Jesaja 57
57
1De Jerajchta kjemt om, un kjeena nemt daut to Hoaten, un de Fromme woaren wajchjeropt, onen daut et wäa beacht, daut de Jerajchta ver däm Onjlekj wajchjeropt woat. 2Hee jeit toom Fräd en; see ruen opp äare Loagastäd, een jiedra, dee jlikj, ver sikj han, däm Wajch jinkj.
3Un jie, komt noda, jie Kjinja de Zaubra, Somen de Ehebräakja un de Hua! 4Äwa wäm moak jie junt lostich, äwa wäm moak jie daut Mul op un strakjt de Tung rut? Sent jie nich Kjinja de Äwaträdunk, een Somen de Läajes, 5dee jie fa de Jetzen brunstliede unja jiedrem jreenen Boom, dee jie Kjinja enne Läachten schlachten unja de Kluften de Steena? 6Aun de glaute Bach Steena wia dien Deel; see, see wieren dien Loss; uk Drinkjopfa gootst du an ut, opfat an Speisopfa. Sull ekj mie doaräwa treesten? 7Opp eenem huagen un scheenem Boajch schluachst du dien Loaga opp; du stieechst doa uk nopp, om Schlachtopfa too opfren. 8Un hinjre Däa un däm Post sadsd du die een Denkjmol. Dan von mie aufjedreit dakjst du op un best noppjestäajen, muakst dien Loaga breet, un du muakst dien Loon met an ut; du leewsd äa Bieloaga, bekjikjst äare Noaktheit. 9Un du jinjst nom Kjennich met Eelj un muakst väl diene scheenrikjende Saulwen; un du schekjst diene Booten wiet ut un buagst die bat nom Scheol. 10Derch dienen wieden Wajch best du meed jeworden, doch du sajchst nich: Daut es emsonst! Du kjrichst diene Krauft, doarom best du nich schwak jeworden. 11Un ver wäm hast du die trigjjetrocken un jeenjst, daut du jeloagen hast, un aun mie nich dochst, daut nich too Hoaten nemst? Sie ekj nich stell jewast, un zwoa aul lange Tiet? Un fa mie haudst du nich Angst. 12Ekj, ekj woa diene Jerajchtichkjeit toweeten loten; un diene jemoakte Woakjen, see woaren die nuscht nutzen. 13Wan du schrichst, soo muchten die diene Jetzenhupes raden! Oba een Wint woat an aula wajchfieren, een Frodem an wajchnäme. Oba wäa no mie siene Tooflucht nemt, woat daut Launt oawen un mienen heiljen Boajch besetten. 14Un maun woat sajen: Moakt Bon, moakt Bon; moakt eenen Wajch reed, riemt ut mienem Volkj sienem Wajch jiedret Hindanis wajch!
15Dan soo sajcht de Huaga un Huagerhoowna, dee en Eewichkjeit wont, un sien Nomen Heilja es: Ekj won Huach un em Heilichtum, un bie däm, dee veschloagne un jeboagne Jeistes es, om to beläwen däm Jeist de Jebekjten un to beläwen daut Hoat de Veschloagne. 16Dan ekj well nich eewich rechten un nich emma oajalich sennen; dan de Jeist wudd ver mie veschmachten, un de Seel, dee ekj jemoakt ha. 17Wäajen de Misdot un siene Habsucht sie ekj oajalich un schluach an, endäm ekj mie vestuak un oajalich wia; un daut (Volkj) jinkj aufjefollen opp däm Wajch von sienem Hoat. 18Siene Wäaj ha ekj jeseenen un woa am heelen; un woa am leiden, un am un siene Truarnde met Troost vejelten. 19Ekj well Frucht de Leppen schaufen, sajcht de Har: Fräd, Fräd däm Wieden un däm dee dichtbie es, un ekj well am heelen. - 20Oba de Gottloose sent aus daut oppjeweelde Mäa; dan daut kaun nich ruich sennen, un siene Wota weele Schlaum un Blott opp. 21Kjeen Fräd däm Gottloosen! Sajcht mien Gott.
Currently Selected:
Jesaja 57: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
