຽວ ເຍີຍ ຫວ່າ ເຖົາ ເມີ່ຍ ບົວ ຕສຸ ໝຽດ, ເຫວີ່ຍ ຕສຸ ເມີ່ຍ ບົວ ໄມ້ ໝວັງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຍີຍ ຫວ່າ, ໄມ້ ເອີຍ ນິ່ນ ຈິວ ປຸນ ເມີ່ຍ ບົວ ເຍີຍ ຫລີ່ງ ເຖສົາ ເລີ໌ຍ. 46ນ້າຍ ເຕີ໋ຍ ຕສ໋ຽວ ເຍີຍ ຫວ່າ ຢຽດ ລິ໌ວ ໂຕສ໋ວ ຈັ໋ງ-ໂຫ່ ເຖສົາ ບົວະ ຮ່ອງ ເຍີຍ ສີ່ ເຫວີ່ຍ ເມີ່ຍ ບົວ ເຖສົາ ເມີ່ຍ ບົວ ເຍີຍ ຝຸຈ໊ວຍ, 47ເຫວີ່ຍ ຕສຸ ເມີ່ຍ ບົວ ປູ໋ງ-ຕສົວະ ເຍີຍ ຕສຢັ້ງ ໂຫ່ ເມີ່ຍ ບົວ ໄມ້ ອຈຽນ-ໂຢ້ວ ອະເຮນີ້ຍ ຟູ-ສູ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ. 48ເຫວີ່ຍ ນ້າຍ, ເມີ່ຍ ບົວ ອ໋ອຍ ຕສຸ ໂຮຍ້ວ ເຊຍ ຈາງ ອກ໊າດ, ແລ່ງ ແກ໊ງ ເຍີຍ ຢຽມ, ຈົ່ມ ເຖົາ ໂດ໊ະ, ໄມ້ ມ່າຍ ຫາຍ ຫຍູ່ງ, ຖສໍ່ ຕສຸ ຟູ-ສູ ຕສ໊ຽວ ພ້າຍ ຕ້າຍ ເບ໊າະ ເມີ່ຍ ບົວ ເຍີຍ ວິນ-ວັ້ງ. ຕສ໊ຽວ ອ໋ອຍ ຫ່ອຍ ເມີ່ຍ ບົວ ໂຄ້ວ #28:48 ຮິບລູ ຫວ່າ ກ໊ອງ “...ເຕສ໊າະ ເຮລັຍ-ກ໌າ, ກ໌າ ຈ໊ຽນ ເມີ່ຍ ບົວ ເຍີຍ ຈາງ”. ເຖົາ ເມີ່ຍ ບົວ ຕສຸ ໝຽດ ເດສ່ງ. 49ຕສ໊ຽວ ອ໋ອຍ ປຸນ ຢຽມ ວົ້ວ ລູ່ງ ກອນ ໂກ ເຍີຍ ຢຽດ ຝີງ ມ່ຽນ ຕ້າຍ ຮນັ້ງ ຕົ້ມ ຈ໊າງ ນໍ ໄດ໋ ເອຈ່ຍ ຊຽບ ເບ໊າະ ເມີ່ຍ ບົວ. ນິ່ນ ບົວ ເຍີຍ ຫວ່າ ເມີ່ຍ ບົວ ຕສູ໊ງ ໄມ້ ຮິ້ວ. #1 ໂຄລິນໂທ 14:21 50ນ້າຍ ຝີງ ມ່ຽນ ເຍີຍ ຮມຽນ-ເໝວີ່ຍ ທສ້ຽວ, ນິ່ນ ບົວ ໄມ້ ທ່າຍ ມ່ຽນ ໂກ໋ ມ່ຽນ ຢ່າ ໄມ້ ຄໍ້-ລ່ຽນ ມ່ຽນ ຫລຸນ ມ່ຽນ. 51ນິ່ນ ບົວ ອ໋ອຍ ຫຍັ່ນ ເມີ່ຍ ບົວ ເຍີຍ ແຊງ-ຄູ້ ເອຈ່ຍ ຕ້າຍ ເຍີຍ ຕອນ ເຖສົາ ເມີ່ຍ ບົວ ເຍີຍ ເດົາ ເຍີຍ ແກງ-ຕສວັ໋ງ ເຖົາ ເມີ່ຍ ບົວ ຕສຸ ໝຽດ. ເມີ່ຍ ບົວ ເຍີຍ ລ່າງ ຕສິ, ຊຢັງ-ອະຫງຸ່ນ ຕິ໊ວ, ກະລັ້ນ ໂຢ້ວ, ລ່ຽມ ງົ່ງ ຕອນ, ປະກີ ຢູ້ງ ຕອນ ຕສູ໊ງ ໄມ້ ລ່ຽວ ເມີ່ຍ ບົວ ເຖົາ ເມີ່ຍ ບົວ ປ່າຍ ເດສ່ງ. 52ນິ່ນ ບົວ ອ໋ອຍ ເວີ່ຍ ກ໋ອມ ເບ໊າະ ເມີ່ຍ ບົວ ເຍີຍ ເຕີ່ຍ-ປູງ ເຍີຍ ນອມໆ ຕສີ້ງ ເຖົາ ເມີ່ຍ ບົວ ເຂົາ ວົ້ວ ເຕີ໋ຍ ວ້ວນ ໄຫ່, ຮລັງ ໄຫ່ ເຍີຍ ຕສີ້ງ ຫລາດ ບາງ. ນິ່ນ ບົວ ຕສ່ຽວ ເວີ່ຍ ຈ໊ຽນ ເບ໊າະ ເມີ່ຍ ບົວ ຢຽມ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ຈິວ ປຸນ ເມີ່ຍ ບົວ ເຍີຍ ເຕີ່ຍ-ປູງ ເຍີຍ ນອມໆ ຕສີ້ງ.

53ວິນ-ວັ້ງ ເວີ່ຍ ຈ໊ຽນ ເມີ່ຍ ບົວ ວົ້ວ ຕສັ່ນ, ນິ່ນ ບົວ ຕສ່ຽວ ຫ່ອຍ ເມີ່ຍ ບົວ ຕສຸ ສ່ຽວ ໂຄ້ວ, ຕສູ໊ງ ຕສຸ ຫຍັ່ນ ເມີ່ຍ ບົວ ກັ້ນ ຢູ໌ງ ຕ້າຍ ເຍີຍ ຝຸຈ໊ວຍ, ເຊ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຖສີຍ ປຸນ ເມີ່ຍ ບົວ ເຍີຍ ຕອນ ເຖສົາ ເຊັຍ. 54ຢຽມ ເມີ່ຍ ບົວ ບຸດົ໋ງ, ລ່ຽມ ໂຮຍ້ວ ເກົ້າ ສ່ວນ ເກົ້າ ເມົາ ເຈ໋ຍ ເຍີຍ ມຈັ່ງ ຕອນ, ຢ່າ ໄມ້ ຄໍ້-ລ່ຽນ ນິ່ນ ເຍີຍ ມົ໌ວ-ຕ່ອຍ ໄຟ ນິ່ນ ເຍີຍ ເອົ໊າ-ຮນ້ຳ ໄຟ ນິ່ນ ເຕສ່ງ ເອຈ່ຍ ເຍີຍ ຝຸຈ໊ວຍ, 55ເຫວີ່ຍ ຕສຸ ວິນ-ວັ້ງ ຕ້າຍ ເວີ່ຍ ຈ໊ຽນ ເມີ່ຍ ບົວ ເຍີຍ ນອມໆ ຕສີ້ງ ຫ່ອຍ ເມີ່ຍ ບົວ ຕສຸ ສ່ຽວ ໂຄ້ວ, ທສວດ ລິ໌ວ ກັ້ນ ເຍີຍ ຝຸຈ໊ວຍ ເຍີຍ ອໍ໊, ນິ່ນ ໄມ້ ມ່າຍ ຫາຍ ຫຍູ່ງ ຫຍັ່ນ. ນິ່ນ ຕສ່ຽວ ຫຍັ່ນ ນິ່ນ ເຍີຍ ຝຸຈ໊ວຍ, ຕສູ໊ງ ໄມ້ ປຸນ ຢຽດ ເຕີ໋ຍ ນິ່ນ ເຍີຍ ມ່ຽນ. 56ຢຽມ ເມີ່ຍ ບົວ ບຸດົ໋ງ, ລ່ຽມ ໂຮຍ້ວ ເກົ້າ ສ່ວນ, ເກົ້າ ເມົາ ເຈ໋ຍ ເຍີຍ ມເຊັຍ ຕອນ, ຕົ້ງ ໄມ້ ຕສຸ ຫລົ່ງ ເຕສົ໋າ ຢັ້ງ ເຈົ໊າ ມີ່ງ ຫາຍ ເດົາ ເຍີຍ ຕສັ່ງ ຮ່ອງ ມເຊັຍ ຕອນ, ຢ່າ ໄມ້ ຄໍ້-ລ່ຽນ ນິ່ນ ເຍີຍ ໂອກ໋-ຮນ້ຳ ເຖສົາ ນິ່ນ ກັ້ນ ເຍີຍ ນ່າມ ໂຍ໌ວ. 57ນິ່ນ ຕສູ໊ງ ຫຍັ່ນ ນິ່ນ ກັ້ນ ໂຄະ ໂຫະ ຢູ໌ງ ທສວດ ເຍີຍ ກູ້ ງວ໌າ-ຊິ ເຖສົາ ມຸ່ຍ. ຫລາຍ ວິນ-ວັ້ງ ເວີ່ຍ ຈ໊ຽນ ເບ໊າະ ເມີ່ຍ ບົວ ເຍີຍ ຕສີ້ງ ຫ່ອຍ ເມີ່ຍ ບົວ ຕສຸ ສ່ຽວ ໂຄ້ວ, ນິ່ນ ໄມ້ ມ່າຍ ຫາຍ ຫຍູ່ງ ຫຍັ່ນ ຕສ່ຽວ ປີ໋ງ ຈ໊ຽນ ຫຍັ່ນ ນິ່ນ ເຍີຍ ກູ້ ງວ໌າ. #2 ຮູ່ງ ໂຕ້ວ 6:28-29; ໜ່ານ ຕສີ້ງ ດສູງ 4:10

58ເຊ ກ໊ອງ ເມີ່ຍ ບົວ ໄມ້ ຕສຽບ ຕສົ໊ວະ ເຍີຍ ເອີຍ ເດສ່ງ ເຟ້ຍ ຈ໊ຽນ ນ້າຍ ປ໊ວນ ໂຊວ ເຍີຍ ຢຽດ ຕສູ໊ງ ຫລີ່ງ, ເມີ່ຍ ບົວ ຢ່າ ໄມ້ ທ່າຍ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຍີຍ ບົ໋ວ, ເຊ ອຈັງ-ຫລ່າງ, ບົວະ ຮ່ອງ ເຍີຍ ບົ໋ວ ນໍ, 59ຕສ໊ຽວ ຕສ່ຽວ ປຸນ ເມີ່ຍ ບົວ ເຖສົາ ເມີ່ຍ ບົວ ເຍີຍ ເຕສີ໊ຍ-ຟຸນ ຕສຸ ໂຄ້ວ ໄຫ່ ເຍີຍ ເຕສະ ໜ່ານ, ເຊ ຕສຸ ຕົ້ມ ສີ່ ເລົ່າ ເຍີຍ, ເຖສົາ ປຸ໊ດ ເຮນ້ຍ ເຍີຍ, ດ໊າວ ເຍີຍ ແປ່ງ-ງ໌າຍ. 60ຕົ້ງ ຕສິ້ນ ດ່າງ ຢຽມ ອີຢິ໊ບ ເຕີ່ຍ-ປູງ ເມີ່ຍ ບົວ ປຸ໊ດ ວົ້ວ ເຕີ໋ຍ ແປ່ງ, ເຊ ເມີ່ຍ ບົວ ກ້ຳ ເດສ໋ຍ ເຍີຍ ແປ່ງ, ນິ່ນ ອ໋ອຍ ປຸນ ເມີ່ຍ ບົວ ແອ໋ງ ປຸ໊ດ ດສຸ່ນ. ນ້າຍ ຫຍູ່ງ ແປ່ງ ຢ່າ ຕສໍ່ ໄມ້ ໄຮ່ ຫລົງ. 61ຕສ໊ຽວ ອ໋ອຍ ປຸນ ເມີ່ຍ ບົວ ຕສຸ ລ່ຽມ ໄມ້ ເຟ້ຍ ຈ໊ຽນ ນ້າຍ ປ໊ວນ ເລີ໌ຍ-ຫລັດ ໂຊວ ເຍີຍ ຕົ້ມ ສີ່ ເຖສົາ ແປ່ງ ເຖົາ ເມີ່ຍ ບົວ ຕສຸ ໝຽດ. 62ໄມ້ ກຸ໊ນ ເມີ່ຍ ບົວ ມ່າຍ ມ່ຽນ ດົ່ງ ລູ່ງ ເຍີຍ ເຫຮລີຍ ທສ້ຳ, ຫລາຍ ໄມ້ ໝວັງ ຕສ໊ຽວ, ເມີ່ຍ ບົວ ເຍີຍ ທິນ-ຮູ່ງ, ເຍີຍ ຫວ່າ, ຕຸ໊ ແໝ່ງ ທສວດ ເຍີຍ ມ່ຽນ ໄມ້ ມ່າຍ ບຸເຕສ໋ຍ ເຕົ້າ. 63ຕສິ້ນ ດ່າງ ຕສ໊ຽວ ຮນັ້ງ ຫາຍ ນໍ ອະເຮນີ້ຍ ປຸນ ເມີ່ຍ ບົວ ຕຸ໊ ຫລົງ ຢ່າ ປຸນ ເມີ່ຍ ບົວ ຫຮຢາງ, ນິ່ນ ອ໋ອຍ ຮນັ້ງ ວົ້ວ ນໍ ອະເຮນີ້ຍ ໝຽດ ເມີ່ຍ ບົວ, ປຸນ ເມີ່ຍ ບົວ ປ່າຍ ເດສ່ງ. ເມີ່ຍ ບົວ ຢ່າ ອ໋ອຍ ຕສຸ ຕສ໊ຽວ ເຕສ໊າະ ເມີ່ຍ ບົວ ທສວດ, ໄມ້ ຕຸ໊ ຢຽມ ຕົ້ງ ເມີ່ຍ ບົວ ອີ້ ຕສັ່ນ ອ໋ອຍ ເປັຍ ມີ່ງ ຢຽມ ວົ້ວ ນອມ ເຕີ່ຍ-ປູງ.

