Spricha 30
30
1De Wieed von Agur, vom Sän Jakes, de Spruch. Daut räd de Maun too Ithiel, too Ithiel un Ukal: 2Woarhauft, ekj sie onveninftja aus irjent eena, un Menschenvestaunt ha ekj nich. 3Un Weisheit ha ekj nich jelieet, daut ekj Erkjantnis von Heilje besett. 4Wäa es noppjestäajen em Himmel un raufjefoaren? Wäa haft däm Wint en siene Fusten jesaumelt? Wäa de Wota en een Duak jebungen? Wäa haft oppjerecht aule Enj de Ieed? Waut es sien Nomen, un waut es de Nomen von sienem Sän, wan du daut weetst?
5Aule Räd Gottes sent jereinicht; een Schild es hee dän, dee opp am true. 6Doo nuscht to siene Wieed doatoo, doamet hee die nich stroft un du aus Läajna jefungen woascht.
7Tweeatlei bedd ekj von die; vewäa mie daut nich, ea ekj stoaw: 8Faulschheit un Läajeswieed doo von mie wajch; Oamoot un Rikjtum jeff mie nich, fooda mie met däm eenfachen Broot; 9doamet ekj nich saut woa un die veläj un saj: Wäa es de Har? Un doamet ekj nich veoam un stäl, un mie vejriep aun däm Nomen von mienem Gott.
10Bepluda eenen Kjnajcht nich bie sienem Haren, doamet hee die nich veflucht, un du die vesindichst.
11Een Jeschlajcht, daut sienen Voda veflucht un siene Mutta nich säajent; 12een Jeschlajcht, daut rein es en siene Uagen un doch nich jewoschen von sienem Drakj; 13een Jeschlajcht - woo stolt sent siene Uagen, un siene Ziepasch erhäwen sikj! - 14Een Jeschlajcht, däm siene Tänen Schwieeta sent, un Massasch sien Jebiss, om wajchtofräten de Älendje von de Ieed un de Oame ut de Medd de Menschen!
15De Blootsua haft 2 Dajchta: Jeff häa! Jeff häa! 3 sent daut, dee nich saut woaren, 4, dee nich sajen: Jenuach! 16De Scheol un de veschlootna Muttalief, de Ieed, dee daut Wota nich saut woat, un daut Fia, daut nich sajcht: Jenuach!
17Een Uag, daut däm Voda vespott un däm Jehuarsom jäajen de Mutta veacht, daut woaren de Kraujen vom Stroom uthaken un de junge vom Odla fräten.
183 sent daut, dee too wundaboa fa mie sent, un 4, dee ekj nich erkjan: 19De Wajch de Odlasch aum Himmel, de Wajch von eene Schlang opp däm Steen, de Wajch von eenem Schepp em Hoaten vom Mäa, un de Wajch von eenem Maun met eene Junkfru. -
20Aulsoo es de Wajch von eene ehebräakjarische Fru: See at, un wescht äa Mul un sajcht: Ekj ha kjeen Orrajcht begonen. 21Unja 3 zettat de Ieed, un unja 4 kaun see daut nich uthoolen: 22Unja eenem Kjnajcht, wan hee Kjennich woat, un eenem Noa, wan hee von Broot saut es; 23unja eene jehausste Fru, wan see too Fru jenomen woat, un eene Deenstmejal, wan see äare Harin beoawt.
244 sent de kjliene de Ieed, un doch sent see met Weisheit jetieekjent: 25De Eemskje, een nich stoakjet Volkj, un doch moakt see aum Somma äa Äten reed; 26de Steendackse, een nich kjraftjet Volkj, un doch saten see äa Hus opp däm Steen; 27de Heischrakjen ha kjeenen Kjennich, un doch trakjen see aula toop eena nom aundren ut; 28de Äajdakjs kaust du met de Henj jriepen, un doch es see enne Paulausten de Kjennichs.
293 ha eenen scheenen Schrett, un 4 eenen stautschen Gank: 30De Leiw, de Held unja de Tieren, un dee fa nuscht trigjdreit; 31de Hon, ooda de Bock; un een Kjennich, bie däm daut Kjrichshäa es.
32Wan du onbedocht jehaundelt hast, endäm du die erhoowst, ooda wan du Beeset dochst: De Haunt oppem Mul! 33Dan de Malkj staumpe jeft Botta, un daut Drekjen de Näs jeft Bloot, un daut Drekjen von Oaja jeft Striet.
Currently Selected:
Spricha 30: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
