4. Mose 8
8
Jesaz äwa de Laumpen em Heilichtum un Enweiunk de Leviten
1Un de Har räd too Moses un säd: 2Räd too Aaron un saj to am: Wan du de Laumpen aunstekjst, soo sellen de 7 Laumpen jlikjwajch ver däm Laumpenhoola dachen. 3Un Aaron deed soo: Hee stekjt äare Laumpen aun, soo daut see jlikjwajch ver däm Laumpenhoola dachten, soo aus de Har Moses befoolen haud. 4De Laumpenhoola wia een Woakj von Golt en Hauntoabeit; von sienem Foot bat siene Bloomen, aules wia Hauntoabeit; nom Bilt, daut de Har Moses jewäsen haud, aulsoo muak hee daut Laumpenhoola.
5Un de Har räd too Moses un säd: 6Nemm de Leviten ut de Medd de Kjinja Israel un reinj an. 7Un aulsoo saust du met an doonen, om an too reinjen: Sprets Entsindjungswota opp an, un see sellen daut Schäamassa äwa äa gaunzet Fleesch gonen loten un äare Kjleeda wauschen un sikj reinjen. 8Un see sellen eenen jungen Boll nämen, met sienem Speisopfa; fienet Mäl, jemischt met Eelj; un eenen aundren jungen Boll saust du toom Sindopfa nämen. 9Un du saust de Leviten ver däm Zelt de Bejäajnunk komen loten un de gaunze Jemeent de Kjinja Israel vesaumlen. 10Un du saust de Leviten ver däm Harn komen loten, un de Kjinja Israel sellen äare Henj oppe Leviten lajen. 11Un Aaron saul de Leviten aus Wäwopfa vonne Kjinja Israel ver däm Harn schwinjen* (opphäwen), om däm Deenst Gottes to doonen. 12Un de Leviten sellen äare Henj opp däm Kopp de Bolles lajen; un däm eenen saust du aus Sindopfa un däm aundren aus Brauntopfa däm Harn opfren, om fa de Leviten Veseenunk to doonen. 13Un soo saust du de Leviten ver Aaron un ver siene Säns stalen un an däm Harn aus Wäwopfa schwinjen*; 14un du saust de Leviten ut de Medd de Kjinja Israel aufsondren, daut de Leviten jehieren mie. 15Un nodäm sellen de Leviten komen, om daut Zelt de Bejäajnunk too bedeenen. Soo saust du an reinjen un an aus Wäwopfa schwinjen*. 16Dan see sent mie gaunz aus Ieejentum jejäft, ut de Medd de Kjinja Israel; enne Städ aules, waut de Muttaschoot derchbrakjt, - jiedrem Ieeschtjebuarnen von de Kjinja Israel ha ekj an fa mie jenomen. 17Dan miene sent aule Ieeschtjebuarne unja de Kjinja Israel aun Menschen un Vee. Aun däm Dach, doa ekj aule Ieeschtjeburt em Ägiptenlaunt schluach, ha ekj an fa mie jeheilicht. 18Un ekj ha de Leviten jenomen aune Städ aule Ieeschtjeburt unja de Kjinja Israel; 19un ekj ha de Leviten däm Aaron un siene Säns aus eene Gow ut de Medd de Kjinja Israel jejäft, om däm Deenst de Kjinja Israel aum Zelt de Bejäajnunk to doonen un fa de Kjinja Israel Veseenunk to doonen, doamet unjre Kjinja Israel kjeene Ploag doaderch entsteit, daut de Kjinja Israel däm Heilichtum noda komen. 20Un Moses un Aaron un de gaunze Jemeent de Kjinja Israel deeden soo met de Leviten; no aulem, waut de Har däm Moses befoolen haud wäajen de Leviten, aulsoo deeden de Kjinja Israel met an. 21Un de Leviten heilijde sikj un woschen äare Kjleeda; un Aaron schwinjd an aus Wäwopfa ver däm Harn; un Aaron deed Veseenunk fa an too äare Reinjunk. 22Un nodäm kaumen de Leviten, om äaren Deenst aum Zelt de Bejäajnunk to doonen ver Aaron un ver siene Säns. Soo aus de Har däm Moses betrafs de Leviten befoolen haud, aulsoo deeden see met an.
23Un de Har räd too Moses un säd: 24Daut es et, waut de Leviten betraft: Von 25 Joa aun un doaräwa saul hee doatokomen, om de Oabeit em Deenst aum Zelt de Bejäajnunk to doonen. 25Oba von 50 Joa aun saul hee ut de Oabeit em Deenst trigjgonen un nich mea deenen; 26hee mucht siene Breeda aum Zelt de Bejäajnunk halpen, wan see äarem Deenst doonen; oba Deenst saul hee nich mea doonen. Soo saust du met de Leviten en äare Oppgowe doonen.
Currently Selected:
4. Mose 8: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
