Spricha 23
23
1Wan du die hansatst, om met eenem Harscha to äten, soo acht doaropp, wäm du ver die hast; 2un sat een Massa aun dien Hauls, wan du jierich best. 3Lot die nich jankren no siene Lakjabeskje, dan see sent eene faulsche Speise.
4Bemieej die nich, rikj toowoare, lot auf von diene Kluakheit. 5West du diene Uagen doanopp flieejen loten, un kjikj, wajch es daut? Dan secha haft daut Flichten aus een Odla, dee em Himmel flicht.
6At nich daut Broot vom Scheelenden, un lot die nich jankren no siene Lakjabeskje. 7Dan woo hee daut aufmat en siene Seel, soo es hee, «at un drinkj», sajcht hee to die, oba sien Hoat es nich met die. 8Dien Aufbietsel, däm du jejäten hast, motst du utspieen, un diene frintliche Wieed woascht du velieren.
9Räd nich to de Uaren von eenem Noa, dan hee woat diena kluake Wieed veachten.
10Veschuw nich de oole Jrensen, un enne Felda de Weise drinj nich en. 11Dan äa Erleesa es stoakj; hee woat äaren Rajchtstriet jäajen die fieren.
12Brinj dien Hoat häa too Zucht, un diene Uaren no de Wieed de Erkjantnis.
13Nemm däm Jung nich de Zuchtijung; wan du am met de Wäd schleist, woat hee nich stoawen. 14Du schleist am met de Wäd, un du radst siene Seel von däm Doot (Unjawelt).
15Mien Sän, wan dien Hoat weis es, soo woat uk dien Hoat sikj freien; 16un miene Nieren woaren froo sennen, wan diene Leppen rajcht räden.
17Dien Hoat beneid nich de Sinda, sonda beiewa sikj jieda Dach, om de Angst Gottes. 18Woarhauft, daut jeft eene Tookunft, un diene Hopninj woat nich venicht woaren.
19Du hia, mien Sän, un woa weis, un leid dien Hoat opp däm rajchten Wajch. 20Sie nich unja Wiensupa, noch unja dän, dee Fleesch vekwose; 21dan een Drinkja un een Vekwosa veoame, un Schleepaja kjleet sikj en Lumpe.
22Horch opp dienen Voda, dee die jebuaren haft, un veacht diene Mutta nich, wan see oolt jeworden es. 23Kjeep Woarheit un vekjeep dee nich, Weisheit un Zucht un Vestaunt. 24De Voda von eenem Jerajchten freit sikj sea; un wia eenem Weisen jebuaren haft, dee freit sikj äwa am. 25Muchten sikj freien dien Voda un diene Mutta, un sea freien, dee die jebuaren ha!
26Jeff mie, mien Sän, dien Hoat, un lot diene Uagen jefaulen ha aun miene Wäaj! 27Dan de Hua es eene deepe Kul un de Framde een enja Borm; 28jo, see luat aus een Reiba, un see vemieet de Truloose unja de Menschen.
29Wäa haft Ach, wäa haft Wee, wäa Zank, wäa Kloagen, wäa Wunden onen Uasoak? Woa sent aunjestrenjde Uagen? 30Dee lot biem Wien setten, dee komen, om Mischjedrenkj too proowen. 31Kjikj däm Wien nich aun, wan hee root schient, wan hee em Kuffel blenkjat, leicht raufrant. 32Sien Enj es, daut hee bit aus eene Schlang un stakjt aus eene Otta. 33Diene Uagen woaren framde Dinj seenen, un dien Hoat woat vekjieede Dinj räden. 34Un du woascht sennen aus eena, dee em Hoaten vom Mäa licht, un aus eena, dee doa licht opp de Spetz von eenem Säajelboom. 35«See schluagen mie, daut deed mie nich wee; see priejelde mie, ekj feeld daut nich. Wanea woa ekj oppwakjen? Ekj well daut wada doonen, well am noch mol oppsäkjen».
Currently Selected:
Spricha 23: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