64 ຕສ໊ຽວ ອ໋ອຍ ໂຕສ໋ວ ປຸນ ເມີ່ຍ ບົວ ດສ໋ານ ເດສ່ງ ຢຽມ ໝ່ານ ຝີງ ບຸດົ໋ງ, ຢຽມ ນ້າຍ ປູງ ລູ່ງ ກອນ ມີ່ງ ເຖົາ ວົ້ວ ປູງ ລູ່ງ ກອນ. ຢຽມ ວົ້ວ ເມີ່ຍ ບົວ ອ໋ອຍ ຕສຸ ຟູ-ສູ ເຫຍ່ຍ ເຍີຍ ຕສ້ຽນ, ຕົ້ງ ເມີ່ຍ ບົວ ເຖສົາ ເມີ່ຍ ບົວ ເຍີຍ ອົງ-ຖາຍ ໄມ້ ຮິ້ວ ເຍີຍ ຕສ້ຽນ, ເຊ ຫລົ່ງ ດຢັ໋ງ ໄຟ ຫລະເປຢີ໊ຍ ໂຕສ໋ວ ຕ້າຍ ເຍີຍ ຕສ້ຽນ. 65ຢຽມ ວົ້ວ ເຕີ໋ຍ ຝີງ ບຸດົ໋ງ ເມີ່ຍ ບົວ ໄມ້ ຕຸ໊ ຢຽມ ຫລົງ ຢ່າ ໄມ້ ມ່າຍ ກັ້ນ ເຍີຍ ຕ໋ອງ. ຢຽມ ວົ້ວ ຕສ໊ຽວ ອ໋ອຍ ປຸນ ເມີ່ຍ ບົວ ໂຮຍ້ວ ຕສັ່ນໆ ກ້ຳ ເດສ໋ຍ, ໂຮຍ້ວ ເດສົ້າ, ໄມ້ ລ່ຳ ຮນ້ຳ ຕ໋ອງ. 66ເມີ່ຍ ບົວ ຕສັ່ນໆ ເດສົ້າ ຈ໊ຽນ ເມີ່ຍ ບົວ ເຍີຍ ແໝ່ງ, ຕສຢັ້ງ ຮນອຍ ຕສຢັ້ງ ມ໌ວນ ກ້ຳ ເດສ໋ຍ ຈ໊ຽນ, ໄມ້ ຮິ້ວ ຫາຍ ຮນອຍ ນັ່ງ ຫາຍ ຮນອຍ ໄຕ່. 67ຫລາຍ ເມີ່ຍ ບົວ ເຍີຍ ໂຮຍ້ວ ເກ້ງ! ກ້ຳ ເດສ໋ຍ ຢ່າ ຫລາຍ ເມີ່ຍ ບົວ ເຍີຍ ມຕສີງ ໝັ່ງ ຕຸ໊ ປວັດ ເຍີຍ ສີ່, ລູ່ງ ດອມ ເມີ່ຍ ບົວ ຕສ່ຽວ ກ໊ອງ, “ເຝີຍ ຕຸ໊ ລູ່ງ ກ໊ານ ຫຮມວັງ.” ເຖົາ ຫຮມວັງ ກ໊ອງ, “ເຝີຍ ຕຸ໊ ລູ່ງ ກ໊ານ ອຈັງ ອ໊ະ.” 68ຕສ໊ຽວ ອ໋ອຍ ປຸນ ເມີ່ຍ ບົວ ເປັຍ ດສັ໊ງ ດສ໋ວນ ອີຢິ໊ບ ເຕີ່ຍ-ປູງ, ດສ໋ວນ ເຢຍ ແລ໌ງ ເມີ່ຍ ບົວ ຢຽດ ລິ໌ວ ໄມ້ ຕສຸ ດສ໋ວນ ເຍີຍ ເຕີ່ຍ-ປູງ. ຢຽມ ວົ້ວ ເມີ່ຍ ບົວ ອ໋ອຍ ໝ່າຍ ກັ້ນ ປຸນ ວິນ-ວັ້ງ ໂຕສ໋ວ ໂນ່ວ ເກົ໊າ ໂນ່ວ ເປີ໌ຍ ຢ່າ ໄມ້ ມ່າຍ ຫາຍ ເຕົ້າ ມ໌າຍ.

Currently Selected:

ດສ່ຳ ເລີ໌ຍ-ຫລັດ 28: IuMiLAO

Highlight

Copy

Compare