Jesaja 50
50
Israel haft Schult opp sikj jebrocht – Tonuscht jemoakt woat Gott sien trua Kjnajcht
1Soo sajcht de Har: Wua es de Scheedungsbreef von june Mutta, met däm ekj ar entleet? Ooda woonem von miene Jleewende ha ekj junt vekoft? Kjikj, om june Misdoten wellen sent jie vekoft, un om june Äwaträdungen wellen es june Mutta entloten.
2Wuarom sie ekj jekomen, un kjeen Mensch wia doa? Ha jeroopt, un kjeena auntwuad? Es miene Haunt veleicht too kort toom Erleesen? Ooda es en mie kjeene Krauft, om to raden? Kjikj, derch mien schellen drieej ekj daut Mäa ut, moak Streem to eene Wieste: Daut stinkjen äare Fesch, wiels doa kjeen Wota es, un see stoawen fa Darscht. 3Ekj kjleed de Himmel en Schwoat un moak Sakduak too äare Dakj. 4De Har, Gott, haft mie eene Tung de Belieede jejäft, doamet ekj weet, däm Meeden derch een Wuat opptorechten. Hee wakjt jieda Morjen, hee wakjt mie daut Ua, doamet ekj hia aus eena dee belieet woat. 5De Har, Gott, haft mie daut Ua opjemoakt, un ekj, ekj sie nich wadaspanstich jewast, sie nich trigjjegonen. 6Ekj hilt mienen Rigjen dän Schlonenden un miene Baken däm Schläajna, mien Aunjesecht vestuak ekj nich ver Schmach un Kjwiel. 7Oba de Har, Gott, halpt mie; doarom sie ekj nich too Schaund jeworden, doarom moak ekj mien Aunjesecht aus een Kjiselsteen, un wist, daut ekj nich wudd beschämt woaren. 8Dichtbie es dee mie rajchtfoadicht: Wäa well met mie rechten? Lot ons toop hangonen! Wäa haft eene Rajchtsach jäajen mie? Hee kjemt häa no mie! 9Kjikj, de Har, Gott, woat mie halpen: Wäa es daut, dee mie fa schuldich erkjläaren kunn? Kjikj, see woaren aula toop vefaule aus een Kjleet, de Mott woat an fräten.
10Wäa unja junt enjst sikj fa däm Har? Wäa hieet opp sienem Kjnajcht siene Stemm? Wäa enne Diestanis waundelt un däm kjeen Licht schient, vetru opp däm Nomen Gottes un stett sikj opp sienen Gott. 11Kjikj, jie aula, dee jie een Fia aunstekjen, met Brauntfeilasch junt reedmoake: Wajch enne Gloot von junem Fia un en de Brauntfeilasch, dee jie aunjestekjt ha! Soowaut passieet junt von miene Haunt; en Weedoag sell jie ligjen.
Currently Selected:
Jesaja 50: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
