Spricha 8
8
Monunk de Weisheit, ar to foljen – Äare Vespräakjen
1Roopt nich de Weisheit, un lat nich de Ensecht äare Stemm erschaulen? 2Bowen oppe Hecht aum Wajch, doa woa de Stiej toopsteeten, haft see sikj hanjestalt. 3Aune Sied de Dooasch, woa de Staut sikj opmoakt, aum Engank de Puat schricht see: 4No junt, jie Mana, roop ekj, un miene Stemm jeit aun de Menschenkjinja. 5Lieet Kluakheit, jie Eenfeltje, un jie Noaren, lieet Vestaunt! 6Hieet! Dan Vetraflichet well ekj räden, un daut Opdoonen miene Leppen saul opprechtich sennen. 7Dan mien Mulbän räd Woarheit ut, un Gottloosichkjeit es miene Leppen een Fräfel. 8Aule Wieed von mienem Mul sent opprechtich; daut es nuscht Vedreidet un Vekjieedet en an. 9See sent aula däm Vestendjen rajcht, un krakjt dän, dee Erkjantnis erlangt ha. 10Nämt miene Zucht aun, un nich Selwa, un Erkjantnis leewa aus utjelesnet, reinet Golt. 11Dan Weisheit es bäta aus Korale, un aules, waut maun wenschen mucht, sent äa nich to vejlikjen. -
12Ekj, Weisheit, bewon de Kluakheit, un finj de Erkjantnis de Besennenheit. 13De Forcht Gottes es: Daut Beese haussen. Stolt un Huachmoot un däm Wajch vom Beesen un daut Mul de Vekjieetheit hauss ekj. 14Miene sent Rot un Ensecht; ekj sie de Vestaunt, mien es de Krauft. 15Derch mie rejieren Kjennichs, un Ferschten trafen jerajchte Entscheidunge; 16derch mie harschen Harscha un Adelje, aule Rechta de Ieed. 17Ekj leew, dee mie leewen; un dee mie iewrich sieekjen, woaren mie finjen. 18Rikjtum un Iea sent bie mie, bliewendet Goot un Jerajchtichkjeit. 19Miene Frucht es bäta aus fienet Golt un jereinichtet Golt, un mien Jewenst aus utjelesnet Selwa. 20Ekj waundel opp däm Stich de Jerajchtichkjeit, enne Medd opp de Stiej vom Rajcht; 21om dee, dee mie leewen, bestendjet Goot oawen to loten, un om äare Spikjasch too fellen.
De Weisheit es Gott sien eewja Besitz
22De Har besaut mie aum Aunfank von sienem Wajch, ver siene Woakjen von jeehäa. 23Ekj wia enjesat von Eewichkjeit häa, em Aunfank, ver de Uatiet de Ieed. 24Ekj wia jebuaren, aus de Deepe (deepe Wota) noch nich wieren, aus noch kjeene Kjwalen wieren, rikj aun Wota. 25Iea de Boajch ennjesenkjt worden, ver de Aunboaj wia ekj jebuaren; 26aus hee de Ieed un de Stapen noch nich jemoakt haud, un däm Aunfank de Kjlieta (de Somm vom Stoff) vom Ieedkjreis. 27Aus hee de Himmel fauststald, wia ekj doa, aus hee eenen Kjreiss aufmaut äwa daut Aunjesecht de Deepe (deepe Wota); 28aus hee de Wolkjen bowen faust muak {Hi.35,5}, aus hee Faustichkjeit de deepen Kjwalen gauf; 29aus hee daut Mäa siene Jrensen sad, daut de Wota sienen Befäl nich äwaschräden, aus hee de Gruntloag de Ieed fauststald: 30Doa wia ekj Schootkjind (Fläajlinkj, Woakjmeista) bie am, un wia Dach fa Dach siene Freid (Erjatsung), un späld ver am aulentiet, 31mie erjatsent opp däm bewontem Deel von siene Ieed; un miene Freid wia bie de Menschenkjinja.
Väarajcht de Weisheit un de Nodeel de Domheit
32Dan nu, jie Säns, hieet opp mie: Jlekjseelich sent, dee miene Wäaj bewoaren! 33Hieet oppe Zucht un woat weis, un veschmiet dee nich! 34Jlekjseelich de Mensch, dee opp mie hieet, endäm hee aun miene Däaren woakt Dach fa Dach, de Past von miene Dooasch bewoakt! 35Dan wäa mie finjt, haft daut Läwen jefungen un Wooljefaulen erlangt vom Harn. 36Oba wäa aun mie sindicht, deit siene Seel Jewault aun; aule, dee mie haussen, leewen däm Doot.
Currently Selected:
Spricha 8: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
