3. Mose 4
4
Sindopfa fa onweetende Sinden
1Un de Har räd too Moses un säd: 2Räd to de Kjinja Israel un saj: Wan wäa ut Veseenen sindicht jäajen irjent eent de Jebooten Gottes, dee nich jedonen woaren sellen, un irjent een von dee selje deit, - 3wan de jesaulwta Priesta sindicht no eene Veschuldjung vom Volkj, soo saul hee fa siene Sinden, dee hee begonen haft, eenen jungen Boll onen Fäla däm Harn brinjen toom Veseenungsopfa. 4Un hee saul däm Boll aun däm Engank vom Zelt de Bejäajnunk ver däm Harn brinjen un siene Haunt oppem Kopp vom Boll lajen un däm Boll ver däm Harn schlachten. 5Un de jesaulwta Priesta saul von däm Bloot vom Boll nämen un daut em Zelt de Bejäajnunk brinjen; 6un de Priesta duck sienen Finja en daut Bloot un sprets säwen Mol ver däm Harn jäajen däm Väahank vom Heilichtum. 7Un de Priesta saul von däm Bloot aune Aultoa Hieena vom woolrikjendem Rieekjastoff (Weiruak, seeta Ruak), dee em Zelt de Bejäajnunk es, ver däm Harn; un aulet Bloot vom Boll saul hee aum Foot vom Brauntopfaaultoa jeeten, dee aun däm Engank vom Zelt de Bejäajnunk es. 8Un aulet Fat von däm Boll, vom Sindopfa, saul hee aufleesen; daut Fat, daut et Ennaliche bedakjt, un aulet Fat, daut aum Ennalichen es, 9un de beid Nieren un daut Fat, daut aun an, daut aune Lenden es, un daut Nat äwa de Läwa; met Nieren saul hee auftranen, 10soo aus daut aufjetrannt woat vom Rind biem Dankopfa; un de Priesta saul daut oppem Brauntopfaaultoa rieekjren. 11Un de Hut vom Boll un aul sien Fleesch met sienem Kopp un siene Schinkjes un sien Ennaschte un sien Mest; 12däm gaunzen Boll saul maun ut däm Loaga rutbrinjen aun eenem reinem Uat, nom Fatausch Hupe, un saul am oppem Holtfia vebrennen; oppem Fatausch Hupe saul hee vebrent woaren.
13Un wan de gaunze Jemeent Israels ut Veseenen sindicht un de Sach es ver de Uagen dee Vesaumlunk veborje, un see deit eent von aule Jebooten Gottes (Jahwe), dee nich sullen jedonen woaren, un veschuldje sikj, 14un de Sind woat bekaunt, dee see jäajen dee selje begonen ha, soo saul de Vesaumlunk eenen jungen Boll toom Sindopfa brinjen un am ver daut Zelt de Bejäajnunk brinjen. 15Un de Eltestasch de Jemeent sellen äare Henj oppem Boll sienen Kopp lajen ver däm Harn, un maun saul däm Boll ver däm Harn schlachten. 16Un de jesaulwta Priesta brinj von däm Bloot vom Boll en daut Zelt de Bejäajnunk, 17un de Priesta duck sienen Finja en daut Bloot un sprets säwen Mol ver däm Harn jäajen däm Väahank. 18Un hee saul von däm Bloot aun de Aultoa Hieena doonen, dee ver däm Harn, dee em Zelt de Bejäajnunk es; un aulet Bloot saul hee aum Foot vom Brauntopfaaultoa jeeten, dee aum Engank vom Zelt de Bejäajnunk es. 19Un aul sien Fat saul hee von am auftranen un oppem Aultoa rieekjren. 20Un hee saul met disem Boll doonen, aus hee met däm Boll vom Sindopfa jedonen haft; soo saul hee doamet doonen. Un soo doo de Priesta Veseenunk fa an, un daut woat an vezeit woaren. 21Un hee saul däm Boll butrem Loaga rutbrinjen un am vebrennen, soo aus hee däm ieeschten Boll vebrent haft. Daut es een Sindopfa de Vesaumlunk.
22Wan een Ferscht sindicht un deit ut Veseenen eent von aul de Jebooten Gottes, sienem Gott, dee nich sellen jedonen woaren, un veschuldicht sikj, 23un siene Sind woat am toweeten loten, met waut hee jesindicht haft, soo saul hee siene Opfagow brinjen, eenen Kosenbock, een Menlichet onen Fäla. 24Un hee saul siene Haunt oppem Kopp vom Bock lajen un am schlachten aun däm Uat, woa maun daut Brauntopfa ver däm Harn schlacht; daut es een Sindopfa. 25Un de Priesta saul von däm Sindopfa Bloot met sienem Finja nämen un daut aune Hieena vom Brauntopfaaultoa doonen; un sien Bloot saul hee aun däm Foot vom Brauntopfaaultoa jeeten. 26Un aul sien Fat saul hee oppem Aultoa rieekjren, aus daut Fat vom Dankopfa. Un soo doo de Priesta Veseenunk fa am wäajen siene Sind, un daut woat am vezeit woaren.
27Un wan wäa vom Laundesvolkj sindicht, endäm hee waut jäajen de Jebooten Gottes deit, dee nich jedonen woaren sellen, un sikj veschuldicht, 28un siene Sind woat am toweeten loten, dee hee begonen haft, soo saul hee siene Opfagow brinjen, eene Kos onen Fäla, eene Fruliche, fa siene Sinden, dee hee begonen haft. 29Un hee saul siene Haunt oppem Kopp vom Sindopfa lajen un daut Sindopfa schlachten aum Brauntopfa Uat. 30Un de Priesta saul met sienem Finja von däm Bloot nämen un daut aune Hieena vom Brauntopfaaultoa doonen; un aul sien Bloot saul hee aum Foot von Aultoa jeeten. 31Un aulet Fat saul hee auftranen, soo aus daut Fat vom Dankopfa aufjetrannt woat; un de Priesta saul daut oppem Aultoa rieekjren toom Leeftoljen Jeroch däm Harn. Un soo doo de Priesta Veseenunk fa am, un daut woat am vezeit woaren.
32Un wan hee een Schop brinjt aus siene Opfagow toom Sindopfa, soo saul daut een Muttaschop onen Fäla sennen, daut hee brinjt. 33Un hee saul siene Haunt oppem Kopp vom Sindopfa lajen un daut toom Sindopfa aun däm Uat schlachten, woa maun daut Brauntopfa schlacht. 34Un de Priesta saul met sienem Finja von däm Sindopfa Bloot nämen un daut aune Hieena vom Brauntopfaaultoa doonen; un aul sien Bloot saul hee aum Foot vom Aultoa jeeten. 35Un aul sien Fat saul hee auftranen, soo aus daut Fat vom Schop vom Dankopfa aufjetrannt woat; un de Priesta saul daut oppem Aultoa rieekjren, bie däm Fiaopfa däm Harn. Un soo saul de Priesta Veseenunk, fa am, wäajen siene Sinden doonen, dee hee begonen haft, un daut woat am vezeit woaren.
Currently Selected:
3. Mose 4: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
